“Brasil tuichakuére oĩ peteĩ veíkulo añoite orekóva parlánte ha ojepurúva al servísio del Señór, péro millones de persóna oikuaa ko veíkulo. Upéva hína pe ‘carro-sonante da Watch Tower’ ” (Nathaniel Yuille, 1938).

OÑEPYRŨVO pe dékada de 1930, saʼi gueteri ojepredika Brasílpe. Péro áño 1935-pe Joseph Rutherford, omoakãva pe predikasión upe tiémpope, orresivi peteĩ kárta omondóva chupe peteĩ matrimónio oikóva Brasílpe. Umíva hína Nathaniel ha Maud Yuille, oservíva de prekursór. Haʼekuéra ojeofrese “oho hag̃ua oimehápe ikatu hag̃uáicha opredika”.

Upérõ Nathaniel, haʼéva peteĩ inheniéro huviládo, oreko 62 áño. Haʼe oservi vaʼekue kómo direktór de servísio peteĩ kongregasiónpe, San Francisco, Califórniape (Estados Unidos). Upépe omoakã avei pe predikasión, ha heta oipuru kuri umi aparáto de sonído ikatu hag̃uáicha oikuaauka pe marandu porã. Upéi, ou rire Brasílpe, oñenombra chupe siérvo de sukursál de Brasil. Nathaniel iguapoiterei ha ikatupyry heta mbaʼépe, ha upéva oipytyvõ ko país tuichaitévape oñeñeʼẽhápe heta idióma.

Nathaniel ha Maud og̃uahẽ Brasílpe áño 1936-pe, ha ou avei hendivekuéra Antonio Andrade, peteĩ prekursór upéi oñepyrũva oservi kómo traduktór. Péro haʼekuéra nog̃uahẽi po nandi. Ogueru heta mbaʼe ideprovechoitereítava, por ehémplo 35 vitróla ha peteĩ kóche iparlánteva. Brasil ningo pe quinto país tuichavéva ko múndope, péro upe tiémpope oĩ 60 puvlikadór rupínte upe país tuichakuére. Upéicharõ jepe, ko grúpo michĩva ojevale koʼã aparátore opredika hag̃ua millones de persónape unos kuánto áñore.

Un mes og̃uahẽ haguépe Nathaniel ha Maud Yuille, ojejapóma pe primera asambléa de servísio Brasílpe, siuda de São Páulope. * Pyaʼe voi ojepurúma pe kóche orekóva parlánte. Amalisia Maud la omaneháva, ha oipuru meme pe veíkulo oanunsia hag̃ua pe diskúrso  púvliko ojejapótava pe asambleahápe. Upérõ oho 110 persóna ohendu hag̃ua pe diskúrso. Pe asambléa oipytyvõiterei umi ermánope ha omokyreʼỹ chupekuéra oñemotiempove hag̃ua predikasionrã. Oaprende hikuái mbaʼéichapa oipuru vaʼerã pe tarhéta ojepredika hag̃ua, umi puvlikasión ha pe vitróla ikatu hag̃uáicha oñemoĩ pype umi marandu porã oĩva alemán, español, húngaro, inglés, polaco ha upe rire portuguéspe avei.

Ko veíkulo orekóva parlánte omog̃uahẽ pe marandu porã millones de persónape Brasílpe

Áño 1937-pe ojejapo mbohapy asambléa de servísio São Páulope, Río de Janeiro ha Curitíbape. Umi ermáno oho de kása en kása, ha ogueraha avei hikuái pe kóche iparlánteva. Tiémpo rire, peteĩ mitãrusu hérava José Maglovsky, oskrivi: “Romoĩ umi puvlikasión bíblica peteĩ exividórpe, ha upe aja romoĩ pe kóche iparlántevape peteĩ mensáhe ojegravapyréva. Umi hénte osẽmba hogakuéragui oikuaaségui mbaʼépa la oikóva, ha ore roaprovecha ropredika chupekuéra”.

Umi vautísmo ojejapo umi rríorupi, ha umi hénte oúva ojahu omañajoa hesekuéra. Péicha jave ojeaprovechapaite avei ojepredika hag̃ua. Pe kóche iparlántevape oñemoĩ avei pe diskúrso de vautísmo ojapo vaʼekue ermáno Rutherford, ha ojetradusi portuguéspe. Umi hénte ikuriósova ojerepa pe veíkulore ha ojapysaka porã pe ojeʼévare. Upéi, umi ojevautisátava oike jave pe ýpe, oñemoĩ umi melodía del Reino oĩva idióma polácope. Umi ermáno avei opurahéi diferénte idiómape. Pe Anuario de 1938 omombeʼu: “Koʼã okasión oremomanduʼa pe Pentekostés rehe, káda uno oñeʼẽrõ guare iñidiómape”.

Domingokue umi asambléa rire, tiémpo porã ha tiémpo vaípe, katuete ojepuru pe kóche orekóva parlánte oñemoĩ hag̃ua umi diskúrso ojegravapyréva umi párke, várrio ha fávrikape oĩvape São Páulope ha umi siuda hiʼag̃uívape upégui. Una ves al mes, pe veíkulo oviaha 97 kilómetro opresenta hag̃ua peteĩ prográma bíblico peteĩ kolónia oikohápe 3.000 persónarupi orekóva lépra, opytáva noroeste gotyo São Páulogui. Tiémpo rire, upe lugárpe oñeforma peteĩ kongregasión oprogresa porãva. Ha umi puvlikadór upepegua hasykatúramo jepe, okonsegi permíso ikatu hag̃uáicha oho opredika ótra kolóniape oĩhápe avei heta lepróso.

Áño 1938 opa potávo, oñepyrũ og̃uahẽ umi gravasión ojejapóva idióma portuguéspe. Umi hénte ofesteha jave Omanóva Ára, umi ermáno ogueraha pe kóche iparlánteva káda sementériope, ha mas de 40.000 persóna ihentemanóva ohendu umi diskúrso ojegravapyréva hérava “¿Moõpa oĩ umi omanóva?”, ha avei ótro diskúrso hérava “Jehová”.

Heta líder rrelihiósope ostorvaiterei umi ermáno opredika haguére lívremente pe añetegua oĩva la Bíbliape. Upévare ojopy umi autoridápe oho hag̃ua ombogue umi gravasión. Pe ermána Maud Yuille omombeʼu peteĩ okasiónpe peteĩ saserdóte omboliga hague heta héntepe ou hag̃ua oñemanifesta pe lugár oĩháme pe kóche. Péro pe intendénte ha unos kuánto polisía opyta ohendupaite pe prográma. Hiʼarive pe intendénte ogueraha unos kuánto lívro. Upe díape ndaipóri ni peteĩ provléma. Pe Anuario de 1940 omombeʼu oĩramo jepe umi oñemoĩva ermanokuérare, áño 1939 haʼe hague “pe áño iporãvéva ikatu hag̃uáicha ojeservi pe Mburuvicha Tuichavévape ha ojekuaauka hag̃ua héra”.

Jahechaháicha pe famóso “carro-sonante da Watch Tower” tuicha oipytyvõ vaʼekue oñepyrũrõ guare oprogresa pe predikasión Brasílpe. Upe veíkulo rupive, millones de persóna ohendu pe marandu porã oñeʼẽva Ñandejára Rréinore. Oñevendémaramo jepe upe kóche áño 1941-pe, hetaiterei testígo de Jehová osegi opredika umi hénte ipyʼaporãvape ko país tuichaitévape (Manduʼarã oúva Brasílgui).

^ párr. 7 Koʼãichagua asambléape oñemboykeʼimi vaʼekue tiémpo ikatu hag̃uáicha umi ermáno ha ermána osẽ opredika.