Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Marzo de 2016

Jehová ogia ipuévlope oikove hag̃ua opa árare

Jehová ogia ipuévlope oikove hag̃ua opa árare

“Kóva hína pe tape, tapeho koʼárupi.” (IS. 30:21)

PURAHÉI: 65, 48

1, 2. a) ¿Mbaʼépa osalváma hetaiterei héntepe? (Ehecha pe taʼanga oĩva iñepyrũme.) b) ¿Mbaʼépa ojapo Jehová ñandesalva hag̃ua?

OJAPO mas de 100 áño oñemoĩ ypy hague heta paíspe umi tape ohasahárupi tren, peteĩ letréro heʼíva: “EPYTA, EMAÑA HA EHENDU”. Umíva oñemoĩ ani hag̃ua umi tren ohóva hatãiterei oatropella umi veíkulo ohasávape upérupi. Oñemoĩ rupi koʼã letréro, hetaiterei héntema ojesalva.

2 Jehová avei ñandesalva heta mbaʼe vaígui. Péro upearã ndahaʼéi oipurúva letréro, síno omeʼẽ ñandéve instruksión jajehekýi hag̃ua umi pelígrogui, ha jasegi hag̃ua pe tape oporogueraháva jeikove opaveʼỹvape. Jehová haʼete peteĩ pastór ohayhuetereíva ijovechakuérape, ha odirihi chupekuéra umi tape ndaiporihárupi pelígro (elee Isaías 30:20, 21).

JEHOVÁ SIÉMPRE OGIA ISIERVOKUÉRAPE

3. ¿Mbaʼéicha rupípa yvyporakuéra omano?

3 Jehová ojapo ypy guive yvyporakuérape omeʼẽ chupekuéra instruksión. Por ehémplo, hardín de Edénpe heʼi porã Adán ha  Évape mbaʼépa ojapo vaʼerã ikatu hag̃uáicha ovyʼa ha oikove opa árare (Gén. 2:15-17). Péro haʼekuéra omboyke Jehová omandáva chupekuéra. Eva ojapo pe mbói heʼíva chupe, ha Adán katu ohendu hembirekópe. Upéicha rupi, mokõivéva opyta osufri, ha upéi omano esperansaʼỹre. Adán ha Eva naiñeʼẽrendúi haguére, entéro yvypóra omano avei.

4. a) ¿Mbaʼérepa oñekotevẽ instruksión pyahu pe Dilúvio rire? b) ¿Mbaʼépa ñaaprende pe mandáto Jehová omeʼẽ vaʼekuégui?

4 Heta tiémpo rire, Jehová omeʼẽ Noépe instruksión ikatu hag̃uáicha ojesalva heta persóna. Pe Dilúvio rire, oñekotevẽ instruksión pyahu pórke pe situasión okambiáta. Jehová ohejáta yvyporakuérape hoʼu soʼo, péro heʼi porã chupekuéra: “Anínteke peʼu umi animál ruguy. Hoʼokuénte peʼu vaʼerã, pórke huguy orrepresenta hína hekove” (Gén. 9:1-4, NM). Ko mandáto ñanemboʼe mbaʼéichapa Jehová ohecha pe vída. Haʼe ñandeapo vaʼekue, ha omeʼẽ ñandéve ñande rekove. Ñande vída opertenese Jehovápe, upévare haʼe oreko derécho heʼívo ñandéve mbaʼéichapa jaiko vaʼerã. Por ehémplo, haʼe heʼi yvyporakuérape ndovaleiha oporojuka. Ñandejárape g̃uarã sagrádo hína pe vída ha pe tuguy. Ha haʼe okastigáta oimeraẽ ndorrespetáivape koʼã mbaʼe (Gén. 9:5, 6).

5. ¿Mbaʼépa jahecháta ko artíkulope, ha maʼerãpa ñanepytyvõta?

5 Noé tiémpo rire, Ñandejára osegi ogia ipuévlope. Ko artíkulope ñahesaʼỹijóta unos kuánto ehémplo ohechaukáva mbaʼéichapa haʼe ojapo upéva. Koʼã ehémplo ñanepytyvõta jasegi hag̃ua Jehová instruksión, ha jaguata hag̃ua pe tape oporoguerahávape jeikove opaveʼỹvape.

JEHOVÁ OMEʼẼ INSTRUKSIÓN IPUÉVLO PYAHÚPE

6. a) ¿Mbaʼérepa umi isrraelíta oikotevẽ pe Léi Jehová omeʼẽva Moisés rupive? b) ¿Mbaʼépa ojapo vaʼerã umi isrraelíta Jehová ovendesi hag̃ua chupekuéra?

6 Moisés tiémpope, Jehová omeʼẽ ipuévlope instruksión omboʼéva chupekuéra mbaʼéichapa oñekomporta ha oadora vaʼerã chupe. ¿Mbaʼérepa? Pórke isituasionkuéra okambia jeýma. Jaikuaaháicha, umi isrraelíta oĩ vaʼekue Egipto poguýpe mas de 200 áño, ha umi ehípsio ojapo heta mbaʼe ombojeguarúva Jehovápe. Por ehémplo, haʼekuéra oadora umi omanóvape ha oreko heta dios. Upévare Jehová puévlo oikotevẽ instruksión pyahu osẽ rire Egíptogui. Koʼág̃a haʼekuéra okumpli vaʼerã Jehová Léi añoite. Oĩ lívro heʼíva pe palávra “léi”, ouha peteĩ palávra evréagui heʼiséva “odirihi, ogia térã omeʼẽ instruksión”. Pe Léi Jehová omeʼẽva umi isrraelítape Moisés rupive, oprotehe chupekuéra pe inmoralida sexuálgui ha umi rrelihión fálsagui, ojepraktikáva umi ótro tetãme. Umi isrraelíta oipotáramo Jehová ovendesi chupekuéra, okumpli vaʼerã pe Léi. Naiñeʼẽrendúiramo hikuái, katuete oho vaíta chupekuéra (elee Deuteronomio 28:1, 2, 15).

7. a) ¿Mbaʼérepa avei Jehová puévlo oikotevẽ instruksión? b) ¿Mbaʼérepa la Biblia heʼi pe Léi haʼe hague peteĩ gía umi isrraelítape g̃uarã?

7 Ñandejára siervokuéra oikotevẽ avei umi instruksión ambue mbaʼére. Por ehémplo, Ñandejára Léi oprepara umi isrraelítape ohaʼarõ hag̃ua pe Mesías, pórke haʼe rupive oñekumplíta Ñandejára rembipota. Avei omomanduʼa chupekuéra iñimperfektoha ha oikotevẽha Jesús sakrifísiore, ikatu hag̃uáicha oñeperdona pára siémpre ipekadokuéra (Gál. 3:19;  Heb. 10:1-10). Pe Léi rupive ojeprotehe pe Mesías antepasadokuérape, ha upéi oipytyvõ Ñandejára siervokuérape opilla hag̃ua pe Mesías og̃uahẽ vove. Upévare la Biblia heʼi pe Léi haʼe hague “peteĩ gía ñandegueraháva Crístope” (Gál. 3:23, 24).

8. ¿Mbaʼérepa iporã jajepyʼamongeta umi mandamiénto oĩvare pe Léi Mosáikape?

8 Ñande kristiáno ikatu avei ñañevenefisia umi instruksión Jehová omeʼẽ vaʼekuégui pe Léi Mosáikape. Por ehémplo ikatu jajepyʼamongeta umi mandamiénto oĩvare pe Léipe. Nañaimevéiramo jepe ko Léi poguýpe, umi mbaʼe oĩva pype ideprovechoiterei ñande rekovépe, ha avei ñanemboʼe mbaʼéichapa jaadora vaʼerã Jehovápe. Ñandejára voi omoĩka vaʼekue pe Léi Mosáika la Bíbliape, ikatu hag̃uáicha ñanemboʼe heta mbaʼe ha jajegia hese. Jesús avei oñeʼẽ vaʼekue pe Léire ha hiʼarive oipuru omboʼe hag̃ua heta mbaʼe iñimportantevéva. Por ehémplo haʼe heʼi vaʼekue: “Peẽ pehendu ojeʼe hague: ‘Ndovaléi reporomoakãratĩ’. Che katu haʼe peẽme: Entéro osegíva omaña peteĩ kuñáre ha iñakãraku hese, upéva oikóma hendive ipyʼapýpe ha péicha oporomoakãratĩma hína”. Jahechaháicha, pe Léi oproivi pe ñemoakãratĩ. Péro Jesús omboʼe ñamboykete vaʼerãha umi deséo ha pensamiénto vai ani hag̃ua ñaporomoakãratĩ (Mat. 5:27, 28).

9. ¿Mbaʼérepa oñekotevẽ instruksión pyahu Jesúsgui oiko rire Mesías?

9 Jesúsgui oiko rire Mesías, Jehová omeʼẽ jey instruksión ipyahúva, ha oikuaauka heta mbaʼe oikótava oñekumpli hag̃ua hembipota. ¿Mbaʼérepa ojapo upéva? Pórke áño 33-pe Jehová orrechasa tetã Israélpe, ha oiporavo ipuevlorã pe kongregasión kristiána. Péicha jahecha Ñandejára puévlo situasión okambia jeymaha.

JEHOVÁ OGIA ISRAEL ESPIRITUÁLPE

10. a) ¿Mbaʼérepa Jehová omeʼẽ instruksión ipyahúva Jesús ou rire ko yvy ape ári? b) ¿Mbaʼérepa umi instruksión pyahu idiferénte pe Léi Mosáikagui?

10 Jahecha haguéicha, Jehová omeʼẽ pe Léi Mosáika umi isrraelítape omboʼe hag̃ua chupekuéra mbaʼéichapa oiko vaʼerã, ha mbaʼéichapa oadora vaʼerã chupe. Upéi Jesús ou rire ko yvy ape ári, Jehová omeʼẽ instruksión ipyahúva. ¿Mbaʼérepa? Pórke isiervokuéra ndahaʼemoʼãvéima peteĩ tetãmeguánte, síno heta paisgua ha orekóva diferénte kostúmbre. Ko puévlo oformáta pe kongregasión kristiána, oikéta peteĩ kompromíso pyahúpe ha oñehenóita chupekuéra Israel espirituál. Péicha jahecha “Ñandejára otrataha enterovépe peteĩchante, haʼe oguerohory entéro umi hembiapo porãva ha okyhyjéva chugui, tahaʼe haʼéva tetãygua” (Hech. 10:34, 35). Pe kongregasión kristiána ipyahúva oñemoĩ “Cristo Léi” poguýpe. Cristo Léipe oĩ heta instruksión ipyahúva. Péro umíva ndojeskrivíri itáre, ojeskrivi haguéicha pe Léi Mosáika, síno oĩ káda kristiáno korasõme. Koʼã instruksión ogia ha oipytyvõta Ñandejára siervokuérape, tahaʼe haʼéva pe lugár oikohápe (Gál. 6:2).

11. ¿Mbaʼe mandátopa Jesús omeʼẽ isegidorkuérape?

11 Pe Israel espirituál oñevenefisiaiterei ‘Cristo Léigui’. Ojejapo mboyvemi pe kompromíso pyahu, Jesús omeʼẽ mokõi mandáto kristianokuéra okumpli vaʼerã. Peteĩva haʼe hína pe predikasión. Ha pe ótro katu ohechauka mbaʼéichapa ojotrata vaʼerã umi kristiáno. Koʼã instruksión oñemeʼẽ entéro Jesús segidorkuérape, tahaʼe umi ohótava yvágape térã oikótava ko yvy ape ári. Upévare koʼag̃aite peve ñande avei tekotevẽ ñakumpli koʼã instruksión.

12. ¿Mbaʼérepa jaʼekuaa pe predikasión ipyahu hague umi kristiánope g̃uarã?

 12 Yma ningo umi oserviséva Jehovápe péro ndahaʼéiva isrraelíta, oho vaʼerã Israélpe oĩháme Ñandejára puévlo (1 Rey. 8:41-43). Péro Jesús heʼi vaʼekue umi idisípulope haʼekuéra la ‘oho’ vaʼerãha oheka umi héntepe (elee Mateo 28:19, 20). Pentekostés áño 33-pe, Jehová ohechauka porã vaʼekue oipotaha isiervokuéra opredika ko yvy tuichakuére. Upe díape, 120 persóna oĩva pe kongregasión pyahúpe orresivi espíritu sánto. Haʼekuéra oñepyrũ opredika diferénte idiómape, tahaʼe umi hudíope térã umi persóna ótro tetãgua oike vaʼekuépe avei rrelihión hudíape. Upéi oñepyrũ hikuái opredika umi samaritánope. Ha áño 36-pe oñepyrũ opredika umi ndahaʼéivape hudío. Péicha jahecha kristianokuéra opredika vaʼerãha enterove héntepe oĩva opaichagua lugárpe.

13, 14. a) ¿Mbaʼépa hína pe “mandamiénto pyahu”? b) ¿Mbaʼe ikatu ñaaprende Jesús ehémplogui?

13 Jesús avei omeʼẽ “peteĩ mandamiénto pyahu” ohechaukáva mbaʼéichapa kristianokuéra jajotrata vaʼerã (elee Juan 13:34, 35). Añetehápe ningo ñande ikatu jahechauka káda día jahayhuha ñane ermanokuérape. Péro ñaime vaʼerã avei dispuésto ñamanóvo hesehapekuéra. Ko mandáto noĩri vaʼekue Moisés Léipe (Mat. 22:39; 1 Juan 3:16).

14 Ndaipóri ningo ótro ohayhu vaʼekue hapichápe Jesús ojapo haguéicha. Haʼe nopensái ijehénte, síno ohayhueterei idisipulokuérape, ha hekove jepe omeʼẽ hesehapekuéra. Haʼe oipota avei ñande jajapo upéva. Upéicharõ, entéro ñaime vaʼerã dispuésto jasufri ha ñamanóvo ñane ermanokuéra rehehápe (1 Tes. 2:8).

JEHOVÁ ÑANDEGIA KOʼÁG̃A HA ÑANDEGIÁTA AMO GOTYOVE

15, 16. a) ¿Mbaʼéichapa Jehová ogia koʼág̃arupi ipuévlope? b) ¿Mbaʼe situasiónpa ohasa koʼág̃arupi Jehová puévlo?

15 Jesús onombra “pe tembiguái jeroviaha ha iñarandúva”, ikatu hag̃uáicha omeʼẽ ñandéve “hiʼupy hiʼoraitépe” (Mat. 24:45-47). Koʼã hiʼupy apytépe oĩ umi instruksión iñimportantetereíva, Jehová omeʼẽva ipuévlope okambia jave pe situasión. Jahechamína mbaʼe situasiónpa ohasa koʼág̃a Jehová puévlo.

16 Jaiko hína “umi ára pahápe”, ha koʼẽrõite og̃uahẽta pe gran trivulasión. Upérõ ojehasa asýta arakaʼeve oikoʼỹ haguéicha (2 Tim. 3:1; Mar. 13:19). Avei Satanás ha idemoniokuéra oñemosẽ kuri yvágagui, ha upe guive ombosufri hikuái yvyporakuérape (Apoc. 12:9, 12). Ñande katu japredika hína ko yvy tuichakuére, Jesús omanda haguéicha ñandéve. Japredika hetave persónape ha heta hetave idiómape, ha koʼã mbaʼe arakaʼeve ndojejapóiva gueteri.

17, 18. ¿Mbaʼéichapa jahecha vaʼerã umi instruksión omeʼẽva ñandéve Jehová organisasión?

17 Jehová organisasión omeʼẽ ñandéve heta mbaʼe ñanepytyvõva japredika hag̃ua, por ehémplo puvlikasión, videokuéra ha diferénte método. ¿Jaaprovechapaitépa hína koʼã mbaʼe? Umi rreuniónpe oñemeʼẽ ñandéve heta instruksión ikatu hag̃uáicha jaipuru porã koʼã mbaʼe. ¿Jahechakuaápa koʼã instruksión ouha Jehovágui?

18 Jaipotáramo Jehová ñanevendesi, jasegi vaʼerã umi instruksión oñemeʼẽva ñandéve kongregasión rupive. Koʼág̃ama voi ñaneñeʼẽrendúramo, ifasilvéta ñaneñeʼẽrendu hag̃ua pe “jehasa asy guasu” aja. Upépe Satanás múndo aña oñehundíta avei (Mat. 24:21). Ha pe múndo pyahúpe, ñaikotevẽ jeýta instruksión pyahu, pórke  upépe Satanás ha imúndo ndaiporimoʼãvéima.

Pe paraísope ojeavríta lívro pyahu ohechaukátava mbaʼéichapa jaiko vaʼerã (Ehecha párrafo 19 ha 20)

19, 20. a) ¿Mbaʼe lívropa Jehová omeʼẽta ñandéve pe múndo pyahúpe? b) ¿Mbaʼéichapa ñanevenefisiáta umi instruksión pyahu?

19 Moisés tiémpope Jehová omeʼẽ umi isrraelítape pe Léi Mosáika. Tiémpo rire, omeʼẽ “Cristo Léi” pe kongregasión kristiánape. Ha pe múndo pyahúpe katu omeʼẽta ñandéve “umi lívro” ipyahúva, orekótava instruksión pyahu (elee Apocalipsis 20:12). Posívlemente koʼã ‘lívrope’ oĩta umi mbaʼe Jehová oipotáva ñakumpli upe guive. Jastudia jave koʼã lívro, jaikuaáta mbaʼépa Jehová ohaʼarõ ñandehegui. Ha koʼã mbaʼe jaikuaaukáta avei umi oikove jeývape. Entéronte ñantende porãvéta mbaʼéichapa Jehová opensa. Ha ñantende porãve rupi la Biblia, jajotrata porãvéta ha jajorrespetavéta (Is. 26:9). ¡Ñañeimahinamína mbaʼe mbaʼépa ñaaprendéta ha ñamboʼéta ñande rapichápe, ñaime vove Jesucristo poguýpe pe paraísope!

20 Jasegíramo umi instruksión “ojehaíva umi lívrope”, ha jasegíramo ñaneñeʼẽrendu pe última pruévape, Jehová ohejaitétama ñande réra ‘pe lívro jeikove reheguápe’. Upéicharõ, ikatu hína jahupyty pe vída etérna. Péro upearã koʼág̃ama jasegi vaʼerã jalee la Biblia, ñañehaʼã ñantende pe jaleéva ha ñaneñeʼẽrendu Jehovápe. Jajapóramo koʼã mbaʼe, ikatúta jajesalva ou vove pe gran trivulasión. Ha ñaime vove pe múndo pyahúpe, koʼẽ koʼẽre jasegíta ñaaprende ñande Ru ñanderayhuetévagui (Ecl. 3:11; Rom. 11:33).