Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Enero de 2016

Burnett, Simone, Eston, ha Caleb

Kyreʼỹme oñekuaveʼẽ hikuái oservi hag̃ua Oceaníape

Kyreʼỹme oñekuaveʼẽ hikuái oservi hag̃ua Oceaníape

PETEĨ ermána Australiagua hérava Reneé, orekóva 35 áñorupi, okakuaa vaʼekue peteĩ família omombaʼetereívape Jehová servísio. Ko ermána omombeʼu: “Ore ningo heta vése rova umi lugár oñekotevẽhápe puvlikadór. Papa ha mama ojapómi heta mbaʼe orembovyʼáva ha oremokyreʼỹva. Upéi, che amenda ha areko rire mokõi mitã, aipota avei haʼekuéra odisfruta umi mbaʼe che ahasa vaʼekue chemitãrõ guare”.

 Reneé ména, hérava Shane ha orekóva haimete 40 áño, oipota avei ifamília oservi Jehovápe oĩháme nesesida. Ko ermáno heʼi: “Onase rire che família mokõiha, rolee peteĩ Ñemañaha omombeʼúva peteĩ família oho hague ivarkoʼípe oséano Pacíficope, suroéste gotyo, opredika hag̃ua umi ísla héravape Tonga. * Upe artíkulo oremokyreʼỹ roskrivi hag̃ua umi sukursál oĩvape Austráliape ha Nueva Zelándape, roporandu hag̃ua moõpa oñekotevẽve puvlikadór. * Haʼekuéra oreinvita rova hag̃ua Tóngape, pe lugár oñeñeʼẽ hague pe rrevístape”.

Jacob, Reneé, Skye, ha Shane

Upéi Shane, Reneé ha umi mokõi ifamília, Jacob ha Skye, ova Tóngape. Ohasa rire un áñorupi, oiko peteĩ sarambi upe lugárpe ha oho jeýmante hikuái Austráliape. Upéicharõ jepe, haʼekuéra ojedesidi osegitaha ojapo hetave mbaʼe Jehová servísiope. Áño 2011-pe ova hikuái ísla Nórfolkpe, peteĩ ísla michĩva oĩva oséano Pacíficope ha opytáva 1.500 kilómetrorupi éste gotyo Austráliagui. ¿Mbaʼéichapa oho chupekuéra? Jacob, orekómava 14 áño, heʼi: “Jehová oñangareko orerehe, ha hiʼarive orepytyvõ rovyʼa hag̃ua ore servísiope”.

OJEPREPARA HIKUÁI OSERVI HAG̃UA EN FAMÍLIA

Ojapo haguéicha Shane, Reneé ha ifamiliakuéra, heta família Testígo kyreʼỹme oñekuaveʼẽ oho hag̃ua oservi oĩháme nesesida. ¿Mbaʼépa omomýi chupekuéra ojapo hag̃ua upéva?

“Heta hénte ohenduseterei pe marandu porã. Ha ore romeʼẽse chupekuéra oportunida ikatu hag̃uáicha ostudia la Biblia” (Burnett).

Burnett ha Simone, de 35 áñorupi, ha ifamiliakuéra hérava Eston de 12 áño, ha Caleb de 9, ova avei peteĩ lugár oñekotevẽhápe puvlikadór. Upe puévlo héra Burketown ha opyta mombyry Queénslandpe, (Australia). Burnett omombeʼu: “Koʼápe umi ermáno ou opredika káda tres o cuatro áño. Heta hénte ohenduseterei pe marandu porã. Ha ore romeʼẽse chupekuéra oportunida ikatu hag̃uáicha ostudia la Biblia”.

Jim, Jack, Mark, ha Karen

Mark ha Karen, orekóva 50 áño rasami, oservi kuri avei unas kuánta kongregasiónpe Sydney ypýrupi (Australia). Péro upéi haʼekuéra ha umi mbohapy ifamília, hérava Jessica, Jim ha Jack, ova mombyry peteĩ puévlo minérope hérava Nhulunbuy, opytáva Territorio del Nórtepe. Mark heʼi: “Ahayhueterei umi héntepe, ha aimese peteĩ lugár ikatuhápe aipytyvõve kongregasiónpe ha predikasiónpe”. Karen katu ñepyrũrã okyhyje ova hag̃ua. Péro upéi heʼi: “Mark ha umi ótro ermáno heta chemokyreʼỹ rire, aĩma dispuésta atanteávo. Koʼág̃a g̃uarã avyʼáma añanima haguére aju koʼápe”.

Benjamin, Jade, Bria, ha Carolyn

Áño 2011-pe, Benjamin ha Carolyn, ha umi mokõi ifamília michĩva, hérava Jade ha Bria, oikóva kuri Queénslandpe (Australia), ova Timor Orientálpe. Upéva ningo peteĩ país michĩva opytáva ísla Timórpe, oĩva Indonésiape. Ben omombeʼu: “Carolyn ha che roservíma vaʼekue voi de prekursór espesiál Timor Orientálpe. Koʼápe igustoiterei japredika ha umi ermáno orepytyvõiterei. Rombyasyeterei kuri rohórõ guare, ha roʼe voi ág̃ante roju jeytaha. Upéi onase ore familiakuéra ha ndaikatúi roju ensegída, péro noromboykéi pe rodesidi vaʼekue”. Carolyn heʼi avei: “Roipota ore familiakuéra okakuaa umi misionéro, vetelíta ha umi prekursór espesiál apytépe. Péicha haʼekuéra ojepreparáta oservi porã hag̃ua Jehovápe”.

OJEPREPARA HIKUÁI OVA HAG̃UA

Jesús heʼi kuri isegidorkuérape: “¿Mávapa pende apytépe omopuʼãsérõ peteĩ tórre ndoguapyraẽi okalkula mboýpa ogastáta?” (Luc. 14:28). Péicha avei, peteĩ família opensáramo ova ótro lugárpe, tekotevẽ okalkula porã raẽ. ¿Mbaʼe mbaʼépa ohecha vaʼerã hikuái?

OĨ PORÃ VAʼERÃ HIKUÁI ESPIRITUÁLMENTE: Ben heʼi: “Ore ningo roipytyvõse ótrope, ha ni mbaʼevéicharõ ndoroikoséi peteĩ kárgaramo. Upévare roñehaʼãmbaite orembarete espirituálmente rova mboyve. Rombaʼapo meme predikasiónpe ha kongregasiónpe”.

Jacob, ñañeʼẽma hague ajeʼi, heʼi: “Rova mboyve ísla Nórfolkpe, rolee Ñemañaha ha ¡Despertad!-pe heta ermáno rembiasakue. Umíva omombeʼu mbaʼéichapa heta família oho oservi oĩháme nesesida. Upéi roñemongeta umi mbaʼe haʼekuéra ombohovái vaʼekuére ha mbaʼéichapa Jehová oñangareko hesekuéra”. Iñermána Skye, orekóva 11 áño, katu heʼi: “Heta añemboʼe Jehovápe, cheañohápe a avei mama ha papándi”.

OĨ VAʼERÃ PREPARÁDO HIKUÁI EMOSIONÁLMENTE: Reneé hei: “Ore roiko vaʼekue peteĩ lugár chéve  chegustaitereihápe, ag̃ui ore hénte ha ore amigokuéragui. Upévare ifasilve voi ropensa núnka ndorovamoʼãiha upégui. Péro apensa rangue umi mbaʼe rohejátavare, añemoĩ apensa umi venefísio rohupytýtavare ore famíliandi”.

OJEPOKUAA VAʼERÃ HIKUÁI UMI KOSTÚMBRERE: Heta família oinvestiga porã raẽ pe lugár ohotaha. Mark heʼi: “Rolee heta informasión oñeʼẽva Nhulunbuy rehe. Ha umi ermáno oikóva upe siudápe ogueruka oréve umi diário upepegua, ikatu hag̃uáicha ore roikuaáma mbaʼéichapa ojeiko hína upépe, ha mbaʼe kostúmbrepa oreko umi hénte”.

Shane, ova vaʼekue ísla Nórfolkpe, heʼi avei: “Añehaʼãmbaite asegi Cristo ehémplo. Aikuaa porã chedeprovechotaha oimeraẽ lugárpe chesinséroramo, cherory, cheonrrádo ha cheguáporamo”.

OHASA HIKUÁI HETA MBAʼE IJETUʼÚVA

Ikatu hag̃uáicha ñandedeprovécho peteĩ lugár oĩháme nesesida, tekotevẽ ñandepositívo. Ha oikóramo peteĩ mbaʼe ñaimoʼãʼỹva, naiporãmoʼãi ñañemohatã ñande jaʼévapente. Ñapensamína koʼã ehémplore:

Reneé omombeʼu: “Aaprende ikatuha jajapo heta mbaʼe de diferénte fórma, por ehémplo ñañekosina hag̃ua. Pe tiémpo ivai jave, umi várko ndaikatúi og̃uahẽ pe ísla Nórfolkpe, ha péicha jave ofaltapa térã hepyeterei umi hiʼupy. Upévare añehaʼã aipuru porã umi provísta arekomíva”. Iména Shane katu heʼi: “Avei roñehaʼãmbaite rogasta saʼive ikatu hag̃uáicha orerupyty ore pláta káda semána”.

Itaʼýra Jacob omombeʼu ambue mbaʼe ombohováiva hikuái: “Ore kongregasión pyahúpe oĩ kuri siete ermánonte, ha ndaipóri ni peteĩ imitãva. Upévare ndarekói ni peteĩ amígo chejavegua. Péro asẽ memévo umi ermáno ijedavévandi predikasiónpe, ajepokuaavéma hesekuéra ha oikóma orehegui oñoamigoite”.

Jim, orekómava 21 áño, heʼi: “Pe kongregasión hiʼag̃uivéva Nhulunbúygui opyta 725 kilómetro, upévare roaprovechapaite oiko jave umi asambléa. Rog̃uahẽ voi porã ha rokomparti vyʼápe umi ermánondi. Koʼã okasión ningo haʼe umi iñimportantevéva káda áño”.

 “¡AVYʼAITE NINGO ROJU HAGUÉRE KOʼÁPE!”

La Biblia heʼi: “Jehová vendisión la ñanemoakãrapuʼãva” (Prov. 10:22, NM). Hetaiterei ermáno ohóva oservi umi lugár oĩháme nesesida, ohechakuaa mbaʼéichapa ko téxto oñekumpli hesekuéra.

Mark heʼi: “Rohecha ningo mbaʼéichapa oipytyvõ ore famíliape rova haguére koʼápe, ha upéva peteĩ vendisión iporãitereíva. Umi tuichavémava ojerovia ipyʼaite guive Jehová oñangarekotaha umi omotenondévare Irréino. Ha peichagua konfiánsa ndaijojahái”.

Shane avei heʼi: “Ahechakuaa che, che rembireko ha che familiakuéra roĩveha unído. Avyʼaiterei ahendúvo omombeʼu jave hikuái mbaʼépa Jehová ojapo hesehapekuéra”. Itaʼýra Jacob heʼi: “Ahasa porãiterei. ¡Avyʼaite ningo roju haguére koʼápe!”.

^ párr. 3 Ehecha pe artíkulo “Amigos de Dios en las ‘islas de la Amistad’”, osẽ vaʼekue La Atalaya 15 de diciembre de 2004-pe, páhina 8 al 11.

^ párr. 3 Áño 2012-pe umi sukursál Australia ha Nueva Zelandagua uñeuni ha oñeforma pe sukursál de Australasia.