Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Febrero de 2017

¿Mávapa odirihi koʼág̃a Ñandejára puévlo?

¿Mávapa odirihi koʼág̃a Ñandejára puévlo?

“Penemanduʼákena umi penemoakãvare” (HEB. 13:7).

PURAHÉI: 125, 43

1, 2. ¿Mbaʼépa oime vaʼerã oñeporandu umi apóstol Jesús oho rire yvágape?

JESÚS apostolkuéra oĩ pe Sérro Olivotýpe ha ohecha mbaʼéichapa ojupi ohóvo yvága gotyo imboʼeharakuéra ha iñamígo, Jesús, omoʼã meve chupe peteĩ arai (Hech. 1:9, 10). Dos áñorupi Jesús omboʼe, omokyreʼỹ ha ogia kuri chupekuéra. Péro koʼág̃a haʼe ndaiporivéima. ¿Mbaʼépa oikóta idisipulokuéragui?

2 Jesús oho mboyve yvágape heʼi kuri isegidorkuérape: “Peikuaaukáta che réra Jerusalénpe, oparupiete Judéape, Samáriape ha mombyryvehápe ko yvy tuichakuére” (Hech. 1:8). ¿Mbaʼéichapa ojapóta hikuái ko tembiapo tuichaitéva? Jesús opromete Ñandejára espíritu oipytyvõtaha chupekuéra (Hech. 1:5). Péro, ¿mávapa odirihíta ha oorganisáta pe predikasión? Umi apóstol oikuaa Jehová oipuru hague unos kuánto kuimbaʼépe odirihi hag̃ua umi israelítape. Upévare oime vaʼerã oñeporandu hikuái: “¿Oiporavótapa koʼág̃a Jehová peteĩ líder pyahu?”.

3. a) ¿Mbaʼépa ojapo umi apóstol Jesús oho riremi yvágape? b) ¿Mbaʼe porandúpa ñambohováita ko artíkulope?

 3 Haimete dos semána Jesús oho rire yvágape, idisipulokuéra oñemoĩma ohecha mbaʼépa heʼi Ñandejára Ñeʼẽ, oñemboʼe ha ojerure Jehovápe oipytyvõ hag̃ua chupekuéra, ha oiporavo Matíaspe opyta hag̃ua umi 12 apóstol apytépe Judas Iscariote rekovia (Hech. 1:15-26). ¿Mbaʼérepa iñimportánte vaʼekue chupekuéra ha Jehovápe g̃uarã oiporavo jey peteĩme? Pórke Matías oĩta umi 12 apóstol apytépe okumplítava Ñandejára rembipota. * (Elee pe nóta). Jesús oiporavo umi apóstolpe ha ombokatupyry chupekuéra ojapo hag̃ua peteĩ tembiapo iñimportantetereíva Ñandejára puévlope. ¿Mbaʼe tembiapópa upéva? Ha, ¿mbaʼéichapa Jehová ha Jesús oprepara chupekuéra? ¿Ojejapópa ñane tiémpope peteĩ tembiapo ojoguáva upévape? ¿Mbaʼépa jajapo vaʼerã jahechauka hag̃ua ñanemanduʼaha umi ñanemoakãvare, koʼýte pe tembiguái jeroviaha ha iñarandúvare? (Heb. 13:7; Mat. 24:45).

JESÚS ODIRIHI PE KUÉRPO GOVERNÁNTEPE

4. ¿Mbaʼe rresponsavilidápa oreko vaʼekue umi apóstol ha ambue ansianokuéra oĩva Jerusalénpe?

4 Pentekostés áño 33-pe, umi apóstol oñepyrũ odirihi pe kongregasión kristiána. La Biblia heʼi “Pedro oñemboʼy [hague] umi once apóstol ndive”, ha omboʼe umi hénte atýpe pe añetegua ikatúva osalva chupekuéra (Hech. 2:14, 15). Upérõ heta persónagui oiko kristiáno, ha “haʼekuéra ojesareko meme umi apóstol omboʼévare” (Hech. 2:42). Umi apóstol oadministra kuri pe pláta kongregasiónpe (Hech. 4:34, 35). Avei omboʼe meme Ñandejára Ñeʼẽ kristianokuérape ha akóinte oñemboʼe hesekuéra (Hech. 6:4). Haʼekuéra omondo avei ermáno iñexperiénsiava opredika hag̃ua umi território ndojepredikáitivape (Hech. 8:14, 15). Tiémpo rire, ambue ansianokuéra unhído oñepyrũ oipytyvõ umi apóstolpe ikatu hag̃uáicha oñatende umi kongregasiónre. Péicha chuguikuéra oiko pe Kuérpo Governánte ha oñondivepa odirihi umi kongregasión (Hech. 15:2).

5, 6. a) ¿Mbaʼéichapa pe espíritu sánto oipytyvõ pe Kuérpo Governántepe? (Ehecha pe taʼanga oĩva iñepyrũme). b) ¿Mbaʼéichapa umi ánhel oipytyvõ vaʼekue pe Kuérpo Governántepe? c) ¿Mbaʼéichapa Ñandejára Ñeʼẽ ogia pe Kuérpo Governántepe?

5 Umi kristiáno síglo primérope guare oĩ segúro Jehová oipuru hague Jesúspe odirihi hag̃ua pe Kuérpo Governántepe. ¿Mbaʼérepa jaʼekuaa upéva? Primero, pórke pe espíritu sánto ombokatupyry pe Kuérpo Governántepe (Juan 16:13). Entéro umi kristiáno unhído orresivi kuri espíritu sánto. Péro umi apóstol ha ansiáno Jerusalengua orresivi espíritu sánto oservi hag̃ua kómo superintendénte. Por ehémplo, áño 49-pe pe espíritu sánto ogia pe Kuérpo Governántepe ikatu hag̃uáicha odesidi mbaʼépa ojejapóta pe téma de sirkunsisiónpe. Umi kongregasión ojapo upe ojedesidi vaʼekue, upéicha rupi “ojerovia mbareteve ha oñemboheta hetave koʼẽ koʼẽre” (Hech. 16:4, 5). Pe kárta omondo vaʼekue pe Kuérpo Governánte umi kongregasiónpe oñeʼẽva pe sirkunsisiónre, ohechauka pe espíritu sánto ogia hague chupekuéra odesidi hag̃ua. Upéicha rupínte ohechauka oporohayhu ha ojeroviaha hikuái (Hech. 15:11, 25-29; Gál. 5:22, 23).

6 Segundo, umi ánhel oipytyvõ vaʼekue avei pe Kuérpo Governántepe. Por ehémplo, peteĩ ánhel heʼi Cornéliope ohenoika  hag̃ua apóstol Pédrope. Upéi Pedro opredika Cornelio ha ihentekuérape, ha haʼekuéra orresivi espíritu sánto noñesirkunsidáiramo jepe. Cornéliogui oiko pe primer kristiáno ndahaʼéiva judío ha noñesirkunsidáiva. Umi apóstol ha ambue ermáno ohendu rire la oiko vaʼekue, oasepta hikuái Ñandejára odesidíva ha orresivi porã kongregasiónpe umi ndahaʼéivape judío ha noñesirkunsidáiva (Hech. 11:13-18). Ko ehémplo ohechauka umi ánhel oapoja meme hague pe predikasión odirihíva pe Kuérpo Governánte (Hech. 5:19, 20). Tercero, Ñandejára Ñeʼẽ ogia pe Kuérpo Governántepe. Por ehémplo oipytyvõ chupekuéra omyesakã hag̃ua pe añetegua ha oorganisa hag̃ua umi kongregasión (Hech. 1:20-22; 15:15-20).

7. ¿Mbaʼérepa ikatu jaʼe Jesús omoakã hague pe kongregasión kristiána?

7 Pe Kuérpo Governánte orekóramo jepe autorida kongregasiónpe, haʼekuéra ontende porã Jesús omoakãha chupekuéra. Apóstol Pablo heʼi vaʼekue Cristo onombra hague algúnope apóstolramo. Avei heʼi Cristo omoakãha pe kongregasión (Efes. 4:11, 15). Umi disípulo ndoipurúi vaʼekue peteĩ apóstol iñimportánteva réra ojekuaa hag̃ua chupekuéra upe térarupi, síno “oñehenói ypy vaʼekue kristiáno umi disípulope. Ñandejára voi ombohéra chupekuéra péicha” (Hech. 11:26). Pablo heʼi entéronte osegi vaʼerãha umi enseñánsa bíblica omboʼéva umi apóstol ha ambue kuimbaʼe omoakãva umi kongregasión. Upéicharõ jepe heʼi avei: “Péro aipota peikuaa Cristo omoakãha entéro kuimbaʼekuérape”. Koʼã kuimbaʼe apytépe oĩ avei pe Kuérpo Governánte. Upéi heʼi: “Ñandejára omoakã hína Crístope” (1 Cor. 11:2, 3). Jahechaháicha, Jehová oiporavo Itaʼýra Jesúspe omoakã hag̃ua umi kongregasión.

“KÓVA NDAHAʼÉI YVYPÓRA REMBIAPO”

8, 9. ¿Mbaʼe tembiapo iñimportántevapa ojapo vaʼekue ermáno Russell?

8 Amo áño 1870-pe rupi, Charles Taze Russell ha iñirũnguéra oñehaʼãmbaite ikatu hag̃uáicha haʼekuéra voi oadora Ñandejárape la Biblia heʼiháicha, ha oipytyvõ umi héntepe ojapo hag̃ua avei upéva. Upévare, áño 1884-pe oforma hikuái pe Zionʼs Watch Tower Tract Society ikatu hag̃uáicha opredika hikuái diferénte idiómape, ha ermáno Russell omoakã upe sosieda. * (Elee pe nóta). Haʼe ohesaʼỹijo porã la Biblia ha ndokyhyjéi heʼi hag̃ua umi héntepe japuha heta enseñánsa omboʼéva umi rrelihión, por ehémplo pe Trinidad ha pe álma nomanoiha arakaʼeve. Haʼe oaprende Cristo ou vove yvyporakuéra ndohechamoʼãiha chupe, ha avei “pe tiémpo oñemeʼẽva umi tetãme” opaha 1914-pe (Luc. 21:24). Ermáno Russell oipuru itiémpo, imbaretekue ha ipláta omboʼe hag̃ua koʼã mbaʼe umi héntepe. Añetehápe ojekuaa porãiterei Jehová ha Jesús oipuru hague ermáno Rússellpe odirihi hag̃ua umi tembiapo upe tiémpo iñimportantetévape.

9 Ermáno Russell ndoipotái vaʼekue avave ombotuicha chupe. Áño 1896-pe oskrivi ndoipotaiha oñemombaʼeguasu chupe ni umi iñirũnguérape. Koʼã ermáno ndoipotái oñehenói chupekuéra de fórma espesiál, ni ndoipotái peteĩ grúpo ogueraha herakuéra. Ermáno Russell heʼi: “Kóva ndahaʼéi yvypóra rembiapo”.

10. a) ¿Arakaʼépa Jesús onombra pe “tembiguái jeroviaha ha iñarandúvape”? b) ¿Mbaʼérepa jaʼekuaa pe Kuérpo Governánte idiferenteha pe sosieda Watch Tówergui?

10 Ermáno Russell omano áño 1916-pe. Tres áño upe rire, 1919-pe, Jesús onombra  pe “tembiguái jeroviaha ha iñarandúva”, ikatu hag̃uáicha omeʼẽ isegidorkuérape “hiʼupy hiʼoraitépe” (Mat. 24:45). Umi áñope, peteĩ grúpo michĩva de ermáno unhído oĩva Brooklyn Nueva Yórkpe, omeʼẽ hiʼupy hiʼoraitépe Jesús segidorkuérape. Pe fráse “Kuérpo Governánte” oñepyrũ osẽ ñane puvlikasionkuérape áño 1940 rire. Upérõ umi ermáno oĩva pe Kuérpo Governántepe oĩ avei pe sosieda héravape Watch Tower Bible and Tract Society. Péro 1971-pe, pe Kuérpo Governántepe sólamente oike umi ermáno unhído noĩriva pe sosieda Watch Tówerpe. Ha unos kuánto áño rire, umi ermáno ndahaʼéiva unhído oñepyrũma omoakã pe sosieda legál ha ambue korporasión oipurúva testígo de Jehová. Péicha pe Kuérpo Governánte orekove tiémpo omboʼe hag̃ua Ñandejára puévlope ha ogia hag̃ua chupekuéra (Juan 10:16; Hech. 6:4). Rrevísta Ñemañaha 15 de julio de 2013, oexplika kuri pe “tembiguái jeroviaha ha iñarandúva” haʼeha peteĩ grúpo de ermáno unhído haʼéva avei pe Kuérpo Governánte.

Pe Kuérpo Governánte áño 1950-pe rupi

11. ¿Mbaʼéichapa pe Kuérpo Governánte odesidi umi mbaʼe iñimportánteva?

11 Pe Kuérpo Governánte odesidi oñondivepa umi mbaʼe iñimportánteva oñerreuni jave káda semána. Koʼã rreunión oipytyvõ chupekuéra ikatu hag̃uáicha oñemongeta porã ha oĩve unído (Prov. 20:18). Ndaipóri ermáno iñimportantevéva ijapytepekuéra, upévare káda áño oñoturna hikuái omoakã hag̃ua irreunionkuéra (1 Ped. 5:1). Avei, káda áño oñoturna hikuái omoakã hag̃ua umi 6 komite oĩva pe Kuérpo Governánte kárgope. Ni peteĩva koʼã ermáno nopensái iñimportanteveha pe ótrogui. Haʼekuéra ohechakuaa haʼeha avei tembiguái, upéicha rupi oaprovecha pe aliménto espirituál omeʼẽva pe “tembiguái jeroviaha ha iñarandúva” ha osegi iñistruksión.

Áño 1919-pe oñenombra pe tembiguái jeroviahápe, ha upe guive omeʼẽ hikuái aliménto espirituál Ñandejára puévlope (Ehecha párrafo 10 ha 11)

“¿MÁVAPA HÍNA PE TEMBIGUÁI JEROVIAHA HA IÑARANDÚVA”?

12. ¿Mbaʼépa ñarrespondéta ko artíkulope?

12 Pe Kuérpo Governánte ningo ndahaʼéi perfékto ni Ñandejára noñeʼẽi chupekuéra diréktamente. Haʼekuéra ikatu avei ojavy ontende lája la Biblia térã oorganisa lája algún tembiapo. Por ehémplo, pe Gía oipurúva testígo de Jehová otopa hag̃ua informasión oreko peteĩ párte heʼíva “Oñemyesakãve umi mbaʼe jagueroviáva”. Upépe oñemoĩ umi rreferénsia osẽ haguépe umi entendimiénto pyahu. Jesús ndeʼíri voi kuri pe tembiguái jeroviaha ojapotaha aliménto espirituál iperféktova. Upéicharõ, ¿mbaʼéichapa ikatu jaikuaa “mávapa hína pe tembiguái jeroviaha ha iñarandúva”? (Mat. 24:45). ¿Mbaʼérepa jaʼekuaa pe Kuérpo Governánte haʼeha pe “tembiguái jeroviaha”? Jahechamína mbohapy mbaʼe oipytyvõva kuri avei pe Kuérpo Governántepe oĩ vaʼekue umi apóstol tiémpope.

13. ¿Mbaʼéichapa pe espíritu sánto oipytyvõ pe Kuérpo Governántepe?

13 Pe espíritu sánto oipytyvõ Kuérpo Governántepe. Péicha rupi, pe Kuérpo Governántepe hesakãve heta mbaʼe la Biblia omboʼéva ymave nañantendéi vaʼekue. Epensamíntena umi entendimiénto pyahu oñemensionávare pe lívro Gíape. Ndaipóri yvypóra ikatu vaʼerã ontende ijeheguínte “umi mbaʼe ipypukuvéva oúva Ñandejáragui” (elee 1 Corintios 2:10). Pe Kuérpo Governánte oñeñandu Pablo heʼi haguéicha: “Ñande nañamboʼéi umi mbaʼe opensáva umi yvypóra arandu, síno Ñandejára opensáva. Ha ñamyesakã haʼe opensáva jaikuaaukávo pe espíritu ñanemboʼéva” (1 Cor. 2:13). Heta tiémpore oñemboʼe heta japu ha saʼi oĩ ontendéva la Biblia. Péro áño 1919 guive, pe espíritu sánto rupive oñentende porãve heta mbaʼe oĩva ipype.

14. Heʼiháicha Apocalipsis 14:6, 7, ¿mbaʼéichapa umi ánhel oipytyvõ pe Kuérpo Governántepe ha Ñandejára puévlo kompletoitépe?

 14 Umi ánhel oipytyvõ pe Kuérpo Governántepe. Pe Kuérpo Governánte ogia vaʼerã umi 8 millón rasa puvlikadórpe ikatu hag̃uáicha opredika ko yvy tuichakuére. ¿Mbaʼéicha rupípa ojehupyty hetaite mbaʼe porã? Oĩ heta mbaʼe oipytyvõva upearã, ha umíva apytépe oĩ hína umi ánhel (elee Apocalipsis 14:6, 7). Heta vése umi ánhel ogia umi puvlikadórpe otopa hag̃ua umi persóna oñemboʼe vaʼekuépe Ñandejárape oipytyvõ hag̃ua chupe. * (Ehecha pe nóta). Umi lugár ojeproivihápe pe predikasión katu, ñahendu oĩha tuicha progréso. Upéva ndojehupytýi vaʼerãmoʼã umi ánhel noipytyvõirire.

15. ¿Mbaʼérepa jaʼekuaa pe Kuérpo Governánte idiferenteha umi líder rrelihiósogui? Emoĩ peteĩ ehémplo.

15 Ñandejára Ñeʼẽ ogia pe Kuérpo Governántepe. (Elee Juan 17:17). Rrevísta Ñemañaha 1 de junio de 1973 osẽ vaʼekue ingléspe, heʼi: “¿Ikatúpa ojevautisa umi tapicha ndopoíriva sigarríllo térã nákogui?”. Upéi orresponde ko porandu: “La Biblia ohechauka ndaikatuiha ojevautisa peichagua persóna”. Upéi osita unos kuánto téxto bíblico ha oexplika mbaʼérepa umi persóna ndopoiséiva ko vísiogui, oñemosẽmante vaʼerã kongregasióngui  (1 Cor. 5:7; 2 Cor. 7:1). Ko rrégla ningo nomoĩri yvyporakuérante, síno ou “Ñandejáragui, omandáva Iñeʼẽ rupive”. Ndaipóri ni peteĩ rrelihión oĩva dispuésto ojapopaitévo la Biblia heʼíva, koʼýte ijetuʼútaramo isegidorkuérape. Peteĩ lívro de rrelihión Estados Unidosgua heʼi: “Umi líder kristiáno pyʼỹinte orrevisa umi mbaʼe omboʼéva irrelihión, ikatu hag̃uáicha okambia oiméramo ihentekuérape ijetuʼúta oguerovia hag̃ua térã ndogustáirõ chupekuéra”. Péro pe Kuérpo Governánte ndojesegíri la majoría opensávarente, síno oheja Ñandejára Ñeʼẽ ogia chupekuéra. Upéva ohechauka porã Jehová ogiaha avei ipuévlope ñane tiémpope.

“PENEMANDUʼÁKENA UMI PENEMOAKÃVARE”

16. ¿Mbaʼéichapa ikatu ñanemanduʼa pe Kuérpo Governántere?

16 (Elee Hebreos 13:7). La Biblia heʼi ñanemanduʼa hag̃ua umi ñanemoakãvare. ¿Mbaʼéichapa jajapokuaa upéva? Ikatu ñañemboʼe pe Kuérpo Governántere (Efes. 6:18). Haʼekuéra ningo oreko heta rresponsavilida, por ehémplo omoĩ vaʼerã pe aliménto espirituál, odirihi vaʼerã pe predikasión ojejapóva ko yvy tuichakuére ha oñangareko vaʼerã umi kontrivusión oñemeʼẽvare Jehová organisasiónpe g̃uarã. Jahechaháicha, oikotevẽterei hikuái ñañemboʼe hesekuéra.

17, 18. a) ¿Mbaʼéichapa jahechauka jasegiha umi gía omeʼẽva ñandéve pe Kuérpo Governánte? b) ¿Mbaʼérepa ikatu jaʼe japredikáramo jaapojaha pe Kuérpo Governánte ha Jesúspe?

17 ¿Mbaʼéichapa ikatu avei ñanemanduʼa pe Kuérpo Governántere? Jasegívo umi instruksión ha gía omeʼẽva ñandéve. Kuérpo Governánte ñandegia umi puvlikasión, rreunión ha asambléa rupive. Avei onombra superintendénte de sirkuíto, ha umi superintendénte onombra ansianokuérape. Koʼã kuimbaʼe osegi porãramo umi instruksión omeʼẽva pe Kuérpo Governánte, ohechauka imanduʼaha hína hesekuéra. Ñande avei ikatu jahechauka jarrespetaha pe ñanemoakãvape, Jesúspe, ñaneñeʼẽrendúvo umi kuimbaʼe haʼe oipurúvape koʼã tiémpope (Heb. 13:17).

18 Jahechauka avei ñanemanduʼaha pe Kuérpo Governántere, ñañehaʼãvo jajapo ikatúva guive jaapoja hag̃ua pe predikasión. Hebreos 13:7-pe ojejerure asy umi kristiánope osegi hag̃ua umi omoakãva ehémplo. Pe Kuérpo Governánte ohechauka ojerovia mbareteha ha omotenonde pe predikasión. Ha ñande, ¿jaapojápa chupekuéra ko tembiapo iñimportantetévape? Oimérõ jajapo hína upéva, javyʼáta ñahendúvo la Jesús heʼíva ñandéve: “Pejapóvo iporãva peteĩ koʼã che ermáno michĩvéva rehehápe jepe, cherehehápe pejapo hína” (Mat. 25:34-40).

19. ¿Mbaʼérepa nde reĩ desidído resegi ñande Líder Jesúspe?

19 Jesús oho rire yvágape ndohejareíri vaʼekue isegidorkuérape (Mat. 28:20). Haʼe oikuaa porã pe espíritu sánto, umi ánhel ha Ñandejára Ñeʼẽ oipytyvõ hague chupe odirihi hag̃ua idisipulokuérape oĩrõ guare ko yvy ape ári. Upéicha avei haʼe oipytyvõ pe tembiguái jeroviahápe koʼã tiémpope. Pe Kuérpo Governánte osegi “pe Ovecharaʼýpe toho ohohápe” (Apoc. 14:4). Ñande avei jasegi jave umi instruksión omeʼẽva pe Kuérpo Governánte, añetehápe jasegi hína ñande Líderpe, Jesús. Koʼẽrõitéma haʼe ñandegiáta ikatu hag̃uáicha jahupyty pe jeikove opaveʼỹva (Apoc. 7:14-17). Ndaipóri ni peteĩ yvypóra ikatu vaʼerã opromete ñandéve upéva.

^ párr. 3 Amalisia Jehová oipota kuri oĩ 12 apóstol orrepresentáva umi “doce ita omopyendáva” pe Jerusalén Pyahu (Apoc. 21:14). Upévare, omano rire umi 12 apóstol iñeʼẽrendúva, natekotevẽvéima kuri ojeelehi jey ótro 12-pe.

^ párr. 8 Áño 1955 guive, ko sosieda oñembohéra Watch Tower Bible and Tract Society of Pennsylvania.

^ párr. 14 Ehecha pe lívro “Testimonio cabal” del Reino de Dios, páhina 58 ha 59.