Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Diciembre de 2016

Ñapensa memékena espíritu sánto oguerohorývare

Ñapensa memékena espíritu sánto oguerohorývare

“Umi oikóva espíritu sánto poguýpe, opensa meme umi mbaʼe espíritu sánto oguerohorývare” (ROM. 8:5).

PURAHÉI: 57, 52

1, 2. ¿Mbaʼérepa umi kristiáno unhídope ointeresa Romanos kapítulo 8 heʼíva?

OIME vaʼerã katuete jalee Romanos 8:15-17 pe Konmemorasión aja. Koʼã versíkulo ohechauka mbaʼéichapa umi unhído oikuaa orekoha esperánsa oho hag̃ua yvágape. Romanos 8:1 oñeʼẽ umi unhído “ojoajúva Cristo Jesús rehe”. Péro, ¿heʼisépa upéva pe kapítulo 8 oñeʼẽha umi unhídorente? Térãpa, ¿ikatu avei oipytyvõ umi orekóvape esperánsa oiko hag̃ua ko yvy ape ári opa árare?

2 Romanos kapítulo 8 ojehai vaʼekue prinsipálmente umi unhídope g̃uarã. Haʼekuéra orresivi “pe espíritu” ha ohaʼarõitereíma Ñandejára oadopta chupekuéra itaʼýraramo (Rom. 8:23). Koʼã kristiáno oho yvágape ha oiko chuguikuéra Ñandejára raʼy. Jesús sakrifísio rupive, Jehová operdona chupekuéra ipekádo ha hekojojáma henondépe (Rom. 3:23-26; 4:25; 8:30).

3. ¿Mbaʼérepa ointeresa vaʼerã avei Romanos kapítulo 8 umi kristiáno orekóvape esperánsa oikove hag̃ua ko yvy ape ári?

3 Pablo oskrivívo pe kárta umi kristiáno Romaguápe, voi reheve oñeʼẽma kuri peteĩ kuimbaʼe ndahaʼéivare unhído. ¿Mávapa hína upéva? Abrahán, ha heʼi hese hekojojaha  Jehová renondépe. Ko kuimbaʼe ifiélva oiko kuri heta tiémpo Jesús omeʼẽ mboyve hekove ñanderehehápe (elee Romanos 4:20-22). Ñane tiémpope avei, entéro kristiáno ifiélva orekóva esperánsa oiko hag̃ua opa árare ko yvy ape ári, hekojoja Jehová renondépe. Chupekuéra avei ideprovécho umi konsého jatopáva Romanos kapítulo 8-pe.

4. Jalee jave Romanos 8:21, ¿mbaʼépa iporã ñañeporandu?

4 Romanos 8:21-pe Jehová ogarantisa oguerutaha pe múndo pyahu, ha yvyporakuéra isãsotaha pekádo ha ñemano poguýgui. Upépe heʼi isiervokuéra ohupytytaha “Ñandejára raʼykuéra liverta ijojahaʼỹva”. ¿Jajeroviápa hína ñaimetaha pe múndo pyahúpe? Jahechamína mbaʼépa tekotevẽ jajapo jaiko hag̃ua upépe.

“ÑAPENSA MEMÉRAMO ÑANDE RETE REMBIPOTÁRE”

5. ¿Mbaʼérehepa apóstol Pablo oñeʼẽ kuri Romanos 8:4-13-pe?

5 (Elee Romanos 8:4-13). Romanos kapítulo 8-pe Pablo oñeʼẽ mokõi kláse de persónare. Heʼi oĩha “umi ojaposéva hete rembipota” ha “umi oikóva espíritu sánto poguýpe”. Ikatu oĩ opensáva Pablo oñeʼẽ hague umi kristiánore ha umi ndahaʼéivare Ñandejára siérvo. Péro ñanemanduʼa vaʼerã haʼe oskrivi hague umi kristiáno ojeporavóvape imarangatu hag̃ua (Rom. 1:7). Jahechakuaa upéicharõ, Pablo oñeʼẽ hague umi kristiánore “ojaposéva hete rembipota”, ha umi kristiáno “oikóva espíritu sánto poguýpe”. ¿Mbaʼépepa idiferénte raʼe hikuái?

6, 7. a) ¿Mbaʼépa heʼise pe palávra “rete” ojepurúva la Bíbliape? b) ¿Mbaʼe sentídopepa ojepuru pe palávra “rete” Romanos 8:4-13-pe?

6 Idióma griégope, la Biblia oipuru jave pe palávra “rete” térã kuérpo, ndeʼiséi peteĩ mbaʼénte. Ikatu hína ojerreferi ñande retére voi (Rom. 2:28; 1 Cor. 15:39, 50) Avei ikatu oñeʼẽ umi oñopariéntevare. Por ehémplo, la Biblia heʼi Jesúsre: “Onase vaʼekue yvypóraicha David ñemoñarégui”. Ha Pablo ohenói umi judíope “che ermanokuéra” (Rom. 1:3; 9:3). Koʼã mokõi téxtope, pe idióma  orihinálpe ojepuru pe palávra “rete” térã kuérpo.

7 Pablo heʼi kuri oĩha ojaposéva “hete rembipota” (Rom. 8:4-13). Ñantende hag̃ua mbaʼérehepa oñeʼẽ heʼírõ guare upéva, jahecha vaʼerã Romanos 7:5. Upépe Pablo heʼi kuri: “Yma jaikórõ guare ñaneakãre, pe Léi ñanemomýi jajapo hag̃ua ñande rete rembipota vai”. Ko versíkulope Pablo oexplika umi hénte ojapóva “hete rembipota”, ohejaha umi deséo vai odomina chupekuéra ha oiko hikuái iñakãre.

8. ¿Mbaʼérepa apóstol Pablo heʼi vaʼekue umi unhídope ndovaleiha oiko “hete rembipota” rapykuéri?

8 ¿Mbaʼérepa Pablo oakonseha kuri umi unhídope ani hag̃ua oiko “hete rembipota” rapykuéri? ¿Mbaʼérepa entéro kristiáno tekotevẽ avei oñatende? Pórke umi deséo vai ikatu odomina oimeraẽ Ñandejára siérvope. Por ehémplo Pablo heʼi vaʼekue oĩha kristiáno Rómape ojapóva “hete oipotávante”. Upéva heʼise oĩ hague oñemeʼẽva tekovaípe, okaru rasáva, térã oñentregáva tahaʼe haʼéva deséo vaípe, ha upéva la iñimportantevéva chupekuéra g̃uarã (Rom. 16:17, 18; Filip. 3:18, 19; Jud. 4, 8, 12). Upéicha avei, peteĩ tiémpore oĩ vaʼekue kongregasión de Coríntope peteĩ kristiáno oñenóva “itúva rembirekóndi” (1 Cor. 5:1). Jahechakuaa upéicharõ mbaʼérepa umi kristiáno ypykue tekotevẽ kuri oñatende ani hag̃ua ojapo “hete rembipota” (Rom. 8:5, 6).

9. ¿Mbaʼéichapa ndovaléi ñantende Romanos 8:6 heʼíva?

9 ¿Tekotevẽpa ñañatende avei koʼág̃arupi? Umi oservíva Jehovápe heta áñore jepe ikatu ou oiko “hete rembipota” rapykuéri. Péro, ¿heʼisépa kuri Pablo naiporãiha ñapensa tembiʼúre, ñane traváhore, diversiónre, térã peteĩ jajegustávare? Nahániri, umi mbaʼe ningo ndaivaíri. Jesús jepe ohasa porã vaʼekue okaruhápe, ha omongaru voi hetápe. Avei haʼe omboyke vaʼekue tiémpo opytuʼu hag̃ua. Ha apóstol Pablo oñeʼẽrõ guare umi rrelasión sexuál rehe, heʼi kuri upéva iñimportanteha peteĩ matrimóniope.

¿Ojekuaápa umi mbaʼe erévare epensa memeha espíritu sánto oguerohorývare? (Ehecha párrafo 10 ha 11)

10. ¿Mbaʼépa heʼise pe fráse “ñapensa meméramo”?

 10 ¿Mbaʼépa heʼise pe fráse “ñapensa meméramo” oĩva Romanos 8:6-pe? Ko palávra griéga Pablo oipuru vaʼekue heʼise ñañekonsentra porãha peteĩ mbaʼe ñapensávare térã ñaplaneávare. Peteĩ expérto oexplika vaʼekue umi persóna koʼãichagua oñeinteresaitereiha voi upe ogustávare chupe, ha manterei oñeʼẽ upévare. Upéicha rupi, oheja umi mbaʼe ojaposéva odomina chupe.

11. ¿Mbaʼe mbaʼépa ikatu ou iñimportanteterei ñandéve g̃uarã?

11 Umi kristiáno Romagua ojepyʼamongeta vaʼerã kuri oikuaa hag̃ua mbaʼérehepa opensa meme oikóvo hikuái. Por ehémplo, ¿opensa memépa raʼe hikuái hete rembipotáre? Koʼág̃arupi avei entéro kristiáno tekotevẽ ñapensa mbaʼépa hína la iñimportantevéva ñandéve g̃uarã. Ñañeporandumína: “¿Mbaʼérehepa ñañeʼẽ meme jepi? ¿Mbaʼépa añetehápe la jajaposevéva?”. Peichahágui ikatu ñañemeʼẽ enkuénta, todo el tiémpo jaikoha ñapensa umi víno ñatanteasévare, mbaʼéichapa jadekorase ñande róga, umi ao jajoguasévare, umi negósio jajaposévare, térã moõpa jahase de vakasión. Añetehápe ningo koʼã mbaʼe ndaivaíri jajapo. Oiméne ñanemanduʼa Jesús ojapo hague víno peteĩ kasamientohápe, ha Pablo katu orrekomenda Timotéope hoʼu hag̃ua “michĩmi víno” (1 Tim. 5:23; Juan 2:3-11). Upéicharõ jepe, ndahaʼéi vaʼekue pe víno la iñimportantevéva chupekuéra g̃uarã. ¿Ha mbaʼépa ikatu jaʼe ñandejehe? ¿Mbaʼépa la iñimportantevéva ñandéve g̃uarã?

12, 13. ¿Mbaʼérepa jahechakuaa vaʼerã mbaʼépa la iñimportánteva ñandéve g̃uarã?

12 Pablo oavisa porã vaʼekue: “Ñapensa meméramo ñande rete rembipotáre, ñamanóta” (Rom. 8:6). ¿Mbaʼépa heʼise upéva? Ñapensa meméramo ñande rete rembipotáre, ikatu ñañemomombyry Jehovágui ha amo gotyove katu ñamanóta. Péro oiméramo jepe jajapo hína la ivaíva, ikatu ñakambia. Ñanemanduʼamínte pe kuimbaʼe hekovaívare oiko vaʼekue Coríntope ha oñemosẽ vaʼekue kongregasióngui. Ojekorrehi rire chupe, haʼe ou okambia, omboykete umi deséo vai ha oñepyrũ jey oservi Jehovápe tekopotĩme (2 Cor. 2:6-8).

13 Pe kuimbaʼe hekovaiete vaʼekue ñamoĩva kómo ehémplo, ojapo kuri “hete rembipota”. Upéicharõ jepe ou okambia ha oheja umi mbaʼe vai ojapo vaʼekue oikóvo. Ñane tiémpope, peteĩ kristiáno oñepyrũramo ojapo umi mbaʼe Jehová ndoguerohorýiva, ikatu avei okambia. Umi konsého Pablo omeʼẽva ñanepytyvõkuaa ñakambia hag̃ua tekotevẽhápe.

“ÑAPENSA MEMÉRAMO ESPÍRITU SÁNTO OGUEROHORÝVARE”

14, 15. a) ¿Mbaʼérehepa iporãve ñapensa, jaiko rangue ñañekonsentra ñande rete rembipotáre? b) ¿Mbaʼépa ndeʼiséi ñapensa meme espíritu sánto oguerohorývare?

14 Pablo heʼi kuri “ñapensa meméramo ñande rete rembipotáre” ipeligrosoha. Péro upéi heʼi avei “ñapensa meméramo espíritu sánto oguerohorývare, jaikovéta ha ñaiméta pyʼaguapýpe”. ¡Ajépa iporãite la ikatúva jahupyty!

15 Ñapensa meme espíritu sánto oguerohorývare, ndeʼiséi tódo el tiémpo ñapensa ha ñañeʼẽtaha Jehováre térã la Bíbliarente voi. Umi kristiáno síglo primeropegua  ojapo vaʼekue avei ambue mbaʼe, por ehémplo okaru, omenda, ifamília, ha ombaʼapo. Koʼág̃arupi Ñandejára siervokuéra ohasa porã avei ojapóvo koʼã mbaʼe (Mar. 6:3; 1 Tes. 2:9).

16. ¿Mbaʼépa iñimportanteve vaʼekue Páblope g̃uarã?

16 Pablo ha ambue kristianokuéra síglo primero guare, ndohejái vaʼekue itraváho térã ótra kósa hoʼupa chuguikuéra itiémpo. Por ehémplo, Pablo ojededika vaʼekue ojapo óga kárpa. Péro upéva ndahaʼéi la iñimportantevéva chupe g̃uarã. Haʼe omotenonde Ñandejára servísio, oñemeʼẽmbaite predikasiónpe ha omboʼe Jehová Ñeʼẽ hapichápe (elee Hechos 18:2-4 ha 20:20, 21, 34, 35). Umi ermáno Romagua osegi vaʼerã Pablo ehémplo, ha ñande tekotevẽ avei jajapo upéva (Rom. 15:15, 16).

17. ¿Mbaʼéichapa ñanevenefisia “ñapensa meméramo espíritu sánto oguerohorývare”?

17 ¿Mbaʼéichapa jaikóta ñamotenondéramo Ñandejára servísio? Romanos 8:6 heʼi: “Ñapensa meméramo espíritu sánto oguerohorývare, jaikovéta ha ñaiméta pyʼaguapýpe”. Upéva heʼise jaheja vaʼerãha Jehová espíritu ogia ñane pensamiénto, ha ñañehaʼã ñapensa haʼe opensaháicha. Jajapóramo upéicha, Jehová opromete ñandéve koʼág̃ama voi javyʼataha ha isentidotaha ñande rekove, ha amo gotyove katu jahupytýta pe jeikove opaveʼỹva.

18. ¿Mbaʼéichapa ikatu jahupyty pyʼaguapy “ñapensa meméramo espíritu sánto oguerohorývare”?

18 ¿Mbaʼérehepa Pablo ojerreferi heʼírõ guare “ñapensa meméramo espíritu sánto oguerohorývare” oguerutaha ñandéve pyʼaguapy? Entéronte ningo jarekose trankilida, upéicharõ jepe saʼieterei oĩ la ohupytýva upéva. Péro Jehová ñanepytyvõ rupi ikatu jahupyty pe pyʼaguapy añetetéva. Avei jaikokuaa trankílo ñande rogapýpe ha ñane ermanokuérandi. Péro ñane imperfékto rupi, sapyʼánte ikatu ñaneprovléma ñane ermanokuérandi. Oikóramo upéva, jasegi vaʼerã Jesús konsého: “Eñemoĩ porã [...] ne ermánondi” (Mat. 5:24). Péicha jave, ani ñanderesarái ñane ermáno ha ñane ermána oserviha avei Jehovápe, “Ñandejára omeʼẽva pyʼaguapy” (Rom. 15:33; 16:20).

19. ¿Mbaʼépa jahupytýta “ñapensa meméramo espíritu sánto oguerohorývare”?

19 “Ñapensa meméramo espíritu sánto oguerohorývare” jaikóta avei pyʼaguapýpe Ñandejárandi. Proféta Isaías heʼi vaʼekue: “Nde [Jehová], eñangareko porã umi oñemoĩvare nde pópe; ha resegíta rembopyʼaguapy chupekuéra ojerovia rupi nderehe” (Is. 26:3, TNM; elee Romanos 5:1).

20. ¿Mbaʼérepa reagradesete umi konsého oĩva Romanos kapítulo 8-pe?

20 Enterovévape ikatu ñanevenefisia umi konsého oĩva Romanos kapítulo 8-pe, tahaʼe jarekóramo esperánsa jaikove hag̃ua opa árare ko yvy ape ári, térã yvágape. Jaagradeseterei ningo la Biblia ñanemokyreʼỹ haguére ñamotenonde hag̃ua Jehová servísio, jajapo rangue ñandévente ñandegustáva. Jaikuaa porã “ñapensa meméramo espíritu sánto oguerohorývare”, jahupytytaha peteĩ mbaʼe iporãitereíva amo gotyove. ¿Mbaʼépa hína upéva? Pablo oskrivi vaʼekue: “Ñandejára orregala jeikove opaveʼỹva ñande Ruvicha Cristo Jesús rupive” (Rom. 6:23).