Ehecha oĩva pype

Ehecha oĩva pype

 MANDUʼARÃ

“¿Arakaʼéiko jareko jeýta ótro aty guasu?”

“¿Arakaʼéiko jareko jeýta ótro aty guasu?”

OPA potaitéma hína mes de noviembre del áño 1932, ha siuda de Méxicope ojapo una semána ojekoloka hague primera ves umi semáforo. Pe siudápe ningo oiko mas de 1 millón de persóna. Péro koʼág̃a ndahaʼevéima umi semáforo la noveda. Umi periodísta oñembyaty pe estasión de trénpe, ha opreparáma hína ikamarakuéra pórke og̃uahẽmbotaitéma peteĩ visitánte espesiál. ¿Mávapa hína? Joseph Rutherford, haʼéva Sociedad Watch Tower presidénte. Umi testígo de Jehová oikóva pe siudápe ohojoa orresivi hag̃ua ermáno Rútherfordpe. Haʼe ou hína oasisti hag̃ua peteĩ aty guasu 3 diaguápe.

Pe rrevísta The Golden Age, koʼág̃a hérava ¡Despertad! heʼi vaʼekue: “Katuete ningo jasegíta ñanemanduʼa ko aty guasu iñimportantetévare ojejapo vaʼekue Méxicope, ojeservi porãve hag̃ua Jehovápe”. Péro pe asambléape ningo 150 persónante oasisti. ¿Mbaʼére piko upéicharõ iñimportantete vaʼekue?

Upe aty guasu mboyve, ndahetaguasúi vaʼekue umi persóna ojedesidíva oservi Jehovápe. Áño 1919 guive ojejapo vaʼekue upe paíspe umi asambléa michĩvéva, péro ndokakuaái umi kongregasión, saʼive guei ohóvo. Áño 1929-pe ojeavri peteĩ sukursál siuda de Méxicope, péro tekotevẽta gueteri oñesolusiona unos kuánto provléma. Por ehémplo, ojejerurérõ guare umi kolportórpe (koʼág̃a oñehenóiva prekursór) ani hag̃ua ojapo negósio opredika aja, peteĩva ijapyteguikuéra ipochyeterei voi. Upévare osẽ Ñandejára organisasióngui ha oforma peteĩ grúpo ostudia hag̃ua la Biblia. Upe tiémpope avei oñekambia pe superintendénte de sukursálpe, pórke ojapo peteĩ mbaʼe noĩporãiva. Jahechaháicha, tekotevẽ kuri oñemokyreʼỹ umi testígo ifiélvape oikóva Méxicope.

Joseph Rutherford oĩ aja upépe, omokyreʼỹeterei ermanokuérape. Haʼe ojapo mokõi diskúrso pe aty guasúpe, ha ojapo avei 5 diskúrso rrádiope. Koʼãva ningo omombareteterei vaʼekue ermanokuérape. Upérõ primera ves ojepuru rrádio oñemombeʼu hag̃ua pe marandu porã Méxicope. Pe aty guasu rire, pe superintendénte de sukursál pyahu oorganisa la tekotevẽva guive ojepredika hag̃ua. Umi ermáno ikyreʼỹeterei opytávo, ha Jehová oipytyvõ chupekuéra osegi hag̃ua opredika.

Aty guasu oiko vaʼekue 1941-pe, siuda de Méxicope

Áño 1933-pe ojejapo mokõi aty guasu upe tetãme, peteĩva oiko Veracrúzpe ha pe ótro katu siuda de Méxicope. Umi ermáno opredika kyreʼỹ rupi, oñepyrũma ojehecha la rresultádo. Por ehémplo, áño 1931-pe oĩ kuri 82 puvlikadór, péro áño 1941-pe 10 vésema voi hetave. Upe áñope ojejapo peteĩ asambléa siuda de Méxicope, ha 1.000 persónarupi oasisti.

“OJAGARRAPA HIKUÁI UMI KÁLLE”

Áño 1943-pe umi Testígo omosaingo ipécho ha ilómore peteĩ kartél omopropagánda hag̃ua pe  Asambléa Teocrática oñembohérava “Nación Libre”, ojejapótava 12 siudápe upe tetãme. * Áño 1936 guive Testigokuéra oipuru koʼãichagua kartél oanunsia hag̃ua umi aty guasu.

Peteĩ rrevísta 1944 guarépe, ojekuaa umi ermáno orekoha ijehe umi kartél siuda de México kállere

Peteĩ rrevísta mexicana hérava La Nación, omombeʼu hiʼéxito hague umi propagánda ojapo vaʼekue Testigokuéra umi kartél reheve. Pe rrevísta heʼi: “Pe aty guasu oñepyrũha díape ojejerure chupekuéra oinvita hag̃ua hetave héntepe. Ha pe ótro díape, ndaijavéima la hénte pe lokálpe”. Péro naentéroipe ogusta la oikóva, por ehémplo umi paʼi ipochyeterei ha oñepyrũ ojapo ikampáña Testigokuéra kóntrape. Upéicharõ jepe umi ermáno pyʼaguasúpe osegi oanunsia pe aty guasu. Ótro artíkulo osẽ vaʼekue La Naciónpe heʼi: “Pe siuda kompletoite ohecha chupekuéra. Omosaingóvo umi kartél ipécho ha ilómore haʼete hikuái ‘sandwich’”. Pe artíkulo osẽva La Naciónpe omoĩ peteĩ fóto ojehechahápe ermanokuérape siuda de México kállere, ha pe fóto guýpe heʼi: “Ojagarrapa hikuái umi kálle”.

“IKOMODOVE PE PÍSO DE SEMÉNTOGUI”

Upe tiémpope, la majoría umi ermáno heta ojesakrifika oasisti hag̃ua umi aty guasu ojejapóvape jepi Méxicope. Heta ermáno ningo oiko mombyryeterei, oĩ lugár ndoikeiha umi tren ha ótro katu ndorekói voi ni tape. Peteĩ kongregasión oskrivi: “Ore roimehápe ndoikéi tren”. Upéicha rupi heta ermáno oho unos kuánto día yvýrupi térã mburika ári, ojagarra hag̃ua pe tren ohóva upe siuda oikotahápe pe asambléa.

La majoría umi ermáno imboriahueterei ha apenami ohupyty ipasaherã ohokuévo g̃uarã. Heta oĩ opytáva ermanokuéra rógape, ha umi ogajára ovyʼaiterei ikatu haguére orresivi chupekuéra. Oĩ avei umi okéva Salón del Réinope. Peteĩ vuéltape, 90 ermánorupi opyta sukursálpe ha oke hikuái umi literatúra ryrukue ári. Pe Anuario heʼi umi ermáno oagradesetereiha pórke umi kartón “nahoʼysãi ha ikomodove pe píso de seméntogui”.

Umi ermáno ningo ovyʼaiterei ojejapo haguére koʼã aty guasu, upévare heta ojesakrifika oasisti hag̃ua. Ñane tiémpope oĩma haimete 1 millón de Testígo Méxicope, ha enterovénte omombaʼe umi aty guasu. * Pe Anuario de 1949 heʼi: “Umi ermáno naikangýi kuri ojesakrifika hetáramo jepe. Káda asambléa rire, osegi hikuái oñeʼẽ hese heta tiémpore, ha siémpre oporandu: ‘¿Arakaʼéiko jareko jeýta ótro aty guasu?’”. (Manduʼarã oúva sukursál de Centroaméricagui).

^ párr. 9 Pe Anuario 1944-pegua heʼi ko aty guasu oipytyvõ hague ikatu hag̃uáicha ojekuaa porãve Méxicope umi testígo de Jehovápe.

^ párr. 14 Áño 2016-pe, 2.262.646 persóna oho Konmemorasionhápe Méxicope.