“Ani rekyhyje pórke che aĩ nde ykére. Che ningo nde Jára, upévare ani rejepyʼapy. Che romombaretéta ha roipytyvõta” (IS. 41:10).

PURAHÉI 7 Jehová, nde añoite oreprotehe

MBAʼE REHEPA ÑAÑEʼẼTA *

1, 2. a) ¿Mbaʼéichapa oipytyvõ ermána Yoshíkope Isaías 41:10 heʼíva? b) ¿Mávapepa ikatu avei oipytyvõ ko téxto?

PETEĨ ermána hérava Yoshiko orresivi kuri peteĩ notísia ivaietereíva. Umi doktór heʼi chupe omano mbotaitemaha, ha upearã ofaltaha unos kuánto mésentema. ¿Mbaʼéichapa oñeñandu ñane ermána? Yoshiko imanduʼa peteĩ téxto ogustaitereívare chupe: Isaías 41:10 (elee). Upéi trankílo porãnte heʼi umi doktórpe haʼe ndokyhyjeiha pórke oikuaa Jehová oĩha ijykére ha oñakaramaha ipóre. * Pe mensáhe porãite jatopáva ko versíkulope oipytyvõ Yoshíkope ojerovia hag̃ua Jehováre ipyʼaite guive. Ha ñandéve ikatu avei ñanepytyvõ ani hag̃ua jajedesespera jahasáramo jepe heta mbaʼe ijetuʼuetereíva. Ñantende porãve hag̃ua, ñepyrũrã ikatu jahecha mbaʼérepa Ñandejára omeʼẽ raʼe upe mensáhe proféta Isaíaspe.

Tenonderã, Jehová oskrivika kuri Isaíaspe ko mensáhe ikatu hag̃uáicha okonsola ha omokyreʼỹ umi judío ojeguerahátavape Babilóniape. Péro Jehová oheja avei la Bíbliape ko mensáhe ikatu hag̃uáicha oipytyvõ entéro isiervokuérape koʼag̃aite peve (Is. 40:8; Rom. 15:4). Ñande ningo jahasa hína heta ‘situasión ijetuʼúva ha hasýva jagueropuʼaka hag̃ua’. Upévare koʼýte ñaikotevẽterei ko mensáhe porãite oĩva lívro de Isaíaspe (2 Tim. 3:1).

3. a) ¿Mbaʼe promésapa jatopa Isaías 41:10-pe, haʼéva pe téxto ko áñope g̃uarã? b) ¿Mbaʼérepa ñaikotevẽte koʼã promésare?

Ko artíkulope ñaanalisáta mbohapy mbaʼe Jehová oprometéva ha jatopáva Isaías 41:10-pe. Koʼã promésa katuete omombaretetereíta ñande jerovia. ¿Mbaʼe mbaʼépa la oprometéva? Primero, oĩtaha ñande ykére. Segundo,  haʼeha ñande Dios. Ha tercero, ñanepytyvõtaha. ¿Mbaʼérepa ñaikotevẽte koʼã promésare? * Pórke jahasa hína hetaiterei mbaʼe ijetuʼúva, ohasa haguéicha avei ermána Yoshiko. Avei heta ñaneprovléma oiko haguére hetaiterei mbaʼe vai ko múndope. Ha heta hendárupi, umi goviérno imbaretéva oñemoĩ voi ñane kóntrape pono ñakumpli Jehová rembipota. Upévare, ñañeʼẽmína peteĩteĩ koʼã mbaʼe Jehová oprometévare ñandéve.

“CHE AĨ NDE YKÉRE”

4. a) ¿Mbaʼépa hína pe primera promésa Jehová ojapóva? (Ehecha avei pe nóta). b) ¿Mbaʼéichapa Jehová ohechauka ñanderayhuha? c) ¿Mbaʼéichapa reñeñandu reikuaávo upéva?

4 ¿Mbaʼépa Jehová opromete ñanekonsola hag̃ua? Primero, haʼe heʼi ñandéve: “Ani rekyhyje pórke che aĩ nde ykére”. * Haʼe opromete oĩtaha ñanendive, ha ojapo upéva ohechaukávo ñanderayhuha ha siémpre oñangarekoha ñanderehe. Ehechamína mbaʼeichaite pevépa Jehová ñanderayhu heʼívo: “Nde ningo neporãiterei chéve g̃uarã, che romombaʼe ha rohayhueterei” (Is. 43:4). Jehová ningo siémpre ñanderayhúta ha ndaipóri mbaʼeve ni avave ikatúva ojoko upéva. Haʼe siémpre ifiél ñanendive (Is. 54:10). Jaikuaávo haʼe ñane amigoha ha ñanderayhuha, upéva ñanembopyʼaguasu. Haʼe oñangarekóta ñanderehe, oñangareko haguéicha iñamígo Abrán (Abrahán) rehe. Jehová heʼi vaʼekue voi chupe: “Ani rekyhyje Abrán, che roprotehéta peteĩ eskúdoicha” (Gén. 15:1).

Jehová ñanepytyvõramo, ikatúta jagueropuʼaka oimehaichagua situasión ojoguáva umi rríope térã ñanderapýva tatáicha (Ehecha párrafo 5, 6) *

5, 6. a) ¿Mbaʼérepa ikatu jaʼe Jehová ñanepytyvõseha jahasa jave umi mbaʼe ijetuʼúva? b) ¿Mbaʼépa ikatu ñaaprende Yoshiko ehémplogui?

Ñande jaikuaa Jehová ñanepytyvõsetereiha jahasa jave umi situasión ijetuʼúva, pórke opromete ñandéve: “Nde rehasa vove oĩhárupi y, che aĩta nendive. Ha rehasa vove umi rríore, nderejahogamoʼãi. Rehasa vove tata mbytérupi, nde nderekaimoʼãi, pe tata nanderapymoʼãi ni michĩmi” (Is. 43:2). ¿Mbaʼépa heʼise ko téxto?

Jehová ndeʼíri oipeʼataha ñande rapégui umi mbaʼe ijetuʼúva ikatúva jahasa. Upéicharõ jepe, haʼe nopermitimoʼãi ñandeahoʼi umi provléma ojoguáva ‘umi  rríope’. Avei ndohejamoʼãi ñandeperhudika are umi pruéva ojoguáva ‘tatápe’. Jehová opromete oĩtaha ñanendive ha ñanepytyvõtaha jagueropuʼaka hag̃ua umichagua situasión. ¿Mbaʼéichapa ojapóta upéva? Haʼe ñanepytyvõta ani hag̃ua jajedesespera ni jakyhyje, péicha ikatúta jasegi ñandefiél tekotevẽtaramo jepe ñamano upe haguére (Is. 41:13). Ermána Yoshiko ohechakuaa vaʼekue siertoha upéva. Imemby omombeʼu: “Rohecharamoiterei mbaʼéichapa mama itrankíla kuri upe situasiónpe. Jehová añetehápe oipytyvõ chupe ikatu hag̃uáicha ipyʼaguapy. Omanoite peve osegi opredika umi enfermérape ha umi ótro hasývape. Oñeʼẽ chupekuéra Jehováre ha umi mbaʼe porãita haʼe oprometévare”. ¿Mbaʼépa ikatu ñaaprende Yoshiko ehémplogui? Ñande jajeroviáramo Jehová siémpre oĩtaha ñande ykére, katuete ñanembarete ha ñandepyʼaguasúta ñaaguanta hag̃ua umi mbaʼe ijetuʼúva.

“CHE NINGO NDE JÁRA”

7, 8. a) ¿Mbaʼépa pe segunda promésa jahechátava, ha mbaʼépa heʼise upéva? b) ¿Mbaʼérepa Jehová heʼi umi judío ojeguerahátavape Babilóniape ani hag̃ua ojepyʼapy? c) ¿Mbaʼe promésa jatopáva Isaías 46:3, 4-pepa ombopyʼaguapýne raʼe Jehová puévlope?

Jahechamína pe segunda promésa oskrivi vaʼekue Isaías. Upépe Jehová heʼi: “Che ningo nde Jára, upévare ani rejepyʼapy”. ¿Mbaʼépa heʼise “ani rejepyʼapy”? Pe idióma ojeskrivi haguépe la Biblia, pe palávra “jepyʼapy” heʼise “manterei ñamañaha ñande atukupe gotyo jakyhyjégui oikóramo g̃uarã ñanderehe álgo ivaíva”, térã “ñamañambaha opárupi ojapoháicha peteĩ persóna oĩva alérta”.

8 ¿Mbaʼérepa Jehová heʼi umi judío ojerahátavape Babilóniape ani hag̃ua ojepyʼapy? Haʼe oikuaa ipuévlo okyhyjetaha, pórke opakuévo umi 70 áño oiko hague hikuái Babilóniape, oúta kuri pe ehérsito medopersa oataka hag̃ua upe tetã. Jehová ojevale hesekuéra onohẽ hag̃ua ipuévlope Babilóniagui (Is. 41:2-4). Umi babilonio ha umi ótro tetã oikuaárõ guare iñenemígo oumaha hiʼarikuéra, oñehaʼã oñomokyreʼỹ hikuái ha heʼi ojupe: “Ani rekyhyje”. Avei oñepyrũ hikuái ojapo hetave taʼanga umi idioskuéragui, oimoʼãgui upéva oprotehetaha chupekuéra (Is. 41:5-7). Péro Jehová otrankilisa ipuévlope heʼívo: “Israel, nde ningo che siérvo, [péro umi ótro tetãnguéra ndahaʼéi]”. Heʼi avei: “Che ningo nde Jára, upévare ani rejepyʼapy” (Is. 41:8-10). Jahechaháicha, Jehová heʼi chupekuéra: “Che ningo nde Jára”. Upéicha ohechauka isiervokuérape ndahesaráiri hague chuguikuéra, pórke heʼi haʼéitiha Idiós ha haʼekuéra haʼéitiha ipuévlo. Jehová heʼi umi judíope: “Che poguerekóta che jyva ári ha posalváta”. Koʼã mbaʼe katuete omombareténe raʼe isiervokuérape oĩva Babilóniape (elee Isaías 46:3, 4).

9, 10. ¿Mbaʼérepa natekotevẽi jakyhyje? Emoĩ peteĩ ehémplo.

Koʼág̃arupi umi hénte koʼytevéntema ojepyʼapy pórke ko múndope amás día ivaive la situasión. Ñande ningo jahasánte avei umi mbaʼe ijetuʼúva, péro ñande natekotevẽi jakyhyje Jehová heʼi rupi ñandéve: “Che ningo nde Jára”. ¿Mbaʼérepa ñanembopyʼaguapyeterei upéva?

10 Ñamoĩmína peteĩ ehémplo: ñapensamína Juan ha Antonio oviahaha hína peteĩ aviónpe, péro hatãiterei rupi la yvytu, pe avión oñepyrũ okacha vaipa. Upévo oñehendu peteĩ heʼíva: “Pemoĩ porãke pene sinturón. Jahasa hína peteĩ torménta mbytérupi, péro ani pejepyʼapy”. Juan katu tuichaiterei oñemondýi ha heʼi: “¡Mbaʼéichaiko ndajajepyʼapymoʼãi!”. Péro ojerévo  omaʼẽ Antóniore, ohechakuaa haʼe oĩha trankílo ha ni vy ndojepyʼapyiha. Upémarõ oporandu chupe: “¿Mbaʼéichaiko nde la netrankiloite?”. Antonio katu opukavy ha heʼi chupe: “Pórke aikuaa porã pe pilótope. Haʼe ningo che túa”. Ha heʼi avei chupe: “Tamombeʼumína ndéve mbaʼéichapa che túa ha mbaʼeichaitépa omanehakuaa umi avión. Upéva katuete netrankilisáta”.

11. ¿Mbaʼe mbaʼépa ikatu ñaaprende pe ehémplogui?

11 ¿Mbaʼépa ikatu ñaaprende ko ehémplogui? Antónioicha avei, ñande jaikuaa porãiterei Jehovápe, ñande Ru yvagapegua. Jaikuaa haʼe ñanepytyvõtaha ñaaguanta hag̃ua umi situasión ijetuʼúva koʼã ára pahápe (Is. 35:4). Ñande jajerovia Jehováre ha upévare ikatu ñaime trankílo, umi hénte oikóramo jepe ojepyʼapyháre (Is. 30:15). Ojapo haguéicha avei Antonio, ñande ñamombeʼu ñande rapichakuérape mbaʼérepa ikatu avei ojerovia hikuái Ñandejárare. Upéicha haʼekuéra oikuaáta avei Jehová oĩtaha siémpre ijykerekuéra, tahaʼe haʼéva pe situasión ohasáva hikuái.

“CHE ROMOMBARETÉTA HA ROIPYTYVÕTA”

12. a) ¿Mbaʼépa pe tercera promésa jahechátava? b) ¿Mbaʼépa heʼise pe téxto oñeʼẽva Jehová ‘jyváre’?

12 Jahechamína koʼág̃a pe tercera promésa oskrivi vaʼekue Isaías. Upépe Jehová heʼi: “Che romombaretéta ha roipytyvõta”. Proféta Isaías heʼíma vaʼekue voi mbaʼéichapa Jehová omombaretéta ipuévlope heʼívo: “Ñandejára Jehová ogovernáva opa mbaʼe ou hína. Haʼe ningo ipoderosoiterei. Ijyvápe haʼe ogoverna hína” (Is. 40:10). La Bíbliape ojepuru jepi pe palávra “jyva” oñeñeʼẽ hag̃ua pe podér rehe. Upévare ko fráse ñanemomanduʼa Jehová haʼeha peteĩ Rréi ipoderosoitereíva. Haʼe ymaite guive oipuru vaʼekue ipodér oipytyvõ ha odefende hag̃ua isiervokuérape, ha koʼag̃aite peve haʼe omombarete ha oprotehe  umi ojeroviávape hese (Deut. 1:30, 31; Is. 43:10).

Ndaipóri árma ikatúva ipuʼaka ñanderehe Jehová oĩramo ñande ykére (Ehecha párrafo 12-16) *

13. a) ¿Mbaʼéicha javépa Jehová koʼytevéntema ñanemombarete? b) ¿Mbaʼe promésapa ñanemombarete ha ñanembopyʼaguasu?

13 Oĩ jave oñemoĩva ñane kóntrape, Jehová koʼýte okumpli pe ipromésa heʼíva: “Che romombaretéta”. Heta lugárpe ko múndo tuichakuére, ñane kontrariokuéra oñehaʼãmbaite ani hag̃ua japredika ha oipota voi ojeproivi umi mbaʼe jajapóva. Upéicharõ jepe, ñande ndahaʼéi la jajepyʼapyetereíva oiko jave koʼã mbaʼe. ¿Mbaʼéicha rupípa? Pórke Jehová opromete ñandéve peteĩ mbaʼe ñanemombaretéva ha ñanembopyʼaguasúva. Haʼe heʼi: “Tahaʼe haʼéva pe árma ojepurúva ne kóntrape, núnka nosẽporãmoʼãi” (Is. 54:17). Ko promésa ñanemomanduʼa mbohapy mbaʼe iñimportántevare.

14. ¿Mbaʼérepa ndajahecharamói vaʼerã oĩ jave oñemoĩva ñane kóntrape?

14 Primero, ñande jaikuaa oĩtanteha voi ndochaʼéiva ñanderehe haʼe haguére Cristo disípulo (Mat. 10:22). Jesús heʼi vaʼekue voi idisipulokuéra ojepersegi vaietereitaha koʼã ára pahápe (Mat. 24:9; Juan 15:20). Segundo, proféta Isaías heʼíva ohechauka porã ñane kontrariokuéra ndahaʼemoʼãi ndochaʼéinteva ñanderehe, síno oipurutaha voi hikuái heta árma ñane kóntrape. Por ehémplo, otaky vaieterei ñanderehe, oiko omosarambi hikuái umi mbaʼe haʼetévaicha la siértova péro amo ipahápe japúnteva avei, térã oñehaʼã voi ñanerundi hikuái (Mat. 5:11). Jehová ningo opermitíta haʼekuéra oipuru umi árma ñane kóntrape (Efes. 6:12; Apoc. 12:17). Upéicharõ jepe ñande ndajakyhyjéi vaʼerã. ¿Mbaʼérepa?

15, 16. a) ¿Mbaʼe rehepa tekotevẽ avei ñanemanduʼa, ha mbaʼéichapa Isaías 25:4, 5 ohechauka upéva? b) ¿Mbaʼéichapa Isaías 41:11, 12 ohechauka porã mbaʼépa oikóta umi oñemoĩvare ñanderehe?

15 Oĩ avei ótra kósa iñimportánteva ñanemanduʼa. Tercero, Jehová heʼi vaʼekue umi ‘árma oñemoĩva ñane kóntrape núnka nosẽporãmoʼãiha’. Peteĩ murálla ñandeproteheháicha  yvytu atãgui torménta jave, péicha avei Jehová ñandeprotehéta “umi iñañáva oataka jave” (elee Isaías 25:4, 5). Ñane enemigokuéra ndaikatumoʼãi ojapo ñanderehe peteĩ mbaʼe Jehová ndaikatumoʼãiva osolusiona (Is. 65:17).

16 Jehová avei ñanepytyvõ jajeroviave hag̃ua hese heʼívo ñandéve mbaʼépa oikóta umi oñemoĩvare ñanderehe (elee Isaías 41:11, 12). Ñane enemigokuéra oñehaʼãmbaitéramo jepe ñanerundi, ñande jaikuaa porã mbaʼépa oikóta: entéro Jehová enemigokuéra “oñehundíta ha opytáta tesaráipe”.

MBAʼÉICHAPA IKATU JAJEROVIAVE JEHOVÁRE

Jalee meméramo la Biblia, jajeroviavéta Jehováre pórke jaikuaa porãvéta chupe (Ehecha párrafo 17, 18) *

17, 18. a) ¿Mbaʼérepa ikatu jaʼe jajeroviavetaha Jehováre jaleéramo la Biblia? Emoĩ peteĩ ehémplo. b) ¿Mbaʼéichapa ñanepytyvõta jajepyʼamongetáramo pe téxto áño 2019-pe g̃uarãre?

17 Amáske jaikuaa porãve Jehovápe, jajeroviavéta hese. ¿Mbaʼéichapa ikatu jajapo upéva? Jaleéramo la Biblia ha jajepyʼamongeta umi mbaʼe jaleévare. Ñandejára Ñeʼẽme jatopáta hetaiterei istória ohechaukáva mbaʼéichapa yma Jehová oprotehe vaʼekue ipuévlope. Umi istória ñanepytyvõta koʼýte jajerovia hag̃ua haʼe katuete oñangarekotaha ñanderehe.

18 Jahechamína pe ehémplo porãite Isaías oipurúva ohechauka hag̃ua mbaʼéichapa Jehová ñandeprotehe. Haʼe heʼi Jehová ojoguaha peteĩ pastórpe, ha isiervokuéra katu haʼeha ijovecha mimi. Isaías heʼi Jehováre: “Ombyatýta umi ovecha raʼýpe ha ogueraháta chupekuéra ijyva ári” (Is. 40:11). Ñañeimahina jave ñaimeha Jehová jyva ári ha ñañandu haʼe ñaneañuaha, katuete ndajakyhyjemoʼãi mbaʼevégui ha ñañeñandúta trankílo porã. Pe tembiguái jeroviaha ha iñarandúva ñanepytyvõse ani hag̃ua jakyhyje ñaneprovléma jave, upévare oiporavo hikuái Isaías 41:10 haʼe hag̃ua pe téxto áño 2019-pe g̃uarã. Upépe heʼi: “Che ningo nde Jára, upévare ani rejepyʼapy”. Jajepyʼamongetákena ko téxto porãitére. Upéva katuete ñanemombaretéta ikatu hag̃uáicha ñaaguanta umi situasión ijetuʼúva oñepresentátava gueteri.

PURAHÉI 38 Jehová nepytyvõ ha nemombarete

^ párr. 5 Pe téxto áño 2019-pe g̃uarã ohechauka ñandéve mbohapy mbaʼe ñanepytyvõtava ani hag̃ua jajepyʼapyeterei, tahaʼe umi mbaʼe vai oikóvare ko múndope térã umi provléma ikatúvare jahasa. Ko artíkulope ñañeʼẽta umi mbohapy mbaʼére, ha umíva ñanepytyvõta jajeroviave hag̃ua Jehováre ha pono ñañekevrantaiterei. Ejepyʼamongetákena pe téxto ko áñope g̃uarãre, ha eñehaʼã voi ememorisa ikatúramo. Upéva katuete nemombaretéta reaguanta hag̃ua umi situasión ijetuʼúva ikatúva rehasa amo gotyove.

^ párr. 3 MBAʼÉPA HEʼISE: Peteĩ promésa haʼe hína peteĩ mbaʼe katuete oñekumplítava. Jehová promesakuéra ñanepytyvõ ani hag̃ua jajepyʼapyeterei umi mbaʼe ikatúvare jahasa.

^ párr. 4 Pe fráse “ani rekyhyje” jatopa mbohapy hendápe. Umíva hína Isaías 41:10, 13 ha 14-pe. Koʼã versíkulope ojepuru meme pe palávra “Che”, ha ohechauka Jehová voi heʼiha umi mbaʼe. ¿Mbaʼérepa Jehová oskrivika raʼe Isaíaspe hetaite vése pe palávra “Che”? Jahechakuaa hag̃ua jajerovia vaʼerãha Jehováre ani hag̃ua jakyhyje.

^ párr. 52 JAHECHÁVA PE TAʼANGÁPE: Peteĩ família ohasa heta situasión ijetuʼúva, por ehémplo travahohápe, predikasiónpe, eskuélape térã hasykatu rupi.

^ párr. 54 JAHECHÁVA PE TAʼANGÁPE: Umi polisía mbaretépe oike peteĩ ógape oñembyatyhápe ñane ermanokuéra, péro haʼekuéra ndojedesesperái.

^ párr. 56 JAHECHÁVA PE TAʼANGÁPE: Jajapo meméramo ñande estúdio de família ñanembaretevéta ñaaguanta hag̃ua oimehaichagua situasión.