Ehecha oĩva pype

Ehecha oĩva pype

Pe espíritu sánto oikuaauka ñande haʼeha Ñandejára raʼy

Pe espíritu sánto oikuaauka ñande haʼeha Ñandejára raʼy

“Pe espíritu sánto ha umi mbaʼe ñañandúva, oikuaauka ñande haʼeha Ñandejára raʼy.” (ROM. 8:16)

PURAHÉI: 109, 108

1-3. a) ¿Mbaʼe mbaʼépa ojejapo vaʼekue pe Pentekostéspe ajeve iñimportantete upe día? b) ¿Mbaʼéichapa oñekumpli proféta Joel heʼi vaʼekue? (Ehecha pe taʼanga oĩva iñepyrũme.)

ÑANEMANDUʼAMÍNA oiko vaʼekuére áño 33-pe. Upérõ ningo domingo pyhareve Jerusalénpe ha ojevyʼajoa. Upe día iñimportanteterei pórke ojegueromanduʼa pe Pentekostés, haʼéva hína peteĩ fiésta sagráda ohechaukáva ikatumaha oñemonoʼõ pe trígo. Upe pyharevépe, pe saserdóte prinsipál oikuaveʼẽ umi ofrénda jepiveguáicha pe témplope. Upéi, og̃uahẽvo las 9 de la mañána, haʼe oikuaveʼẽ mokõi pan ojejapóva arína ha levadúragui. Pe arína ojejapo pe trígo oñemonoʼõ vaʼekuégui primeroite. Upéi pe saserdóte prinsipál oikuaveʼẽ umi pan Jehovápe, ha ombokacha ojapóvo pe ofrénda (Lev. 23:15-20). Koʼã mbaʼe ohechauka ikatumaha oñemonoʼõ pe trígo.

2 Péro ndahaʼéi primera ves ojejapóva koʼã mbaʼe pe témplope. Hetaiterei tiémporema pe saserdóte prinsipál ojapo hague upéva. Ko ofrénda orrepresenta peteĩ mbaʼe iñimportantetereíva oikótava upe rire. Upe díape 120 disípulorupi ijaty Jerusalénpe  peteĩ koty yvateguápe, ha oñemboʼe hikuái ipyʼaite guive (Hech. 1:13-15). Upérõ oñekumpli kuri proféta Joel heʼi vaʼekue ojapóma 800 áño atrás (Joel 2:28-32; Hech. 2:16-21). ¿Mbaʼe susésorepa ñañeʼẽ hína?

3 Elee Hechos 2:2-4. Peichaháguinte, Ñandejára omeʼẽ espíritu sánto umi kristiáno ijatývape upe lugárpe (Hech. 1:8). Upéi entéronte oñepyrũ oñeʼẽ umi mbaʼe porãita ohendu ha ohecha vaʼekuére. Sapyʼaitérõ g̃uarã ijatýma hetaiterei hénte. Apóstol Pedro oñepyrũ oexplika mbaʼépa la oikóva ha mbaʼérepa iñimportantete upe suséso. Upéi heʼi: “Peñarrepenti ha pejevautisa peteĩteĩ Jesucristo rérape. Péicha oñeperdonáta peẽme pende pekádo ha oñemeʼẽta peẽme rregáloramo espíritu sánto”. Upe díape, 3.000 persónarupi oasepta pe invitasión, ojevautisa ha orresivi pe espíritu sánto oñepromete vaʼekue (Hech. 2:37, 38, 41).

4. a) ¿Mbaʼérepa iñimportánte ñandéve g̃uarã umi mbaʼe oiko vaʼekue Pentekostéspe? b) ¿Mbaʼépa ohechauka umi primer disípulo ojeporavo hague Pentekostés áño 33-pe? (Ehecha pe nóta.)

4 Umi mbaʼe oiko vaʼekue Pentekostés áño 33-pe iñimportanteterei ñandéve g̃uarã. Upe díape, pe saserdóte prinsipál oikuaveʼẽ Jehovápe mokõi pan orekóva levadúra. Pe saserdóte prinsipál orrepresenta Jesúspe. Ha umi mokõi pan orrepresenta umi disípulo ojeporavo vaʼekuépe tenondete yvyporakuéra pekadór apytégui. [1] (Elee pe nóta oĩva opakuévo ko artíkulo.) Koʼã disípulo Ñandejára oiporavóva ijespíritu sánto rupive ha oadoptáva itaʼyrarã, haʼe hína umi primeroite oikéva pe grúpo ohótavape yvágape, ikatu hag̃uáicha ogoverna yvyporakuérape Crístondi. Chupekuéra oñehenói umi “tenondegua”, térã umi oñemonoʼõ raẽvéva (Sant. 1:18; 1 Ped. 2:9). Umi mbaʼe oiko vaʼekue upe díape iñimportanteterei ñandéve g̃uarã, tahaʼe jarekóramo esperánsa jaikove hag̃ua ko yvy ape ári térã yvágape.

¿MBAʼÉICHAPA ÑANDEJÁRA OIPORAVO UMI UNHÍDOPE?

5. ¿Mbaʼéichapa jaikuaa umi unhídope ndojeporavoiha de la mísma fórma?

5 Ñapensamína: Ñamoĩ chupe nde reimeha umi 120 disípulo apytépe, ha peichahágui ojekuaa ne akã ári peteĩ mbaʼe ojoguáva tatarendýpe ha reñepyrũ reñeʼẽ peteĩ idióma ndereikuaáivape. Katuete ningo reiméta segúro rerresivi hague pe espíritu sánto (Hech. 2:6-12). Péro añetehápe naentéroi umi unhído ojeporavo de la mísma fórma. Upe día de Pentekostéspe hetaiterei persóna orresivi pe espíritu sánto ojevautisárõ guare (Hech. 2:38). La Biblia nomombeʼúi ojehecha hague koʼã persóna akã ári peteĩ mbaʼe ojoguáva tatarendýpe. Péro naentéroi umi unhído orresivi espíritu sánto ojevautisávo. Por ehémplo, umi samaritáno orresivi ojevautisa riréma (Hech. 8:14-17). Cornelio ha hogayguakuéra katu orresivi pe espíritu ojevautisa mboyve (Hech. 10:44-48).

6. a) ¿Mbaʼépa oĩ segúro orresivitaha entéro unhído? b) ¿Mbaʼérepa umi unhído oĩ segúro ojeporavo hague oho hag̃ua yvágape?

6 Jahechaháicha, naentéroi umi unhído ojeporavo de la mísma fórma. Oĩ pyaʼe voi oñemeʼẽva enkuénta ojeporavo hague; ótro katu hasypeve ontende ha oasepta. Péro tahaʼe haʼeháicha enterovévape ojeasegura orresivitaha iñerénsia. Apóstol Pablo heʼi vaʼekue: “Peẽ pejerovia rire hese, Ñandejára oiporu pe espíritu sánto opromete vaʼekue, omoĩ hag̃ua penderehe peteĩ márka. Haʼe ojevale Crístore ojapo hag̃ua upéva. Péva hína peteĩ garantía ohechaukáva Ñandejára omeʼẽtaha ñandéve opa mbaʼe opromete vaʼekue” (Efes. 1:13, 14). Ñandejára omeʼẽ umi unhídope espíritu sánto kómo garantía, ikatu hag̃uáicha ohechauka chupekuéra mbaʼeichagua esperánsapa oreko hikuái. Upévare haʼekuéra ni michĩmi ndodudái  ojeporavo hague oho hag̃ua yvágape (elee 2 Corintios 1:21, 22; 5:5).

7. ¿Mbaʼépa ojapo vaʼerã umi unhído orresiviséramo irrekompénsa?

7 ¿Heʼisépa upéva umi unhído orekoha garantisádo ohotaha yvágape? Nahániri. Haʼekuéra oĩ segúro oñeinvitaha oho hag̃ua yvágape, péro orresivíta hikuái irrekompénsa sólamente osegíramo iñeʼẽrendu ipyʼaite guive Ñandejárape ipahaite peve. Upévare Pedro heʼi vaʼekue umi ermáno unhídope: “Peẽme ningo che ermanokuéra Ñandejára penerenói ha pendeporavo vaʼekue, upévare peñehaʼãmbaitéke haʼe akóinte pendeguerohory hag̃ua. Pesegíramo pejapo koʼã mbaʼe, ni mbaʼevéicharõ napeñepysangamoʼãi. Añetehápe, upéicha peẽ tuichaiterei pejehovasáta ha peikéta ñande Ruvicha ha Salvadór Jesucristo Rréinope; upe Rréino ndopamoʼãi arakaʼeve” (2 Ped. 1:10, 11). Jahechaháicha, káda uno umi unhído osegi vaʼerã iñeʼẽrendu Jehovápe. Peichaʼỹrõ ndovalemoʼãi mbaʼeverã chupekuéra pe invitasión porãite orresivi vaʼekue (Heb. 3:1; Apoc. 2:10).

¿MBAʼÉICHAPA PETEĨ KRISTIÁNO OIKUAA OJEPORAVO HAGUE CHUPE?

8, 9. a) ¿Mbaʼérepa hetápe hasy ontende hag̃ua mbaʼéichapa ojeporavo umi unhídope? b) ¿Mbaʼéichapa peteĩ persóna oikuaa oñeinvitaha chupe oho hag̃ua yvágape?

8 La majoría Ñandejára siérvo nontendepái mbaʼéichapa ojeporavo umi unhídope. Péro upéva ningo upéichatante voi, pórke naentéroipe ojeelehi oho hag̃ua yvágape. Jehová ojapo vaʼekue yvyporakuérape oikove hag̃ua opa árare ko yvy ape ári (Gén. 1:28; Sal. 37:29). Upévare ndahaʼéi normál peteĩ umáno ojeporavo oho hag̃ua yvágape. Péro Jehová oiporavo chupekuéra oiko hag̃ua chuguikuéra rréi ha saserdóte Cristo ndive. Peteĩ kristiáno orresivíva pe invitasión, oreko peteĩ esperánsa ipyahúva ha avei okambia opensa lája (elee Efesios 1:18).

9 ¿Mbaʼéichapa peteĩ persóna oikuaa oñeinvitaha chupe oho hag̃ua yvágape? Pablo omyesakã upéva oskrivírõ guare umi kristiáno Romaguápe ‘ojeporavóvape imarangatu hag̃ua’. Haʼe heʼi chupekuéra: “Peẽme noñemeʼẽi peteĩ espíritu ojapóva pendehegui tembiguái ha penemongyhyje jeýva, oñemeʼẽ guei peteĩ espíritu ohechaukáva Ñandejára pendeadoptaha itaʼýraramo, ha upe espíritu rupive enterove jasapukái: ¡Abba, che Ru! Pe espíritu sánto ha umi mbaʼe ñañandúva, oikuaauka ñande haʼeha Ñandejára raʼy” (Rom. 1:7; 8:15, 16). Upéva heʼise Jehová oipuruha ijespíritu okonfirma hag̃ua pe persónape oñeinvitaha chupe oho hag̃ua ogoverna yvágape Crístondi (1 Tes. 2:12).

10. ¿Mbaʼérepa 1 Juan 2:27 heʼi ‘natekotevẽiha avave omboʼe’ umi unhídope?

10 Umi orresivíva ko invitasión ijojahaʼỹva noikotevẽi ótra persóna okonfirma chupekuéra ojeporavoha espíritu rupive. Jehová voi oñenkarga ani hag̃ua oduda. Apóstol Juan heʼi koʼã kristiánope: “Peẽme katu pendeporavo Ñandejára Imarangatúva, ha enterove peikuaa pe añetegua. Peẽme katu Ñandejára pendeporavo ipodér rupive, ha upéva opyta pene korasõme, ha napeikotevẽi avave penemboʼe. Pe podér oúva chugui añete hína, ndaijapúi ha penemboʼe opa mbaʼe. Pesegíkena pepyta hendive” (1 Juan 2:20, 27). Koʼápe Juan ndeʼiséi kuri umi unhído natekotevẽiha orresivi pe enseñánsa oúva Jehovágui. Haʼekuéra oikotevẽ avei upe enseñánsa umi ótro kristiánoicha. Juan ohechaukánte natekotevẽiha avave okonfirma chupekuéra oñeinvitaha oho hag̃ua yvágape. ¿Mbaʼérepa? Pórke pe espíritu sánto, haʼéva hína pe fuérsa ipoderosovéva ko univérsope, okonfirmáma chupekuéra upéva.

 UMI UNHÍDO ‘ONASE JEY’

11, 12. a) ¿Mbaʼépa ikatu oñeporandu peteĩ unhído? b) ¿Mbaʼépa arakaʼeve noñeporandumoʼãi?

11 Peteĩ kristiáno ojeporavóva espíritu sánto rupive oreko peteĩ esperánsa ipyahúva, ha avei okambia opensa lája. Jesús heʼi haʼeteha “onase jeýva” [2] (Juan 3:3, 5). Haʼe heʼi vaʼekue: “Ani rehecharamo ko haʼéva ndéve: Peẽ penase jey vaʼerã. Pe yvytu oipeju oipejuseha gotyo, nde rehendu hyapu, péro ndereikuaái moõguipa ou ni moõpa oho. Péicha avei entéro umi onaséva espíritugui” (Juan 3:7, 8). Jahechaháicha, ñande ndahaʼéiramo unhído hasýtante voi jaexplika ha ñantende porã hag̃ua mbaʼépa oñandu peteĩ unhído.

12 Umi kristiáno ojeporavóva espíritu sánto rupive ikatu oñeporandu: “¿Mbaʼére piko cheelehi chéve? ¿Mbaʼére piko ndojeporavói ótrope?”. Ikatu avei oñeporandu okumpli porãtapa upe rresponsavilida. Péro arakaʼeve noñeporandúi hikuái oimépa haʼe hína unhído térã nahániri. ¿Mbaʼérepa? Pórke haʼekuéra oĩ segúro Jehová oiporavo hague chupekuéra. Avei ovyʼaiterei ha oagradese hikuái orresivi haguére pe priviléhio, ha heʼi apóstol Pedro heʼi haguéicha: “Toñembotuicha Ñandejárape, ñande Ruvicha Jesucristo Túva. Haʼe ñandeporiahuverekoiterei rupi, ñande ñanase jey jaguereko hag̃ua peteĩ esperánsa oikovéva. Ha upéva oiko Jesucrístope oñemoingove jey rupi omanóva apytégui. Ha upéicha ñahaʼarõ peteĩ erénsia oñembyaiʼỹva, ndaikyʼáiva ha noñehundimoʼãiva. Upéva oñeñongatu peẽme g̃uarã yvágape” (1 Ped. 1:3, 4). Peteĩ kristiáno unhído olee vove koʼã versíkulo, oikuaa porã Itúva yvagapegua oñeʼẽha chupete voi.

13. a) ¿Mbaʼéichapa peteĩ persóna ou okambia opensa lája Jehová oiporavo rire chupe ijespíritu sánto rupive? b) ¿Mbaʼépa la omokambiáva chupekuéra?

13 Jehová oinvita mboyve koʼã kristiánope oho hag̃ua yvágape, haʼekuéra oreko kuri esperánsa oiko hag̃ua ko yvy ape ári opa árare. Upévare katuete oipotáne raʼe hikuái og̃uahẽ pe tiémpo Jehová ojapotahápe ko yvýgui peteĩ paraíso, ha oipeʼatahápe opaichagua inhustísia. Oime vaʼerã oñeimahina raʼe hikuái orresivívo peteĩ ihénte térã iñamígo omano vaʼekuépe. Térã opensa omopuʼã hogarã, oñemitỹ ha hoʼu iproduktokue (Is. 65:21-23). Péro, ¿mbaʼérepa okambia hikuái opensa lája? ¿Oimépa ndovyʼavéi térã osufrieterei? ¿Térãpa ikuerái oikove haguére ko yvy ape ári ha opensa ndovyʼamoʼãiha koʼápe opa árare? ¿Oime piko ohosénte yvágape oikuaa hag̃ua mbaʼéichapa ojeiko upépe? Nahániri. Jehová voi oiporavo koʼã kristiánope oho hag̃ua yvágape. Ha pe espíritu sánto rupive, okambia hikuái opensa lája ha oreko peteĩ esperánsa ipyahúva.

14. ¿Mbaʼéichapa oñeñandu umi unhído oikove aja ko yvy ape ári?

14 ¿Heʼisépa upéva umi unhído omanosentemaha ikatu hag̃uáicha oho yvágape? Pablo ojapo peteĩ komparasión ikatu hag̃uáicha oexplika mbaʼéichapa oñeñandu umi kristiáno ojeporavóva. Haʼe okompara ikuerpokuéra peteĩ ‘ógare’, ha heʼi: “Ñande ñaiméva ko ógape ñanepyahẽ ha jajepyʼapyeterei, ndahaʼéi jahejaségui ko óga jaipeʼaramoguáicha peteĩ ao, síno jarresiviségui pe óga yvagapegua. Péicha pe jeikove opaveʼỹva omyengoviáta ñande rete omanóvape” (2 Cor. 5:4). Ndahaʼéi ningo koʼã kristiáno unhído omanoséntemava. Haʼekuéra ovyʼa ha pyʼarorýpe oservi Jehovápe ihénte ha iñamigokuérandi. Péro siémpre oreko iñakãme pe esperánsa porãite ohaʼarõva chupekuéra (1 Cor. 15:53; 2 Ped. 1:4; 1 Juan 3:2, 3; Apoc. 20:6).

¿NDÉPA HÍNA UNHÍDO?

15. a) ¿Mbaʼépa ikatu oñeporandu peteĩ persóna opensáramo haʼeha unhído? b) Rehechakuaáramo koʼã mbaʼe oikopaiteha nderehe, ¿heʼisépa upéva rejeporavo hague reho hag̃ua yvágape?

15 Oiméramo nereiméi segúro Ñandejára  neinvita hague ikatu hag̃uáicha reho yvágape regoverna hag̃ua Crístondi, koʼã porandu ikatu nepytyvõ: ¿Nekyreʼỹetevépa heta ermánogui repredika hag̃ua? ¿Restudiasetereípa la Biblia ha reaprendese “umi mbaʼe ipypukuvéva oúva Ñandejáragui”? (1 Cor. 2:10). ¿Haʼetépa ndéve Jehová ovendesiha de fórma espesiál umi mbaʼe rejapóva iservísiope? ¿Nekyreʼỹeterei voípa rejapo hag̃ua Ñandejára rembipota? ¿Rehayhúpa umi héntepe ha rejapo opa ikatúva reipytyvõ hag̃ua chupekuéra ikatu hag̃uáicha oikuaa Ñandejárape? ¿Rehechakuaápa Jehová nepytyvõ hague espesífikamente heta vése? Oiméramo rehechakuaa koʼã mbaʼe oikopaiteha nderehe, ¿heʼisépa nde haʼeha peteĩ unhído? Nahániri, pórke ndahaʼéi umi unhídorente oikóva koʼã mbaʼe. Pe espíritu sánto ikatu avei ombaʼapo upéicha entéro kristiánore, tahaʼe ohótaramo yvágape térã oikótarõ ko yvy ape ári. Añetehápe, oiméramo reduda hína, nde ndahaʼéi unhído. Umi unhído ni michĩmi ndodudái ojeporavo hague.

16. Emyesakã mbaʼérepa ndaikatúi jaʼe katuete ohotaha yvágape umi persóna oñandúva pe espíritu sánto oipytyvõha chupekuéra.

16 La Bíbliape omombeʼu oĩ hague heta persóna iñeʼẽrendúva Jehovápe ha oñandúva mbaʼeichaitépa pe espíritu sánto oipytyvõ chupekuéra, ndorekóiramo jepe hikuái esperánsa oho hag̃ua yvágape. Por ehémplo Juan el Bautista. Jesús ningo oñeʼẽ porãiterei vaʼekue hese, péro heʼi avei haʼe noĩmoʼãiha pe Rréino yvagapeguápe (Mat. 11:10, 11). David avei ohecha vaʼekue mbaʼéichapa pe espíritu sánto ogia chupe (1 Sam. 16:13). Por ehémplo oipytyvõ chupe ontende hag̃ua umi mbaʼe ipypukúva oúva Jehovágui, ha oskrivi hag̃ua unas kuánta párte oĩva la Bíbliape (Mar. 12:36). Upéicharõ jepe apóstol Pedro heʼi hese ‘ndojupíri hague yvágape’ (Hech. 2:34). Jehová omeʼẽ ijespíritu sánto koʼã kuimbaʼépe ojapo hag̃ua heta mbaʼe tuicháva, péro upéva ndeʼiséi oinvita hague chupekuéra oho hag̃ua yvágape. Upéicharõ, ¿ikatúpa jaʼe koʼã kuimbaʼe ndokalifikái hague oho hag̃ua ogoverna yvágape? Nahániri. Haʼekuéra ningo iñeʼẽrendu Jehovápe ha oikove jeýta, péro ndahaʼéi yvágape, síno ko yvy ape ári (Juan 5:28, 29; Hech. 24:15).

17, 18. a) ¿Moõpa oikóta la majoría Ñandejára siervokuéra? b) ¿Mbaʼépa jahecháta pe artíkulo oúvape?

17 La majoría Ñandejára siérvo oikóva ko tiémpope, ndohomoʼãi yvágape. Haʼekuéra oikóta ko yvy ape ári opa árare, oikotaháicha avei David, Juan el Bautista ha heta kuimbaʼe ha kuña yma guare iñeʼẽrendúva Jehovápe. Abrahán ohaʼarõ haguéicha, koʼã persóna oipota avei Ñandejára ogoverna ko yvy (Heb. 11:10). Sólamente 144.000 kristiáno ogovernáta Crístondi yvágape, ha umíva apytégui saʼíma hemby ko yvy ape ári. Opavave léntoma omano (Apoc. 12:17).

18 Ñahesaʼỹijo rire koʼã mbaʼe, ¿mbaʼéichapa jahecha vaʼerã umi unhídope? Oĩramo ne kongregasiónpe oñepyrũva hoʼu pe pan ha pe víno Konmemorasiónpe, ¿mbaʼéichapa retrata vaʼerã chupe? ¿Iporãpa rejepyʼapy heta hetavéramo umi hoʼúva pe pan ha pe víno Konmemorasiónpe? Koʼã porandu oñembohováita pe artíkulo oúvape.

^ [1] (párrafo 4) Posívlemente Pentekostés ojegueromanduʼa pe mísma fécha Moisés omeʼẽ hague umi isrraelítape Ñandejára Léi pe Mónte Sinaípe (Éx. 19:1). Oiméramo upéicha, Jesús ojapo pe kompromíso idisipulokuéra unhídondi, térã Israel Ñandejára mbaʼévandi, la mísma fécha Ñandejára ojapo haguépe pe pákto de la Léi Israel ndive.

^ [2] (párrafo 11) Reikuaave hag̃ua mbaʼépa heʼise ñanase jey, ehecha Ñemañaha abril-junio de 2009, páhina 3 guive 11 peve.