Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Enero de 2018

Pe Konmemorasión ñanepytyvõ ñaneunidove hag̃ua

Pe Konmemorasión ñanepytyvõ ñaneunidove hag̃ua

“Ajépa iporã ha igustoite umi ermáno oiko porãrõ oñondivepa peteĩ famíliaicha” (SAL. 133:1, TNM).

PURAHÉI: 18, 14

1, 2. ¿Mbaʼe akontesimiéntopa ouníta hetaiterei persónape, ha mbaʼérepa iñimportantete upe rreunión? (Ehecha pe taʼanga oĩva iñepyrũme).

EL 31 DE MARZO DE 2018 hetaiterei persóna oikóva ko yvy tuichakuére oñembyatýta ogueromanduʼa hag̃ua peteĩ akontesimiénto iñimportantetereíva. Upéva ningo ojejapo una ves al áño. Upe díape kuarahy oike rire, entéro testígo de Jehová ha heta persóna oñeinteresáva la Biblia omboʼévare, oñembyatýta ogueromanduʼa hag̃ua pe sakrifísio Jesús ojapo vaʼekue ñanderehehápe. Káda áño ko rreunión ouni hetaiterei persónape. Añetehápe ndaipóri ótro akontesimiénto peichaite peve ojapóva upéva.

Katuete ningo Jehová ha Jesús ovyʼaiterei ohecha jave hetaiterei persóna oĩva ko yvy tuichakuére ohoha pe Konmemorasiónpe. La Biblia heʼi “peteĩ aty guasu avave ndaikatúiva oipapa, oúva opa tetã, trívu ha puévlogui” heʼitaha: “Pe salvasión ou Ñandejáragui, oguapýva pe trónope ha pe Ovecharaʼy rupive” (Apoc. 7:9, 10). Káda áño ningo pe Konmemorasiónpe heta persóna ombotuicha Jehová ha Jesúspe pe mbaʼe guasuete ojapo vaʼekuére hikuái ¡Ajépa iporãite upéva!

3. ¿Mbaʼe porandúpa ñambohováita ko artíkulope?

 Ko artíkulope ñambohováita 4 porandu: 1) ¿Mbaʼéichapa káda uno ikatu jajeprepara pe Konmemorasión ideprovécho hag̃ua ñandéve? 2) ¿Mbaʼéichapa pe Konmemorasión oipytyvõ Ñandejára puévlo iñunidove hag̃ua? 3) ¿Mbaʼépa ikatu káda uno jajapo oĩ hag̃ua unida Ñandejára puévlope? 4) ¿Og̃uahẽtapa pe tiémpo jajapotahápe pe última Konmemorasión? Oiméramo péicha, ¿arakaʼétapa upéva?

JAJEPREPARÁKENA IDEPROVÉCHO HAG̃UA ÑANDÉVE PE KONMEMORASIÓN

4. ¿Mbaʼérepa iñimportantete jajapo opa ikatúva ñaime hag̃ua pe Konmemorasionhápe?

4 ¿Mbaʼérepa iñimportantete ñaime pe Konmemorasionhápe? Jahávo upe rreuniónpe ñamombaʼeguasu hína Jehovápe. Katuete Jehová ha Jesús orekóta enkuénta ñañehaʼãramo ñaime hag̃ua pe rreunión iñimportantetévape ojejapóva káda áño. Sapyʼánte ikatu ñanderasy térã oñepresenta peteĩ situasión nañahaʼarõietéva. Upéicharõ jepe, ñande jaipota haʼekuéra ohecha ñañehaʼãmbaiteha jaasisti hag̃ua, ha ndaikatuietérõnte nañaĩmoʼãiha upépe. Jahechaukáramo umi mbaʼe jajapóva rupive umi rreunión iñimportanteha ñandéve g̃uarã, Jehová siémpre orekóta ñande réra ilívrope, oĩhápe “umi hénte réra, umi haʼe imanduʼátavare”. Ko lívrope oñehenói avei “lívro jeikove rehegua”. Pype Jehová oanota máva mávapepa omeʼẽta vída etérna (Mal. 3:16, TNM; Apoc. 20:15).

5. Umi semána og̃uahẽmbotápe pe Konmemorasión, ¿mbaʼépa ikatu jajapo jahecha hag̃ua ñañakarama hatãitipa hína ñande jeroviáre?

Umi semána og̃uahẽmbotaitépe pe Konmemorasión, ikatu remboykeve tiémpo reñemboʼe hag̃ua Jehovápe ha rejepyʼamongeta hag̃ua mbaʼéichapa oĩ ne amista hendive (elee 2 Corintios 13:5). Apóstol Pablo heʼi vaʼekue kristianokuérape: “Pesegíkena pejesareko pendejehe pehecha hag̃ua peñakarama hatãpa pende jeroviáre”. ¿Mbaʼéichapa ikatu ñande avei jajapo upéva? Eñeporandumína: “¿Añetehápe piko aguerovia ko organisasión añoite Jehová oiporavo hague ojapo hag̃ua hembipota? ¿Ajapo piko la ikatúva guive apredika ha amboʼe hag̃ua umi marandu porã la héntepe? ¿Ahechaukápa umi mbaʼe ajapóvare añetehápe agueroviaha jaikoha umi ára pahápe, ha opapotaitemaha Satanás goviérno? ¿Asegípa ajerovia Jehová ha Jesúsre ajapo haguéicha añepyrũrõ guare aservi Jehovápe?” (Mat. 24:14; 2 Tim. 3:1; Heb. 3:14). Jajepyʼamongetárõ koʼã porandúre, ñanepytyvõta jahechakuaa hag̃ua oimépa ñañakarama hatãiti hína ñande jeroviáre.

6. a) ¿Mbaʼéicha añoitépa ikatúta jaiko pára siémpre? b) ¿Mbaʼéichapa peteĩ ansiáno ojeprepara jepi Konmemorasionrã, ha mbaʼéichapa ikatu jasegi iñehémplo?

6 ¿Mbaʼépa ikatu jajapo jajeprepara hag̃ua pe Konmemorasionrã? Iporãitereíta jaleéramo umi artíkulo oexplikáva mbaʼérepa iñimportánte upe rreunión, ha jajepyʼamongeta umívare (elee Juan 3:16; 17:3). Ñande ikatúta jaikove pára siémpre sólamente jaikuaa porãramo Jehovápe ha jajeroviárõ Itaʼýra Jesúsre. Jajeprepara porã hag̃ua pe Konmemorasionrã, ikatu jastudia umi téma ñanemoag̃uivétava Jehová ha Jesúsre. Peteĩ ermáno oservímava heta tiémpo kómo ansiáno siémpre ojapo upéva. Heta áñorema haʼe oñongatu oikóvo umi artíkulo osẽva rrevísta Ñemañaháme oñeʼẽva pe Konmemorasiónre, ha mbaʼéichapa Jehová ha Jesús ohechauka ñanderayhuha. Unas kuánta semána og̃uahẽ mboyve pe Konmemorasión, haʼe olee jey umi artíkulo ha ojepyʼamongeta mbaʼeichaitépa iñimportánte upe rreunión. Sapyʼánte haʼe otopave peteĩ térã mokõi artíkulo oñeʼẽva koʼã témare, ha omoĩ umi ótro orekóvandi. Ko ermáno olee ha ojepyʼamongeta porã avei umi téxto oñemoĩvare ojelee hag̃ua Konmemorasión tiémpope. Haʼe omombeʼu oipytyvõitereiha chupe koʼã mbaʼe, ha péicha rupi káda áño oaprendeha hetave mbaʼe. Péro  iñimportanteveha, pe estúdio oipytyvõ chupe ohayhuve hag̃ua Jehová ha Jesúspe. Ñande avei jastudiáramo péicha, koʼẽ koʼẽre jahayhuvéta Jehová ha Jesúspe. Avei ñamombaʼevéta la haʼekuéra ojapo vaʼekue ñanderehehápe, ha pe Konmemorasión ideprovechovéta ñandéve.

PE KONMEMORASIÓN ÑANEPYTYVÕ ÑANEUNÍDO HAG̃UA

7. a) ¿Mbaʼépa ojerure kuri Jesús Itúape ojejapórõ guare primera ves pe Séna del Señór? b) ¿Mbaʼérepa jaʼekuaa Jehová ombohovái hague upe orasión?

Primera ves ojejapórõ guare pe Séna del Señór, Jesús oñemboʼe kuri Itúape. Upérõ ojerure chupe idisipulokuéra oĩ hag̃ua unído haʼekuéra oĩháicha unído (elee Juan 17:20, 21). Jehová ombohovái ko orasión ojapo vaʼekue Itaʼýra ohayhuetéva. Por ehémplo, pe Konmemorasión jave ojehecha porãvéntema entéro ñande testígo de Jehová ñaneunidoha. Upe díape, hetaiterei persóna de diferénte país térã ipire kolór diferénteva, oñembyaty ko yvy tuichakuére ohechauka hag̃ua ojeroviaha Jehová ombou hague Itaʼýrape. Heta lugárpe ningo la hénte ndojepokuaái ohecha koʼãichagua rreunión oñembyatyhápe persóna de diferénte rrása, ha hetápe katu ndogustái voi umíva. Péro Jehová ha Jesús nopensái upéicha. Chupekuéra g̃uarã iporãiterei pe unida oĩva ñañembyaty jave pe Konmemorasionrã.

8. ¿Mbaʼe mensáhepa omeʼẽ Jehová Ezequiélpe?

Ñande jaservíva Jehovápe ningo ñaneunidoiterei, péro añetehápe nañanesorprendéi upéva. Proféta Ezequiel rupive Jehová heʼíma vaʼekue voi oikotaha upéva. Haʼe heʼi Ezequiélpe ojagarra hag̃ua mokõi yvyra, peteĩva “Judápe g̃uarã” ha ótro katu “Josépe g̃uarã”. Upéi omoĩ hag̃ua mokõivéva oñondive, pórke oikóta chuguikuéra peteĩnte (elee Ezequiel 37:15-17). Ñemañaha osẽva julio 2016-pe, pe párte héravape “Oñeporandúva jepi”, heʼi: “Ezequiel rupive, Jehová oprofetisa vaʼekue ouni jeytaha tetã Israélpe oho jey vove hikuái pe Tiérra Prometídape. Pe mensáhe rupive ojeprofetisa avei Ñandejára puévlo oñeunitaha koʼã ára pahápe”.

9. ¿Mbaʼéichapa káda áño oñekumpli pe profesía Ñandejára heʼi vaʼekue Ezequiel rupive?

Oñepyrũre 1919, primeroite voi Jehová oorganisa ha ouni jey mbeguekatúpe umi unhídope. Chupekuéra oñekompara pe yvyra Judápe g̃uarãre. Upéi omoirũma avei umi unhídope heta persóna orekóva esperánsa oiko hag̃ua pára siémpre ko yvy ape ári. Chupekuéra oñekompara pe yvyra Josépe g̃uarãre. Jehová opromete ounitaha umi mokõi yvyra ha oikotaha chuguikuéra peteĩnte Ñandejára pópe (Ezeq. 37:19). Jehová ouni umi unhído ha “ambue ovechakuéra” ha oiko chuguikuéra “peteĩ ovecha aty” (Juan 10:16; Zac. 8:23). Ñane tiémpope mokõive grúpo ombaʼapo oñondive peteĩ ñeʼẽme ha odirihi chupekuéra peteĩ rréi, Jesucristo. Ezequiel profesíape Ñandejára ohenói upe rréipe “che siérvo David” (Ezeq. 37:24, 25, TNM). Ñañembyaty jave káda áño pe Konmemorasiónpe jagueromanduʼa hag̃ua Jesucristo sakrifísio, jahecha mokõive grúpo oĩha unído Jehová heʼi haguéicha Ezequiel rupive. Péro iporã ñañeporandu: “¿Mbaʼépa ajapokuaa ikatu hag̃uáicha oĩ pyʼaguapy ha unida Ñandejára puévlope?”.

¿MBAʼÉICHAPA IKATU ÑAIPYTYVÕ OĨ HAG̃UA UNIDA?

10. ¿Mbaʼépa iñimportánte jajapo oĩ hag̃ua unida Ñandejára puévlope?

10 Primeroite voi ñaneumílde vaʼerã, upéicha ñaipytyvõta hína oĩ hag̃ua unida Ñandejára puévlope. Jesús oĩrõ guare ko yvy ape ári omboʼe vaʼekue idisipulokuérape iñumílde hag̃ua (Mat. 23:12). Ñaneumílderamo arakaʼeve nañapensamoʼãi ñaneimportanteveha ótrogui, ha jarrespetáta umi ñanemoakãvape kongregasiónpe. Enterove ñañehaʼãramo ñaneñeʼẽrendu chupekuéra ñande pyʼaite guive, pe kongregasión iñunídota. Péro iñimportanteveha, ñaneumílderamo Jehová ñandeguerohorýta.  La Biblia heʼi voi: “Pe oñembotuichávape, ojeapoʼíta, ha pe oñemomirĩvape katu oñembotuicháta” (1 Ped. 5:5).

11. ¿Mbaʼérepa ñanepytyvõta ñaneunidove hag̃ua jajepyʼamongetáramo mbaʼépa orrepresenta pe pan ha pe víno?

11 Segundo, jajepyʼamongeta vaʼerã mbaʼépa orrepresenta pe pan ha pe víno oñembohasáva Konmemorasionhápe, péicha ñaipytyvõta avei oĩ hag̃ua unida Ñandejára puévlope. Og̃uahẽ mboyve pe Konmemorasión, ha koʼýte pe Konmemorasión díape, jajapo vaʼerã upéva (1 Cor. 11:23-25). Pe pan ilevaduraʼỹva ningo orrepresenta Jesús rete ndorekóiva pekádo, haʼe omeʼẽ vaʼekue ñanderehehápe. Ha pe víno katu orrepresenta pe huguy. Péro ndahaʼéi ningo jaikuaánte vaʼerã mbaʼépa orrepresenta pe pan ha pe víno. Jesús sakrifísio ningo ohechauka ñandéve mbaʼeichaitépa Jehová ha Jesús ñanderayhu. Jehová ohechauka ñanderayhuetereiha omboúvo itaʼýra omano hag̃ua ñanderehehápe ikatu hag̃uáicha ñandesalva. Jesús katu ohechauka ñanderayhuetereiha oĩvo dispuésto omanóvo ñanderehehápe. Jajepyʼamongetáramo mbaʼeichaitépa ñanderayhu hikuái, katuete jahayhuvéta avei chupekuéra. Péicha, ñande ha entéro ermáno jahayhúramo Jehovápe, katuete ñaneunidovéta.

Ñaporoperdona jave ñaipytyvõ hína oĩ hag̃ua unida (Ehecha párrafo 12 ha 13)

12. ¿Mbaʼéichapa pe ehémplo oĩva Mateo 18:23-34-pe ohechauka Jehová ha Jesús oipotaha ñaperdona ñande rapichakuérape?

12 Tercero, ñaipytyvõta hína oĩ hag̃ua unida ñaperdonáramo ñande pyʼaite guive ñande rapichakuérape. Ñaperdonáramo umi ñaneofendévape, jahechauka hína jaagradeseha Jehovápe operdona haguére ñande pekádo Jesús sakrifísio rupive. Ñapensamína pe ehémplo Jesús omombeʼu vaʼekuére Mateo 18:23-34-pe, ha ñañeporandumi: “¿Chemomýipa ko ehémplo ajapo hag̃ua Jesús omboʼe vaʼekue? ¿Chepasiénsia ha chembaʼeporãpa ermanokuérandi? ¿Aimépa dispuésto aperdonávo umi cheofendévape?”. Jaikuaa ningo oĩha umi pekádo igravevéva ótrogui, ha oĩ voi umi ijetuʼuetereíva ñandéve ñaperdona hag̃ua ñaneimperfékto rupi. Péro ko ehémplo ohechauka porã ñandéve mbaʼépa la Jehová oipotáva jajapo (elee Mateo 18:35). Jesús ohechauka porã Jehová nañaneperdonamoʼãiha ñande voi nañaperdonáiramo ñane ermanokuérape, koʼýte  oñarrepenti jave hikuái ipyʼaite guive. Upéicharõ, iñimportánte ñapensa porã ko mbaʼére. Jajapóramo Jesús omanda vaʼekue ha ñaperdonáramo ñande rapichakuérape, ñaipytyvõta hína siémpre ñaime hag̃ua unído.

13. ¿Mbaʼérepa jaʼekuaa ñañehaʼãramo jajogueraha porã ermanokuérandi ñaipytyvõha hína ñaime hag̃ua unído?

13 Ñaperdonáramo ermanokuérape, jaikóta pyʼaguapýpe hendivekuéra. Ñanemanduʼa vaʼerã apóstol Pablo heʼi vaʼekuére: “Peñehaʼãmbaite akóinte peime hag̃ua peteĩ ñeʼẽme espíritu sánto rupive” (Efes. 4:3). Pe Konmemorasión tiémpope, ha koʼýte pe idíape, jajepyʼamongeta vaʼerã mbaʼéichapa jatrata hína ñande rapichakuérape. Iporãta ñañeporandu: “¿Ojekuaápa hína cherehe ndachepyʼaroiha che rapichakuérandi? ¿Ojehechápa hína añehaʼãha ajogueraha porã hag̃ua ermanokuérandi, ha aipytyvõha oĩ hag̃ua unida?”. Koʼã épokape ñapensa vaʼerã koʼã pregúntare.

14. ¿Mbaʼéichapa ikatu jahechauka ñañoaguantaha mborayhúpe?

14 Cuarto, ñaipytyvõta hína oĩ hag̃ua unida japorohayhúramo Jehová oporohayhuháicha. Ñandejára ningo mborayhu (1 Juan 4:8). Aníkena arakaʼeve jaʼe: “Chéngo añehaʼã ahayhu ermanokuérape, péro naentéroi okae porã chéve”. Ñapensáramo péicha, ndajasegíri hína pe konsého Pablo omeʼẽ vaʼekue kristianokuérape. Haʼe heʼi: “Mborayhúpe peñoaguanta oñoermánoicha” (Efes. 4:2). Haʼe ndeʼíri ñañoaguantánte vaʼerãha, síno heʼi mborayhúpe ñañoaguanta vaʼerãha. Ajépa tuicha la diferénsia. Ñanemanduʼa vaʼerã Jehová ogueruha kongregasiónpe opaichagua persónape (Juan 6:44). Haʼe ningo ohechakuaa álgo iporãva umi persónare ha ohayhu chupekuéra, upévaguinte ogueru chupekuéra kongregasiónpe. ¿Mbaʼéicha piko ñande upéicharõ jaʼéta peteĩ ermáno nomereseiha jahayhu chupe? Ñande jahechauka vaʼerã japorohayhuha Jehová omandaháicha ñandéve (1 Juan 4:20, 21).

¿ARAKAʼÉTAPA PE ÚLTIMA KONMEMORASIÓN?

15. ¿Mbaʼérepa jaʼe oĩtaha peteĩ última Konmemorasión?

15 Og̃uahẽta hína pe tiémpo ojejapotahápe última ves pe Konmemorasión. ¿Mbaʼérepa jaʼe upéva? Pablo heʼi vaʼekue umi kristiáno unhídope ojapo jave hikuái káda áño pe Konmemorasión, osegiha oikuaauka “ñande Ruvicha omano hague, haʼe og̃uahẽ meve” (1 Cor. 11:26). Jesús omombeʼúrõ guare umi profesía oñeʼẽva pe ára paháre, oñeʼẽ kuri avei pe tiémpo haʼe outaháre. Pe jehasa asy guasu og̃uahẽmbotávare haʼe heʼi kuri: “Upévo ojekuaáta yvágare pe Yvypóra Raʼy techapyrã, ha opa tetãnguéra oĩva yvy ape ári ojepytiʼanupãta ñembyasýgui; ha ohecháta hikuái pe Yvypóra Raʼy ouha umi arai ári tekomimbipa ha podér reheve. Haʼe omondóta hiʼanhelkuérape, ha trompéta pu reheve ombyatýta hikuái umi ojeporavo vaʼekuépe, nórte, sur, kuarahyreike ha kuarahyresẽguio, peteĩ yvága púnta guive ótro púnta peve” (Mat. 24:29-31). Jesús ombyatypáta umi “ojeporavo vaʼekuépe” oguerahapa vove yvágape umi unhído opytávape gueteri ko yvy ape ári. Upéva oikóta hína oñepyrũ riréma pe jehasa asy guasu, péro oñepyrũ mboyve Armagedón. Ko gérra oiko vove, Jesús ha umi 144.000 ohundipaitéta umi goviérno oĩva ko yvy ape ári (Apoc. 17:12-14). Pe Konmemorasión ojejapóta Jesús ou peve ogueraha hag̃ua umi unhídope, ha upéva haʼéta pe última Konmemorasión.

16. ¿Mbaʼérepa nahiʼãi ndéve rejavy pe Konmemorasión ojejapótava ko áñope?

16 Ko áño 2018-pe, pe Konmemorasión ojejapóta el 31 de marzo. Jajapókena ikatúva guive ani hag̃ua jafalta ko rreunión iñimportantetévape. Jasegi avei jajerure Jehovápe tañanepytyvõ jajapo hag̃ua opa ikatúva ñaime hag̃ua unído (elee Salmo 133:1). Ñanemanduʼa vaʼerã avei og̃uahẽtaha pe última Konmemorasión. Upévare koʼág̃a jahechauka vaʼerã javaloraitereiha pe unida oĩva Ñandejára puévlope ojejapo jave pe Konmemorasión.