Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Abril de 2016

Jehová ovendesi umi ojeroviávape hese

Jehová ovendesi umi ojeroviávape hese

“Pehaʼanga umi ojerovia ha ipasiénsiavape, umíva orresivíta umi mbaʼe porã oñepromete vaʼekue.” (HEB. 6:12)

PURAHÉI: 86, 54

1, 2. ¿Mbaʼépa ombohovái vaʼekue Jefté ha itajýra?

PETEĨ karai og̃uahẽ ohóvo hógape ogana rire pe gérra. Itajýra ovyʼaiterei, ha osẽ ojeroky ha opurahéi itúape. Péro pe karai ojapo peteĩ mbaʼe oñehaʼarõʼỹva. Ojagarra pe ijao juru ha omondoro ohechauka hag̃ua oñembyasyetereiha. Upéi heʼi: “¡Áina che rajy! ¿Mbaʼéiko la rejapomíva cherehe?”. Pe karai ojapo kuri Jehovápe peteĩ promésa, ha upévare itajýra ndaikatumoʼãi omenda ni ifamília. ¿Mbaʼépa heʼi pe kuñataĩ? Upepete heʼi itúape okumpli vaʼerãha ipromésa. Péicha ohechauka oĩha segúra Jehová núnka ndojeruremoʼãiha chupe peteĩ mbaʼe noĩporãiva (Juec. 11:34-37, NM). Ko karai oñesenti orgullóso ohechávo mbaʼeichaitépa itajýra ojerovia Jehováre, ha oĩha dispuésta ojesakrifikávo hesehápe.

2 Ko karai héra Jefté. Haʼe ha itajýra ojeroviaiterei Jehováre ha ni michĩmi ndodudái umi mbaʼe odesidívagui. Haʼekuéra siémpre iñeʼẽrendu, sapyʼánte ijetuʼúramo jepe. Mokõivévante oipota Jehová oguerohory chupekuéra, ha oĩ segúro hikuái  Jehová omombaʼetereiha entéro sakrifísio ojapóva hesehápe.

3. ¿Mbaʼépa ñanemboʼe Jefté ha itajýra ehémplo?

3 Heta vése ningo ijetuʼu jasegi hag̃ua ñakonfia Jehováre. Añetehápe, tekotevẽ ‘ñañorairõ mbarete ñande jerovia’ rehehápe (Jud. 3). Upévare, ko artíkulope ñahesaʼỹijóta Jefté ha itajýra ehémplo. ¿Mbaʼéichapa haʼekuéra ohechauka ojeroviaiterei hague Jehováre ijetuʼúramo jepe pe situasión ohasáva?

OJEROVIA HIKUÁI OIKÓRAMO JEPE UMI NAIÑEʼẼRENDÚIVA APYTÉPE

4, 5. a) ¿Mbaʼépa ojapo vaʼerã kuri umi isrraelíta oikérõ guare pe Tiérra Prometídape? b) Heʼiháicha Salmo 106, ¿mbaʼépa oiko umi isrraelítare idesovediénte haguére?

4 Ára ha ára Jefté ha itajýra ohecha mbaʼéichapa oho vai vaive umi hénte naiñeʼẽrendúiva Jehovápe. Haimete 300 áño upe mboyve, Ñandejára omanda vaʼekue umi isrraelítape ojuka hag̃ua umi hénte oadorávape umi dios fálsope, oikóvape pe Tiérra Prometídape. Péro umi isrraelíta ndojapói Jehová heʼíva (Deut. 7:1-4). Upéva rangue, heta oĩ ijapytepekuéra oñepyrũva hekovai ha omombaʼeguasu avei umi dioskuérape, ojapoháicha umi kananéo (elee Salmo 106:34-39).

5 Umi isrraelíta idesovediénte rupi, Jehová ndoprotehéi chupekuéra iñenemigokuéragui (Juec. 2:1-3, 11-15; Sal. 106:40-43). Oime vaʼerã upe tiémpope ijetuʼu raʼe heta família ohayhúvape Jehovápe osegi hag̃ua iñeʼẽrendu chupe. Péro la Biblia heʼi oĩ hague heta isrraelíta ombovyʼaséva Jehovápe. Umíva apytépe oĩ vaʼekue Jefté ha itajýra, Elqaná, Ana ha Samuel (1 Sam. 1:20-28; 2:26).

6. a) ¿Mbaʼéichapa oiko umi hénte ko mundopegua? b) ¿Mbaʼépa ñañehaʼã vaʼerã jajapo?

6 Koʼág̃arupi heta persóna opensa ha oiko umi kananéoicha. Haʼekuéra hekovai, iviolénto ha iplatarayhu vaʼekue. Péro Jehová ñandeprotehe umi mbaʼe vaígui, oprotehe haguéicha heta vése umi isrraelítape. Upéicharõ jepe, la majoría naiñeʼẽrendúi chupe. ¿Ñañehaʼãtapa ani hag̃ua jaju ñanedesovediénte haʼekuéraicha? (1 Cor. 10:6-11.) Aníkena arakaʼeve ñahaʼanga umi hénte ko mundopeguápe (Rom. 12:2).

JEFTÉ OSEGI OJEROVIA OĨRÕ JEPE ODESEPSIONÁVA CHUPE

7. a) ¿Mbaʼéichapa otrata Jeftépe iñermanokuéra ha umi ansiáno Israelgua? b) ¿Mbaʼépa ojapo Jefté?

7 Jefté tiémpope umi isrraelíta naiñeʼẽrendúi Jehovápe, ha upeakuére umi filistéo ha ammoníta oataka chupekuéra (Juec. 10:7, 8). Hiʼarive Jefté ou iprovléma iñermanokuéra ha umi ansiáno Israelgua ndive. Haʼekuéra ndaijaʼéi hese ha oenvidia chupe. Upévare omosẽ chupe hikuái pe lugár oikohágui, jepe pe yvy imbaʼe kuri pórke haʼe taʼýra ypykue (Juec. 11:1-3). Péro Jefté ndohejái koʼã mbaʼe vaiete omokangy chupe. ¿Mbaʼérepa jaʼe upéva? Pórke tiémpo rire, umi ansiáno Israelgua ojerure asy chupe ajúda, ha haʼe naiprovlémai oipytyvõ hag̃ua chupekuéra (Juec. 11:4-11). ¿Mbaʼéicha rupípa ojapo upéva?

8, 9. a) ¿Mbaʼéichapa pe Léi Mosáika oipytyvõ Jeftépe? b) ¿Mbaʼépa iñimportanteve vaʼekue Jeftépe g̃uarã?

8 Jefté ningo peteĩ gerréro ivaletereíva. Hiʼarive oikuaa porã pe Léi Mosáika ha umi mbaʼe ohasa vaʼekue tetã Israel. Haʼe opensa meme mbaʼéichapa Jehová otrata ipuévlope, upéicha rupi ontende mbaʼépa oĩ porã ha mbaʼépa oĩ vai (Juec. 11:12-27). Jefté oipuru umi mbaʼe oikuaáva odesidíta jave álgo. Haʼe oikuaa porã Jehová ndoipotaiha isiervokuéra ipochy ha oñevenga, síno oipota ojoayhu hikuái. Avei pe Léi rupive oaprende oporotrata porã vaʼerãha,  oĩramo jepe ndaijaʼéiva hese (elee Éxodo 23:5 ha Levítico 19:17, 18).

9 Oime vaʼerã Jefté oikuaa raʼe José ehémplo, ha upéva tuicha oipytyvõ chupe. Haʼe katuete oikuaáne José oiporiahuvereko hague iñermanokuérape, ndaijaʼéiramo jepe hese hikuái (Gén. 37:4; 45:4, 5). Oiméne Jefté ojepyʼamongeta rakaʼe ko ehémplore, ha upéva oipytyvõ chupe orreaksiona hag̃ua Jehová oipotaháicha. Katuete ningo haʼe osufrieterei iñermanokuéra otrata vaírõ guare chupe. Péro Jefté nomboguapýi ijehe umi mbaʼe. Chupe g̃uarã iñimportanteve odefende Jehová réra ha ipuévlope (Juec. 11:9). Jefté ojedesidi osegitaha ojerovia Jehováre. Ha upévare Jehová ovendesi chupe ha umi isrraelítape (Heb. 11:32, 33).

10. ¿Mbaʼéichapa la Biblia ñanepytyvõ ñambohovái hag̃ua umi situasión ijetuʼúva?

10 ¿Mbaʼéichapa ikatu jasegi Jefté ehémplo? Ñapensamína: ¿Mbaʼépa jajapóne peteĩ ermáno ñanedesepsionáramo, térã haʼetéramo ñandéve reiete ñandetrata vaíva? Katuete ningo ñañeñandu vaíta, péro ani ñamboyke Jehovápe upe haguére. Jasegi vaʼerã Jefté ehémplo ha jaipuru umi konsého oĩva la Bíbliape. Avei tekotevẽ jaha meme rreunionhápe, jahasa tiémpo ñane ermanokuérandi ha ñaneñeʼẽrendu Jehovápe opa mbaʼépe. Koʼã mbaʼe ñanepytyvõta ñambohovái hag̃ua umi situasión ijetuʼúva, ha ñamoĩ hag̃ua ehémplo porã ótrope, Jefté ojapo haguéicha (Rom. 12:20, 21; Col. 3:13).

UMI SAKRIFÍSIO JAJAPÓVA OHECHAUKA JAREKOHA FE

11, 12. a) ¿Mbaʼe promésapa ojapo Jefté? b) ¿Mbaʼépa ojapo vaʼerã kuri okumpli hag̃ua ipromésa?

11 Jefté oikuaa porã Jehová noipytyvõiramo chupe, ndaikatumoʼãiha osalva Israélpe umi ammonítagui. Upévare opromete Jehovápe oipytyvõramo ipuévlope ogana hag̃ua, oofresetaha chupe pe primera persóna osẽva hógagui orresivi hag̃ua chupe. Jefté heʼi oikuaveʼẽtaha Jehovápe upe persónape haʼerõguáicha peteĩ “ofrenda quemada” (Juec. 11:30, 31, NM). ¿Mbaʼépa heʼise upéva?

12 Jefté ndeʼiséi kuri ojukataha pe primera persóna osẽvape orresivi chupe. Haʼe oikuaa porã Jehová ndoipotaiha ojejuka peteĩ persónape ha oñekuaveʼẽ sakrifísioramo (Deut. 18:9, 10). Umi isrraelíta tiémpope, pe ofrenda quemada haʼe vaʼekue peteĩ rregálo espesiál oñemeʼẽva Jehovápe. Upéicharõ, Jefté opromete omeʼẽtaha Jehovápe peteĩ persóna oservítava chupe pe tavernákulope oikove aja pukukue. Jehová ojerovia Jefté promésare ha oipytyvõ chupe ogana hag̃ua pe gérra (Juec. 11:32, 33). Péro, ¿mávapa hína pe persóna Jefté oofresétava peteĩ rregáloramo?

13, 14. Ohechaukaháicha Jueces 11:35, ¿mbaʼeichaite pevépa ojerovia vaʼekue Jefté?

13 Jahecha haguéicha pe primer párrafope, Jefté og̃uahẽvo hógape, itajýra osẽ orresivi chupe. Pe kuñataĩ ningo itajýra peteĩmi ha itúa ohayhueterei chupe. ¿Mbaʼépa ojapóta Jefté? ¿Okumplítapa ipromésa? ¿Omeʼẽtapa itajýra oservi hag̃ua pe tavernákulope tóda la vída?

14 Jefté ojechávo ko situasiónpe, osegi jey umi mbaʼe oaprende vaʼekue Ñandejára Léigui. Oiméne haʼe imanduʼa pe Léi heʼi hague umi isrraelíta omeʼẽ vaʼerãha umi mbaʼe iporãvéva Jehovápe (Éx. 23:19). Katuete imanduʼáne raʼe mbaʼépa oñehaʼarõ peteĩ persóna ojapóvagui peteĩ promésa Jehovápe. Pe Léi heʼi: “Peteĩ kuimbaʼe katuete okumpli vaʼerã iñeʼẽ ojapóramo peteĩ promésa Jehovápe [...]. Ojapopaite vaʼerã umi mbaʼe heʼi vaʼekue ojapotaha”  (Núm. 30:2, NM). Upéicharõ, Jefté okumpli vaʼerã iñeʼẽ Ana ojapo haguéicha. Ko kuñakarai haʼe vaʼekue Samuel sy ha amalisia oiko avei upe tiémpope. Jefté okumplímante vaʼerã ipromésa, sapyʼánte ijetuʼútaramo jepe chupe ha itajýrape. Pe kuñataĩ oservíta pe tavernákulope oikove aja pukukue, ha núnka nomendamoʼãi ni naimembymoʼãi. Upéicha Jefté ndorekomoʼãi ni peteĩ desendiénte opytáva hendaguépe ha orresivítava iñerénsia (Juec. 11:34). Upéicharõ jepe, Jefté heʼi: “Ajapóma peteĩ promésa Jehovápe, ha ndaikatúi apyrũ che ñeʼẽre” (Juec. 11:35, NM). Jefté ohechauka ojeroviaitereiha Jehováre, ijetuʼúramo jepe. Ha Jehová ovendesi chupe upe haguére. ¿Rejapónepa nde peichagua sakrifísio?

15. a) ¿Mbaʼépa ñapromete kuri Jehovápe jajededikárõ guare chupe? b) ¿Mbaʼéichapa ikatu jahechauka jajeroviaha Jefté ojapo haguéicha?

15 Jajededikárõ guare Jehovápe ñapromete kuri chupe jajapotaha opa mbaʼe haʼe oipotáva, ha ndaiporimoʼãiha ótra kósa iñimportantevéva upévagui. Avei jaikuaáma kuri sapyʼánte ijetuʼutaha ñandéve ñakumpli hag̃ua ñapromete vaʼekue. Péro, ¿mbaʼéichapa ñarreaksiona ojejerure jave ñandéve jajapo hag̃ua peteĩ mbaʼe nañandegustáiva? Nañapensáiramo ñandejehe ha ñaiméramo dispuésto jajapo hag̃ua Jehová oipotáva, jahechaukáta ñakumpliha ñande promésa. Jaikuaaháicha, jajesakrifikáramo jepe Jehová rehehápe, upéva ndahaʼéi jey mbaʼeve ñakomparávo umi vendisión jarresivívare (Mal. 3:10). Ñapensamína Jefté rajýre, ¿mbaʼéichapa orreaksiona raʼe oikuaárõ guare mbaʼépa itúa opromete Jehovápe?

Jajeroviákena Jehováre Jefté ha itajýraicha (Ehecha párrafo 16 ha 17)

16. ¿Mbaʼépa odesidi ojapo Jefté rajy oikuaárõ guare mbaʼépa itúa opromete Jehovápe? (Ehecha pe taʼanga oĩva iñepyrũme.)

16 Pe promésa Jefté ojapo vaʼekue idiferénte pe promésa Ana ojapo vaʼekuégui. Ko kuñakarai opromete kuri Jehovápe omeʼẽtaha imemby oservi hag̃ua pe tavernákulope nasaréoicha (1 Sam. 1:11). Umi nasaréo ningo ikatu vaʼekue omenda ha ifamília. Péro Jefté rajy ndaikatumoʼãi ojapo  upéva, pórke itúa oikuaveʼẽ chupe haʼerõguáicha peteĩ “ofrenda quemada” (Juec. 11:37-40, NM). Ñapensamíntena pe kuñataĩ situasiónre. Itúa ningo Israel líder, upévare haʼe ikatu kuri omenda peteĩ mitãkariaʼy iñimportántevare Israélpe. Péro haʼe odesidi opyta soltéra ha oho oservi pe tavernákulope. Pe kuñataĩ heʼi itúape: “Che ru, oimérire remeʼẽ raʼe ne ñeʼẽ [Jehovápe] ha ere raʼe chupe péicha rejapotaha cherehe, ejapo upéicha” (Juec. 11:36). Ko kuñataĩ ohechauka ojeroviaitereiha Ñandejárare. Oiméne ningo haʼe katuete omendase ha imembyse rakaʼe, péro omboyke koʼã mbaʼe ikatu hag̃uáicha oservi porã Jehovápe. ¿Ikatúpa ñande avei jajesakrifika Jehová rehehápe?

17. a) ¿Mbaʼéichapa ikatu jasegi Jefté ha itajýra ehémplo? b) ¿Mbaʼérepa Hebreos 6:10-12 ñanemokyreʼỹ jajesakrifika hag̃ua Jehová rehehápe?

17 ¿Mbaʼéichapa ikatu jasegi Jefté ha itajýra ehémplo? Heta Testígo imitãva odesidi nomendái térã naifamíliai, por lo ménos peteĩ tiémpore. ¿Mbaʼérepa? Ikatu hag̃uáicha odedikave tiémpo Jehová servísiope. Heta ermáno ijedavéva katu oipurupa rangue itiémpo ifamília ha inietokuérandi, omboyke avei tiémpo oipuru hag̃ua Jehová servísiope. Oĩ avei ermáno oipytyvõva oñemopuʼã hag̃ua Salón del Reino. Ótro katu oho Eskuéla Oñembokatupyryve hag̃ua umi Opredikávape ha upéi ova ótra kongregasión oñekotevẽvehápe opredika vaʼerã. Heta oĩ avei omohenda porãva itiémpo ikatu hag̃uáicha opredikave Konmemorasión tiémpope. Añetehápe ningo Jehová arakaʼeve ndahesaraimoʼãi umi sakrifísio ojapóvagui koʼã ermáno (elee Hebreos 6:10-12). Ha nde, ¿reimépa dispuésto rejapóvo sakrifísio reservive hag̃ua Jehovápe?

¿MBAʼÉPA ÑAAPRENDE RAʼE?

18, 19. a) ¿Mbaʼépa ñaaprende Jefté ha itajýragui? b) ¿Mbaʼéichapa ikatu jasegi iñehemplokuéra?

18 Oĩ heta mbaʼe ikatúva ñaaprende Jefté ha itajýragui. Por ehémplo, Jefté odesidíta jave peteĩ mbaʼe, katuete osegi umi konsého oúva Jehovágui. Haʼe ndohejái okambia chupe umi hénte hembiapo vaíva oĩva ijerére. Ha oĩrõ guare odesepsionáva chupe, osegi okonfia Jehováre. Umi hénte naiñeʼẽrendúiramo jepe Ñandejárape, Jefté ha itajýra ohechauka ojeroviaitereiha hese. Jehová ovendesi chupekuéra, pórke oĩ dispuésto hikuái ojesakrifikávo hesehápe, ha ojevale hesekuéra ikatu hag̃uáicha oipytyvõ umi héntepe oadora hag̃ua chupe.

19 La Biblia heʼi: “Pehaʼanga umi ojerovia ha ipasiénsiavape, umíva orresivíta umi mbaʼe porã oñepromete vaʼekue” (Heb. 6:12). Upéicharõ, jasegíkena Jefté ha itajýra ehémplo ha jahechauka jajeroviaha Jehováre ñande pyʼaite guive. Ñanemanduʼákena haʼe katuete ñanevendesitaha jasegíramo jajerovia hese.