Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Marzo de 2016

Mitãrusukuéra, ¿mbaʼéichapa ikatu pejeprepara pejevautisa hag̃ua?

Mitãrusukuéra, ¿mbaʼéichapa ikatu pejeprepara pejevautisa hag̃ua?

“Ñandejára, avyʼaiterei ajapo haguére ne rembipota.” (SAL. 40:8, NM)

PURAHÉI: 51, 58

1, 2. a) Emyesakã mbaʼérepa iñimportánte pe vautísmo. b) ¿Mbaʼérepa rejeasegura porã vaʼerã rejevautisa mboyve?

¿NDÉPA nemitã ha rejevautisase? Oiméramo upéicha, rejapose hína peteĩ mbaʼe iporãitereíva. Jahecha haguéicha pe ótro artíkulope, upéva peteĩ desisión iñimportantetereíva. Peteĩ persóna ojevautisáva ohechauka hína entérope ojededikáma hague Jehovápe. Upéva heʼise opromete hague Jehovápe oservitaha chupe pára siémpre, ha ndaiporimoʼãiha ótra kósa iñimportantevéva upévagui. Upéicharõ, nemanduʼákena pe promésa rejapótava Jehovápe ndahaʼeiha vyrorei. Upévare, rejevautisa mboyve rehechauka vaʼerã neakãguapyha, reikuaa porã vaʼerã mbaʼérepa rejevautisase, ha rentende porã vaʼerã mbaʼépa heʼise jajededika Jehovápe.

2 Upéicharõ, ¿reimépa preparádo rejevautisa hag̃ua? Ikatu repensa neʼĩraha gueteri. Térã ikatu reñandu reimemaha preparádo, péro nde tuakuéra oipota rehaʼarõmie pórke nemitãiterei gueteri. ¿Mbaʼépa ikatu rejapo oikóramo upéva? Ani reñedesanima, upéva rangue reñehaʼãmbaite vaʼerã ikatu hag̃uáicha emehorave rehóvo reime peve preparádo. Ko artíkulo nepytyvõta  mbohapy mbaʼépe: 1) rejeasegura hag̃ua mbaʼépa reguerovia, 2) nekondúkta porãve hag̃ua, ha 3) remombaʼeve hag̃ua umi mbaʼe Jehová ojapóva nderehehápe.

EJEASEGURA MBAʼÉPA REGUEROVIA

3, 4. ¿Mbaʼépa ikatu reaprende Timoteo ehémplogui?

3 Eñeporandumína: “¿Mbaʼérepa aguerovia Ñandejára oexistiha? ¿Mbaʼérepa aĩ segúro la Biblia haʼeha Ñandejára Ñeʼẽ? ¿Mbaʼérepa adesidi ajapo Jehová oipotáva, aikónte rangue umi hénte oikoháicha?”. Koʼã pregúnta nepytyvõta resegi hag̃ua ko konsého Pablo omeʼẽ vaʼekue: “Peikuaa porã Ñandejára rembipota iporãva, hekopeguáva ha haʼe oguerohorýva” (Rom. 12:2). Upéva heʼise ndete rekomprova vaʼerãha mbaʼérepa iporãve rejapo Jehová oipotáva. ¿Mbaʼérepa rejapo vaʼerã upéva?

4 Epensamína Timoteo ehémplore. Haʼe oikuaa porã vaʼekue Ñandejára Ñeʼẽ, pórke isy ha ijavuéla omboʼe chupe. Upéicharõ jepe, Pablo heʼi Timotéope: “Nde reñehekomboʼe vaʼekue hekoitépe reguerovia hag̃ua nde pyʼaite guive, upévare akóinte resegi vaʼerã umi mbaʼe reaprende vaʼekue” (2 Tim. 3:14, 15). Timoteo oĩ kuri segúro Ñandejára Ñeʼẽme oĩha pe añetegua. Péro haʼe ndoroviái upéva isy ha ijavuéla oguerovia rupínte, síno oipuru meme iñakã oikuaa hag̃ua mbaʼépa iporã ha mbaʼépa ivai (elee Hebreos 5:14).

5, 6. ¿Mbaʼérepa iñimportanteterei koʼág̃ama ‘reipuru meme ne akã’?

5 Oime vaʼerã nde avei reaprendéma heta mbaʼe oĩva la Bíbliape. Upéicharõ, iporã vaʼerã repensáramo mbaʼérepa reguerovia umi enseñánsa bíblica. Upéva nepytyvõta imbareteve hag̃ua nde fe ha ani hag̃ua ndegueraha vai umi mbaʼe reñandúva, ne kompañerokuéra ni ko múndo.

6 Iñimportanteterei ningo koʼág̃ama ‘reipuru meme ne akã’ rehechakuaa hag̃ua “mbaʼépa iporã ha mbaʼépa ivai”. Upéva nepytyvõta reikuaa hag̃ua mbaʼépa eréta ne kompañerokuéra oporandúramo ndéve: “¿Mbaʼérepa reime segúro Ñandejára oexistiha? Oimérõ Ñandejára ñanderayhuete, ¿mbaʼérepa opermiti oiko heta mbaʼe vai? Oimérire Ñandejára okrea raʼe opa mbaʼe, ¿mávapa ojapo chupe?”. Reiméramo preparádo rerresponde hag̃ua koʼã porandu, nderedudamoʼãi umi mbaʼe regueroviávagui. Upéva rangue, nekyreʼỹvéta restudia porãve hag̃ua la Biblia.

7-9. ¿Mbaʼéichapa ikatu nepytyvõ umi gía de estúdio oĩva jw.org-pe?

Restudia porãramo la Biblia, ikatúta rerresponde heta pregúnta, ha rejeaseguráta oimépa siérto umi mbaʼe regueroviáva. Ha oimérõ reduda katu, nepytyvõta pyaʼe reime jey hag̃ua segúro (Hech. 17:11). Jareko ningo heta puvlikasión nepytyvõtava rejapo hag̃ua koʼã mbaʼe. Por ehémplo, heta mitãrusu ha mitãkuñáme ideprovéchoma pe folléto El origen de la vida, ha pe lívro ¿Existe un Creador que se interese por nosotros? Hetápe avei oipytyvõ pe seksión oĩva jw.org-pe oĩva españólpe, hérava ¿QUÉ ENSEÑA REALMENTE LA BIBLIA? (GUÍAS DE ESTUDIO). Retopa hag̃ua ko seksión, reike vaʼerã pe párte heʼihápe ENSEÑANZAS BÍBLICAS / JÓVENES. Upépe oĩ heta informasión nepytyvõtava rentende porãve hag̃ua umi mbaʼe omboʼéva la Biblia.

8 Oime vaʼerã nde reikuaáma voi heta mbaʼe oĩva la Bíbliape, ha ifásilta ndéve rerresponde hag̃ua unas kuánta pregúnta oĩva pe gía de estúdiope. Péro, ¿mbaʼéichapa ikatu rekomprova siertoha umi mbaʼe rerrespondéva? Ko gía nepytyvõta rejepyʼamongeta hag̃ua umi téxto bíblicore ha reskrivi hag̃ua mbaʼérepa reguerovia  umi enseñánsa bíblica. Avei nepytyvõta reexplikakuaa hag̃ua ótrope umi mbaʼe regueroviáva. Ikatúramo reike Internétpe, eaprovechákena rehecha hag̃ua koʼã informasión, ha eipuru rejapo hag̃ua nde estúdio personál. Péicha rejeroviavéta la Biblia omboʼévare.

9 Nde ningo reime vaʼerã segúro umi mbaʼe la Biblia omboʼéva haʼeha pe añetegua. Péicha reiméta preparádo rejevautisa hag̃ua. Peteĩ ermána imitãva heʼi: “Adesidi mboyve ajevautisa, astudia la Biblia ajeasegura porã hag̃ua testígo de Jehová haʼeha pe rrelihión verdadéra. Ha káda día ohasáva ahecha porãvéntema adesidi porã hague”.

NEKONDÚKTA PORÃVE

10. ¿Mbaʼépa oñehaʼarõ ndehegui oimérõ ereko fe?

10 La Biblia heʼi: “Ñande jerovia omano hína ndajajapóiramo tembiapo iporãva” (Sant. 2:17). Upéicharõ, oiméramo ereko fe ha reime segúro siertoha umi mbaʼe regueroviáva, upéva ojekuaáta ne kondúktare. Péicha ikatúta rejapo la Biblia heʼíva: “Penderekomarangatu ha pemombaʼeguasu vaʼerã Ñandejárape pende pyʼaite guive” (elee 2 Pedro 3:11).

11. ¿Mbaʼépa heʼise peteĩ kristiáno ‘hekomarangatuha’?

11 ¿Mbaʼépa heʼise ‘ñanderekomarangatu’? Upéva heʼise ñanderekopotĩha. Por ehémplo, epensamína umi 6 mése ohasa vaʼekuére. Oñepresentárõ guare peteĩ tentasión, ¿rehechakuaápa raʼe mbaʼépa iporã ha mbaʼépa ivai? (Heb. 5:14.) ¿Nemanduʼápa rejejoko hague ani hag̃ua reʼa peteĩ tentasiónpe, térã ani hag̃ua rejapo ne kompañerokuéra oipotáva rejapo? ¿Rejeporta porãpa siémpre nde eskuéla térã koléhiope? ¿Neñeʼẽrendúpa Jehovápe, térãpa rejapónte ne kompañerokuéra heʼíva, ani hag̃ua oñembohory nderehe hikuái? (1 Ped. 4:3, 4.) Añetehápe ningo entéro ñaneimperfékto, upévare umi oservíva Ñandejárape heta tiémpore jepe ikatu otĩ opredika hag̃ua ótrope. Péro entéro ojededikámava Jehovápe hekopotĩ vaʼerã, ha oñesenti vaʼerã orgullóso haʼe haguére testígo de Jehová.

12. a) ¿Mbaʼéichapa ‘ñamombaʼeguasu Ñandejárape ñande pyʼaite guive’? b) ¿Mbaʼéichapa jahecha vaʼerã umi mbaʼe jajapóva Jehovápe g̃uarã?

12 La Biblia heʼi: “Pemombaʼeguasu vaʼerã Ñandejárape pende pyʼaite guive”. Upéva ikatu jajapo ñane ermanokuérandi, por ehémplo, jahávo rreunionhápe ha japredika jave hendivekuéra. Péro ikatu avei ñamombaʼeguasu Ñandejárape ñaneañohápe, por ehémplo ñañemboʼe jave ha jastudiávo la Biblia. Entéro ojededikáva Jehovápe ndohechái koʼã mbaʼe peteĩ kárgaramo, síno oñeñandu rréi David oñeñandu haguéicha. Haʼe heʼi vaʼekue: “Ñandejára, avyʼaiterei ajapo haguére ne rembipota. Che areko nde léi che korasõme” (Sal. 40:8, NM).

13, 14. a) ¿Mbaʼépa nepytyvõta ‘remombaʼeguasu hag̃ua Ñandejárape nde pyʼaite guive’? b) ¿Mbaʼéichapa ko informasión oipytyvõma heta mitãrusúpe?

13 ¿Mbaʼépa nepytyvõta remombaʼeguasu hag̃ua Ñandejárape nde pyʼaite guive? Ikatu reipuru pe lívro Los jóvenes preguntan, volumen 2, páhina 308 ha 309. Koʼã páhinape ikatúta rerresponde koʼãichagua porandu: “Reñemboʼe jave Jehovápe, ¿remombeʼúpa chupe espesífikamente mbaʼéichapa reñeñandu térã mbaʼépa repensa? ¿Ojekuaápa umi mbaʼe erévare ne ñemboʼépe rehayhuha Jehovápe? ¿Mbaʼeichagua informasiónpa rehesaʼỹijo rejapo jave nde estúdio personál? ¿Resẽpa repredika nde sy ha nde túa nosẽiramo jepe?”. Koʼã mokõi páhinape reanotakuaa avei mbaʼépa ikatu rejapo remehorave hag̃ua reñemboʼe lája, restudia ha repredika lája.

14 Heta mitãrusu ha mitãkuña ojevautisaséva  heʼi tuichaiterei oipytyvõ hague chupekuéra ko párte oĩva pe lívrope. Peteĩ ermána imitãva hérava Tilda, omombeʼu: “Koʼã pregúnta chepytyvõ vaʼekue saʼi saʼípe ahupyty hag̃ua che metakuéra. Un áño haguépe aiméma preparáda ajevautisa hag̃ua”. Ótro ermáno imitãva hérava Patrick, omombeʼu avei: “Che arekóma vaʼekue voi unas kuánta méta, péro askrivi rire ae umíva, añehaʼãve ahupyty hag̃ua”.

¿Resegítapa reservi Jehovápe nde sy térã nde túa oñemomombyrýramo chugui? (Ehecha párrafo 15)

15. ¿Mbaʼérepa ndete redesidi vaʼerã rejededika Jehovápe?

15 Pe lívro Los jóvenes preguntan, volumen 2, páhina 308 ha 309-pe, oreko avei koichagua porandu: “¿Resegítapa reservi Jehovápe nde tuakuéra térã ne amigokuéra oñemomombyrýramo chugui?”. Ko pregúnta ningo iñimportanteterei, pórke amo ipahápe káda uno ñarrendíta kuénta Jehovápe umi mbaʼe jajapóvare. Upévare, ani nderesarái nde servísio Jehovápe ndaikatuiha odepende nde sy, nde túa ni ótra persónare. Koʼág̃ama nderekopotĩramo ha remombaʼeguasu Ñandejárape nde pyʼaite guive, ojekuaáta nderehe reimeha segúro kóva haʼeha pe rrelihión verdadéra. Avei ojekuaáta nderehe rejaposeha Jehová heʼíva. Péicha rejepreparátama rehóvo rejevautisa hag̃ua.

EMOMBAʼEVE JEHOVÁ OJAPÓVA NDEREHEHÁPE

16, 17. a) ¿Mbaʼépa omomýi vaʼerã peteĩ persónape ojevautisa hag̃ua? b) ¿Mbaʼérepa ñamombaʼe vaʼerã Jesús sakrifísio? Emoĩ peteĩ ehémplo.

16 Peteĩ díape, peteĩ kuimbaʼe oikuaa porãva pe Léi Mosáika, oporandu Jesúspe: “¿Mbaʼépa pe mandamiénto tuichavéva oĩva pe Léipe?”. Jesús heʼi chupe: “Rehayhu vaʼerã Jehová nde Járape nde pyʼaite guive, ne álma rugua guive, ha opa ne arandukue reheve” (Mat. 22:35-37). Jahechaháicha, peteĩ persóna ojevautisaséva ha osegiséva Jesús ehémplo, ojapo vaʼerã upéva ohayhúgui Jehovápe. Ha ikatu hag̃uáicha amás día ohayhuve ohóvo chupe, ojepyʼamongeta vaʼerã Jesús sakrifísiore (elee 2 Corintios 5:14, 15 ha 1 Juan 4:9, 19). Reñemotiémporamo repensa hag̃ua ko rregálo porãite Jehová omeʼẽvare, nekyreʼỹvéta rehechauka hag̃ua reagradeseha chupe.

17 Epensamína ko ehémplore. Ñamoĩ chupe rejahoga potaitemaha, péro peichahágui ou peteĩ persóna ndesalva. ¿Mbaʼépa rejapóta nenohẽ rire pe ýgui? ¿Rehótapa nde rógape reagradeseʼỹre chupe? Katuete ningo nderejapomoʼãi upéva, síno reiméta agradesído chupe tóda la vída. Péicha avei  ñande yvyporakuéra haʼete hína jajahogáva jahávo pe pekádo ha ñemano káusare. Péro Jehová ha Jesús ñandesalva ñanderayhueterei rupi. Avei haʼekuéra rupive jareko esperánsa jaikove hag̃ua opa árare pe Paraísope. ¡Ajépa jaagradesete chupekuéra upe haguére!

18, 19. a) ¿Mbaʼérepa nderekyhyjéi vaʼerã rejededika hag̃ua Jehovápe? b) ¿Mbaʼérepa ikatu jaʼe reservíramo Jehovápe oho porãvetaha ndéve?

18 ¿Ndépa reagradese Jehovápe opa mbaʼe ojapóvare nderehehápe? Upéicharõ, ejededika chupe ha ejevautisa. Rejededikávo Jehovápe repromete hína chupe siémpre rejapotaha ivolunta. Ani rekyhyje reñekompromete hag̃ua Jehovápe. Haʼe ningo iporãvante oipota ndéve g̃uarã ha nerrekompensáta neñeʼẽrendúramo chupe (Heb. 11:6). Reñemeʼẽvo Jehovápe ha rejevautisa, katuete oho porãvéta ndéve. Peteĩ ermáno orekóva 24 áño ojevautisa kuri imitãʼírõ guare. Haʼe heʼi: “Ahaʼarõrire unos kuánto áño, antendeve vaʼerãmoʼã mbaʼépa la ajapóva. Péro ajevautisa rupi, ajeprotehe heta ñuhã oĩvagui ko múndope”.

19 Jaʼéma haguéicha, Jehová oipota pe iporãvéva ndéve g̃uarã. Péro Satanás opensa ijehénte ha ndoikuaaséi ndehegui mbaʼeve. Rejapóramo chupe ogustáva, haʼe ndorekói mbaʼeve iporãva oofrese hag̃ua ndéve. Satanás ndorekói notísia porã, ni ndaikatúi omeʼẽ avavépe mbaʼeveichagua esperánsa. Ndaikatúi opromete ndéve mbaʼeve, pórke haʼe voi oñehundíta (Apoc. 20:10).

20. ¿Mbaʼépa nepytyvõta reime hag̃ua preparádo ikatu hag̃uáicha rejededika ha rejevautisa? (Ehecha avei pe rrekuádro “ ¿Mbaʼépa nepytyvõta reñemoag̃uive hag̃ua Jehováre?”.)

20 Pe dedikasión ningo pe desisión iñimportantevéva ikatúva rejapo nde rekovépe. ¿Reimémapa preparádo upearã? Oimérõ upéicha, ani rekyhyje. Péro rehechakuaárõ ofaltaʼimiha gueteri ndéve, esegi umi konsého oĩva ko artíkulope remehorave hag̃ua rehóvo. Pablo omokyreʼỹ vaʼekue umi ermáno Filiposguápe osegi hag̃ua oprogresa (Filip. 3:16). Resegíramo ko konsého, koʼẽrõitéma reiméta preparádo ikatu hag̃uáicha rejededika Jehovápe ha rejevautisa.