HETAITEREI Testígo ningo oservi umi lugár oñekotevẽhápe opredikáva pe marandu porã. Umíva apytépe jatopa heta ermána soltéra. Oĩ voi areterei oservímava tetã ambuépe. ¿Mbaʼépa oipytyvõ koʼã ermánape odesidi hag̃ua ova ótro tetãme? ¿Mbaʼépa oaprende pe servísio porãitégui? ¿Mbaʼetekópa oho chupekuéra? Jahechamína mbaʼépa heʼi hikuái. Oimérõ nde peteĩ ermána soltéra ha revyʼaseve predikasiónpe, umi ermána rembiasakue katuete nemokyreʼỹta. Añetehápe, entéro Ñandejára siérvo ikatu oñevenefisia koʼã ehémplogui.

OMBOYKE UMI MBAʼE OIPYʼAPÝVA CHUPEKUÉRA

Anita

Oime vaʼerã reñeporandu hína: “¿Che piko añetehápe ikatúta aservi ótro tetãme?”. Anita, koʼág̃a orekóva 75 áño, okyhyje kuri avei ha opensa ndaikatumoʼãiha ojapo upéva. Haʼe okakuaa vaʼekue Inglatérrape ha oñepyrũ iprekursorádo orekópe 18 áño. Anita omombeʼu: “Che ningo amboʼeseterei voi la Biblia umi héntepe, péro arakaʼeve napensái aservitaha ótro tetãme. Núnka naaprendéi vaʼekue ótro idióma, ha aĩ voi segúra ndaikatumoʼãiha ajapo upéva. Péicha rupi, arresivírõ guare pe invitasión aha hag̃ua Escuela de Galaádpe, apyta al áire. Añesorprende peteĩ persóna cheichagua orresivi haguére peteĩ invitasión iñimportantetéva. Péro apensa: ‘Jehová ojeroviáramo cherehe, añehaʼãta’. Koʼág̃a ohasáma mas de 50 áño aservi hague kómo misionéra Japónpe”. Anita heʼi avei: “Sapyʼánte, kyreʼỹme haʼe umi ermána imitãvape: ‘Emoĩ katu ne mochíla ne lómore ha chemoirũ ko servísio neporãmba jepévape, ndaipóri ótra kósa nembovyʼave vaʼerã’. Avyʼa pórke heta ermána osegi che konsého”.

OJEDESIDI HIKUÁI

Heta ermána koʼág̃a oservíva ambue tetãme, ñepyrũrã oduda vaʼekue ova hag̃ua. ¿Mbaʼépa oipytyvõ raʼe chupekuéra?

Maureen

Maureen, koʼág̃a orekóva 64 áño, heʼi: “Chemichĩ guive aipota vaʼekue isentído che rekove, ha aporopytyvõse voi”. Ko ermána omboty rire 20 áño ova Quebécpe, Canadá. Upépe oñekotevẽterei kuri prekursorkuérare. Maureen omombeʼu: “Upe rire añeinvita Escuela de Galaádpe, péro akyhyje aha hag̃ua peteĩ lugár ndaiporihápe che konosído”. Avei heʼi: “Ajepyʼapy ahejáta rupi che sýpe haʼeñoite okuida hag̃ua che túa hasývare. Pyharekue, heta vése cheresay che rováre amombeʼu Jehovápe umi mbaʼe chepyʼapýva. Upéi, añeʼẽ che sy ha che túandi umi  mbaʼe chekevrantávare, ha haʼekuéra chemokyreʼỹ aasepta hag̃ua pe invitasión. Ahechakuaa avei umi ermáno kongregasionpegua oñangarekoha mborayhúpe hesekuéra. Jehová okuida porã che tuakuérare, ha upéva chepytyvõ akonfia hag̃ua oñangarekotaha avei cherehe. Upépe ae ajedesidi aha”. Áño 1979 guive, Maureen oservi kómo misionéra África occidentálpe, ha opyta upépe 30 áño rasa. Koʼág̃a okuida isýre Canadápe, péro oservi gueteri upépe kómo prekursóra espesiál. Maureen opensa jave umi tiémpo oservi hague ótro paíspe, heʼi: “Jehová núnka nombofaltái chéve mbaʼeve”.

Wendy

Wendy ningo orekóma 65 áño, haʼe oñepyrũ vaʼekue iprekursorádo imitãkuñáme, Austráliape. Wendy imanduʼa: “Cheotĩeterei vaʼekue ha ijetuʼu chéve añemongeta hag̃ua umi ndaikuaáiva ndive. Péro pe prekursorádo rupive ajepokuaa añeʼẽ opaichagua tapichándi, ha ajeroviavéma chejehe. Mbeguekatúpe ahechakuaa ndarekoveimaha pe provléma. Ko servísio chemboʼe ajeroviave hag̃ua Jehováre, ha chemokyreʼỹ aservi hag̃ua ótro paíspe. Upéi, peteĩ ermána soltéra oservímava kómo misionéra mas de 30 áño Japónpe, cheinvita aha hag̃ua apredika hendive 3 mésere. Upéva chepytyvõ aserviseve hag̃ua ótro tetãme”. Áño 1986-pe, Wendy ova kuri Vanuátupe, peteĩ ísla opytáva 1.770 kilómetro Austráliagui, éste gotyo.

Wendy oĩ gueteri Vanuátupe, ha koʼág̃a oservi peteĩ ofisína rremóta de traduksiónpe. Haʼe heʼi: “Avyʼaiterei ahechávo mbaʼéichapa oñeforma grúpo ha kongregasión pyahu umi lugár mombyryvehápe. Chéve g̃uarã peteĩ priviléhio tuichaitereíva ikatu haguére aipytyvõ michĩmi jepe umi héntepe oikóva koʼã íslape”.

Kumiko (oĩva mbytépe)

Kumiko, koʼág̃a orekóva 65 áño, oservi vaʼekue de prekursóra rregulár Japónpe. Upérõ ikompañéra omokyreʼỹ chupe ova hag̃ua hikuái Nepálpe. Haʼe heʼi: “Che irũ ojerure jey jeými vaʼekue chéve rova hag̃ua, ha che katu ndaaseptái. Ajepyʼapy pórke tekotevẽta aaprende ótro idióma ha ajepokuaa vaʼerã aiko ótro lugárpe. Hiʼarive aaorra vaʼerã kuri ikatu hag̃uáicha rova. Ajedesidi aja, aju añaksidenta móto ári ha ajegueraha ospitálpe. Upépe añepyrũ apensa: ‘Ndaikuaái ningo mbaʼépa oikóta chehegui koʼẽrõ. Peichahágui ikatu aju cherasyete ha aperde pe oportunida aservi hag̃ua ótro tetãme. ¿Mbaʼére piko natanteái 1 añomi jepe?’ Añemboʼe che pyʼaite guive Jehovápe chepytyvõmínte hag̃ua”. Kumiko osẽ rire ospitálgui, oho oikuaa Nepal, ha upéi haʼe ha ikompañéra ova upe tetãme.

Kumiko imanduʼávo umi 10 áño ohasámava ova guive Nepálpe, heʼi: “Umi provléma chekevrantaite  vaʼekue yma, ndahaʼevéima mbaʼevete. Koʼág̃a ndajepyʼapyvéima, ojapo haguéicha avei umi israelita okrusa rire pe mar Rojo. Avyʼaiterei ningo ikatu haguére aservi oĩvehápe nesesida. Sapyʼánte, ag̃uahẽ jave apredika hag̃ua peteĩ ógape, ou avei 5 térã 6 vesíno ohendu hag̃ua. Mitãnguéra jepe rrespetuósamente ojerure chéve umi tratádo. Tuichaiterei priviléhio chéve g̃uarã ikatu haguére apredika peteĩ lugár oĩhápe progréso”.

OMBOHOVÁI PORÃ UMI PROVLÉMA

Koʼã ermána iguapaitéva ohasa avei heta mbaʼe ikatúva kuri ojoko chupekuéra. ¿Mbaʼéichapa ombohovái umi situasión?

Diane

Diane ningo Canadagua ha oreko 62 áño. Haʼe oservi kuri de misionéra Costa de Marfílpe 20 áñore. Diane omombeʼu: “Ñepyrũrã ijetuʼu vaʼekue chéve aiko hag̃ua mombyry che hentekuéragui. Ajerure Jehovápe ikatu hag̃uáicha chepytyvõ ahayhu hag̃ua umi hénte che territoriopeguápe. Sapyʼánte chemanduʼa la heʼími vaʼekuére peteĩva ore instruktorkue Galaádpe, hérava Jack Redford. Haʼe heʼi oréve ikatuha roñemondýi rohechávo mbaʼéichapa oiko umi persóna ore territoriopegua imboriahueterei rupi. Ha omeʼẽ oréve ko konsého: ‘Pembyasýramo jepe, ani pejesareko isituasiónre. Peñekonsentra umi persónare, pemaña hováre ha hesáre pepredika jave chupekuéra, péicha peikuaáta mbaʼéichapa ojagarra hikuái pe mensáhe oúva la Bíbliagui’. Upeichaite ajapo kuri, ha ahechakuaa la rresultádo. Añeʼẽ jave pe mensáhe porãitére, umi hénte resa ojajaipa voi”. ¿Mbaʼépa oipytyvõ Diánepe ojeadapta hag̃ua? Haʼe heʼi: “Añeamigaite che estudiantekuérare, ha añeñandu porãiterei ahechávo oikoha chuguikuéra Jehová siérvo. Ajepokuaaite voi che asignasiónre, haʼetévaicha chéve lomímo ke pe lugár anase hague. Jesús opromete haguéicha, che asignasiónpe akonsegi heta túa, sy, ermáno ha ermána” (Mar. 10:29, 30).

Anne, orekóva koʼág̃a 46 áño, oservi peteĩ país oĩva Ásiape ojeproivihápe pe predikasión. Haʼe omombeʼu: “Heta áñorema aservi diferénte lugárpe, ha aiko umi ermána idiferéntevandi chehegui, tahaʼe ikostúmbre térã ilájape. Upévare, sapyʼánte noroĩri de akuérdo, térã oiko jepi umi mbaʼe oremoñeñandu vaíva. Umícha jave añehaʼã aikuaa porãve chupekuéra, ha antendeve ikostumbrekuéra. Avei añehaʼãmbaite ani hag̃ua añemohatã che apensávapente ha ahechauka hag̃ua ahayhuha chupekuéra. Añetehápe avyʼaiterei pórke añemeʼẽ enkuénta nañehaʼãreíri hague. Koʼág̃a areko heta amíga chepytyvõ meméva asegi hag̃ua che asignasiónpe”.

Ute

 Áño 1993-pe, peteĩ ermána Alemaniagua hérava Ute, oñasigna kómo misionéra Madagascárpe. Haʼe omombeʼu: “Ñepyrũrã ijetuʼu vaʼekue chéve aaprende hag̃ua pe idióma, avei tekotevẽ kuri ajeadapta pórke upe lugárpe iñumedaiterei, ha oĩ heta mbaʼasy umi parásito káusare. Péro areko heta mbaʼe chepytyvõva. Por ehémplo, umi ermána, imembykuéra ha umi che estudiánte ipasiénsia cherehe aaprende hag̃ua iñidióma. Avei pe ótra misionéra oikóva chendive oñatende porã vaʼekue cherehe cherasykatu jave. Péro Jehová hína la chepytyvõve vaʼekue. Siémpre amombeʼu chupe umi mbaʼe chepyʼapýva. Upéi, ahaʼarõ sapyʼánte díare térã mésere ahecha hag̃ua mbaʼéichapa ombohovái che ñemboʼe. Jehová osolusiona entéro umi che provléma”. Ute koʼág̃a oreko 53 áño, ha ojapóma 23 áño oservi hague Madagascárpe.

OHUPYTY HIKUÁI HETA VENDISIÓN

Umi ermána soltéra ha entéro umi oho vaʼekue oservi ótro tetãme oĩvehápe nesesida, pyʼỹinte omombeʼu orresivi hague heta vendisión ojapo haguére upéva. ¿Mbaʼe iporãvapa ohupyty vaʼekue hikuái?

Heidi

Heidi ningo Alemaniagua ha oreko 73 áño. Haʼe oservi áño 1968 guive kómo misionéra Costa de Marfílpe. Ko ermána heʼi: “Avyʼaiterei ningo ahechávo umi amboʼe vaʼekuépe la Biblia ‘osegiha oiko pe añetegua rapére’, ha ndaipóri ótra kósa chembovyʼavéva upévagui. Umi ostudia vaʼekue chendive apytépe oĩ umi koʼág̃a oservíva kómo prekursór térã kómo ansiáno. Haʼekuéra cherenói jepi ‘che sy’ térã ‘che avuéla’. Peteĩva koʼã ansiáno, hembireko ha ifamiliakuéra chetrata voi haʼeramoguáicha ipariénte. Upévare haʼekuaa Jehová omeʼẽ hague chéve che membyrã, che nuerarã ha mbohapy che nietorã” (3 Juan 4).

Karen (oĩva mbytépe)

Karen katu Canadagua ha koʼág̃a oreko 72 áño. Haʼe oservi vaʼekue mas de 20 áño África occidentálpe. Karen heʼi: “Aservi rupi kómo misionéra aaprende iñimportanteha ajesakrifika che rapichakuéra rehehápe, avei aporohayhu ha chepasiénsia vaʼerãha. Aaprende heta mbaʼe aservi rupi umi ermáno diferénte tetãgua ndive. Por ehémplo, ahechakuaa peteĩ mbaʼe ikatuha ojejapo heta hendáicha. Avei avyʼaiterei areko haguére amígo ha amíga opa hendárupi. Ndoroservivéiramo jepe oñondive, rosegi gueteri oñoamígo”.

Margaret, peteĩ ermána Inglaterragua ha orekóva 79 áño, oservi vaʼekue kómo misionéra Láospe. Haʼe heʼi: “Aservi rupi ótro tetãme, ahechakuaa mbaʼéichapa Jehová ogueru iñorganisasiónpe opaichagua persónape ha tahaʼe haʼéva la irrása. Umi mbaʼe ahasa vaʼekue omombareteve che jerovia. Avei chepytyvõ aime hag̃ua segúra Jehová hína pe odirihíva ko organisasión ha katuete okumplitaha hembipota”.

Umi ermána soltéra oservíva fiélmente ótro tetãme, oheja ñandéve ehémplo neporãva ha omerese ojeguerohory chupekuéra (Juec. 11:40). Ha iporãveha katu, amás día hetave ermána ojapo upéva (Sal. 68:11). Ha nde, ¿ikatúpa ejapo umi kámbio tekotevẽva ha esegi koʼã ermána ehémplo? Rejapóramo upéva, ndete voi rekomprováta mbaʼeichaitépa “Jehová ivuéno” (Sal. 34:8, TNM).