Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Diciembre de 2017

Tuakuéra, peipytyvõkena pene famíliape iñarandu ha ojesalva hag̃ua

Tuakuéra, peipytyvõkena pene famíliape iñarandu ha ojesalva hag̃ua

“Nde reikuaa ne mitã guive Ñandejára Ñeʼẽ, ikatúva nemoarandu rejesalva hag̃ua” (2 TIM. 3:15).

PURAHÉI: 141, 134

1, 2. ¿Mbaʼérepa sapyʼánte tuakuéra ojepyʼapy ifamília odesidi jave oñemeʼẽtaha Jehovápe ha ojevautisa?

HETAITEREI estudiánte de la Biblia ningo káda áño oñemeʼẽ Jehovápe ha ojevautisa. Umíva apytépe oĩ heta mitãrusu ha mitãkuña michĩ guive oikuaámava pe añetegua. Péicha oelehi hikuái pe tape iporãvéva (Sal. 1:1-3). Oiméramo nde peteĩ túa térã sy oservíva Jehovápe, katuete hiʼãiterei ndéve ne família ojevautisa (embojoja 3 Juan 4 heʼívare).

Upéicharõ jepe oiméne ejepyʼapy avei. Ikatu oime rehecha oĩha mitãrusu térã mitãkuña ojevautisa rire odudáva añetehápepa ideprovécho jajapo la Biblia heʼíva. Oĩ voi umi ohejaitéva Jehovápe. Upéicha rupi ikatu rekyhyje ne família ojevautisa rire oúrõ g̃uarã avei ndohayhuvéi Jehovápe ha nomombaʼevéi la Biblia omboʼéva. Upéicha oiko vaʼekue yma umi kristiáno Efesoguáre. Peteĩ jey Jesús heʼi upe kongregasiónpe: “Nderehayhuvéima Ñandejárape, rehayhu haguéicha chupe iñepyrũme” (Apoc. 2:4). ¿Mbaʼéichapa ikatu reipytyvõ ne famíliape  amás día ohayhuve hag̃ua Jehovápe ikatu hag̃uáicha ojesalva? (1 Ped. 2:2). Jahechamína mbaʼépa ikatu ñaaprende Timoteo ehémplogui.

“REIKUAA NE MITÃ GUIVE ÑANDEJÁRA ÑEʼẼ”

3. a) ¿Mbaʼéichapa Timoteo oñepyrũ vaʼekue oaprende Jesúsgui, ha mbaʼépa ojapo umi mbaʼe oaprendévagui? b) Pablo heʼi vaʼekue mbohapy mbaʼe iñimportánteva Timotéope, ¿mbaʼe mbaʼépa umíva?

Áño 47-pe apóstol Pablo ovisita vaʼekue primera ves Listra. Posívlemente upérõ guare Timoteo oñepyrũ vaʼekue oaprende umi mbaʼe Jesús omboʼe vaʼekue. Upe tiémpope oiméne haʼe imitãiti kuri, péro omoĩma en práktika entéro umi mbaʼe oaprendéva. Dos áño haguépe oñepyrũma omoirũ Páblope ovisita jave umi kongregasión. Amo 16 áñorupi upe rire, Apóstol Pablo oskrivi Timotéope: “Nde reñehekomboʼe vaʼekue hekoitépe reguerovia hag̃ua nde pyʼaite guive, upévare akóinte resegi vaʼerã umi mbaʼe reaprende vaʼekue, reikuaa porãgui mávapa nemboʼe umíva. Nde reikuaa ne mitã guive Ñandejára Ñeʼẽ [umi Escrituras Hebreas], ikatúva nemoarandu rejesalva hag̃ua rejerovia rupi Cristo Jesús rehe” (2 Tim. 3:14, 15). Ñaanalisamína mbohapy mbaʼe Pablo heʼi vaʼekue Timotéope: 1) “reikuaa ne mitã guive Ñandejára Ñeʼẽ”, 2) “reguerovia hag̃ua nde pyʼaite guive”, ha 3) “ikatúva nemoarandu rejesalva hag̃ua rejerovia rupi Cristo Jesús rehe”.

4. ¿Mbaʼépa ideprovécho ndéve remboʼe hag̃ua ne família michĩvape? (Ehecha pe taʼanga oĩva iñepyrũme).

Oiméramo nde peteĩ sy térã túa reservíva Jehovápe, katuete reipotaiterei ne família oikuaa porã “Ñandejára Ñeʼẽ”. Ñane tiémpope jarekóma pe Escrituras Hebreas ha Escrituras Griegas Cristianas. Umi mitã ningo michĩ guive ikatúma oaprende umi istória ha rreláto oĩva la Bíbliape. Jehová organisasión onohẽ heta lívro, folléto ha vidéo ikatúva tuakuéra oipuru omboʼe hag̃ua ifamíliape. ¿Máva mávapa umívagui oĩ ne idiómape? Umi mitã ningo oikuaa porã vaʼerã la Biblia omboʼéva ikatu hag̃uáicha oñemoag̃ui avei Jehováre.

“REGUEROVIA HAG̃UA NDE PYʼAITE GUIVE”

5. a) ¿Mbaʼépa heʼise pe fráse “reguerovia hag̃ua nde pyʼaite guive”? b) ¿Mbaʼérepa jaʼekuaa Timoteo oguerovia hague umi mbaʼe oaprendéva Jesúsgui?

Ndahaʼéi vaʼerã ñamboʼénteva ñane famíliape umi istória ha rreláto oĩva la Bíbliape. Ñanemanduʼa vaʼerã Timoteo oĩ hague konvensído umi mbaʼe oaprendévagui. Por ehémplo, Pablo heʼi vaʼekue chupe: “Reguerovia hag̃ua nde pyʼaite guive”. Griégope ko fráse heʼise avei “reime hag̃ua segúro” térã “reguerovia siertoha peteĩ mbaʼe”. Timoteo imitãite guive oaprende vaʼekue pe Escrituras Hebréasgui. Upéi oaprende kuri hetave mbaʼe okonvenséva chupe Jesús añetehápe haʼeha pe Mesías. Haʼe oikuaa porã rupi siertoha koʼã mbaʼe, odesidi ojevautisa ha omoirũ Páblope ovisita jave umi kongregasión oĩva diferénte tetãrupi.

6. ¿Mbaʼéichapa ikatu reipytyvõ ne famíliape oguerovia hag̃ua ipyʼaite guive la Biblia omboʼéva?

Timoteo oguerovia vaʼekue ipyʼaite guive umi mbaʼe oaprendéva, ¿mbaʼéichapa ikatu reipytyvõ ne famíliape ojapo hag̃ua avei upéva? Tekotevẽterei ne pasiénsia hese. Kon el tiémpomante haʼe ojeroviavéta ohóvo Jehováre. Nemanduʼa vaʼerã avei ndahaʼeiha nde reguerovia haguérente peteĩ mbaʼe, haʼe ogueroviatamaha avei upéva. Umi mitã tekotevẽ “oipuru meme iñakã” ikatu hag̃uáicha okonvense chupekuéra umi mbaʼe oaprendéva la Bíbliagui (elee Hebreos 5:14). Tuakuéra tuicha ikatu oipytyvõ ifamíliape omombarete hag̃ua ijerovia, koʼýte umi mitã oporandu jave chupekuéra peteĩ  mbaʼe oikuaaséva. Jahechamína mbaʼépa ikatu ñaaprende peteĩ túa ehémplogui.

7, 8. a) ¿Mbaʼéichapa Thomas ohechauka ipasiensiaha omboʼe hag̃ua itajýrape? b) ¿Mbaʼéicha javépa nde avei tekotevẽ nepasiénsia ne famíliare?

Thomas oreko peteĩ itajýra de 11 áño. Haʼe heʼi sapyʼánte itajýra oporanduha chupe: “¿Noiméi piko Jehová ojevale rakaʼe pe evolusión rehe okrea hag̃ua opa mbaʼe oikovéva? ¿Mbaʼére piko ñande ndajavotái avei jaapojave hag̃ua ñane komunidápe?”. Sapyʼánte haʼe heʼi porãséntema itajýrape mbaʼépa la oguerovia vaʼerã, péro ojejokopaite ani hag̃ua ojapo upéva. Thomas oikuaa iporãveha mbeguekatúpe ñakonvense jahávo peteĩ persónape heta pruéva rupive, jajapo rangue upéva unavetépe.

Thomas oikuaa avei tekotevẽha ipasiénsia ikatu hag̃uáicha omboʼe porã itajýrape. Añetehápe ningo entéro kristiáno ipasiénsiante vaʼerã voi (Col. 3:12). Thomas ohechakuaa iñimportanteha oñemotiémpo ha oñemongeta meme itajýrandi. Haʼe orrasona hendive la Biblia omboʼévare ikatu hag̃uáicha oguerovia ipyʼaite guive umi mbaʼe oaprendéva. Thomas heʼi: “Che ha che rembireko roikuaase ore famíliapa oguerovia hína la romboʼéva chupe ha isentídopa chupe g̃uarã umíva. Upévare rovyʼa voi oporandúramo oréve álgo. Sinséramente ajepyʼapýta kuri ogueroviánteramo la ojeʼéva chupe ha noporandúiramo mbaʼeve”.

9. ¿Mbaʼéichapa ikatu reipytyvõ ne famíliape ojerovia hag̃ua Ñandejára Ñeʼẽre?

Tuakuéra ipasiénsiaramo omboʼe hag̃ua ifamíliape, mbeguekatúpe haʼekuéra ontende porãvéta “pe añetegua: ipekue, ipukukue, ijyvatekue ha ipypukukue” (Efes. 3:18). Iñimportánte oreko hikuái enkuénta ifamília eda ikatu hag̃uáicha omboʼe chupekuéra umi mbaʼe ikatútava ontende. Umi mitã ogueroviáramo ipyʼaite guive umi mbaʼe oaprendéva, ifasilvéta chupekuéra odefende hag̃ua ikreénsia tahaʼe koléhiope térã ótro hendápe (1 Ped. 3:15). Epensamína, ¿ikatúnepa ne família oexplika la Biblia rupive mbaʼépa oiko umi omanóvagui? ¿Okonvensépa chupekuéra la Biblia omboʼéva? * Aníkena nderesarái iñimportanteha nepasiénsia ikatu hag̃uáicha reipytyvõ ne famíliape ojerovia hag̃ua Ñandejára Ñeʼẽre. Arakaʼeve ningo nerembyasymoʼãi rejapóramo upéicha (Deut. 6:6, 7).

10. ¿Mbaʼépa iñimportánte ojapo tuakuéra?

10 Ne ehémplo ningo tuichaiterei avei oipytyvõta ne famíliape ojeroviave hag̃ua ohóvo. Stephanie, orekóva mbohapy mitãkuña, heʼi: “Che membykuéra michĩete guive, añeporandúmi vaʼekue: ‘¿Aexplikápa chupekuéra mbaʼérepa che aime segúra Jehová oexistiha ha avei haʼe ihústo ha ñanderayhuetereiha? ¿Ohechápa cherehe hikuái añetehápe ahayhuha Jehovápe?’. Ndaikatúi ningo ahaʼarõ haʼekuéra ojerovia mbarete Ñandejárare che voi ndahechaukáiramo chupekuéra upéva”.

“NEMOARANDU REJESALVA HAG̃UA”

11, 12. a) ¿Mbaʼépa heʼise pe palávra arandu? b) ¿Mbaʼérepa jaʼekuaa nodependeiha ñande edáre ñanearandu hag̃ua?

11 Jahechaháicha, Timoteo 1) oikuaa porã vaʼekue Ñandejára Ñeʼẽ heʼíva, ha 2) oguerovia ipyʼaite guive umi mbaʼe oaprendéva. Péro, ¿mbaʼérepa Pablo heʼi vaʼekue Timotéope Ñandejára Ñeʼẽ omoarandutaha chupe ojesalva hag̃ua?

12 Lívro Perspicacia volumen 2 heʼi pe palávra arandu ojepuru jave la Bíbliape ikatuha osignifika peteĩ persóna “oipuru porãha umi mbaʼe oikuaáva, tahaʼe osolusiona hag̃ua peteĩ provléma, omboyke térã ojehekýi hag̃ua oimehaichagua pelígrogui. Avei heʼise upe persóna ndaivyroiha, ha pe arandu oipytyvõha  chupe ikatu hag̃uáicha ohupyty iméta ha omokyreʼỹ hag̃ua ótrope ojapo hag̃ua upéva”. La Biblia ningo heʼi: “Umi mitã vyroreínte voi ojapose” (Prov. 22:15). Pe iñarandúva ningo ndaivýroi ha upéva ohechauka iñakãguapyha. Peteĩ persóna iñakãguapy hag̃ua nodependéi ijedáre, síno orrespeta vaʼerã Jehovápe ha ojapo vaʼerã hembipota (elee Salmo 111:10).

13. ¿Mbaʼéichapa umi mitãrusu ha mitãkuña ikatu ohechauka iñaranduha?

13 Umi mitãrusu ha mitãkuña oñehaʼãva omombarete ijerovia, ndohejái umi mbaʼe ojaposéva ni ikompañerokuéra heʼíva ogueraha chupe “ápe ha pépe umi oláda ha yvytu oguerahaháicha peteĩ várko oĩva márpe” (Efes. 4:14). Upéva rangue, “oiporu meme iñakã ha upévare ikatupyry oikuaa hag̃ua mbaʼépa iporã ha mbaʼépa ivai” (Heb. 5:14). Upéicha rupi odesidi porã hikuái, ituakuéra térã ótra persóna majór noĩriramo jepe hendivekuéra (Filip. 2:12). Peichagua arandu ningo la ñaikotevẽva jajesalva hag̃ua (elee Proverbios 24:14). ¿Mbaʼéichapa ikatu reipytyvõ ne famíliape iñaranduve hag̃ua ohóvo? Nde voi reñehaʼã vaʼerã ikatu hag̃uáicha haʼekuéra ohecha mbaʼépa la iñimportantevéva ndéve g̃uarã. Umi mbaʼe ere ha ejapóvare ohechakuaa vaʼerã hikuái eñehaʼãha eiko la Biblia heʼiháicha (Rom. 2:21-23).

¿Mbaʼérepa tuakuéra osegi vaʼerã oñehaʼã ifamíliare? (Ehecha párrafo 14-18)

14, 15. a) ¿Mbaʼérehepa opensa vaʼerã peteĩ mitãrusu térã mitãkuña ojevautisaséva? b) ¿Mbaʼéichapa ikatu reipytyvõ ne famíliape opensa hag̃ua umi mbaʼe porã ohupytýtavare ojapóramo la Biblia heʼíva?

14 Ikatu hag̃uáicha ne família ojeroviave ohóvo, ndahaʼéi vaʼerã erénteva chupe mbaʼépa oĩ porã ha mbaʼépa oĩ vai. Síno reipytyvõ vaʼerã chupe orrasona hag̃ua. Upearã ikatu reporandu chupe: ¿Mbaʼérepa la Biblia oproivi peteĩ mbaʼe haʼetévaicha la igústova? ¿Mbaʼérepa nde repensa iporãveha jajapo la Biblia heʼíva? (Is. 48:17, 18).

15 Ne família heʼíramo ndéve ojevautisaseha, eipytyvõ vaʼerã chupe ohechakuaa hag̃ua upéva iñimportantetereiha, ha mbaʼe mbaʼépa oñehaʼãrõ chugui upe rire. Ikatu eporandu chupe: ¿Mbaʼépa repensa pe vautísmore? ¿Mbaʼe iporãvapa rehupytýta? ¿Mbaʼe  mbaʼépa ikatu hína rembohovái? ¿Mbaʼérepa ikatu ere umi mbaʼe porã rehupytýtava tuichaiteveha umi mbaʼe ikatúvagui rembohovái? (Mar. 10:29, 30). Iñimportanteterei ningo pemorrasona pene famíliape ojevautisa mboyve. Peipytyvõ vaʼerã chupe ohechakuaa hag̃ua mbaʼépa ohupytýta iñeʼẽrendúramo ha mbaʼépa ikatu oiko hese naiñeʼẽrendúiramo. Koʼã mbaʼe katuete oipytyvõta chupe ohechakuaa hag̃ua siémpre iporãvetaha ojapo la Biblia heʼíva (Deut. 30:19, 20).

MITÃRUSUKUÉRA OJEVAUTISÁMAVA ODUDÁRAMO IKREÉNSIAGUI

16. ¿Mbaʼépa pejapo vaʼerã pene família ojevautisámava oúramo ijerovia kangy?

16 ¿Mbaʼépa ikatu ojapo tuakuéra ifamília ojevautisámava oúramo oduda ikreénsiagui? Por ehémplo, Ikatu oime ogusta chupe ko múndo oikuaveʼẽva, térã oduda okonvenípa chupe añete ojapo la Biblia heʼíva (Sal. 73:1-3, 12, 13). Tuakuéra, odepende hína mbaʼéichapa pemaneha ko situasión ikatu hag̃uáicha pene família osegi oservi Jehovápe térã oñemomombyry chugui. Peñehaʼã vaʼerã ani peikovai hendivekuéra, tahaʼe imitãramo gueteri hikuái térã oiméramo ikariaʼy ha ikuñataĩma ohóvo. Pene família ohechakuaa vaʼerã pehayhu ha peipytyvõsenteha chupekuéra.

17, 18. ¿Mbaʼéichapa ikatu reipytyvõ ne famíliape odudáramo ikreénsiagui?

17 Peteĩ mitãrusu térã mitãkuña ojevautisáva ningo opromete Jehovápe oñemeʼẽha chupe ojapo hag̃ua ivolunta. Opromete ohayhu ha omotenondetaha chupe opa mbaʼépe (elee Marcos 12:30). Jehovápe g̃uarã upe promésa iñimportanteterei, ha entéro ojevautisáva ohecha vaʼerã avei upéicha (Ecl. 5:4, 5). Tuakuéra siémpre omomanduʼa vaʼerã upéva ifamíliape. Péro primero oanalisa vaʼerã umi informasión omeʼẽva Jehová organisasión tuakuérape g̃uarã, ha upéi ohecha vaʼerã mbaʼe moméntopepa opyta porãvéta oñemongeta hag̃ua hendive. Mborayhúpe oipytyvõ vaʼerã ifamíliape imanduʼa hag̃ua umi mbaʼe opromete vaʼekuére Jehovápe ojevautisárõ guare, ha ohechakuaa hag̃ua umi mbaʼe porã ohupytýva oservi rupi chupe.

18 Por ehémplo, ikatu petopa heta suherénsia pe lívro héravape Mitãrusukuéra oñeporandúva jepi, volúmen 1. Upe lívrope, heʼihápe Informasión oĩvéva, oĩ pe párte hérava: “Tuvakuéra oñeporandúva”. Upépe heʼi: “Ani voi rejapura repensa hag̃ua ne família omboyketamaha Ñandejárape. Ikatu oime ombohováinte hína peteĩ provléma omokangyʼimíva chupe ha upévare ipyʼamokõi”. Por ehémplo ikatu hína ikompañerokuéra omboliga chupe ojapo hag̃ua álgo noĩporãiva, oñeñandu haʼeño térã opensa hapicha ijavegua pyaʼeve oprogresaha chugui kongregasiónpe. Pe lívrope heʼi avei: “Ikatu ijetuʼúnte ne famíliape koʼã mbaʼe ha upévare hasy lénto chupe ojapo hag̃ua la Biblia heʼíva. Péro ndahaʼéi ku opensáva japuha umi mbaʼe remboʼe vaʼekue chupe ha ndoikuaasevéimava mbaʼeve Ñandejáragui”. Pe lívro omombeʼu avei tuakuérape mbaʼéichapa ikatu oipytyvõ ifamíliape oúramo oduda ikreénsiagui.

19. ¿Mbaʼéichapa ikatu peipytyvõ pene famíliape ikatu hag̃uáicha iñarandu ha ojesalva?

19 Tuakuéra oreko pe rresponsavilida ha priviléhio ohekomboʼévo ifamíliape. La Biblia heʼi: “Pesegi vaʼerã pemongakuaa ha pekorrehi pene famíliape Jehová oipotaháicha” (Efes. 6:4). Jahecháma haguéicha, upéva ndeʼiséi ñamboʼetanteha chupekuéra la Biblia heʼíva, síno ñaipytyvõ vaʼerã oguerovia hag̃ua ipyʼaite guive umi mbaʼe oaprendéva. Haʼekuéra ojerovia mbaretéramo, upéva omomýita chupekuéra oñemeʼẽ hag̃ua Jehovápe ha oservi hag̃ua chupe ipyʼaite guive. Aníkena penderesarái, la Biblia, pe espíritu sánto ha peẽ tuakuéra ikatuha peipytyvõ pene famíliape ikatu hag̃uáicha iñarandu ha ojesalva.

^ párr. 9 Ñande sítiope Internétpe oĩ umi gía de estúdio oñeguenohẽva pe lívro Enséñagui. Upéva oĩ heta idiómape ha ikatu oipytyvõ umi mitã ha kakuaápe ontende ha oexplika hag̃ua la Biblia omboʼéva. Ko gía retopa hag̃ua eike jw.org-pe heʼihápe ENSEÑANZAS BÍBLICAS > AYUDAS PARA ESTUDIAR LA BIBLIA.