Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Enero de 2017

“Umi mbaʼe emoĩ umi kuimbaʼe iñeʼẽrendúva kárgope”

“Umi mbaʼe emoĩ umi kuimbaʼe iñeʼẽrendúva kárgope”

“Umi mbaʼe emoĩ umi kuimbaʼe iñeʼẽrendúva kárgope, péicha haʼekuéra ikatupyrýta omboʼe hag̃ua ótrope” (2 Tim. 2:2).

PURAHÉI: 123, 53

1, 2. ¿Mbaʼépa opensa heta persóna itraváhore?

HETA persóna opensa pe traváho ojapóva ohechaukaha oimépa haʼe iñimportánte térã nahániri. Oĩ voi lugár umi hénte ojepokuaaha oporandu umi oikuaa ramóvape mbaʼépepa ombaʼapo.

2 La Biblia oñeʼẽ jave peteĩ persónare, sapyʼánte omombeʼu avei mbaʼépepa ombaʼapo. Por ehémplo Matéore heʼi haʼe hague “impuésto kovraha”, Simónre heʼi haʼe hague “kurtidór”, ha Lúcasre katu “doktór” (Mat. 10:3; Hech. 10:6; Col. 4:14). La Biblia avei omensiona mbaʼe asignasiónpa orresivi vaʼekue unos kuánto Jehová siérvo. Por ehémplo, David rehe heʼi haʼe hague rréi, Elías katu proféta ha Pablo, apóstol. Koʼã kuimbaʼe ovalora vaʼekue umi asignasión orresivíva Jehovágui. Ñande avei ñamombaʼe vaʼerã oimeraẽ asignasión jarekóva Jehová servísiope.

3. ¿Mbaʼérepa tekotevẽ umi ijedavéva ombokatupyry umi imitãvévape? (Ehecha pe taʼanga oĩva iñepyrũme).

3 Ñande ningo javyʼa jaservívo Jehovápe ha javaloraiterei umi asignasión jarekóva. Heta oĩ ñande apytépe ohayhuetereíva iñasignasión ha hiʼãnte voi chupe siémpre ojapo la mísma kósa. Péro ñambyasýramo jepe, ñandeeda jave ndaikatuvéima  jajapo heta mbaʼe ñanemitãrõ guaréicha (Ecl. 1:4). Sapyʼánte koʼã mbaʼe ijetuʼu Jehová puévlope g̃uarã. Ñane tiémpope, ojepredika arakaʼeve ojejapoʼỹ haguéicha. Avei Jehová organisasión oipuru meme pe teknolohía ikatu hag̃uáicha oñemog̃uahẽ opárupi pe marandu porã. Péro sapyʼánte ijetuʼu upéva umi ijedavévape, pórke tekotevẽ oaprende heta mbaʼe ha ojeadapta (Luc. 5:39). Avei naimbaretevéima hikuái ymave guaréicha (Prov. 20:29). Upéicha rupi iporãiterei umi iñexperiensiavéva ombokatupyrýramo umi imitãvévape, ikatu hag̃uáicha orekove rresponsavilida Jehová organisasiónpe (elee Salmo 71:18).

4. ¿Mbaʼérepa ijetuʼu jepi umi iñexperiensiavévape omeʼẽ hag̃ua rresponsavilida ótrope? (Ehecha pe rrekuádro “ Mbaʼérepa ikatu oĩ hakateʼỹva ipriviléhiore”).

4 Añetehápe ningo heta vése ndahaʼéi la ifasilpáva umi orekóvape heta priviléhio omeʼẽve hag̃ua rresponsavilida umi imitãmiévape. Umi iñexperiensiavéva ikatu ombyasy operdéta haguére peteĩ asignasión omombaʼetereíva, térã omeʼẽta rupi peteĩ priviléhio ogustáva chupekuéra. Avei ikatu ojepyʼapy openságui umi imitãvéva ndaikatumoʼãiha ojapo porã umi asignasión. Térã ikatu voi opensa naitiempoiha okapasita hag̃ua ótrope. ¿Ha mbaʼépa ikatu jaʼe umi imitãvévare? Tekotevẽ ipasiénsia hikuái noñemeʼẽiramo chupekuéra hetave rresponsavilida.

5. ¿Mbaʼe porandúpa ñambohováita ko artíkulope?

5 ¿Mbaʼérepa iñimportánte umi iñexperiensiavéva oipytyvõ umi imitãmiévape orekove hag̃ua rresponsavilida? ¿Mbaʼéichapa ikatu ojapo upéva? (2 Tim. 2:2.) Ha, ¿mbaʼépa oreko vaʼerã enkuénta umi imitãvéva ombaʼapo jave umi iñexperiensiavévandi? ¿Mbaʼérepa oĩ vaʼerã dispuésto oaprendévo chuguikuéra? Ñepyrũrã jahecháta mbaʼéichapa rréi David ombokatupyry vaʼekue itaʼýrape ojapo hag̃ua peteĩ tembiapo iñimportantetereíva.

DAVID OMBOKATUPYRY SALOMÓNPE

6. ¿Mbaʼépa ojapose vaʼekue rréi David, péro mbaʼépa heʼi Jehová?

6 Heta áñore ojepersegi vaʼekue Davídpe, upéicha rupi haʼe ova ha ova. Tiémpo rire  oiko chugui rréi ha oreko peteĩ óga iporãitereíva. Upévare haʼe heʼi proféta Natánpe: “Péina, ápe che aiko peteĩ óga guasúpe ojejapo vaʼekue sédrogui, péro pe árka del pákto Jehová mbaʼéva katu oĩ óga kárpape”. Natán heʼi chupe: “Ejapo katu pe rejaposéva. Ñandejára ningo oĩ nendive”. Péro ndahaʼéi upéva la Jehová oipotáva. Upémarõ, Natán rupive heʼika Davídpe: “Ndahaʼemoʼãi nde la remopuʼãtava chéve che rogarã”. Upéicharõ jepe, Jehová opromete Davídpe siémpre oĩtaha hendive. Péro oikuaauka chupe peteĩva itaʼýra omopuʼãtaha pe témplo. ¿Mbaʼéichapa orreaksiona David? (1 Crón. 17:1-4, 8, 11, 12; 29:1, TNM).

7. ¿Mbaʼéichapa orreaksiona David oikuaávo nomopuʼãmoʼãiha pe témplo?

7 David ningo omopuʼãseterei vaʼekue pe témplo Jehovápe g̃uarã, upévare ikatu kuri ou oñedesanima. Péro upéva rangue, oapoja itaʼýra Salomónpe ha oipytyvõ oñeorganisa hag̃ua umi ombaʼapótavape, ha ombyaty iérro, kóvre, pláta, óro ha yvyra. Tiémpo rire pe konstruksiónpe oñehenói Salomón témplo. Péro David ndojepyʼapýi kuri ndojeʼemoʼãi haguére haʼe omopuʼã hague pe témplo. Upéva rangue omokyreʼỹ itaʼýrape heʼívo: “Koʼág̃a che raʼy, Jehová toĩ nendive ikatu hag̃uáicha resẽ porã emopuʼãvo Jehová nde Jára róga. Haʼe ningo heʼíma voi kuri nde rejapotaha” (1 Crón. 22:11, 14-16, TNM).

8. ¿Mbaʼérepa David ikatu kuri opensa Salomón noĩriha preparádo omopuʼã hag̃ua pe témplo, péro mbaʼépa haʼe ojapo?

8 (Elee 1 Crónicas 22:5). David ningo ikatu kuri opensa itaʼýra noĩriha preparádo odirihi hag̃ua pe óvra tuichaitéva. Pe témplo ningo “iporãiterei vaʼerã”, ha Salomón katu “imitã ha naiñexperiénsiai”. Péro David oikuaa Jehová ikatuha ombokatupyry Salomónpe ojapo hag̃ua ko tembiapo iñimportantetéva. Upévare oñehaʼãmbaite oipytyvõ ikatuháicha, por ehémplo oprepara hetaiterei materiál ojepurútava pe konstruksiónpe.

JAVYʼA ÑAMBOʼE JAVE ÓTROPE

Javyʼaiterei jahechávo umi ermáno imitãmiéva orresiviha hetave rresponsavilida (Ehecha párrafo 9)

9. ¿Mbaʼérepa umi ijedavéva ikatu ovyʼa omeʼẽvo rresponsavilida umi imitãvévape? Emoĩ peteĩ ehémplo.

9 Umi ermáno ijedavéva noñedesanimái vaʼerã tekotevẽta jave omeʼẽve rresponsavilida umi imitãmiévape. Jaikuaaháicha, Jehová rembipota iñimportanteve opa mbaʼégui. Upévare, umi iñexperiensiavéva ombokatupyry vaʼerã umi imitãvévape ikatu hag̃uáicha okumpli porã hetave rresponsavilida Jehová organisasiónpe. Ñamoĩmína peteĩ ehémplo. Epensamína peteĩ túa omboʼévare itaʼýrape omaneha hag̃ua. Pe mitã imichĩvépe omañánte mbaʼéichapa omaneha itúa. Okakuaavévo ohóvo, itúa oexplika chupe mbaʼéichapa ojapo vaʼerã upéva. Tiémpo rire, onohẽma irrehístro ha oñepyrũma omaneha haʼeño. Upéicharõ jepe itúa osegi omboʼe mimi chupe. Sapyʼánte oñoturna hikuái omaneha hag̃ua, péro mbeguekatúpe pe mitãrusúntema omaneha  pórke itúa ijedáma ohóvo. ¿Ipochýpa pe túa upévare? Nahániri, nopensái haʼénte siémpre odirihipa vaʼerãha, síno ovyʼa oheja haguére ótro kárgope peteĩ mbaʼe haʼe ojapo vaʼekue. Péicha avei, umi ermáno iñexperiensiavéva ombokatupyry umi imitãvévape, ha ovyʼa orresivi jave hikuái hetave rresponsavilida Jehová organisasiónpe.

10. ¿Mbaʼéichapa Moisés ohecha vaʼekue pe priviléhio orekóva?

10 Ñañatende vaʼerã ani hag̃ua jaju ñaenvidia umi orresivívape peteĩ asignasión. Jahechamína mbaʼépa ojapo Moisés unos kuánto israelita oñepyrũrõ guare oñekomporta profétaicha (elee Números 11:24-29). Upérõ Josué oipota ojejoko chupekuéra, péro Moisés heʼi: “¿Nde piko ndeselóso hína cherehe? Ndovaléi ningo upéicha. ¡Hiʼãite chéve ko puévlo kompletoitégui oiko Jehová proféta ha Jehová tomeʼẽ chupekuéra ijespíritu!”. Moisés oikuaa Jehová odirihiha opa mbaʼe, ha ndoipotái oñemombaʼeguasu chupe, síno hiʼãnte chupe entéro Jehová siérvo orresivi avei upe asignasión. Ha ñande, ¿javyʼápa avei ótro orresivíramo peteĩ asignasión Jehová servísiope?

11. ¿Mbaʼépa heʼi peteĩ ermáno oñemeʼẽ haguére hetave rresponsavilida umi imitãvévape?

11 Oĩ heta ermáno áñorema ombaʼapóva Jehová servísiope ha ombokatupyrýva umi imitãmiévape ohupyty hag̃ua hetave rresponsavilida. Jahechamína peteĩ ermáno hérava Peter ehémplo. Haʼe oservi mas de 74 áñoma de tiémpo kompléto, ha 35 áño ombaʼapo peteĩ sukursálpe Európape. Heta tiémpore oservi kómo superintendénte Departaménto de Servísiope. Upéi, oñemeʼẽ upe asignasión peteĩ ermáno imitãvape hérava Paul, Peter voi ombokatupyry vaʼekue. Oñeporandúrõ guare Péterpe mbaʼépa opensa upe kámbiore, heʼi: “Avyʼa oñembokatupyry haguére umi ermáno imitãmiévape ikatu hag̃uáicha orresivi hetave rresponsavilida, ha okumpli porã haguére hikuái umi tembiapóre”.

ÑAMOMBAʼÉKENA UMI ERMÁNO IJEDAVÉVAPE

12. ¿Mbaʼépa ñanemboʼe Rehoboam rehe oiko vaʼekue?

12 Salomón raʼy, hérava Rehoboam ogoverna vaʼekue itúa rendaguépe. Haʼe ojerure vaʼekue konsého umi kuimbaʼe ijedavévape oikuaa hag̃ua mbaʼéichapa ikatu okumpli porã irresponsavilida. Péro ohendu rangue chupekuéra, osegi umi ikakuaa irũngue konsého, ha osẽ vaieterei upe haguére (2 Crón. 10:6-11, 19). ¿Mbaʼépa ñanemboʼe ko ehémplo? Iporãveha jajerure konsého umi ijedavéva ha iñexperiensiavévape ñandehegui. Añetehápe ningo umi imitãmiéva natekotevẽi katuete ojapo opa mbaʼe ojejapo haguéicha ymave. Upéicharõ jepe, orrespeta vaʼerã umi ijedavéva suherénsia ha ndojapurái vaʼerã opensa hag̃ua ndoikoiha la heʼíva hikuái.

13. ¿Mbaʼépa ojapo vaʼerã umi imitãvéva ombaʼapo jave umi ijedavévandi?

13 Sapyʼánte umi ermáno imitãvéva odirihi koʼág̃a umi tembiapo ojapóva umi ermáno ijedavéva. Upéicharõ jepe, umi imitãvéva oñehaʼã vaʼerã oaprende chuguikuéra. Pe ehémplo jahecha vaʼekuépe, Paul opyta kuri kómo superintendénte pe Departaménto de Servísiope Peter rendaguépe. Haʼe heʼi: “Añemotiémpo vaʼekue ajerure hag̃ua konsého Péterpe, ha amokyreʼỹ umi ermáno ombaʼapóvape chendive ojapo hag̃ua avei upéva”.

14. ¿Mbaʼépa ikatu ñaaprende Pablo ha Timoteo ombaʼapo lájagui?

14 Timoteo ningo imitãiteve vaʼekue apóstol Páblogui, upéicharõ jepe haʼekuéra ombaʼapo oñondive heta áñore (elee Filipenses 2:20-22). Pablo heʼi umi ermáno Corintoguápe: “Amondo pene rendápe  Timotéope, haʼe ningo che raʼy ahayhuetéva, ojapóva hekoitépe ñande Ruvicha rembiapo. Haʼe penemomanduʼáta mbaʼéichapa che ajapo opa mbaʼe aservívo Cristo Jesúspe, ha mbaʼéichapa aporomboʼe hína entéro kongregasiónpe ha opa hendárupi” (1 Cor. 4:17). Ko téxto heʼíva ohechauka Pablo ha Timoteo ombaʼapo porãiterei hague oñondive. Pablo oñemotiémpo omboʼe hag̃ua Timotéope umi método haʼe oipurúva oporomboʼe hag̃ua, ha Timoteo oaprende porã chugui. Pablo ojeroviaiterei Timotéore ha oĩ segúro oñangareko porãtaha umi ermáno ha ermána oĩvare Coríntope. Iporãta avei ansianokuéra osegíramo Pablo ehémplo ha ombokatupyry umi kuimbaʼépe oñatende hag̃ua kongregasiónre.

ENTEROVÉVA ÑANDEDEPROVÉCHO

15. ¿Mbaʼéichapa Romanos 12:3-5 ñanepytyvõ ñambohovái hag̃ua umi kámbio?

15 Javyʼaiterei jahechávo Jehová organisasión ko yvy ape ári okakuaaveha ohóvo. Upéva heʼise heta mbaʼe osegitaha okambia. Koʼã kámbio sapyʼánte ñandeafekta ha hasy ñambohovái porã hag̃ua. Ñaneumílderamo ha ñamotenondéramo Ñandejára rembipota, nañapensamoʼãi ñandejehénte ha ñaneunidovéta. Pablo oskrivi vaʼekue umi kristiáno Corintoguápe: “Ajerure peẽme anive hag̃ua pepensa pendevaletereiha”. Upéi oexplika avei: “Ñande retépe oĩ heta párte, ha káda párte ojapo peteĩ mbaʼe idiferénteva”. Upéicha avei, entéro ñaiméva kongregasiónpe jareko diferénte tembiapo (Rom. 12:3-5).

16. ¿Mbaʼépa ojapokuaa káda kristiáno oĩ hag̃ua pyʼaguapy ha unida Jehová organisasiónpe?

16 Ñaiméva guive Jehová puévlope jaapojase Ñandejára Rréino ha jajapose la ojejeruréva ñandéve. Umi ermáno ijedáva okapasita vaʼerã umi imitãmiévape. Umi imitãva orresivíramo peteĩ rresponsavilida osegi vaʼerã iñumílde ha orrespeta umi ijedavévape. Umi ermáno omendáva katu oagradeseterei hembireko oapoja jave chupekuéra koʼãichagua situasiónpe. Umi tembireko ikatu avei osegi Priscila ehémplo. Haʼe oapoja meme vaʼekue iména Áquilape tahaʼe haʼéva pe situasión ohasáva hikuái (Hech. 18:2).

17. ¿Mbaʼépa Jesús ojapo ombokatupyry hag̃ua idisipulokuérape?

17 Jesús oheja ñandéve pe ehémplo iporãvéva ohechaukáva mbaʼéichapa ikatu ñambokatupyry ótrope. Haʼe ningo oikuaa ndopytamoʼãiha tódo el tiémpo ko yvy ape ári, ha ohechakuaa umi idisípulo osegi vaʼerãha ojapo pe tembiapo haʼe omoñepyrũ vaʼekue. Jesús oikuaa idisipulokuéra iñimperfektoha. Upéicharõ jepe oĩ segúro haʼekuéra ikatutaha omosarambi pe marandu porã hetaiteve hendárupi (Juan 14:12). Haʼe omboʼe porãiterei rupi chupekuéra, oĩma hikuái preparádo opredika hag̃ua opárupi (Col. 1:23).

18. a) ¿Mbaʼeichagua tembiapópa jajapóta amo gotyove? b) ¿Mbaʼe tembiapópa ikatu jajapo koʼág̃ama voi?

18 Jesús omano rire, Jehová omoingove jey itaʼýrape ha omeʼẽ chupe hetave traváho ha autorida. La Biblia heʼi omoĩ hague Jesúspe “yvateve opaichagua goviérno, autorida [ha mburuvichágui]” (Efes. 1:19-21). Ñamanóramo jepe fiél Jehovápe og̃uahẽ mboyve Armagedón, jaikuaa porã jaikove jeytaha pe múndo pyahúpe, ha javyʼaitereitaha jajapóvo umi tembiapo ñanembopyʼarorýva. Péro koʼág̃ama voi ikatu javyʼa japredikávo pe marandu porã, ha ñaipytyvõvo ñande rapichakuérape oservi hag̃ua Jehovápe. Upéicharõ, ñanemitã térã ñandeedáramo jepe, lomímonte ikatu jajapo heta mbaʼe “ñande Ruvicha servísiope” (1 Cor. 15:58).