Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Febrero de 2017

Jesús sakrifísio: peteĩ rregálo ijojahaʼỹva oúva Jehovágui

Jesús sakrifísio: peteĩ rregálo ijojahaʼỹva oúva Jehovágui

“Opa mbaʼe porã ha rregálo hekopeguáva ou [Ñandejáragui]” (SANT. 1:17).

PURAHÉI: 148, 109

1. ¿Mbaʼépa ojehupyty pe rreskáte rupive?

JESÚS sakrifísio rupive ojehupyty heta mbaʼe porã. Por ehémplo, omeʼẽ yvyporakuérape oportunida oikove hag̃ua vyʼápe opa ára g̃uarã. Avei, umi ohayhúva pe tekojoja ikatúta oike Ñandejára família apytépe. Péro ndahaʼéi ningo koʼã mbaʼénte la ojehupytýva Jesús sakrifísio rupive. Ikatúta avei oñesolusiona yvágape ha ko yvy ape ári ambue mbaʼe iñimportantetereíva (Heb. 1:8, 9).

2. a) ¿Mbaʼe mbaʼépa heʼi Jesús pe padrenuéstrope oñekumplítava yvágape ha ko yvy ape ári? (Ehecha pe taʼanga oĩva iñepyrũme). b) ¿Mbaʼépa ñahesaʼỹijóta ko artíkulope?

2 Dos áño Jesús omano mboyve, omboʼe idisipulokuérape oñemboʼe hag̃ua kóicha: “Ore Ru reiméva yvágape, toñemomarangatu nde réra. Tou ne Rréino, tojejapo ne rembipota yvy ape ári yvagapeguáicha” (Mat. 6:9, 10). Ko artíkulope jahecháta mbaʼéichapa pe rreskáte oipytyvõ mbohapy mbaʼépe: 1) oñesantifika hag̃ua Jehová réra, 2) Ñandejára Rréino  ogoverna hag̃ua, ha 3) oñekumpli hag̃ua Jehová propósito.

“TOÑEMOMARANGATU NDE RÉRA”

3. a) ¿Mbaʼépa orrepresenta Ñandejára réra? b) ¿Mbaʼéichapa Satanás omongyʼa Jehová réra?

3 Primeroite voi, pe padrenuéstrope Jesús ojerure toñesantifika Jehová réra. Upéva heʼise oipotaha ojerrespeta upe téra, pórke orrepresenta Ñandejárape voi ha ohechauka mbaʼeichagua persónapa haʼe. Jehová ningo pe persóna ipoderosove ha ihustovéva oĩva ko univérsope. Jesús ohenói chupe “che Ru marangatu” (Juan 17:11). Ñandejára imarangatu, upévare opa mbaʼe ojapóva oĩ porã, umíva apytépe ileikuéra. Péro Hardín de Edénpe Satanás okuestiona pe derécho Jehová orekóva omoĩ hag̃ua léi yvyporakuérape. Haʼe ijapu oheja vai hag̃ua Jehovápe, ha péicha omongyʼa upe téra porãite (Gén. 3:1-5).

4. ¿Mbaʼéichapa Jesús osantifika Ñandejára réra?

4 Jesús ndojoguaiete Satanáspe, haʼe ohayhu ipyʼaite guive Itúa réra ha ojapo opa ikatúva osantifika hag̃ua (Juan 17:25, 26). ¿Mbaʼéichapa haʼe omomarangatu Ñandejára réra? Umi mbaʼe ojapo ha omboʼévare. Péicha Jesús oipytyvõ umi héntepe ohechakuaa hag̃ua Jehová léi ihustoha, ha entéro mbaʼe heʼíva ñandéve jajapo hag̃ua haʼeha ñanevenefisiorãnte (elee Salmo 40:8-10). Jesús ifiél Jehovápe, jepe Satanás káusare heta osufri omanótarõ guare. Péicha Jesús ohechauka peteĩ kuimbaʼe perfékto ikatuha ojapo opa mbaʼe Jehová oipotáva.

5. ¿Mbaʼéichapa ikatu ñamomarangatu Jehová réra?

5 ¿Mbaʼéichapa ñande ikatu jahechauka jahayhuha Jehová réra? Umi mbaʼe jajapóvare. Jehová oipota ñanderekomarangatu (elee 1 Pedro 1:15, 16). Upévare jaadora chupe añoite ha ñaneñeʼẽrendu ñande pyʼaite guive. Ha oĩramo jepe ñandepersegíva, ñañehaʼãmbaite jaiko Jehová oipotaháicha. Ñaneñeʼẽrendu jave chupe, ñambotuicha hína héra (Mat. 5:14-16). Avei, péicha jahechauka umi léi haʼe omeʼẽva iporãha ha Satanás haʼeha peteĩ tekove japu. Sapyʼánte ningo jajavy ñaneimperfékto rupi, péro péicha jave ñañarrepenti ha ñañehaʼãmbaite ani hag̃ua jajapove mbaʼeve omongyʼátava Jehová réra (Sal. 79:9).

6. ¿Mbaʼéicha rupípa ikatu ñanderekojoja Jehová renondépe ñaneimperféktoramo jepe?

6 Oiméramo ñande haʼe unhído térã ñaime “ambue ovechakuéra” apytépe, Jehová operdona ñande pekádo jajeroviáramo Jesús sakrifísiore. Haʼe oasepta isiérvoramo umi oñemeʼẽvape chupe. Umi unhído hekojoja Jehová renondépe, ha haʼe oreko chupekuéra itaʼýraramo. Avei umi “ambue ovechakuéra” hekojoja henondépe, ha oiko chuguikuéra Ñandejára amígo (Juan 10:16; Rom. 5:1, 2; San. 2:21-25). Pe rreskáte rupive, koʼág̃ama voi ikatu ñaime porã ñande Túa renondépe ha ñasantifika héra.

“TOU NE RRÉINO”

7. ¿Mbaʼépa ojapóta Ñandejára Rréino Jesús sakrifísio rupive?

7 Pe padrenuéstrope Jesús heʼi: “Tou ne Rréino”. ¿Mbaʼépa ojapóta Ñandejára Rréino Jesús sakrifísio rupive? Ko goviérnope oĩ Jesús ha 144.000 persóna ojeporavo vaʼekue yvyporakuéra apytégui. Pe rreskáte rupive koʼã persóna ikatu orresusita yvágape (Apoc. 5:9, 10;  14:1). Upépe oikóta chuguikuéra rréi ha saserdóte, ha ogovernáta ko yvy Jesús ndive 1.000 áño pukukue. Upe tiémpo aja, Jehová oipurúta Irréino ojapo hag̃ua ko yvýgui peteĩ paraíso ha oipytyvõta yvyporakuérape ohupyty hag̃ua perfeksión. Upe rire, entéro Ñandejára siervokuéra, tahaʼe umi oikóva yvágape térã ko yvy ape ári haʼétama peteĩ famíliante (Apoc. 5:13; 20:6). Jesús ohundietéta Satanáspe ha oipeʼapaitéta umi provléma oĩva ikáusare (Gén. 3:15).

8. a) ¿Mbaʼéichapa Jesús oipytyvõ idisipulokuérape ontende hag̃ua Ñandejára Rréino iñimportantetereiha? b) ¿Mbaʼéichapa ikatu jahechauka jaapojaha Ñandejára Rréino?

8 Jesús oipytyvõ idisipulokuérape ontende hag̃ua Ñandejára Rréino iñimportantetereiha. ¿Mbaʼéichapa ojapo upéva? Ojevautisa riremínte oñepyrũma opredika oparupiete “umi marandu porã oñeʼẽva Ñandejára Rréinore” (Luc. 4:43). Avei heʼi idisipulokuérape oikuaauka hag̃ua héra “mombyryvehápe ko yvy tuichakuére” (Hech. 1:6-8). Ñane tiémpope, pe predikasión rupive heta persóna oreko oportunida ontende hag̃ua mbaʼépa añetehápe pe rreskáte, ha mbaʼépa ojapo vaʼerã hikuái oiko hag̃ua Ñandejára Rréino poguýpe. Ñaipytyvõvo umi unhídope opredika hag̃ua umi marandu porã oparupiete ko yvy ape ári, jahechauka hína jaapojaha Ñandejára Rréino (Mat. 24:14; 25:40).

“TOJEJAPO NE REMBIPOTA”

9. ¿Mbaʼéicha rupípa ikatu jajerovia Ñandejára okumplitaha katuete ipropósito yvyporakuérape g̃uarã?

9 Pe padrenuéstrope Jesús heʼi avei: “Tojejapo ne rembipota”. Jehová heʼíramo oikotaha peteĩ mbaʼe, katuete oñekumplíta (Is. 55:11). Satanás opuʼã vaʼekue Jehováre, péro upéva ndojokomoʼãi chupe okumpli hag̃ua ipropósito. ¿Mbaʼépa rakaʼe Ñandejára propósito ko yvýpe g̃uarã? Haʼe oipota vaʼekue Adán ha Eva familiare perfékto omyenyhẽ ko yvy (Gén. 1:28). Adán ha Eva omanórire ifamília mboyve, noñekumplimoʼãi kuri Ñandejára propósito ko yvýpe g̃uarã. Upévare Jehová opermiti kuri chupekuéra ifamília. Entéro ojeroviáva Jesús sakrifísiore oreko oportunida ohupytývo perfeksión ha jeikove opaveʼỹva. Jehová ohayhu yvyporakuérape ha oipota oiko pára siémpre.

10. ¿Mbaʼe esperánsapa oreko umi omano vaʼekue?

10 Hetaiterei ningo oĩ omanóva oikuaaʼỹre Jehovápe, péro Jesús sakrifísio rupive orresusitáta hikuái ha orekóta oportunida oaprendévo Ñandejáragui ha oikovévo opa ára g̃uarã (Hech. 24:15). Añetehápe Jehová ndoipotái avave omano. Haʼe rupive ningo entéro persóna oikove, upévare omoingove jey vove umi omano vaʼekuépe, Jehová haʼéta Ituakuéra (Sal. 36:9). Ndareíri Jesús heʼi Jehová haʼeha ñande Ru yvagapegua (Mat. 6:9). Jehová oenkarga Jesúspe omoingove jey hag̃ua umi omano vaʼekuépe (Juan 6:40, 44). Upévare Jesús heʼi: “Che hína pe ñemoingove jey ha che rupive oikove jey umi hénte” (Juan 11:25).

11. ¿Mbaʼépa Jehová oipota ojapo pe aty guasu?

11 Jesús heʼi vaʼekue avei: “Oimeraẽ ojapóva Ñandejára rembipota, upéva hína che ermáno, che ermána ha che sy” (Mar. 3:35). Jehová oipota “peteĩ aty guasu avave ndaikatúiva oipapa”  oservi chupe. Ko aty guasúpe oĩta persóna oúva opa tetã ha trívugui, ha oñeʼẽva opaichagua idióma. Haʼekuéra ojerovia Jesús sakrifísiore ha iñeʼẽrendu ipyʼaite guive Ñandejárape. Avei ombotuicha chupe ha heʼi: “Pe salvasión ou Ñandejáragui, oguapýva pe trónope ha pe Ovecharaʼy rupive” (Apoc. 7:9, 10).

12. ¿Mbaʼépa ñaaprende pe padrenuéstro Jesús omboʼe vaʼekuégui?

12 Pe padrenuéstro ñanemboʼe heta mbaʼe Jehovágui, ha avei umi mbaʼe oipotávagui yvyporakuérape g̃uarã. Primero, ñaaprende jajapo vaʼerãha opa ikatúva jarrespeta ha ñasantifika hag̃ua Jehová réra (Is. 8:13). Jesús sakrifísio rupive ikatu jajesalva ha oñemopotĩ Ñandejára réra. Jesús réra heʼise voi: “Jehová haʼe ñande Salvadór”. Segundo, ñaaprende Jehová ojevaletaha Irréinore ikatu hag̃uáicha umi iñeʼẽrendúva ohupyty heta vendisión. Ha tercero, ñaaprende avave ndaikatuiha ojoko Jehovápe ikatu hag̃uáicha okumpli hembipota (Sal. 135:6; Is. 46:9, 10).

JAHECHAUKÁKENA JEHOVÁPE ÑAMOMBAʼEHA JESÚS SAKRIFÍSIO

13. ¿Mbaʼépa jahechauka ñañemeʼẽvo Jehovápe ha jajevautisa?

13 Jahechauka hag̃ua jaagradeseha Jesús sakrifísio, ñañemeʼẽ vaʼerã Jehovápe ha jajevautisa. Péicha ñademostra jajeroviaha pe rreskátere ha ñande haʼeha “Jehová mbaʼe” (Rom. 14:8). Avei ñande vautísmo rupive, jajerure Ñandejárape “peteĩ konsiénsia potĩ” (1 Ped. 3:21). Jehová orresponde ñane orasión ñanemopotĩvo Jesús ruguy rupive. Ha ñaĩ segúro haʼe okumplitaha opa mbaʼe oprometéva (Rom. 8:32).

¿Mbaʼéichapa jahechauka jaagradeseha Jesús sakrifísio? (Ehecha párrafo 13 ha 14)

14. ¿Mbaʼérepa Jehová oipota jahayhu ñande rapichakuérape?

 14 Jehová ojapo opa mbaʼe oporohayhu rupi. Haʼe oipota entéro oservíva chupe osegi iñehémplo ha ohayhu hapichakuérape (1 Juan 4:8-11). Jahayhu jave ñande rapichakuérape, jahechauka ñande haʼeha ñande “Ru yvagapegua raʼy” (Mat. 5:43-48). La Biblia heʼi mbaʼépa pe mandamiénto iñimportantevéva: jahayhu Jehovápe. Ha pe segundo haʼe hína jahayhu ñande rapichakuérape (Mat. 22:37-40). Ñañeʼẽramo umi héntepe pe marandu porãre, jahechauka hína jahayhuha chupekuéra. Ñakumpli hag̃ua pe mandáto Jehová omeʼẽva ñandéve, jahayhu vaʼerã umi héntepe ha koʼýte ñane ermanokuérape (1 Juan 4:12, 20).

JEHOVÁ ÑANEVENDESI PE RRESKÁTE RUPIVE

15. a) ¿Mbaʼéichapa Jehová ñanevendesi koʼág̃arupi? b) ¿Mbaʼe vendisiónpa jahupytýta amo gotyove?

15 Jehová oasegura ñandéve operdonataha ñande pekádo jajeroviáramo Jesús sakrifísiore (elee Hechos 3:19-21). Jahecha haguéicha, pe rreskáte rupive Jehová oadopta unos kuánto yvypórape itaʼyrarã ikatu hag̃uáicha oho oiko yvágape. Koʼãva haʼe hína umi unhído (Rom. 8:15-17). Jehová oinvita avei umi “ambue ovechakuérape” oike hag̃ua ifamília apytépe ko yvy ape ári. Koʼã kristiánogui oiko rire yvypóra perfékto, ombohovái vaʼerã pe pruéva paha. Ohechaukáramo hikuái iñeʼẽrenduha, Jehová oadoptáta avei chupekuéra itaʼyrarã (Rom. 8:20, 21; Apoc. 20:7-9). Jehová ohayhúta itaʼyrakuérape opa árare, ha pe rreskáte rupive siémpre ñanevendesíta (Heb. 9:12). Añetehápe avave ndaikatúi oipeʼa ñandehegui ko rregálo ijojahaʼỹva Ñandejára omeʼẽva ñandéve.

16. ¿Mbaʼéichapa Jesús sakrifísio ñanemosãso?

16 Ñañarrepentíramo ñane rembiapo vaikuégui jaikéta Jehová família apytépe, ha Satanás ndaikatumoʼãi ojoko upéva. Jesús omeʼẽ hekove “una ves ha opa ára g̃uarã”. Upéva heʼise natekotevẽmoʼãveimaha ojejapo mbaʼeveichagua rreskáte, ni ojepaga ñanderehehápe (Heb. 9:24-26). Adán káusare ñamano, péro Jesús sakrifísio rupive ikatúta jahupyty jeikove opaveʼỹva. Pe rreskáte ñandesalva Satanás múndo añágui ha ñanepytyvõ ani hag̃ua jakyhyje pe ñemanógui (Heb. 2:14, 15).

17. ¿Mbaʼéichapa reñeñandu rehechávo mbaʼeichaitépa Jehová nderayhu?

17 Jehová promesakuéra katuete oñekumplíta, ani voi jaduda ni michĩmi upévagui. Umi léi oĩva pe naturalésape ningo nokambiái, péicha avei, Jehová arakaʼeve nokambiamoʼãi, ni nañambyasymoʼãi jajerovia haguére hese (Mal. 3:6). Haʼe ndahaʼéi omeʼẽnteva ñandéve pe vída, síno avei ñanderayhu. La Biblia heʼi: “Ñande jaikuaa ha jaguerovia Ñandejára ñanderayhuha. Ñandejára ningo mborayhu” (1 Juan 4:16). Ñande jaikuaa Jehová siémpre ojapoha la heʼíva, upévare ñaĩ segúro koʼẽrõitéma ko yvýgui oikotaha peteĩ paraíso neporãva. Yvyporakuéra katu osegíta Jehová ehémplo ha ojoayhúta. Upe tiémpope, entéro Ñandejára siervokuéra oikóva yvágape ha ko yvy ape ári ombotuicháta chupe ha heʼíta: “Ñandejárape tojehovasa ha toñemeʼẽ tekomimbipa, arandu, agradesimiénto, ñemombaʼe, podér ha puʼaka opa ára g̃uarã. Taupéicha” (Apoc. 7:12).