Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Febrero de 2017

 TEMBIASAKUE

Jehová imbaʼeporã orendive heta hendáicha noromereséiramo jepe

Jehová imbaʼeporã orendive heta hendáicha noromereséiramo jepe

CHE túa hérava Arthur ningo imitãite guive ohayhu Ñandejárape, upévare oservise kómo minístro metodísta. Péro olee rire umi puvlikasión ojapóva umi Estudiánte de la Biblia ha oñepyrũ rire oñerreuni hendivekuéra, ou okambiaite la ijidéa. Áño 1914-pe, papa orekópe 17 áño ojevautisa. Pe primera gérra mundiál aja, oñehenói chupe ojapo hag̃ua pe servísio militár, péro haʼe oñenega. Upévare oñemondo chupe 10 mésere kársel de Kíngstonpe, Ontario (Canadá). Upéi opoi jey chugui hikuái ha oñepyrũ oservi kómo kolportór, térã kómo prekursór.

Áño 1926-pe, papa omenda mamáre. Che sy héra Hazel Wilkinson. Che avuéla oñepyrũ oaprende la verda áño 1908-pe. Che anase el 24 de abril de 1931. Roĩ éntre 4 ermáno, ha che haʼe pe segundo. Papa siémpre ohayhu ha omombaʼeterei vaʼekue la Biblia, ha oñehaʼãmbaite ikatu hag̃uáicha ore rojapo avei upéva. Romombaʼeterei ningo Jehová servísio, upéicha rupi rosẽ meme ropredika de kása en kása en família (Hech. 20:20).

CHE TÚAICHA, AÑEMANTENE NEUTRÁL HA ASERVI DE PREKURSÓR

Áño 1939-pe, oñepyrũ pe segunda gérra mundiál. Un áño upe rire ou ojeproivi pe tembiapo ojapóva testígo de Jehová Canadápe. Umi oikéva eskuélape osaluda vaʼerã pe vandéra ha opurahéi vaʼerã pe ímno nasionál iklásepe. Sapyʼánte umi profesór oheja che ha che ermána Dorothy rosẽ pe klásegui upéicha jave. Péro peteĩ vuéltape, che profesór chemotĩse ha heʼi chéve chepyʼajuha. Upéi pe kláse rire, unos kuánto che kompañéro chembyepoti ha chereity yvýpe. Péro upéva nachemokangýi, síno chemokyreʼỹve guei arrespeta hag̃ua Ñandejárape cheruvicháramo, yvypórape rangue (Hech. 5:29).

 Julio de 1942-pe, arekópe 11 áño ajevautisa peteĩ gránhape, peteĩ tánkepe. Pe vakasión tiémpope, ajapómi che prekursorádo de vakasión, koʼág̃a hérava prekursorádo auxiliár. Peteĩ vuéltape, mbohapy ermáno ha che roho mombyry nórte gotyo Ontáriope ropredika hag̃ua umi leñadór oikóvape upérupi.

El 1 de mayo de 1949 añepyrũ aservi kómo prekursór rregulár. Upe tiémpope ojejapo kuri traváho de konstruksión Betel de Canadápe, ha cheinvita hikuái ambaʼapo hag̃ua hendivekuéra. El 1 de diciembre guive aservi kómo betelita upe sukursálpe. Ambaʼapo pe impréntape ha aaprende aipuru pe prénsa plána. Unas kuánta semána ambaʼapo pyharekue, ha aimprimi peteĩ tratádo oñeʼẽva pe persekusión ohasávare Jehová puévlo Canadápe.

Upéi, ambaʼapo aja Departaménto de Servísiope, añemongeta vaʼerã unos kuánto prekursórndi oúva ovisita Betel oho mboyve oservi Quebécpe. Pe lugárpe ojepersegi kuri Testigokuérape. Upérõ guare aikuaa Mary Zazúlape, Edmontongua (Alberta). Ituakuéra oĩ vaʼekue pe iglésia ortodóxape ha ifiél hikuái la irrelihiónpe. Mary ha iñermáno ypykue hérava Joe ostudia la Biblia ha ndohejaséi la ijestúdio, upévare oñemosẽ chupekuéra hógagui. Mary ha Joe ojevautisa junio de 1951-pe, ha seis mése rire oñepyrũ iprekursorádo. Añemongetárõ guare Máryndi, ahecharamoiterei mbaʼeichaitépa ijespirituál imitãramo jepe. Chemanduʼa apensa hague: “Roho porãrõ hese, ikatu voi romenda mbaʼe”. Nueve mése upe rire romendáma katu, el 30 de enero de 1954. Upe semánape roñeinvita rorresivi hag̃ua entrenamiénto ikatu hag̃uáicha roservi kómo superintendénte de sirkuíto. Upéi, dos áñore rovisita umi kongregasión oĩva Ontáriope, nórte gotyo.

Upe tiémpope, pe predikasión oho porãiterei hese opárupi, upévare ojejerureve misionéro. Ore roʼe voi, ore paíspe roaguantáramo roʼyeterei jave pe inviérnope ha umi ñatiʼũ atýra pe veránope, ikatutaha rombohovái oimeraẽ mbaʼe oimeha lugárpe. Áño 1956-pe roho pe kláse número 27-pe Galaádpe. Júliope rojegradua ha noviémbrepe roĩma ore asignasiónpe Brasílpe.

ROSERVI MISIONÉRORAMO BRASÍLPE

Rog̃uahẽ hague Brasílpe, roñepyrũma roaprende portugués. Ñepyrũrã roñensaja mbaʼéichapa rosaludáta ha ropresentáta mbykymi umi rrevísta. Upéi rosẽma ropredika hag̃ua. Umi hénte oñatende porãramo orerehe, rolee chupekuéra peteĩ téxto bíblico heʼíva mbaʼéichapa ojeikóta Ñandejára Rréino poguýpe. Pe primera ves rosẽrõ guare, peteĩ kuñakarai oñeinteresaiterei pe mensáhere, upémarõ alee chupe Apocalipsis 21:3, 4. Péro peichaháguinte añedesmaja. Upérõ neʼĩra gueteri ajepokuaa  pórke hakueterei ha iñumeda, ha siémpre cheforsa upe klíma.

Roñeasigna siuda de Campos dos Goytacázespe. Koʼág̃a oĩ 15 kongregasión upépe. Péro upérõ oĩ vaʼekue peteĩ grúpo ha peteĩ kása misionálnte. Upépe oiko vaʼekue cuatro ermána: Esther Tracy, Ramona Bauer, Luiza Schwarz ha Lorraine Brookes (koʼág̃a Wallen). Che aipytyvõ vaʼekue ojejohéi hag̃ua umi ao ha ambyaty jepeʼa roñekosina hag̃ua. Peteĩ lunes pyhare, opa rire ore estúdio de Ñemañaha, rorresivi peteĩ visíta rohaʼarõʼỹva. Che rembireko oñeno pe sofápe ha romombeʼu ojupe mbaʼetekópa oho oréve upe díape. Upéi Mary opuʼã, ha osẽmi peteĩ mbói oĩ vaʼekue pe almoáda guýpe haʼe omoĩ haguépe iñakã. Tuichaiterei ningo roñemondýi ha rojukámante pe mbói.

Ohasa rire un áño roaprende hague portugués, roñepyrũ roservi pe sirkuítope. Roservi umi lugár ndaiporihápe elektrisida. Roke písope ha roviaha karrétape térã kavaju ári. Peteĩ jey roho trénpe peteĩ puévlope oĩva umi montañahárupi, ropredika hag̃ua umi território ndojehoguasuihápe. Pe sukursál omondo oréve 800 rrevísta roipuru hag̃ua predikasiónpe. Heta vése roju ha roho pe estasión de trénpe roguerahapa hag̃ua umi káha de rrevísta.

Áño 1962-pe, Brasil tuichakuére ojejapo pe Escuela del Ministerio del Reino. Seis mésere añeasigna aviaha hag̃ua cheaño koʼã lugárpe. Che aporomboʼe umi Escuela ojejapóva Manaos, Belém, Fortaleza, Recife ha Salvadórpe. Aimérõ guare Manáospe, aorganisa ojejapo hag̃ua peteĩ asambléa tres diagua peteĩ teátro de ópera ikonosídovape. Upérõ hetaiterei oky, upévare ndaiporiguasúi y potĩ royʼu hag̃ua, ha saʼi oĩ umi lugár ikatu hag̃uáicha umi ermáno oguapy okaru. Upémarõ aha añeʼẽ peteĩ ofisiál del ehérsitondi ha aexplika chupe la ore provléma. Haʼe ikalidaiterei, ha okonsegi y enterovépe g̃uarã. Avei ombou unos kuánto soldádo omoĩ hag̃ua mokõi kárpa guasu, ikatu hag̃uáicha ojepuru kómo kosina ha ojekaru hag̃ua upépe.

Che naiméi aja, Mary opredika umi lugár oĩháme heta negósio Portugálpe. Péro upérupi avave ndoikuaaséi mbaʼeve la Bíbliagui, entéronte oho upépe ogana hag̃ua pláta. Mary oñedesanimaite ha heʼi unas kuánta iñamígape: “Che aime dispuésta aservívo oimeha lugárpe, péro ndaiporietérõ káso mbaʼe aservíne Portugálpe”. Upe riremínte, rorresivi peteĩ kárta roñeinvitahápe roservi hag̃ua Portugálpe. Hiʼarive upe tiémporupi ojeproivi upépe pe predikasión. Mary ni noimoʼãi la oikóva, péro roasepta upe asignasión ha rova Portugálpe.

ORE ASIGNASIÓN PORTUGÁLPE

Áño 1964-pe rog̃uahẽ Lisbóape, Portugal. Pe polisía sekréta opersegi mbarete kuri umi Testígo upepeguápe. Upévare rohechakuaa iporãventeha  noroñekomunikái umi ermánondi. Primerorã roalkilánte peteĩ kotyʼi. Upéi rokonsegi ore visarã ha roalkila peteĩ departaménto. Cinco mése rire, hasypeve ikatu roho peteĩ rreuniónpe.

Ojeproivi rupi pe tembiapo ojapóva umi Testígo upe paíspe, oñembotypa umi Salón de Reino ha umi rreunión ojejapo ermanokuéra rógape. Umi polisía manterei oho umi ermáno rógape orrevisa hag̃ua la ikosakuéra. Hetaiterei ermáno ha ermánape ojegueraha jepe komisaríape oñenohẽ hag̃ua chuguikuéra informasión. Umi polisía omaltrata ha oovliga chupekuéra omombeʼu hag̃ua umi ermáno réra omoakãva umi rreunión. Upévare umi ermáno noñohenoivéima ojoapellídorupi, síno oipurúntema herakuéra ani hag̃ua ojepilla chupekuéra.

Ore ningo roipotaiterei umi ermáno osegi orresivi umi puvlikasión ikatu hag̃uáicha oaguanta. Upévare Mary okopia mákina de eskrivírpe umi artíkulo de estúdio osẽva Ñemañaháme ha avei ótra puvlikasión.

RODEFENDE PE MARANDU PORÃ UMI TRIVUNÁLPE

Junio de 1966-pe, pe trivunál oñatende peteĩ káso iñimportántevare Lisbóape. Entéro umi 49 ermáno kongregasión Feijogua, ojeakusa oasisti haguére peteĩ rreunión ilegálpe ojejapóva peteĩ ógape. Ikatu hag̃uáicha umi ermáno oĩ preparádo oñedefende hag̃ua pe trivunálpe, roñensaja umi mbaʼe ikatúva oñeporandu chupekuéra. Upearã che guaʼu la avogádo ointerrogáva chupekuéra. Péro rokalkula haguéicha voi, lastimósamente roperde la káso. Umi 49 ermáno ha ermána oho kárselpe, algúno oho 45 día ha oĩ ohóva 5 mése y médiore. Péro mediánte ko huísio ojepredika avei. Por ehémplo, pe huísio aja ore avogádo omensiona umi mbaʼe heʼi vaʼekue Gamaliel oĩva la Bíbliape (Hech. 5:33-39). Upéi pe huísio oñembohasa umi notísiape. Rovyʼaiterei roikuaávo upéi ore avogádo oñepyrũ hague ostudia la Biblia ha oasisti umi rreuniónpe.

Diciembre de 1966-pe, añeasigna aservi hag̃ua kómo superintendénte de sukursál, ha upépe heta ambaʼapo añatende hag̃ua umi káso legál. Rojapo opa ikatúva ropresenta hag̃ua váse legál ohechaukáva mbaʼérepa umi testígo de Jehová oreko derécho oadorávo Ñandejárape lívremente Portugálpe (Filip. 1:7). Amo ipahápe, el 18 de diciembre de 1974, oñemeʼẽ oréve pe permíso legál. Ermáno Nathan Knorr ha Frederick Franz ou pe séde mundiálgui okomparti hag̃ua orendeive ko notísia porãite. Upérõ ojejapo peteĩ rreunión tuicháva Oporto ha Lisbóape, ha oasisti 46.870 persóna.

Jehová rupive ikatu kuri ojepredika avei heta íslarupi oñeñeʼẽhápe portugés, umíva apytépe oĩ Azores, Cabo Verde, Madeira y Santo Tomé ha  Príncipe. Ohasávo pe tiémpo heta hetave Testígo oĩ umi lugár rupi, upéicha rupi oñembotuichavémante vaʼerã kuri pe sukursál. Oñetermina rire umi edifísio pyahu, el 23 de abril de 1988 ermáno Milton Henschel ojapo pe diskúrso de dedikasión. Upérõ oasisti 45.522 ermáno ha ermána, umíva apytépe 20 misionéro ha misionéra oservi vaʼekue Portugálpe ha oúva pe dedikasionrã.

ROAPRENDE HETA MBAʼE UMI ERMÁNO IJEROVIA MBARETÉVAGUI

Koʼã áño ohasa vaʼekuépe, Mary ha che rovyʼaiterei pórke roaprende heta mbaʼe umi ermáno ijerovia mbaretéva ehémplogui. Por ehémplo, ahárõ guare ermáno Theodore Jaracz ndive, haʼe ojapo aja peteĩ visíta de sóna, aaprende chugui peteĩ mbaʼe iñimportantetereíva. Pe sukursál rovisitaha ohasa peteĩ situasión ijetuʼuetereíva, ha umi ermáno oĩva pe Komitépe ojapóma opa ikatúva osolusiona hag̃ua. Haʼekuéra oñeñandu vaieterei pórke nokonsegíri mbaʼeve. Upémarõ ermáno Jaracz ombopyʼaguapy chupekuéra heʼívo: “Koʼág̃a haʼe hína pe tiémpo jaheja vaʼerãha ombaʼapo pe espíritu sánto”. Mary ha che rovisitárõ guare Brooklyn, ermáno Franz heʼi vaʼekue chéve peteĩ mbaʼe núnka ndacheresaraimoʼãiva. Unos kuánto ermáno rojerure kuri chupe konsého, ha haʼe heʼi oréve: “Toiko la oikóva, siémpre peime Jehová organisasión ykére. Pórke ko organisasión añoite opredika pe marandu porã Ñandejára Rréino rehegua Jesús omanda haguéicha”.

Mary ha che rovyʼa rosegi haguére ko konsého. Heta rrekuérdo porã roguereko rojapórõ guare visíta de sóna umi sukursálpe. Rovyʼaiterei roikuaa rupi heta ermáno ha ermána de diferénte eda, ha ikatu haguére roʼe chupekuéra Jehová omombaʼetereiha iservísio. Siémpre roñehaʼã kuri romokyreʼỹ chupekuéra osegi hag̃ua oservi Jehovápe.

Pyaʼeterei ningo ohasa la tiémpo, ha koʼág̃a che rembireko ha che roguerekóma mas de 80 áño. Mary oreko heta provléma de salu (2 Cor. 12:9). Ha roguereko avei ambueichagua provléma. Péro koʼã mbaʼe omombareteve ore fe, ha orepytyvõ roĩve hag̃ua desidído rosegitaha orefiél Jehovápe. Rojepyʼamongetávo umi mbaʼe rohasa vaʼekuére Jehová servísiope, rohechakuaa Jehová imbaʼeporã hague orendive heta hendáicha noromereséiramo jepe.  * (Elee pe nóta).

^ párr. 29 Ojeskrivi aja ko tembiasakue, ermáno Douglas Guest omano fiél Jehovápe el 25 de octubre de 2015.