Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Agosto de 2017

Oñeporandúva jepi

Oñeporandúva jepi

¿Mbaʼérepa Mateo ha Lucas nomombeʼúi peteĩchaite umi mbaʼe Jesús ohasáva imitãrõ guare?

Umi mbaʼe Mateo omombeʼúva Jesús onasérõ guare ha la oikóva imitã aja, idiferénte pe jatopávagui Lúcaspe. Mokõive eskritór oñeʼẽramo jepe Jesús ohasa vaʼekuére, nomombeʼúi pe istória peteĩchaite, pórke peteĩva oñeʼẽve Josére ha ótro katu Maríare.

Mateo oñeʼẽve Josére. Por ehémplo, omombeʼu mbaʼéichapa orreaksiona vaʼekue oikuaárõ guare María hyeguasuha, heʼi avei peteĩ ánhel oexplika hague chupe mbaʼéicha rupípa oiko upéva, ha omombeʼu José osegi hague umi instruksión oñemeʼẽva chupe (Mat. 1:19-25). Mateo heʼi peteĩ ánhel omanda hague Josépe peteĩ suéñope oho hag̃ua hikuái Egíptope, ha haʼe iñeʼẽrendu hague. Ko lívrope ojeskrivi avei José oreko hague ótro suéño, peteĩ ánhel heʼihápe chupe oho jeýma hag̃ua Israélpe, ha upévare haʼe ha ifamília ova kuri Nazarétpe (Mat. 2:13, 14, 19-23). Lívro de Matéope kapítulo 1 ha 2-pe oñemensiona Josépe 12 vése voi, ha Maríape katu 8 vése.

Lucas katu oñeʼẽve Maríare. Por ehémplo omombeʼu ánhel Gabriel ovisita hague chupe, María oho hague ohecha Elizabétpe, ha avei umi mbaʼe María heʼi vaʼekue ombotuicha hag̃ua Jehovápe (Luc. 1:26-56). Omombeʼu avei Simeón heʼi hague Maríape Jesús ohasa asytaha. Avei heʼi Jesús orekópe 12 áño oho hague pe témplope ihentekuérandi. Upérõ Lucas omensiona María heʼi vaʼekue, ndahaʼéi José heʼíva. Avei omombeʼu entéro koʼã mbaʼe oikóva opokoiterei hague hese (Luc. 2:19, 34, 35, 48, 51). Lucas kapítulo 1 ha 2-pe oñemensiona Maríape 19 vése, péro Josépe 4 vésente. Jahechaháicha, Mateo oñeʼẽve Josére, péro Lucas imanduʼave María opensa ha ojapo vaʼekuére.

Koʼã mokõi eskritór oñeʼẽ avei José ha María antepasadokuérare. Mateo omensiona José antepasadokuérape ha ohechauka porã Jesús haʼeha rréi David eredéro, upévare orekoha derécho legál. ¿Mbaʼérepa jaʼekuaa upeichaha? Pórke Jesús haʼe José raʼy anga, ha José ou peteĩva David raʼýgui, Salomón (Mat. 1:6, 16). Lucas katu omensionávo María antepasadokuérape, ohechauka porã Jesús ouha “David ñemoñarégui”, ha haʼeha David eredéro teete (Rom. 1:3). ¿Mbaʼérepa jaʼekuaa upeichaha? María oúgui rréi David familiarégui, peteĩva itaʼýragui, Natán (Luc. 3:31). Jaikuaaháicha, María haʼe hína Helí rajy, ¿mbaʼérepa upéicharõ Lucas heʼi José haʼeha Helí raʼy? Pórke upe tiémpope noñemoĩri umi rrehístro ofisiálpe umi kuña réra, síno kuimbaʼekuéra rérante. Upéicharõ, Lucas heʼívo José haʼeha Helí raʼy, la heʼiséva hína haʼeha ijérno (Luc. 3:23).

Umi rrehístro oĩva Mateo ha Lúcaspe oñemoĩháme Jesús antepasadokuéra réra, ohechauka porã Jesús haʼeha pe Mesías oñepromete vaʼekue. Umi fariséo ha saduséo jepe oikuaa porã vaʼekue Jesús ouha David familiarégui. Ñane tiémpope, koʼã lísta ojerrehistrahápe umi téra oĩva la Bíbliape, ñanepytyvõ ñamombarete hag̃ua ñande fe ha avei jajeroviave hag̃ua Ñandejára promesakuérare.