Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Diciembre de 2016

Eheja Jehová pópe opaite mbaʼe ndepyʼapýva

Eheja Jehová pópe opaite mbaʼe ndepyʼapýva

“Pemoĩ ipópe opaite mbaʼe pendepyʼapýva, haʼe ojepyʼapýgui penderehe” (1 PED. 5:7).

PURAHÉI: 60, 23

1, 2. a) ¿Mbaʼérepa ñañekevrantaiterei jepi? (Ehecha pe taʼanga oĩva iñepyrũme). b) ¿Mbaʼépa jahecháta ko artíkulope?

LA Biblia heʼi: “Pe Aña, okorre oikóvo pende jerére peteĩ león pochýicha ha oñehaʼã omokõ oimeraẽvape” (1 Ped. 5:8; Apoc. 12:17). Upévare ko múndope jahasa heta situasión ipohýiva ha ñanekevrantaitereíva. Ñandejára siervokuéra yma guare ohasa avei koʼãichagua situasiónre. Por ehémplo, rréi David heta vése ojepyʼapyeterei vaʼekue (Sal. 13:2). Avei, apóstol Pablo “káda día [ojepyʼapy] entéro umi kongregasiónre” (2 Cor. 11:28). Ha ñande, ¿mbaʼépa ikatu jajapo ñañekevrantaiterei jave?

2 Ñande Ru yvagapegua ñanderayhuetéva, oipytyvõ isiervokuéra yma guarépe ipyʼaguapy hag̃ua, ha koʼág̃a ñanepytyvõse avei. La Biblia heʼi: “Pemoĩ ipópe opaite mbaʼe pendepyʼapýva, haʼe ojepyʼapýgui penderehe” (1 Ped. 5:7). ¿Mbaʼéichapa ikatu jajapo upéva? Ko artíkulope jahecháta 4 mbaʼe ñanepytyvõtava: 1) ñañemboʼe, 2) jalee la Biblia ha jajepyʼamongeta hese, 3) jajerure Jehovápe ijespíritu sánto, ha 4) ñamombeʼu peteĩ persóna ñakonfiávape mbaʼéichapa ñañeñandu. Ñahesaʼỹijóvo koʼã mbaʼe, iporãta jahecha mbaʼépepa tekotevẽ ñamehorave.

 “EMOĨ JEHOVÁ PÓPE UMI MBAʼE NDEPYʼAPÝVA”

3. ¿Mbaʼéichapa ikatu ñamoĩ Jehová pópe umi mbaʼe ñandepyʼapýva?

3 Primero, ikatu ñamoĩ Jehová pópe umi mbaʼe ñandepyʼapýva pe orasión rupive. Rejepyʼapyeterei jave, Jehová oipota remombeʼu chupe mbaʼeichaitépa reñeñandu. Rréi David ojerure asy vaʼekue Jehovápe: “Ñandejára, ehendumína che ñemboʼe”. Upéi heʼi: “Emoĩ Jehová pópe umi mbaʼe ndepyʼapýva haʼetéva peteĩ kárga ndéve g̃uarã, ha haʼe katuete nepytyvõta” (Sal. 55:1, 22, TNM). Ejapo rire la ikatúva guive resolusiona hag̃ua pe provléma ndejopýva, eñemboʼe Jehovápe ne korasõite guive. Upéva ikuentavéta rejapo reiko rangue rejepyʼapy. ¿Mbaʼéichapa nepytyvõta pe orasión ani hag̃ua reñekevrantaiterei? (Sal. 94:18, 19).

4. ¿Mbaʼérepa iñimportanteterei ñañemboʼe jajepyʼapyeterei jave?

4 (Elee Filipenses 4:6, 7). ¿Mbaʼéichapa Jehová orresponde ñane orasión ñañemboʼe meme jave chupe ñande pyʼaite guive? Haʼe ikatu ñanepytyvõ ñaime hag̃ua trankílo, ha jaipeʼa hag̃ua ñane akãgui umi pensamiénto ñanemoñeñandu vaíva. Ñandejára ñanepytyvõ ani hag̃ua jakyhyje ni ñañekevrantaiterei, ha omeʼẽ ñandéve pe pyʼaguapy tuichavéva opa mbaʼe yvyporakuéra ikatúvagui ontende. Heta ermáno ha ermána oñandu peichagua pas. Ha nde ikatu avei reñandu upéva. “Ñandejára pyʼaguapy” nepytyvõkuaa regueropuʼaka hag̃ua oimehaichagua provléma. Añetehápe ikatu rejerovia ko promésa Jehová ojapóvare: “Ani rekyhyje, che hína nde Jára. Che romombaretéta, che katuete roipytyvõta” (Is. 41:10, TNM).

LA BIBLIA ÑANEPYTYVÕ ÑANDEPYʼAGUAPY HAG̃UA

5. ¿Mbaʼéichapa Ñandejára Ñeʼẽ ikatu ñanepytyvõ ani hag̃ua jajepyʼapyeterei?

5 Segundo, jalee la Biblia ha jajepyʼamongeta hese. ¿Mbaʼérepa iñimportantete jajapo koʼã mbaʼe? La Biblia ningo Ñandejára Ñeʼẽ, ha pype jatopa heta konsého ideprovéchova oúva ñande Apoharégui. Jajepreokupa jave, ikatu ñapensa mbaʼéichapa umi konsého oĩva Ñandejára Ñeʼẽme ñanemombaretekuaa. Péicha menove jajepyʼapýta, térã ndajajepyʼapymoʼãi voi. Jehová heʼi jaleéramo Iñeʼẽ, ñandepyʼaguasu ha ñanembaretetaha, avei ñanepytyvõta ani hag̃ua jakyhyje (Jos. 1:7-9).

6. ¿Mbaʼéichapa ñanepytyvõ umi mbaʼe Jesús heʼi vaʼekue?

6 Ñandejára Ñeʼẽ omombeʼu mbaʼéichapa Jesús oñeʼẽ vaʼekue umi héntepe. Haʼekuéra ohenduseterei vaʼekue chupe, pórke umi mbaʼe heʼíva okonsola ha omokyreʼỹ umi ojepyʼapy térã oñedeprimívape (elee Mateo 11:28-30). Jesús oñeinteresa vaʼekue umi hénte oñeñandu lájare (Mar. 6:30-32). Haʼe opromete kuri oipytyvõtaha ijapostolkuéra oviahávape hendive. Koʼág̃a avei, katuete ñanepytyvõta nañaiméiramo jepe hendive yvágape. Jesús ningo ñande Ruvicha, ha osegíta ñanderayhu. Upévare, ñañekevrantáramo peteĩ mbaʼére, ñaime vaʼerã segúro haʼe oĩtaha ñanendive ha ñanepytyvõtaha itiempoitépe. Jesús ñaneanima ha omeʼẽ ñandéve esperánsa. Koʼã mbaʼe ñanepytyvõ ani hag̃ua jajepyʼapyeterei (Heb. 2:17, 18; 4:16).

UMI MBAʼE PORÃ OÚVA ESPÍRITU SÁNTOGUI

7. ¿Mbaʼéichapa Ñandejára espíritu ñanepytyvõ?

7 Tercero, jajerure Jehovápe espíritu sánto. Jesús opromete kuri ñande Ru yvagapegua  omeʼẽtaha ñandéve espíritu sánto jajeruréramo chupe (Luc. 11:10-13). ¿Mbaʼéichapa upéva ikatu ñanepytyvõ ani hag̃ua jajepyʼapyeterei? Ñandejára espíritu ikatu ñanepytyvõ jareko hag̃ua heta kualida haʼe voi ohechaukáva (Col. 3:10). La Biblia ohenói koʼã kualidápe “umi mbaʼe porã oúva Ñandejára espíritugui” (elee Gálatas 5:22, 23). Ñañehaʼãramo jareko koʼã kualida, jajogueraha porãvéta ñande rapichakuérandi, ha jajehekýita umi situasión ikatúvagui ñanemoangekói. Jahechamína mbaʼéichapa “umi mbaʼe porã oúva Ñandejára espíritugui” ikatu ñanepytyvõ.

8-12. ¿Mbaʼéichapa ñanepytyvõ umi mbaʼe porã oúva espíritu sántogui?

8 “Mborayhu, vyʼa, pyʼaguapy”. Jarrespetáramo siémpre ñande rapichápe, menove jajepyʼapýta. ¿Mbaʼérepa jaʼekuaa upéva? Pórke japorohayhúrõ, ñaneamávle ha jahechaukárõ ñamombaʼeha ñande rapichápe, jajehekýita umi situasión ikatúvagui ñanembopochy, ñanemoñeñandu vai ha ñanekevranta. Koʼã mbaʼe ñanepytyvõta jaiko hag̃ua pyʼaguapýpe enterovévandi (Rom. 12:10).

9 “Pasiénsia, pyʼaporã, mbaʼeporã”. La Biblia heʼi: “Penembaʼeporã vaʼerã oñondive, pejoporiahuvereko ha peñoperdona pende pyʼaite guive” (Efes. 4:32). Jasegíramo ko konsého, jajogueraha porãta ñande rapichakuérandi, ha ñañehaʼãta ani hag̃ua oñepresenta umi situasión ikatúva ñandepyʼapy. Avei ifasilvéta ñandéve ñambohovái porã hag̃ua umi provléma oĩva jepi ñaneimperfékto rupi.

10 “Jerovia”. Ñane tiémpope, pyʼỹinte oĩ ojepyʼapýva plátare ha umi mbaʼerepýre (Prov. 18:11). ¿Mbaʼéichapa ikatu ñamboyke koʼãichagua kevránto? Iporãta jasegírõ apóstol Pablo konsého. Haʼe heʼi vaʼekue: “Peñekontenta vaʼerã umi mbaʼe perekóvare”. Jajerovia añetéramo Jehováre, ñaĩta segúro haʼe ikatutaha omeʼẽ ñandéve opa mbaʼe ñaikotevẽva. Haʼe ningo ojapo ko promésa: “Arakaʼeve ndorohejamoʼãi ha arakaʼeve noromotyreʼỹmoʼãi”. Ñande avei jaʼekuaa Pablo heʼi haguéicha: “Jehová chepytyvõ hína, ndakyhyjemoʼãi, ¿mbaʼe piko ojapóta cherehe peteĩ yvypórante?” (Heb. 13:5, 6).

11 “Pochyʼỹ, jejokokuaa”. ¿Mbaʼéichapa ideprovécho ñandéve jajejokokuaa ha nañandepochyreíri? Koʼã kualida porãite ñanepytyvõ ani hag̃ua jaʼe térã jajapo peteĩ mbaʼe upéi ñambyasýva, ha japyta ñañekevranta upévare. Upéicha avei ndajaikomoʼãi ñandepyʼaro, ñarrenega vaipa, ñandepochy, jasapukái, ha jajojaʼo (Efes. 4:31).

12 Tekotevẽ ningo ñaneumílde ikatu hag̃uáicha ñañemoĩ “Ñandejára ipuʼakapáva poguýpe”, ha ñamoĩ hag̃ua “ipópe opaite mbaʼe ñandepyʼapýva” (1 Ped. 5:6, 7). Avei iñimportánte ñarrekonose oĩha heta mbaʼe ndaikatúiva jajapo (Miq. 6:8). Upéicha ningo ñakonfiavéta Ñandejárare, jajerovia rangue ñandejehe. Amáske jahechakuaa mbaʼeichaitépa Ñandejára ñanderayhu ha oñangareko ñanderehe, saʼive jajepyʼapýta.

“ANI PEJEPYʼAPYETEREI”

13. ¿Mbaʼéichapa ñantende vaʼerã pe konsého heʼíva: “Ani pejepyʼapyeterei”?

13 Jesús heʼi vaʼekue: “Ani pejepyʼapyeterei” (elee Mateo 6:34). Ikatu ñapensa hasyetereiha jajapo upéva. ¿Heʼisépa raʼe Jesús umi oservíva Ñandejárape arakaʼeve ndojepyʼapymoʼãiha? Jahecháma haguéicha, David ha Pablo heta vése ojepreokupa vaʼekue avei. Jesús ontendekasénte kuri  idisipulokuérape ojepyʼapypareírõ térã oñekevrantaitereíramo, nosolusionamoʼãiha mbaʼeve. Káda día ñambohovái heta mbaʼe ijetuʼúva. Upévare naiporãi jajepyʼapy umi provléma ohasáma vaʼekuére, térã umi ikatúvare oñepresenta amo gotyove. ¿Mbaʼéichapa Jesús konsého ñanepytyvõ ñañeñandu porãve hag̃ua?

14. ¿Mbaʼéichapa David ehémplo ñanepytyvõ ñañeñandu porãve hag̃ua?

14 Oĩ persóna ojepyʼapýva umi mbaʼe vai ojapo vaʼekuére ymave. Haʼekuéra oñeñandu gueteri kulpávle ohasámarõ jepe heta tiémpo. Por ehémplo, rréi Davídpe ojopyeterei vaʼekue umi hembiapo vai. Haʼe heʼi: “Ndavyʼavéi ha hetáma ajaheʼo” (Sal. 38:3, 4, 8, 18, TNM). Ko situasiónpe David ohechauka kuri iñaranduha, upévare ojerovia Jehová oiporiahuverekotaha chupe ha operdonataha hembiapo vaikue. Haʼe orrekonose: “Ovyʼa pe persóna ojehejareívape hembiapo vai” (elee Salmo 32:1-3, 5).

15. a) ¿Mbaʼépa ikatu ñaaprendeve Davídgui? b) ¿Mbaʼépa jajapóta ani hag̃ua umi preokupasión ñanedomina? (Ehecha pe rrekuádro “ Mbaʼépa rejapokuaa ani hag̃ua rejepyʼapyeterei”).

15 Ikatu avei ñandepyʼapy umi mbaʼe jahasáva koʼág̃a. Por ehémplo, David oskrivírõ guare pe Salmo 55, okyhyjeterei kuri ojejukárõ g̃uarã chupe (Sal. 55:2-5). Upéicharõ jepe, ndohejái umi preokupasión omomombyry chupe Jehovágui. David ojerure asy Jehovápe oipytyvõmi hag̃ua chupe. Péro oikuaa avei haʼe voi tekotevẽtaha ojapo álgo (2 Sam. 15:30-34). ¿Mbaʼépa ñaaprende David ehémplogui? Ndajahejái vaʼerã umi preokupasión ñanedomina. Upéva rangue, jajapo vaʼerã ikatúva guive ñasolusiona hag̃ua umi provléma, ha upéi jajerovia ñande pyʼaite guive Jehová oñangarekotaha ñanderehe.

16. ¿Mbaʼérepa Ñandejára réra ikatu omombareteve ñande fe?

16 Oĩ kristiáno ojepyʼapýva umi mbaʼe ikatúvare oiko tenondeve. Péro natekotevẽi ojapo upéva. ¿Mbaʼérepa? Pórke heta vése oikóramo jepe umi mbaʼe ñapensa vaʼekue, amo ipahápe ndaivaietereíri jakalkula haguéicha. Avei, iporã ñanemanduʼa ndaiporiha mbaʼeveichagua situasión Jehová ikatuʼỹva osolusiona. Héra ningo heʼise voi: “Chehegui Oikóta pe Che Aipotáva Oiko” (Éx. 3:14, TNM). Upéicharõ, natekotevẽi jajepyʼapyeterei ñanerenonderãre, pórke Ñandejára réra ogarantisa katuete okumplitaha ipropósito yvyporakuérape g̃uarã. Ikatu ñaĩ segúro haʼe ovendesitaha umi ifiélvape, ha oipytyvõtaha chupekuéra ani hag̃ua ojepyʼapy umi mbaʼe oikóma vaʼekuére, umi mbaʼe oñepresentáva koʼág̃arupi térã ikatúva oiko amo gotyove.

ÑAÑEʼẼ PETEĨ PERSÓNA ÑAKONFIÁVANDI

17, 18. ¿Mbaʼéichapa peteĩ persóna ñakonfiáva ikatu ñanepytyvõ ani hag̃ua jajepyʼapyeterei?

17 Cuarto, ñamombeʼu peteĩ persóna ñakonfiávape mbaʼéichapa ñañeñandu. ¿Mávandipa  ikatu ñañemongeta? Por ehémplo ñane ména térã ñane rembirekóndi, peteĩ ñane amigoiténdi, térã peteĩ ansiáno kongregasionguándi. Haʼekuéra ikatu ñanepytyvõ ñantende porãve hag̃ua pe situasión jahasáva. La Biblia heʼi: “Peteĩ persóna oikóramo oñekevrantaiterei ou ikangy ha oñedeprimi, péro remokyreʼỹramo chupe hetiaʼe jeýta” (Prov. 12:25, TNM). La Biblia heʼi avei: “Ndaiporihápe oguapýva oñemongeta porã mbaʼeve nosẽporãi, péro oĩramo omeʼẽva konsého porã ojehupyty heta mbaʼe” (Prov. 15:22, TNM).

18 Umi rreunión ikatu avei ñanepytyvõ ani hag̃ua ñañekevrantaiterei ñane provlemakuérare. Káda semána jaha jave rreunionhápe jahasa tiémpo umi ermánondi, haʼekuéra ojepyʼapy ñanderehe ha ñaneanimase voi (Heb. 10:24, 25). “Káda uno ñañomokyreʼỹ” rupi, ñanembareteve ha ifasilve ñandéve ñambohovái hag̃ua umi situasión ikatúva ñandepyʼapy (Rom. 1:12).

JEHOVÁ HAʼE VAʼERÃ ÑANEAMIGOITE

19. ¿Mbaʼérepa nde repensa reñemoag̃uivéramo Jehováre nembaretevetaha?

19 Peteĩ ansiáno oikóva Canadápe, oñemeʼẽ enkuénta iñimportanteha ñamoĩ Jehová pópe umi mbaʼe ñandepyʼapýva. Haʼe ningo profesór ha konsehéro estudiantil, ha itraváho oestresaiterei chupe. Hiʼarive oreko provléma de ansieda ha upévare ojepyʼapyeterei oimeraẽ mbaʼére. ¿Mbaʼépa oipytyvõ chupe ogueropuʼaka hag̃ua ko situasión? Pe ermáno heʼi: “Añehaʼãmbaite añemoag̃uive Jehováre, upéva la chepytyvõvéva. Añeñandu vai jave, che amigokuéra ha umi ermáno chemombarete jey. Upéicha jave, amombeʼu porã che rembirekópe mbaʼeichaitépa añeñandu. Umi ansiáno ha pe superintendénte de sirkuíto chepytyvõ vaʼekue ani hag̃ua ajedesespera. Asegi avei peteĩ tratamiénto ha amohenda porãve che tiémpo ikatu hag̃uáicha apytuʼuve ha ajapo ehersísio. Mbeguekatúpe añeñandu porãmie ha saʼivéma ajepyʼapy. Peichahágui oñepresentárõ chéve peteĩ situasión ndaikuaáiva mbaʼéichapa asolusionáta, ahejánte Jehová pópe”.

20. a) ¿Mbaʼéichapa ikatu ñamoĩ Ñandejára pópe umi mbaʼe ñandepyʼapýva? b) ¿Mbaʼépa jahecháta pe artíkulo oúvape?

20 Ko artíkulope ñaaprende iñimportanteha ñamoĩ Ñandejára pópe umi mbaʼe ñandepyʼapýva. Upearã tekotevẽ ñañemboʼe, jalee la Biblia ha jajepyʼamongeta hese. Avei iporã jajerure Jehovápe espíritu sánto, ñamombeʼu umi mbaʼe ñañandúva peteĩ persóna ñakonfiávape, ha jaha meme rreunionhápe. Pe artíkulo oúvape ñahesaʼỹijóta Jehová ñanemombareteha jasegívo ñahaʼarõ pe prémio omeʼẽtava ñandéve (Heb. 11:6).