“Pemotenonde meme katu IRréino, ha koʼã mbaʼe oñemeʼẽta avei peẽme.” (LUC. 12:31)

PURAHÉI: 40, 98

1. ¿Mbaʼépepa idiferénte umi mbaʼe añetehápe ñaikotevẽva ha umi mbaʼe jaipotávante?

YVYPÓRA ningo noikotevẽi heta mbaʼe oikove hag̃ua. Añetehápe oĩma kompléto orekóma guive tembiʼu, ao ha peteĩ lugár oikomi hag̃ua. Upéicharõ jepe, ikatu hína jaipota heta mbaʼe nañaikotevẽguasúiva. Heta persóna noñemeʼẽi enkuénta natekotevẽiha oreko entéro umi mbaʼe oipotáva.

2. ¿Mbaʼe mbaʼépa oñehaʼã ojogua umi hénte oikóva umi país imboriahúvape ha iplatavévape?

2 Umi persóna oikóva umi país imboriahúvape, oñekontentáma jepi ikatúma guive ojogua, por ehémplo peteĩ selulár, peteĩ móto, térã peteĩ terrenoʼi. Péro umi hénte oikóva umi país iplatavévape katu, oñehaʼã ojogua ao iporã porãvéva, áuto hepyvéva, térã óga tuichavéva. Péro tahaʼe haʼéva pe lugár jaikoha térã ñane situasión, ndahasyiete ñañepyrũ hag̃ua jaipota potave umi kósa materiál nañaikotevẽiva, térã noĩriva ñande posivilidápe.

 ANÍKENA JAJU ÑANEMATERIALÍSTA

3. ¿Mbaʼéichapa oiko peteĩ persóna imaterialístava?

3 ¿Mbaʼépa heʼise peteĩ persóna imaterialistaha? Peteĩ imaterialístavape ointeresave umi mbaʼerepy ha ndovaloraguasúi iñamista Jehovándi. Avei noñekontentái ohupytýramo jepe umi mbaʼe oikotevẽva, síno oipota potave umi kósa materiál. Ikatu ningo oime ñanemboriahu ha ndaikatúi jajogua umi mbaʼe hepýva. Upéicharõ jepe, nañañatendéiramo ikatu jaju ñanematerialísta, ha upeakuére ñambotapykue Ñandejára Rréino (Heb. 13:5).

4. ¿Mbaʼéichapa Satanás oipuru “ñande resa oipotáva”?

4 Satanás oipota ñapensa javyʼavetaha sólamente jarekóramo heta mbaʼerepy. Upévare ojevale ko múndore ha “ñande resa oipotáva” rehe, jaipota potave hag̃ua umi kósa materiál (1 Juan 2:15-17; Gén. 3:6; Prov. 27:20). Ko múndo oofrese heta mbaʼe, ha ñanemboliga jajogua hag̃ua umi mbaʼe osẽ pyahuvéva. Ha umíva ikatu iporã ha ideprovécho, térã naiporãi ha ndovaléi mbaʼeverã. Ñapensamína, ¿jajoguámapa algúna ves peteĩ mbaʼe nañaikotevẽiva? Ikatu oime jajogua raʼe pórke ñandegustaiterei jahecha ypýrõ guare, térã jahecha rupi peteĩ propagándape. Jaikóramo jajogua umi mbaʼe nañaikotevẽiva, jagasta reíta ha ikatu ñanemoprovléma. Koʼã mbaʼe ikatu ñandedistrae ha jaju ndajastudiaguasuvéi la Biblia, saʼíma japredika, ndajajepreparavéi rreunionrã térã ñañepyrũ jafalta meme. Ani ñanderesarái Juan heʼi vaʼekuégui: “Ko múndo ha umi mbaʼe oipotáva, ohasa ohóvo”.

5. ¿Mbaʼépa ikatu oiko umi ombaʼapoitereívare okonsegi hag̃ua umi mbaʼerepýnte?

5 Satanás ndoipotái jaservi Jehovápe, síno ñambaʼapo meme ñambyaty hag̃ua pláta ha mbaʼerepy (Mat. 6:24). Péro ñande jaikuaa porã ndajavyʼamoʼãiha jaikóramo ñambyaty umi kósa materiál. Ikatu voi jahasa provléma ekonómiko ha ñasẽ vai heta mbaʼépe. Ha ivaiveha, ikatu voi ndajajeroviavéi Jehováre ni Irréinore (1 Tim. 6:9, 10; Apoc. 3:17). Jesús heʼi vaʼekue peteĩ persóna oipotaitereíva oimeraẽ mbaʼe ohecháva, ojoguaha pe semílla hoʼávape ñuatĩndýpe. Peichagua persóna ohendu pe mensáhe oñeʼẽva pe Rréinore, péro umi mbaʼe oipotáva “mbeguekatúpe oike ikorasõme ha ojahoʼipa Ñandejára ñeʼẽ, ha upévare ndahiʼái” (Mar. 4:14, 18, 19).

6. ¿Mbaʼépa ñaaprende Baruc ehémplogui?

6 Jahechamína mbaʼépa oiko vaʼekue Baruc rehe, Jeremías sekretário. Haʼe ningo oñepyrũ kuri oheka “umi mbaʼe tuicháva”, péro Jehová omomanduʼa chupe Jerusalén oñehundi potaitemaha. Jehová opromete Barúcpe osalvataha chupe (Jer. 45:1-5, TNM). Upéicharõ, Baruc nopensái vaʼerã ikatutaha osalva umi mbaʼerepy. Jehová ni mbaʼevéicharõ ndoprotehemoʼãi umi kósa materiál (Jer. 20:5). Koʼág̃a avei oñehundi potaitéma ko múndo aña oĩva Satanás poguýpe. Upévare jaʼekuaa ndahaʼeiha tiémpo jaiko hag̃ua ñambyaty mbaʼerepy. Aníkena ñaimoʼã pe gran trivulasiónpe jasalvataha ñande kosakuéra jahayhúva, térã jajogua hepyeterei vaʼekue (Prov. 11:4; Mat. 24:21, 22; Luc. 12:15).

7. ¿Mbaʼépa ñahesaʼỹijóta koʼág̃a, ha mbaʼérepa?

7 ¿Mbaʼépa jajapo vaʼerã jahupyty hag̃ua ñane remikotevẽ, ñamboykeʼỹre umi mbaʼe iñimportantevéva? ¿Mbaʼépa ñanepytyvõta ani hag̃ua jaju ñanematerialísta, térã jajepyʼapyeterei umi mbaʼe ñaikotevẽvare? Jesús ojapórõ guare pe Sermón del  Mónte, omeʼẽ vaʼekue heta konsého ideprovechoitereíva (Mat. 6:19-21). Jahechamína mbaʼépa ñanemboʼe Mateo 6:25-34. Upéva ñanepytyvõta jasegi hag̃ua ñamotenonde Ñandejára Rréino, ani umi kósa materiál (Luc. 12:31).

JEHOVÁ OMEʼẼ ÑANDÉVE UMI MBAʼE ÑAIKOTEVẼVA

8, 9. a) ¿Mbaʼérepa ndovaléi jajepyʼapyeterei ñane remikotevẽre? b) ¿Mbaʼépa Jesús oikuaa porã vaʼekue?

8 (Elee Mateo 6:25.) Jesús oikuaa vaʼekue idisipulokuéra ojepyʼapytaha hemikotevẽre, por ehémplo hoʼu ha omonde vaʼerãre. Upévare heʼi: “Anive pejepyʼapyeterei”. Jesús oipytyvõse chupekuéra ontende hag̃ua mbaʼérepa ndovaléi oñekevrantaiterei. Haʼe oikuaa idisipulokuéra ojepyʼapyetereíramo umi mbaʼe oikotevẽvare, ikatu hína hesarái umi mbaʼe iñimportantevévagui. Jesús oñeinteresa vaʼekue hesekuéra, upévare pe Sermón del Móntepe 4 vése voi heʼi chupekuéra ani hag̃ua ojepyʼapyeterei (Mat. 6:27, 28, 31, 34).

9 Péro, ¿mbaʼérepa Jesús heʼi ani hag̃ua jajepyʼapy ñane remikotevẽre? Entéro ningo tekotevẽ jakaru ha ñañemonde, ha katuete jajepyʼapýta ofaltáramo ñandéve pláta jajogua hag̃ua koʼã mbaʼe. Péro Jesús oikuaa avei upéva, ha oikuaa mbaʼépa oikotevẽ umi hénte. Haʼe oikuaa avei isegidorkuéra ohasataha heta mbaʼe ijetuʼúva “umi ára pahápe” (2 Tim. 3:1). Jahechaháicha, koʼág̃arupi heta persónape ijetuʼu okonsegi hag̃ua itravahorã, ha hiʼarive opa mbaʼénte hepypa. Heta lugárpe umi hénte imboriahueterei, ha ohupyty asy hoʼumi vaʼerã. Péro Jesús ontende porã vaʼekue umi persóna rekove iñimportanteveha pe tembiʼúgui ha aógui.

10. Jesús omboʼérõ guare idisipulokuérape oñemboʼe hag̃ua, ¿mbaʼépa heʼi iñimportanteveha?

10 Jesús omboʼe kuri idisipulokuérape ojerure hag̃ua Itúape umi mbaʼe oikotevẽva. Haʼe heʼi chupekuéra oñemboʼe vaʼerãha kóicha: “Emeʼẽna oréve ore rembiʼurãmi ko árape g̃uarã” (Mat. 6:11). Ótra okasiónpe heʼi avei chupekuéra ojerure hag̃ua Ñandejárape: “Emeʼẽna oréve ore rembiʼurãmi roikotevẽva koestediarã” (Luc. 11:3). Péro upéva ndeʼiséi haʼekuéra ojepyʼapy vaʼerãha tódo el día hemikotevẽre. Jesús omboʼe idisipulokuérape iñimportanteveha ojerure ou hag̃ua Ñandejára Rréino, ha upéi ae hemikotevẽre (Mat. 6:10; Luc. 11:2). Upéi, ikatu hag̃uáicha oipytyvõ idisipulokuérape anive hag̃ua ojepyʼapyeterei, Jesús ohechauka chupekuéra mbaʼéichapa Jehová oñangareko ikreasiónre.

11, 12. ¿Mbaʼépa ñaaprende Jehová oñangareko lájare umi guyráre? (Ehecha pe taʼanga oĩva iñepyrũme.)

11 (Elee Mateo 6:26.) Jesús heʼi vaʼekue: “Pemaña porãmína umi guyra yvagapeguáre”. Umi guyra ningo michĩ, upéicharõ jepe hoʼu heta semílla, yva, vícho térã yso. Koʼã animál ñandéicha tuichárire, ikarueteve vaʼerãmoʼã ñandehegui. Péro haʼekuéra natekotevẽi oñemitỹ, pórke Jehová omeʼẽ chupekuéra opa mbaʼe oikotevẽva (Sal. 147:9). Jaikuaaháicha, Jehová nomoĩri umi guyraʼi jurúpe la hoʼu vaʼerã, síno haʼekuéra oho ojeporeka ha katuete ojuhu la hembiʼurã.

12 Jesús oĩ vaʼekue segúro Itúa oñangarekotaha yvyporakuérare, pórke umi guyraʼíre jepe oñangareko porã. [1](1 Ped. 5:6, 7). Ñande jaikuaa Jehová nomoĩmoʼãiha ñande jurúpe la jaʼu vaʼerã. Upévare ñambaʼapo térã ñañemitỹ vaʼerã ñakonsegi hag̃ua ñane remikotevẽ, ha ndovaléi  ñaneateʼỹ. Jehová katuete ñanevendesíta ñañehaʼã haguére. Péro sapyʼánte ivaíramo ñane situasión, haʼe ikatu omomýi ótrope okomparti hag̃ua ñanendive orekomíva. Jesús ndeʼíri kuri Jehová omeʼẽha umi guyraʼípe peteĩ lugár oiko hag̃ua. Péro jaikuaaháicha, ombokatupyry ha omeʼẽ chupekuéra oikotevẽva ikatu hag̃uáicha ojaitypo. Péicha avei Jehová ikatu ñanepytyvõ jajuhu hag̃ua peteĩ lugár idesentemíva jaiko hag̃ua ñane famíliandi.

13. ¿Mbaʼérepa ikatu jaʼe javaleveha umi guyrágui?

13 Jesús oñeʼẽ rire umi guyráre, oporandu idisipulokuérape: “¿Ndapevalevéingaʼu piko peẽ chuguikuéra?” (embojoja Lucas 12:6, 7 heʼívare). Oime vaʼerã upérõ Jesús imanduʼa haʼe omeʼẽtaha hekove yvyporakuéra rehehápe. Añetehápe ningo haʼe nomanói vaʼekue umi guyraʼi térã ótro animál rehehápe, síno omano ñanderehehápe, ikatu hag̃uáicha jaikove opa ára g̃uarã (Mat. 20:28).

14. ¿Mbaʼépa ikatu oiko ñanderehe jajepyʼapyetereírõ?

14 (Elee Mateo 6:27.) ¿Mbaʼérepa Jesús heʼi ndaikatumoʼãiha ñambopukumie ñande rekove jajepyʼapyetereíramo? Pórke ñañekevrantaitereírõ umi mbaʼe ñaikotevẽvare, ikatu hína ñanderasy ha ñamano pyaʼeve.

15, 16. a) ¿Mbaʼépa ñaaprende Jehová oñangareko lájare umi líriore? (Ehecha pe taʼanga oĩva iñepyrũme.) b) ¿Mbaʼépa ñañeporandu vaʼerã, ha mbaʼérepa?

15 (Elee Mateo 6:28-30.) Entéro ningo ñañemonde porãse, koʼýte jahátarõ predikasiónpe, rreunionhápe térã asambleahápe. Péro, ¿jajepyʼapy vaʼerãpa ñamonde  vaʼerãre? Jesús omomanduʼa jey idisipulokuérape mbaʼéichapa Jehová oñangareko ikreasiónre. Ko okasiónpe Jesús omoĩ kómo ehémplo “umi lírio oĩva ñúre”. Oñeʼẽvo umi líriore, ikatu imanduʼa raʼe umi gladiólo, hasínto, íris ha tulipánre. Koʼã yvoty iporã porã ha natekotevẽi ojapo ijaorã. Upéicharõ jepe, Jesús heʼi kuri “ni Salomón haʼéramo guare pe mburuvicha iplatavéva, noñemondéi vaʼekue haʼekuéraicha”.

16 Ñapensamína Jesús heʼívare upe rire: “Ñandejára péicha omondéramo umi ñana okakuaáva ñúre, [...] ¿mbaʼéicha piko pejeroviaʼiete ha ndapehechakuaái koʼytevéntema haʼe omeʼẽtaha peẽme pende aorã?”. Jehová ningo katuete omeʼẽta isiervokuérape oikotevẽva. Péro umi disípulo ojeroviaʼieterei (Mat. 8:26; 14:31; 16:8; 17:20). Haʼekuéra oñemeʼẽ vaʼerã enkuénta Jehová oñeinteresaha káda únore, ha siémpre oñangarekotaha hesekuéra. Ha ñande, ¿jajeroviápa ñande pyʼaite guive Jehová omeʼẽtaha ñandéve opa mbaʼe ñaikotevẽva?

17. ¿Mbaʼépa ikatu ombyai ñane amista Jehovándi?

17 (Elee Mateo 6:31, 32.) Umi hénte ndoikuaáiva Jehovápe oñehaʼãmbaite okonsegi pláta ha kósa materiál. Péro ñande jajapóramo upéva, ñambyaíta ñane amista Jehovándi. Haʼe ningo ñande Túa ha ñanderayhueterei. Upévare ñai segúro haʼe omeʼẽ rasapataha ñandéve umi mbaʼe ñaikotevẽva, jajapóramo opa mbaʼe haʼe oipotáva ha ñamotenondéramo Irréino. Avei, ñaime porãramo Jehovándi javyʼavéta ha ñañekontentáta jarekóma guive jaʼumi ha ñamonde vaʼerã (1 Tim. 6:6-8).

 ¿ÑAMOTENONDÉPA HÍNA ÑANDEJÁRA RRÉINO?

18. a) ¿Mbaʼeichaite pevépa Jehová ñandekuaa? b) ¿Mbaʼérehepa haʼe oñenkargáta?

18 (Elee Mateo 6:33.) Jehová opromete omeʼẽtaha ñandéve opa mbaʼe ñaikotevẽva ñamotenondéramo Irréino. ¿Mbaʼérepa ikatu ñaĩ segúro okumplitaha ipromésa? Jesús heʼi vaʼekue: “Pende Ru yvagapegua oikuaa voi peẽ peikotevẽha opa koʼã mbaʼe”. Jehová oikuaáma mbaʼépa ñaikotevẽ, ñande jaikuaa mboyve jepe (Filip. 4:19). Por ehémplo, haʼe oikuaáma mbaʼe ao ha tembiʼúpa ñaikotevẽta. Ha oikuaa avei ñande ha ñane família ñaikotevẽha peteĩ lugár jaiko hag̃ua. Upéicharõ, Jehová katuete oñenkargáta jahupyty hag̃ua umi mbaʼe añetehápe ñaikotevẽva.

19. ¿Mbaʼérepa ndajaikói vaʼerã ñañekevrantaiterei ñane renonderãre?

19 (Elee Mateo 6:34.) Jesús heʼi jey umi disípulope: “Ani pejepyʼapyeterei”. Jaikuaaháicha, Jehová omeʼẽtante voi ñandéve opa mbaʼe ñaikotevẽva káda día. Upévare, ani ñañekevrantaiterei umi mbaʼe ñaikotevẽtavare amo gotyove. Jajepyʼapyetereírõ, amo ipahápe ñañepyrũta jajeroviaiterei ñandejehe ha ñambyaíta ñane amista Jehovándi. Upéicharõ, jasegíkena jajerovia Jehováre ñande pyʼaite guive (Prov. 3:5, 6; Filip. 4:6, 7).

JEHOVÁ OÑANGAREKÓTA ÑANDEREHE ÑAMOTENONDÉRAMO PE RRÉINO

¿Ikatúpa jaiko sensillomie jaservi porãve hag̃ua Jehovápe? (Ehecha párrafo 20)

20. a) ¿Mbaʼe métapa ikatu remoĩ reservi porãve hag̃ua Jehovápe? b) ¿Mbaʼépa ikatu rejapo reiko sensillomie hag̃ua?

20 Ajépa nahiʼãiete jaipurupa ñane tiémpo ñakonsegi hag̃ua umi mbaʼerepy, ha upeakuére ndaikatúi jaservi porã Jehovápe. Upéva rangue, ñameʼẽ vaʼerã Jehovápe la iporãvéva. Ikatu voi ñamoĩ méta jaservi porãve hag̃ua chupe. Por ehémplo, ikatu jaha jaservi peteĩ kongregasión oĩhápe nesesida, térã jajapo ñande prekursorádo. Ha oiméramo jaservíma de prekursór, ikatu jaha pe Eskuéla Oñembokatupyryve hag̃uáme umi Opredikávape. Avei jajeofresekuaa ñambaʼapo hag̃ua unos kuánto día Betélpe, térã Ofisína de Traduksiónpe. Ikatu jaservi kómo voluntário lokál departaménto de Diseño y Construcciónpe, térã oñemopuʼãhápe Salón del Reino. Ñapensamína mbaʼépa jajapokuaa jaiko sensillomie hag̃ua. Péicha jarekovéta tiémpo ha ñanekyreʼỹvéta ñamotenonde hag̃ua Ñandejára Rréino. Pe rrekuádro heʼíva “ Mbaʼéichapa ikatu reiko sensillove,” omeʼẽ ñandéve unas kuánta suherénsia. Jajerurékena Jehovápe tañanepytyvõ jahechakuaa hag̃ua mbaʼépa jajapo vaʼerã, ha upéi ñakambia tekotevẽhápe.

21. ¿Mbaʼépa ñanepytyvõta ñañemoag̃uive hag̃ua Jehováre?

21 Jesús ñanemboʼe ñamotenonde hag̃ua Ñandejára Rréino. Jajapóramo upéva, ndajaikomoʼãi jajepyʼapyeterei ñane remikotevẽre, pórke ñakonfia Jehová oñangarekotaha ñanderehe. Avei, ñaaprende jajejokokuaa hag̃ua ha ndajaikomoʼãi jajogua opa mbaʼe jaipotáva, térã oikuaveʼẽva ko múndo, jarekóramo jepe japaga hag̃ua umívare. Jaikóramo sensillomínte, ñañemoag̃uivéta Jehováre ha jasegíta ñaneñeʼẽrendu chupe, ha upéi jahupytýta pe jeikove opaveʼỹva haʼe oprometéva ñandéve (1 Tim. 6:19).

^ [1] (párrafo 12) Sapyʼánte oĩ Ñandejára siérvo ohupyty asyetereíva hoʼu vaʼerã. Ñantende hag̃ua mbaʼérepa Jehová opermiti upéva, ikatu jahecha Ñemañaha 15 de septiembre de 2014-pe, páhina 22, pe artíkulo hérava “Oñeporandúva jepi”.