“Jajepyʼapýkena ojuehe ñande pyʼaite guive, ha [...] ñañomokyreʼỹ vaʼerã, koʼýte koʼág̃a jahechávo pe ára hiʼag̃uimbaitemaha” (HEB. 10:24, 25).

PURAHÉI: 90, 87

1. ¿Mbaʼérepa apóstol Pablo heʼi vaʼekue umi kristiáno hebréope oñomokyreʼỹ hag̃ua “koʼýte koʼág̃a”?

SÍGLO primérope, apóstol Pablo heʼi umi kristiáno hebréope: “Jajepyʼapýkena ojuehe ñande pyʼaite guive, ha ñañomokyreʼỹ japorohayhu ha jajapo hag̃ua iporãva. Ani jafalta meme rreunionhápe, oĩramo jepe ojepokuaáva ojapo upéicha. Upéva rangue, ñañomokyreʼỹ vaʼerã, koʼýte koʼág̃a jahechávo pe ára hiʼag̃uimbaitemaha” (Heb. 10:24, 25). Oime vaʼerã umi kristiáno oñeporandu raʼe mbaʼérepa Pablo heʼi chupekuéra oñomokyreʼỹ vaʼerãha koʼýte koʼág̃a. Upéi, ni 5 áño ndohasái haʼekuéra ohechakuaa hag̃ua upéva, pórke “Jehová ára guasu” térã pe ára ohusga hag̃ua Jerusalénpe hiʼag̃uimbaitéma kuri. Upérõ umi kristiáno ontende tekotevẽha osẽ upe siudágui Jesús heʼi haguéicha chupekuéra (Hech. 2:19, 20; Luc. 21:20-22). Jehová ára og̃uahẽ áño 70-pe, umi romano ohundírõ guare Jerusalén.

2. ¿Mbaʼérepa koʼág̃arupi tekotevẽterei ñañomokyreʼỹ?

Koʼág̃arupi ñaime avei peichagua situasiónpe. “Jehová ára” tuichaiterei ha oporomongyhyjéva hiʼag̃uimbaitéma hína (Joel  2:11). Proféta Sofonías heʼíva oñekumpli avei ñane tiémpope. Haʼe heʼi vaʼekue: “¡Hiʼag̃uimbaitéma Jehová ára guasu! Hiʼag̃uimbaite ha pyaʼeterei og̃uahẽ” (Sof. 1:14). Upévare, “jajepyʼapýkena ojuehe ñande pyʼaite guive, ha ñañomokyreʼỹ japorohayhu ha jajapo hag̃ua iporãva” (Heb. 10:24). Upéva heʼise tekotevẽha ñañeinteresave ñane ermanokuérare ikatu hag̃uáicha ñamokyreʼỹ chupekuéra oikotevẽ jave.

¿MÁVAPEPA ÑAMOKYREʼỸ VAʼERÃ?

3. ¿Mbaʼéichapa apóstol Pablo ohechauka vaʼekue iñimportanteha ñañomokyreʼỹ? (Ehecha pe taʼanga oĩva iñepyrũme).

3 “Peteĩ persóna oikóramo oñekevrantaiterei ou ikangy ha oñedeprimi, péro remokyreʼỹramo chupe hetiaʼe jeýta” (Prov. 12:25). Enterovéva ningo ñaikotevẽ jepi ótro ñanemokyreʼỹ. Pablo ohechauka vaʼekue umi oporomokyreʼỹ meméva jepe oikotevẽha avei oñemokyreʼỹ chupe. Haʼe heʼi umi kristiáno oikóvape Rómape: “Hiʼãite chéve pohechami, ikatu hag̃uáicha pomokyreʼỹ ha péicha pemombarete pene amista Ñandejárandi. Añetehápe pohechase ikatu hag̃uáicha káda uno ñañomokyreʼỹ ñande jerovia rupive, peẽ ha che avei” (Rom. 1:11, 12). Jahechaháicha, Pablo jepe sapyʼánte oikotevẽ vaʼekue oñemokyreʼỹ chupe (elee Romanos 15:30-32).

4, 5. ¿Máva mávapepa ikatu ñamokyreʼỹ, ha mbaʼérepa?

Koʼág̃arupi ikatu ñamokyreʼỹ umi oservívape Jehovápe de tiémpo kompléto, por ehémplo umi prekursór ifiélvape. Heta ermáno oheja umi mbaʼe ogustáva chupekuéra ikatu hag̃uáicha oservi de prekursór. Avei iporã ñamokyreʼỹ umi misionéro, betelita, superintendénte de sirkuíto ha hembireko, ha umi ombaʼapóva ofisína rremóta de traduksiónpe. Entéro koʼã ermáno omboyke heta mbaʼe ombaʼapove hag̃ua Jehová servísiope, upévare tekotevẽterei ñamokyreʼỹ chupekuéra. Oĩ avei umi ermáno oservi vaʼekue de tiémpo kompléto, péro koʼág̃a ndaikatuvéiva ojapo upéva. Haʼekuéra ovyʼa avei oñemokyreʼỹ jave chupekuéra.

5 ¿Mávapa omerese avei oñemokyreʼỹ? Umi ermáno ha ermána odesidíva opyta soltéro osegi hag̃ua Jehová mandáto heʼíva omenda vaʼerãha peteĩ ojeroviávare “ñande Ruvicháre” añoite (1 Cor. 7:39). Umi tembireko omombaʼeterei iména heʼi jave ohayhuha chupekuéra ha omombaʼeha entéro mbaʼe ojapóva hikuái (Prov. 31:28, 31). Umi kristiáno ombohováiva persekusión térã hasykatúva oikotevẽ avei ánimo (2 Tes. 1:3-5). Jehová ha Jesús okonsola entéro koʼã ermáno ifiélvape (elee 2 Tesalonicenses 2:16, 17).

UMI ANSIÁNO IKATU ÑANEMOKYREʼỸ

6. ¿Mbaʼépa ojapo umi ansiáno oñeñeʼẽha Isaías 32:1, 2-pe?

6 (Elee Isaías 32:1, 2). Jaiko rupi peteĩ tiémpo ijetuʼúvape ikatu jaju ndajavyʼavéi ha ñañedesanima. Jesucristo ojevale umi unhídore ha oipuru avei “umi prínsipe” ifiélvape oĩva umi ambue ovecha apytépe ñanemokyreʼỹ hag̃ua. Umi ansiáno ningo nomandái ñande jeroviáre, ombaʼapo guei ñande ykére javyʼa hag̃ua. Haʼekuéra ñanepytyvõ ikatu hag̃uáicha ñañeñandu porã ha jasegi ñandefiél Jehovápe (2 Cor. 1:24).

7, 8. ¿Mbaʼéichapa umi ansiáno ikatu omokyreʼỹ ermanokuérape?

Iporã umi ansiáno osegi Pablo ehémplo. Haʼe siémpre oñehaʼã vaʼekue omokyreʼỹ iñermanokuérape. Por ehémplo, ojepersegírõ guare umi ermáno Tesalonicaguápe, Pablo oskrivi chupekuéra: “Ore ningo pohayhueterei, upévare vyʼápe roikuaauka peẽme umi marandu porã oñeʼẽva Ñandejárare; ha poipytyvõ hag̃ua romeʼẽ voi ore rekove jepe penderehehápe” (1 Tes. 2:8).

Umi ansiáno ningo ikatu omokyreʼỹ  ermanokuérape umi mbaʼe heʼíva rupive. Péro, ¿mbaʼépa ikatu ojapove hikuái? Pablo heʼi kuri umi ansiáno Efesoguápe: “Pembaʼapo [...] peipytyvõ hag̃ua umi ikangývape. Ha avei penemanduʼa vaʼerã ñande Ruvicha Jesús heʼi vaʼekuére: ‘Javyʼaiteve ñameʼẽvo, ñandéve oñemeʼẽ rangue’” (Hech. 20:35). Pablo ningo oñemeʼẽmbaite vaʼekue iñermanokuéra rehehápe. Umi mbaʼe ojapóvare ohechauka oĩha ojapo hag̃uáicha oimeraẽ mbaʼe hesehapekuéra (2 Cor. 12:15). Upéicha avei, umi ansiáno omokyreʼỹ ha okonsola vaʼerã iñermanokuérape umi mbaʼe heʼíva ha ojapóva rupive. Péicha ohechaukáta añetehápe ojepyʼapyha hesekuéra (1 Cor. 14:3).

9. ¿Mbaʼéichapa umi ansiáno ikatu omeʼẽ konsého oporomokyreʼỹva?

Heta vése umi ansiáno tekotevẽ oakonseha umi ermánope oajuda hag̃ua chupekuéra. La Biblia tuicha ikatu oipytyvõ umi ansiánope omeʼẽ hag̃ua konsého oporomokyreʼỹva. Jesús ehémplo ningo iporãiterei. Oñemoingove jey rire chupe, omeʼẽ vaʼekue konsého umi kongregasión oĩvape Asia Menórpe. Haʼe ningo tekotevẽ kuri okorrehi umi kongregasión oĩvape Éfeso, Pérgamo ha Tiatírape. Péro upe mboyve oguerohory umi mbaʼe porã ojapóva hikuái (Apoc. 2:1-5, 12, 13, 18, 19). Jesús heʼi umi oĩvape kongregasión Laodicéape: “Che amongavaju ha akorrehi entéro umi ahayhúvape. Upévare, nekyreʼỹkena ha eñarrepenti” (Apoc. 3:19). Umi ansiáno oñehaʼã osegi Jesús ehémplo omeʼẽ jave konsého.

NDAHAʼÉI ANSIANOKUÉRANTE LA OPOROMOKYREʼỸ VAʼERÃ

Tuakuéra, ¿pemboʼépa pene famíliape omokyreʼỹ hag̃ua ótrope? (Ehecha párrafo 10)

10. ¿Mbaʼéichapa káda uno ikatu ñamombarete ñane ermanokuérape?

10 Ndahaʼéi ningo ansianokuérante la ikatúva omokyreʼỹ ótrope. Pablo omanda ñandéve jaʼe hag̃ua “umi mbaʼe iporãva ha oporomombaretétava oñekotevẽ jave”, péicha ideprovéchota umi ñanerendúvape (Efes. 4:29). Káda uno ñapensa vaʼerã mbaʼépa ikatu jajapo ñaipytyvõ hag̃ua ñane ermanokuérape. Pablo heʼi vaʼekue umi kristiáno hebréope: “Pemombaretékena pende jyva ikaneʼõva ha pene renypyʼã ikangýva. Pesegíkena  peguata derechoite pe tape porãre, pe ikarẽva okuera hag̃ua ha ani oĩ vaive” (Heb. 12:12, 13). Entéro ikatu jaʼe umi mbaʼe omombarete ha omokyreʼỹ vaʼerã ñande rapichápe, umi imitãva jepe ikatu ojapo upéva.

11. ¿Mbaʼépa oipytyvõ Mártape oñedeprimírõ guare?

11 Peteĩ ermána hérava Marta ou vaʼekue oñedeprimi peteĩ tiémpore. * Haʼe heʼi: “Peteĩ vuéltape ajerurérõ guare Jehovápe chemokyreʼỹmínte hag̃ua, ajotopa peteĩ ermána ijedávandi. Haʼe oñeʼẽ chéve mborayhúpe ha ohechauka cheporiahuverekoha. Upéva ningo la che aikotevẽva kuri upe moméntope. Ko ermána omombeʼu chéve ohasa hague avei peteĩ situasión ijetuʼúvare, ha upéva chepytyvõ anivéma hag̃ua añeñandu cheaño”. Upe ermána ijedáva oime vaʼerã ni noñeimahinái mbaʼeichaite pevépa oipytyvõ Mártape umi mbaʼe heʼíva chupe.

12, 13. ¿Mbaʼéichapa ikatu jasegi pe konsého oĩva Filipenses 2:1-4-pe?

12 Pablo heʼi umi kristiáno Filiposguápe: “Peẽ ningo peservi Crístope, ha oimérõ penekyreʼỹ ha pekonsola pende rapichápe pehayhúgui chupekuéra, oimérõ pejepyʼapy ojuehe ha peiporiahuvereko hína pende rapichápe, upéicharõ pechemyenyhẽna vyʼágui. Pejapo upéva pejoayhúvo, peikóvo peteĩ ñeʼẽme ha pepensávo enterove peteĩchapa. Ani pejapo mbaʼeve peiko vaiségui ni peñembovaleségui, peñemomirĩ guei ha pepensa umi ótro tuichaveha pendehegui. Aníkena pejapo peẽmente ou porãva, síno pejepyʼapy vaʼerã avei pende rapicháre” (Filip. 2:1-4).

13 Entéro ñañehaʼã vaʼerã ñaipytyvõ ñande rapichápe. Ikatu jahechauka jahayhuha ñane ermanokuérape jajepyʼapývo hesekuéra, ñakonsola ha jaiporiahuverekóvo chupekuéra. Koʼã mbaʼe omokyreʼỹetereíta ñane ermáno ha ermanakuérape.

¿MBAʼÉPA IKATU JAJAPO ÑAPOROMOKYREʼỸ HAG̃UA?

14. ¿Mbaʼépa ikatu jajapo ñamokyreʼỹ hag̃ua ótrope?

14 Ñanembovyʼaiterei jaikuaa jave umi persóna ñaipytyvõ vaʼekue oserviha gueteri fiélmente Jehovápe. Apóstol Juan oskrivi vaʼekue: “Chéngo avyʼaiterei ahendu jave che raʼykuéra osegiha oiko pe añetegua rapére” (3 Juan 4). Heta prekursór ikyreʼỹ oikuaávo peteĩ persóna ombostudia vaʼekue la Biblia osegiha gueteri ifiél. Ijapytepekuéra ikatu voi oĩ umi oservímava avei de prekursór. Upévare, oiméramo peteĩ prekursór oñedesanima, ikatu ñamomanduʼa chupe umi mbaʼe porã ojapo vaʼekue oipytyvõ hag̃ua ótrope.

15. ¿Mbaʼépa ikatu jajapo ñamokyreʼỹ hag̃ua umi oservívape fiélmente Jehovápe?

15 Sapyʼánte umi ermáno omeʼẽ umi superintendénte de sirkuítope ha hembirekópe peteĩ notaʼi heʼihápe oagradeseha ivisíta. Ko mbaʼe ningo omokyreʼỹeterei chupekuéra. Upéicha avei oñeñandu umi ansiáno, misionéro, prekursór ha betelita jahechaukáramo jaagradeseha chupekuéra oservi haguére fiélmente Jehovápe.

ENTEROVÉVA IKATU ÑAPOROMOKYREʼỸ

16. ¿Mbaʼépa ikatu hína omokyreʼỹ ñande rapichápe?

16 Sapyʼánte ikatu ñapensa ijetuʼutaha ñandéve jaʼe hag̃ua álgo omokyreʼỹtava ótrope. Péro añetehápe ndahasýi hína jajapo upéva. Por ehémplo, jasaluda jave peteĩ ermánope ikatu japukavy chupe. Péro haʼe opytánterõ isério ikatu oindika ñandéve orekoha peteĩ provléma ha oñemongetaseha peteĩ persónandi. Jajapysaka porãramo la heʼívare, upévantema voi ikatu tuicha okonsola chupe (Sant. 1:19).

17. ¿Mbaʼépa omokyreʼỹ peteĩ mitãrusúpe?

 17 Peteĩ ermáno imitãva hérava Henri ou vaʼekue oñedesanima pórke unos kuánto ihénte oheja Jehovápe. Umíva apytépe oĩ kuri itúa, oservi vaʼekue kómo ansiáno. Peteĩ superintendénte de sirkuíto ohechakuaa Henri ndovyʼaveiha ha oinvita chupe oho hag̃ua peteĩ kafeteríape. Ko mitãrusu omombeʼu pe ermánope la ojopýva chupe ha haʼe ojapysaka porã hese. Henri oñemeʼẽ enkuénta osegíramo ifiél oipytyvõ porãvetaha ihentekuérape oservi jey hag̃ua Jehovápe. Avei umi mbaʼe heʼíva Salmo 46, Sofonías 3:17 ha Marcos 10:29, 30-pe okonsolaiterei chupe.

Enterovéva ningo ikatu ñamombarete ha ñamokyreʼỹ ótrope (Ehecha párrafo 18)

18. a) ¿Mbaʼépa oskrivi vaʼekue rréi Salomón? b) ¿Mbaʼépa omboʼe vaʼekue apóstol Pablo?

18 ¿Mbaʼépa ikatu ñaaprende Marta ha Henri ehémplogui? Oimeraẽva ikatuha oporokonsola ha oporomokyreʼỹ. Rréi Salomón oskrivi vaʼekue: “Igustoite peteĩ persóna oikuaáramo la heʼi vaʼerã oñekotevẽve jave. Peteĩ persóna ovyʼáramo nderecha jave, upéva nembovyʼa avei. Ñanemokyreʼỹete ningo ñahendúramo peteĩ notísia porã” (Prov. 15:23, 30). ¿Mbaʼépa ikatu jajapo jahecháramo peteĩ ñande rapicha ndovyʼaiha térã oñedesanima? Jaleekuaa chupe peteĩ artíkulo osẽ vaʼekue Ñemañaháme térã ñande sítiope oĩva Internétpe. Pablo heʼi vaʼekue avei japurahéiramo oñondive umi kántiko ikatuha ojapo porã ñanderehe. Haʼe oskrivi vaʼekue: “Pesegíkena pemboʼe ha pemokyreʼỹ pende rapichápe, upearã peipuru umi sálmo, umi músika ojepurúva ojepurahéi hag̃ua Ñandejárape, umi músika omombaʼeguasúva ha oagradeséva chupe. Pegueropurahéikena Jehovápe pende pyʼaite guive” (Col. 3:16; Hech. 16:25).

19. ¿Mbaʼérepa iñimportanteterei ñañomokyreʼỹ, ha mbaʼépa jajapo vaʼerã?

19 Jehová ára guasu ningo hiʼag̃uimbaitéma, upévare iñimportanteterei ñañomokyreʼỹ (Heb. 10:25). Javyʼáta jasegíramo pe konsého Pablo omeʼẽ vaʼekue. Haʼe heʼi: “Pesegíkena peñomokyreʼỹ ha peñomombarete, pejapoháicha voi peikóvo” (1 Tes. 5:11).

^ párr. 11 Ko artíkulope oñekambia umi téra.