Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Febrero de 2016

Eservi Jehovápe vyʼapópe

Eservi Jehovápe vyʼapópe

OÑEPORANDÚRAMO ndéve mbaʼe díapepa raʼe la revyʼave, ¿mbaʼépa eréta? Oĩ heʼíva ikasamiénto día. Ótro katu heʼi ovyʼaiterei hague onasérõ guare iprimér família. Péro oime vaʼerã pe día iñimportantevéva ndéve g̃uarã haʼe kuri pe rejevautisaha día. ¡Ajépa revyʼaite upérõ guare! Umi ermáno ipyʼaroryjoa rehechauka haguére rehayhuha Jehovápe nde pyʼaite guive, ne álma rugua guive ha opa ne arandu ha ne mbaretekue reheve (Mar. 12:30).

Rejevautisa guive, katuete rehasáma heta mbaʼe nembovyʼáva reservívo Jehovápe. Péro oĩ heta kristiáno ndodisfrutaguasuvéimava iservísiope. ¿Mbaʼérepa oiko upéva hesekuéra? ¿Mbaʼépa ikatu ñanepytyvõ jasegi hag̃ua jaservi Jehovápe vyʼapópe? Jahechamína.

MBAʼÉREPA HETA KRISTIÁNO NDOVYʼAVÉI

Pe marandu porã oñeʼẽva Ñandejára Rréinore ningo ñanembovyʼaiterei, pórke Jehová opromete ñandéve koʼẽrõitéma ohunditaha ko múndo aña ha omoĩtaha peteĩ paraíso. Sofonías 1:14 heʼi: “Hiʼag̃uíma Ñandejára ára guasu. Hiʼag̃uíma hína ha pyaʼe ou”. Upéicharõ jepe, ikatu jaju ñanekaneʼõ ñahaʼarõ hague heta tiémpore Jehová ára. Péro ñapensáramo péicha, ikatu ndajavyʼavéi ha nañanekyreʼỹvéi jaservívo Jehovápe (Prov. 13:12).

Iporã ningo jahasa tiémpo ñane ermanokuérandi, pórke upéva ñanemokyreʼỹta jaservi hag̃ua Jehovápe vyʼapópe. Ikatu voi hína oiko raʼe ñandehegui Testígo jahecha haguére mbaʼéichapa Jehová siervokuéra ikondúkta porã (1 Ped. 2:12). Péro jahecháramo peteĩ ermáno ouha hembiapo vai ha oñedisiplina chupe, ikatu ñañedesanima ha ndajavyʼavéi.

Ótra kósa ikatúva ñanemokangy haʼe hína Satanás múndo aña. Ko múndo ñanemboliga jareko hag̃ua heta hetave mbaʼerepy ha pláta, ha oipota jajogua umi mbaʼe añetehápe ni nañaikotevẽiva. Péro iporã ñanemanduʼa Jesús heʼi hague: “Avave ndaikatúi ombaʼapo tembiguáiramo mokõi patrónpe g̃uarã. Peteĩme ohayhúta ha pe ótrore ndaijaʼemoʼãi, peteĩre ojepokuaavéta ha pe ótrope omboykéta. Upéicha avei, peẽ ndaikatúi peiko Ñandejára rembiguáirõ ha avei peiko pláta rapykuéri” (Mat. 6:24). Ndaikatumoʼãi javyʼa jaservívo Jehovápe, jaikóramo jahupytyse opa mbaʼe oikuaveʼẽva ko múndo.

 JAVYʼÁKENA JASERVI HAGUÉRE JEHOVÁPE

Jahayhúramo Jehovápe, iservísio ndahaʼemoʼãi peteĩ kárga ñandéve g̃uarã (1 Juan 5:3). Jesús heʼi vaʼekue: “Peju che rendápe enterove peẽ pembaʼapo jejopy ha pendekárga pohýiva, ha che pombopiroʼýta. Pehupi pende ári che júgo ha peaprende chehegui. Che ningo ndachepochyreíri ha añemomirĩ che pyʼaite guive, upévare katuete pombopiroʼýta. Che júgo napendeforsamoʼãi ha che kárga ivevýi” (Mat. 11:28-30). Upeichaite ningo, ñande kristiáno ñañeñandu porã ha javyʼa jaservi haguére Jehovápe. Oĩ heta mbaʼe ñanemomýiva jaservi hag̃ua vyʼápe Jehovápe. Jahechamína mbohapy (Hab. 3:18).

Jaservi ñande Apohare ovyʼávape (Hech. 17:28; 1 Tim. 1:11). Enterove jaikuaa ñande jaikoveha Jehová rupivénte. Jajepyʼamongetáramo upévare, ñanepytyvõta jaservi hag̃ua chupe vyʼapópe, jepe aréma jajevautisa hague.

Héctor oñehaʼã osegi apredika ha opensa meme pe paraísore

Ñapensamíntena peteĩ kristiáno hérava Héctor situasiónre. Ko ermáno ningo oservi vaʼekue 40 áñore de superintendénte viahánte. Koʼág̃a “ijedáramo jepe”, osegi oservi Jehovápe vyʼapópe (Sal. 92:12-14, NM). Hembireko katu hasyháre oiko, upéicha rupi haʼe ndaikatuvéima ojapo heta mbaʼe ymave guaréicha. Péro ko ermáno ndoikói oñembyasyháre, síno siémpre ovyʼa. Haʼe orrekonose: “Hasy asy chéve ahechávo che rembireko koʼẽ koʼẽre oempeoraveha. Ha ijetuʼúramo jepe chéve akuida hese, ndahejái koʼã mbaʼe chedesanima, lomímonte adisfruta Ñandejára servísiope. Aikuaa porã maʼerãpa Jehová ñandeapo vaʼekue, ha upéva chepytyvõ ahayhuve ha aservi hag̃ua Ñandejárape che pyʼaite guive. Upévare añehaʼã asegi apredika ha apensa meme pe paraísore, pe esperánsa iporãitévare. Koʼã mbaʼe chepytyvõ asegi hag̃ua aservi Jehovápe vyʼapópe”.

Jehová ombou Itaʼýrape omano hag̃ua ñanderehehápe. La Biblia heʼi: “Ñandejára ohayhuetereígui pe múndo omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva” (Juan 3:16). Jarekóramo fe ko rregálo porãite Jehová omeʼẽvare ñandéve, haʼe ikatu operdona ñande pekádo ha omeʼẽ ñandéve pe jeikove opaveʼỹva. ¡Ajépa tuichaite mbaʼe ojapo Ñandejára ñanderehehápe! Ñandeagradesídoramo Jehovápe, katuete jaservíta chupe vyʼapópe.

Jesús odesidi oiko sensillomi ha oservi Jehovápe vyʼápe heta áñorema

Peteĩ ermáno oikóva Méxicope, hérava Jesús, omombeʼu: “Che ningo yma vúrroicha ambaʼapo. Sapyʼánte ajagarra cinco túrno de segído, ndahaʼéi aikotevẽgui, síno agana hag̃ua hetave pláta. Péro upéi aikuaa Jehovápe ha aaprende haʼe omeʼẽ hague Itaʼýra ohayhuetéva ñanderehehápe. Upéva  chemomýi aservise hag̃ua Ñandejárape ha apromete añemeʼẽtaha chupe. Ha ojapóramo jepe 28 áñoma ambaʼapo hague pe emprésape, adesidi arrenunsia. Koʼág̃a ojapóma heta áño aservi hague Jehovápe de tiémpo kompléto ha avyʼaiterei”.

Ñande jaservíva Jehovápe ñanderekopotĩ. ¿Mbaʼéichapa reñekomporta vaʼekue reikuaa mboyve Jehovápe? Apóstol Pablo heʼi vaʼekue umi kristiáno Romaguápe: “Peẽ haʼe vaʼekue pekádo rembiguái, péro koʼág̃a peneñeʼẽrendu pende pyʼaite guive Ñandejárape ha pejapo meme haʼe penemboʼe vaʼekue”. Upéicha rupi, koʼã kristiáno oreko kuri esperánsa oikove hag̃ua opa ára g̃uarã (Rom. 6:17-22). Ñande avei jarrespeta Ñandejára mandamientokuéra. Upévare ndajaikói jasufri ñanderekokyʼa, térã ñandeviolénto haguére. ¡Ajépa javyʼaite jajelivra haguére koʼã mbaʼégui!

Jaime heʼi oñepyrũ hague ovyʼa oservi guive Jehovápe

Peteĩ ermáno hérava Jaime haʼe vaʼekue voxeadór oiko mboyve chugui Testígo. Avei ndoroviái vaʼekue oexistiha peteĩ Kreadór, síno oguerovia pe evolusión. Upéi oñepyrũ oho testígo de Jehová rreunionkuérape, ha ohecharamoiterei mbaʼeichaitépa ojoayhu umi ermáno. Upémarõ haʼe odesidi okambia oiko lája, péro ojerure Jehovápe toipytyvõmi chupe ojerovia hag̃ua hese. Jaime heʼi: “Saʼi saʼípe aaprende Ñandejára haʼeha peteĩ Túa ñanderayhuetereíva ha oporoporiahuverekóva. Ahechakuaa ajehekyiha heta mbaʼe vaígui cheñeʼẽrendu haguére Jehovápe. Che nakambiáirire, amanóma vaʼerãmoʼã, oiko haguéicha unos kuánto che kompañerokue de voxéore. Ikatu voi haʼe añepyrũ hague avyʼa aservi guive Jehovápe”.

ANÍKENA ÑAÑENTREGA

¿Mbaʼépa jajapo vaʼerã ñahaʼarõ aja og̃uahẽ pe tiémpo oñehunditahápe ko múndo aña? Ñande ningo koʼág̃ama jajapo jaikóvo Ñandejára oipotáva ha jareko esperánsa jaikovévo opa ára g̃uarã. Upévare, jasegíkena ko konsého: “Akóintekena jajapo iporãva, péicha og̃uahẽ vove pe tiémpo katuete ñamonoʼõta nañanekaneʼõiramo” (Gál. 6:8, 9). Jajerurékena Jehovápe tañanepytyvõ, ha ñañehaʼãmbaite jagueropuʼaka opa mbaʼe oúva. Avei iñimportánte jareko umi kualida ñaikotevẽtava ñaaguanta hag̃ua pe ‘jehasa asy guasúpe’. Ha jasegíkena jaservi Jehovápe vyʼapópe (Apoc. 7:9, 13, 14; Sant. 1:2-4).

Ñaaguantáramo, Jehová katuete ñanerrekompensáta. ¿Mbaʼérepa jaʼe upéva? Pórke haʼe oikuaa opa mbaʼe jajapóva hesehápe ha oikuaa jahayhuha chupe ha ñamombaʼeha héra. Jasegíramo jaservi chupe vyʼapópe, ñañeñandúta David oñeñandu haguéicha. Haʼe heʼi vaʼekue: “Che siémpre apensa Jehováre. Haʼete voi arekóva chupe che renondépe tódo el tiémpo. Haʼe oĩ che ykére cheprotehe hag̃ua. Ndaipóri chereity vaʼerã. Upévare chepyʼarory ha avyʼaiterei” (Sal. 16:8, 9, NM).