“NDAIPORIMOʼÃVÉIMA omanóva ha umi omano vaʼekue katu oikove jeýta”. Che rembireko hérava Mairambubu oviaha aja kolektívope ohendu peteĩ kuñakarai oexplikárõ guare upéva ótrope. Ombokuriósa chupe la ohendúva ha oikuaaseve upévagui. Upévare, oguejypa rire hikuái pe kolektívogui, haʼe oho pe kuñakarai rapykuéri oñeʼẽ hag̃ua hendive. Ko kuñakarai ningo testígo de Jehová ha héra Apun Mambetsadykova. Upe tiémpope ipeligróso vaʼekue oñeñeʼẽ umi Testígondi, péro umi mbaʼe Apun oremboʼe vaʼekue okambiaite la ropensa lája.

KOʼẼ GUIVE PYTŨ MEVE ROMBAʼAPO

Anase kuri 1937-pe peteĩ koljóspe térã peteĩ gránha heta persóna ombaʼapohápe, opytáva Tokmak ypýpe (Kirguistán). Ore trívu ningo héra kirguís ha roñeʼẽ pe idióma kirguís. Che túa umía agrikultór ha ombaʼapo upe gránhape koʼẽ guive pytũ meve. Entéro umi ombaʼapóvape upépe oñemeʼẽ tembiʼu, péro una ves al áñonte ojepaga chupekuéra en efektívo. Che sy heta ojesakrifika vaʼekue oremongakuaa hag̃ua, chéve ha che ermána menórpe. Aha kuri eskuélape 5 áñonte, upéi añepyrũ avei ambaʼapo meme upe gránhape.

Pe kordilléra Teskey Ala-Too

Pe lugár roikohápe ningo imboriahueterei vaʼekue la hénte, ha oñembaʼapo jejopy vaʼerã ojehupyty hag̃ua oñekotevẽmíva. Chemitãrõ guare napensaguasúi vaʼekue maʼerãpa yvyporakuéra oĩ ko yvy ape ári, ni mbaʼépa ñaneraʼarõ amo gotyove. Nañeimahinái avei okambiaitetaha che rekove aikuaa rire Jehovápe ha umi mbaʼe porãita ojapótava yvyporakuéra rehehápe. Amombeʼuse ningo peẽme mbaʼéichapa oñepyrũ vaʼekue pe predikasión Kirguistánpe, ha mbaʼéichapa oñemog̃uahẽ pe mensáhe oparupiete. Upéva oñepyrũ kuri nórte gotyo Kirguistánpe, pe sóna che akakuaa haguépe.

OU HIKUÁI SIBÉRIAGUI HA OPREDIKA PE AÑETEGUA KIRGUISTÁNPE

Pe marandu porã oñepyrũ ojekuaa Kirguistánpe áño 1956-pe. Péro upe mboyve oñembohovái kuri peteĩ situasión ijetuʼúva. Upérõ Kirguistán oĩ vaʼekue Unión Soviéticape, ha umi testígo de Jehová oikóva umi país oĩvape Unión Soviéticape, ndojeheʼái vaʼekue polítikare (Juan 18:36). Upévare  ojereko umi Testígope haʼerõguáicha pe goviérno komunísta enemígo ha ojepersegi chupekuéra. Péro jaikuaaháicha, Ñandejára Ñeʼẽ katuete og̃uahẽta umi hénte ipyʼaporãva korasõme, ha yvyporakuéra ndaikatúi ojoko upéva. Che ningo aaprende peteĩ mbaʼe iñimportánteva che rekovépe: “Ñandejárape g̃uarã ndaipóri ikatuʼỹva” (Mar. 10:27).

Emil Yantzen

Heta ningo ojepersegi umi Testígope, péro amo ipahápe upéva oipytyvõ oñemog̃uahẽ hag̃ua pe marandu porã Kirguistánpe. ¿Mbaʼéichapa oiko kuri upéva? Siberia oĩ vaʼekue avei pe Unión Soviéticape, ha upépe oñemondo entéro umi enemígo del estádope. Heta persónagui ojepoi rire ou Kirguistánpe, ha umi oúva apytépe oĩ omombeʼúva pe añetegua. Por ehémplo, Emil Yantzen onase vaʼekue Kirguistánpe 1919-pe, ha oñemondo kuri chupe peteĩ kámpo oñembaʼapo pohyihápe. Emil oikuaa pe añetegua upe lugárpe, ha ou jey 1956-pe ha opyta Sokuluk ypýpe (Kirguistán), che aikoha gotyo. Áño 1958-pe oñeforma upépe pe primera kongregasión.

Victor Vinter

Un áñorupi upe rire, Victor Vinter ova Sokúlukpe. Ko ermáno ifiélva ningo ohasa heta mbaʼe ijetuʼúva. Por ehémplo 2 vése osẽ vaʼekue chupe 3 áño de kársel noñentremeteséi rupi polítikape. Upe rire oñenkarsela jey chupe 10 áñore, ha upéi umi autorida omondo chupe mombyry hógagui oiko hag̃ua 5 áño ótro lugárpe. Jahechaháicha, umi kristiánope ojepersegi meme vaʼekue, péro koʼã situasión ijetuʼuetéva ndojokói chupekuéra osegi hag̃ua opredika.

PE MARANDU PORÃ OG̃UAHẼ CHE VÁLLEPE

Eduard Varter

Áño 1963-pe oĩma 160 Testígorupi Kirguistánpe. Heta oĩ oúva Alemania, Ucrania ha Rúsiagui. Umi oúva apytépe oĩ ermáno Eduard Varter. Umi autorida omosẽ vaʼekue chupe hógagui ha omondo chupe oiko hag̃ua mombyry. Haʼe ojevautisa kuri Alemániape 1924-pe. Dékada de 1940-pe, umi nási omondo chupe kámpo de konsentrasiónpe. Tiémpo riremi, umi komunísta Unión Sovieticagua oguerahauka chupe mombyry hógagui oiko hag̃ua ótro lugárpe. Áño 1961-pe, ko ermáno ifiélva ova peteĩ puévlo héravape Kant, opytáva ag̃ui pe che aikohágui.

Elizabeth Fot; Aksamai Sultanalieva

Kántpe oiko vaʼekue peteĩ ermána oservíva fiélmente Jehovápe ha hérava Elizabeth Fot. Haʼe ningo modísta ha ivale voi la kostúrape, upéicha rupi heta doktór, profesór ha opaichagua profesionál ojapouka chupe ijaorã. Peteĩ ikliénte héra Aksamai Sultanalieva, ha iména ombaʼapo fiskalíape. Peteĩ jey, Aksamai oho Elizabeth rendápe ojapouka hag̃ua chupe ijaorã. Upérõ haʼe oaprovecha ha oporandu Elizabéthpe heta mbaʼe oikuaaséva, por ehémplo maʼerãpa jaikove ha mbaʼépa oiko umi omanóvagui. Elizabeth ombohovaipaite chupe umi pregúnta la Biblia rupive. Kon el tiémpo Aksamai oñepyrũ avei opredika kyreʼỹ umi marandu porã.

Nikolai Chimpoesh

Upe tiémpope, peteĩ ermáno Moldaviagua hérava Nikolai Chimpoesh oservi vaʼekue kómo superintendénte de sirkuíto. Haʼe haimete 30 áñore ovisita kuri umi kongregasión. Péro ndahaʼéi upévante la ojapóva, haʼe oorganisa avei ojekopia ha oñemosarambi hag̃ua umi puvlikasión. Umi autorida oñepyrũ osospecha la haʼe ojapóva oikóvo. Upévare, Eduard Varter heʼi chupe: “Umi autorida ombaʼeporandu vove ndéve, erénte chupekuéra jarresiviha umi puvlikasión ñande sentrál oĩvagui Broóklynpe. Eñeʼẽvo chupe, emaña de frentete pe ofisiál KGB-pegua rováre, ndaipóri rekyhyje hag̃ua” (Mat. 10:19).

 Upe riremínte, ojejerure Nikoláipe oñepresenta hag̃ua pe KGB ofisínape opytáva Kántpe. Haʼe heʼi: “Pe ofisiál oporandu chéve mbaʼéichapa rokonsegi umi puvlikasión, ha che haʼe chupe ojeguerukaha oréve Broóklyngui. Ndoikuaái ningo mbaʼépa heʼíta chéve, opoi chehegui ha nacherenoivéi hikuái arakaʼeve”. Umi ermáno ipyʼaguasu vaʼekue ha osegi opredika umi marandu porã nórte gotyo Kirguistánpe, ag̃ui che aikohágui. Áño 1981-pe, oñemog̃uahẽ sapyʼa umi marandu porã che hentekuérape, ha che rembireko Mairambubu la ohendu ñepyrũ vaʼekue.

CHE REMBIREKO ENSEGÍDA OASEPTA PE AÑETEGUA

Mairambubu ningo Naryngua, peteĩ lugár opytáva Kirguistánpe. Agosto de 1974-pe aha avisita che ermánape. Upépe rojokuaa Mairambubu ndive, ha ahecha guive chupe añeenamoraite voi hese, ha romendáma voi upe díape.

Apun Mambetsadykova

Enero de 1981-pe, Mairambubu oviaha kolektívope oho hag̃ua merkádope, ha upérõ la ohendu kuri peteĩ Testígo opredikárõ guare. Che rembireko oikuaaseve, upévare oporandu pe Testígope mbaʼéichapa héra ha moõpa oiko. Pe ermána heʼi chupe heraha Apun, péro nomeʼẽi chupe idireksión pórke upe tiémpope ojeproivi gueteri ojepredika upe tetãme ha umi ermanokuéra ojekuida. Upéva rangue ojerure che rembirekópe ore direksión. Mairambubu ovyʼaiterei og̃uahẽvo ógape.

Haʼe heʼi chéve: “Ahendu ningo peteĩ mbaʼe iporãitereíva. Peteĩ kuñakarai heʼi chéve koʼẽrõitéma yvyporakuéra nomanomoʼãveimaha. Umi animál salváhe jepe imansopataha”. Chéve g̃uarã umíva haʼete kuri kuénto reínte. Upémarõ haʼe chupe: “Ñahaʼarõnte pe kuñakarai tañandevisita ha upépe ág̃a jaikuaa porãvéta”.

Tres mése haguépe Apun orevisita. Upérõ oĩ mimíma vaʼekue pe trívu kirguíspe la haʼéva Testígo, ha upéi umíva osegi kuri orevisita. Haʼekuéra oremboʼe Jehovágui ha umi mbaʼe ojapótavagui yvyporakuéra rehehápe. Olee oréve hikuái pe lívro De paraíso perdido a paraíso recobrado. * Peteĩnte ningo oĩ upe lívro siuda de Tokmákpe, upévare rokopia kuri a máno upe lívro.

Roñepyrũre rostudia la Biblia roaprende pe profesía oĩva Génesis 3:15-pe. Ko profesía oñekumplíta Jesús rupive, chupe ningo Ñandejára omoĩ vaʼekue ñanegoverna hag̃ua. Ko mbaʼe ningo iñimportanteterei ha entéro tekotevẽ oikuaa. Upéva oremokyreʼỹ roñepyrũ hag̃ua ropredika (Mat. 24:14). Sapyʼaitérõ g̃uarã, umi mbaʼe roaprendéva rohóvo oñepyrũma okambia la roiko lája.

 RREUNIÓN HA VAUTÍSMO PROSKRIPSIÓN TIÉMPOPE

Peteĩ ermáno Tokmakgua oreinvita peteĩ kasamientorã. Upérõ che ha che rembireko ensegída voi ropilla umi Testígo idiferentetereiha. Upe fiésta itrankílo ha ndojeʼúi vevída alkoólika. Ndojoguaiete umi kasamiénto ymave rohómi haguépe, pórke umívape umi hénte okaʼujoa, ojeporta vai ha iñeʼẽ kyʼa.

Avei roasisti mimi jepi rreunionhápe Tokmákpe. Tiémpo porã jave, umi rreunión ojejapo kaʼaguýre. Umi ermáno oikuaa umi polisía okontrolaha chupekuéra, upévare oĩ katuete la ovihiláva oúramo g̃uarã hikuái. Roʼy tiémpope katu roñembyaty peteĩ ógape, ha umi polisía oñepresenta unas kuánta vése ohecha hag̃ua mbaʼépa rojapo. Julio de 1982-pe, che ha Mairambubu rojevautisa rrío Chúpe. Upérõ guare roñatende porã avei kuri ani hag̃ua rojepilla (Mat. 10:16). Noroñembyatýi oñondivepa pe kaʼaguýpe, síno por grúpo, ropurahéi umi kántiko ha rohendu pe diskúrso de vautísmo.

ROAPROVECHA ROMBAʼAPOVE HAG̃UA JEHOVÁ SERVÍSIOPE

Áño 1987-pe, peteĩ ermáno ojerure chéve avisita hag̃ua peteĩ persóna oikóvape Balykchýpe, pórke ohendu porã kuri pe predikasión. Rog̃uahẽ hag̃ua upe lugárpe, roviaha 4 óra trénpe. Roho rire ropredika unas kuánta vése Balykchýpe, rohechakuaa heta persóna ohenduseha pe añetegua, ha upéva omeʼẽ oréve peteĩ oportunida iporãitereíva rombaʼapove hag̃ua Jehová servísiope.

Che ha Mairambubu pyʼỹi roho Balykchýpe. Haimete káda fin de semána roho ropredika upépe ha rojapo umi rreunión. Rogueraha umi puvlikasión peteĩ vosa oñemoĩhápe jepi pápa, oñehenóiva mishok. Péro amáske ropredika upépe roikotevẽve umi puvlikasión. Rogueraháramo jepe mokõi mishok renyhẽte káda mes, ndohupytypái umi héntepe. Trénpe jepe ropredika vaʼekue umi héntepe, rohokuévo ha rojukuévo Balykchýgui.

Áño 1995-pe, ocho áño rovisita rire Balykchy, oñeforma peteĩ kongregasión. Heta ningo rogasta rojapóvo káda viáhe upe lugárpe, ha hiʼarive oresogue. Péro peteĩ ermáno orepytyvõ jepi rokuvri hag̃ua umi gásto. Jehová oikuaa porã kuri ore rombaʼaposeve hague iservísiope, upévare oavri oréve pe yvága rokẽ ha ohykuavo ore ári hetaiterei vendisión (Mal. 3:10). Añetehápe ndaipóri mbaʼeve Jehová ikatuʼỹva ojapo.

OREREMBIAPO HETA ÓGAPE HA PREDIKASIÓNPE

Añenombra ansiáno áño 1992-pe, che haʼe vaʼekue pe primer ansiáno trívu kirguisgua. Heta oportunida oñepresenta oréve roservi porãve hag̃ua Jehovápe ore kongregasiónpe voi, Tokmákpe. Por ehémplo, unos kuánto koléhio oĩvape upe lugárpe rostudia la Biblia heta mitãrusu trívu kirguisgua ndive. Peteĩva umi mitãrusu koʼág̃a oservi Komite de Sukursálpe, ha mokõi katu oservi de prekursór espesiál. Avei, roñehaʼã roipytyvõ unos kuánto mitãrusúpe ohóva rreunionhápe. Áño 1990 rupi, entéro umi puvlikasión rorekóva oĩ rúsope ha umi rreunión ojejapo avei upe idiómape. Péro mbeguekatúpe hetavéma ohóvo kongregasiónpe umi oñeʼẽva idióma kirguís. Upévare che atradusi chupekuéra umi rreunión ikatu hag̃uáicha ontende porãve hikuái pe añetegua.

Che rembireko ha 8 ore famíliandi, 1989-pe

 Che ha che rembireko rogerreapaite avei romongakuaa hag̃ua ore família. Rogueraha chupekuéra predikasiónpe ha rreunionhápe. Che rajy Gulsayra orekórõ guare 12 áño vyʼápe opredika vaʼekue umi héntepe kállere. Enterovénte che familiakuéra oñehaʼãmi omemorisa umi téxto bíblico, upéva ogustaiterei chupekuéra. Ore família ha umi ore niéto avei siémpre ikyreʼỹ kongregasiónpe. Ore ningo roreko 9 família ha 11 niéto oikovéva gueteri. Dieciséis oĩ oservíva Jehovápe, umíva apytépe oĩ ojevautisámava térã ohóva rreunionhápe ituakuéra ndive.

OKAMBIA HETA MBAʼE

Umi ermáno ha ermána rohayhuetéva oñepyrũ vaʼekue opredika pe sóna roikohápe áño 1956-pe. Haʼekuéra ni ndoroviasemoʼãi umi kámbio tuichaite oikóva upe rire. Por ehémplo, áño 1990 rire rovyʼa rorekovéma haguére liverta ropredika hag̃ua, ha roñembyaty hag̃ua asamblearã.

Ropredikahápe che rembirekóndi

Áño 1991-pe, roho che rembirekóndi Kazajistánpe, pe siuda héravape Alma-Atá ha koʼág̃a oñembohérava Almaty. Upérõ primera ves roasisti peteĩ asambléa tuichávape. Áño 1993-pe katu umi ermáno Kirguistangua oorganisa pe primera asambléa Estádio Spartákpe, siuda de Biskékpe. Umi ermáno omopotĩ pe estádio una semánare, ha pe enkargádo ohecharamoitereígui upéva ndaorekovrái mbaʼevete.

Áño 1994-pe ojehupyty peteĩ mbaʼe iporãitereíva, upe áñope oñeimprimi pe primera puvlikasión idióma kirguíspe. Koʼág̃arupi ojetradusi meme umi puvlikasión idióma kirguíspe sukursál Biskékpe. Áño 1998-pe Jehová organisasión oreko kuri pe rrekonosimiénto legál Kirguistánpe. Pe óvra okakuaa ohóvo, ha koʼág̃a roiméma 5.000 puvlikadór. Avei oĩ 83 kongregasión, ha 25 grúpo idióma chino, inglés, kirguís, turco, uigur, uzbeko, ruso ha lenguáhe de séña rúsope. Tahaʼe haʼéva la ore kultúra, enterovéva roservi Jehovápe peteĩ ñeʼẽme. Añetehápe ningo Ñandejára rupivénte oiko kuri koʼã kámbio.

Tuicha okambia kuri che rekove aikuaa rire Jehovápe. Che ningo akakuaa vaʼekue kampáñape peteĩ família mboriahumíme, ha 5 áñonte aha vaʼekue eskuélape. Upéicharõ jepe, Jehová chepuru aservi hag̃ua de ansiáno ha amboʼe hag̃ua umi mbaʼe ijojahaʼỹva oĩva Iñeʼẽme umi ijeskuelavévape jepe chehegui. Añetehápe ningo Jehová ikatu ojapo umi mbaʼe ñaimoʼãʼỹva. Entéro umi mbaʼe ahasáva chemokyreʼỹ asegi hag̃ua añeʼẽ umi héntepe Jehováre, pórke “Ñandejárape g̃uarã ndaipóri ikatuʼỹva” (Mat. 19:26).

^ párr. 21 Ojapo testígo de Jehová. Ko lívro noñeimprimivéima.