Ehecha oĩva pype

Ehecha oĩva pype

 TEMBIASAKUE

Ñepyrũrã mónha ha upéi oñoermána espirituál

Ñepyrũrã mónha ha upéi oñoermána espirituál

FELISA heʼi: “Che ermána menór Araceli osapukái chéve: ‘Anivetéke eñeʼẽ chéve. Norohendusevéima. Chembohasy la nde rrelihión. ¡Ndachaʼéi nderehe!’. Koʼág̃a arekóma 91 áño, ha chemanduʼa porã gueteri mbaʼéichapa hasy asy vaʼekue chéve umi mbaʼe heʼíva che ermána. Péro ore kásope ahechakuaa mbaʼéichapa oñekumpli Eclesiastés 7:8 heʼíva: ‘Iporãve peteĩ mbaʼe oñemohuʼãva ke la oñemoñepyrũva’” (NM).

Felisa: Akakuaa vaʼekue peteĩ família umíldepe, Espáñape. Ha entéronte orekatóliko ha orerrelihiosoiterei. Ore hentekuéra apytépe oĩ vaʼekue 13 voi ombaʼapo meméva Iglésia Katólikape ha ijapytepekuéra oĩ avei unos kuánto paʼi. Por ehémplo, mama oreko vaʼekue peteĩ iprímo paʼi, omboʼéva peteĩ koléhio katólikope, ha el pápa Juan Pablo II onombra vaʼekue chupe beato omano rire. Papa ningo erréro vaʼekue, ha che sy katu ombaʼapo kokuépe. Roime éntre 8 ermáno ha che la ijypykue.

Arekópe 12 áño oiko peteĩ gérra sivíl Espáñape ha upéi oñepyrũ pe diktadúra. Opa rire pe gérra, papápe oñemondo kárselpe, pórke haʼe ndoapojái pe goviérno pyahúpe. Upéva ijetuʼueterei mamápe, pórke haʼe oremantene vaʼerã ha oreretaiterei. Peteĩ iñamíga heʼi chupe omondo hag̃ua peteĩ konvéntope siuda de Bilbáope, mbohapy che ermanaʼípe hérava Araceli, Lauri ha Ramoni, ikatu hag̃uáicha oiko upépe umi mónhandi. Upépe orekóta hikuái hoʼumi vaʼerã jepe.

Araceli: Oremondórõ guare hikuái pe konvéntope, che areko 14 áño, Lauri 12 ha Ramoni katu 10 áñonte. Rohechagaʼueterei kuri ore famíliape, ha hiʼarive rombaʼapo pohýi rojapo hag̃ua limpiésa pe konvénto de Bilbáope. Ohasa rire 2 áño, umi mónha oretraslada ótro konvénto tuichavévape oñeñatendehápe umi ijedávare, siuda de Zaragózape. Upépe rombaʼapo jejopy romopotĩ hag̃ua pe kosina, ha upéva orepurupaite, pórke oremitãiterei gueteri.

 Felisa: Oĩ vaʼekue peteĩ mitãrusu ojegustáva cherehe, péro upéva ndogustái mama ha che tiópe, haʼéva pe paʼi ore puevlopegua. Upévare che ermanakuérape oñemondórõ guare pe konvénto de Zaragózape, mama ha tio chemondo avei upépe. Che cherrelihiosaiterei voi, upévare apensa igustotaha chéve upépe. Avei aha káda día tupaópe ha aservise kómo misionéra katólika peteĩ che prímoicha oĩva Áfricape.

Pe konvénto de Zaragoza, Espáñape (iskiérda); Sagrada Biblia Nácar-Colunga (derécha)

Che ahase aservi Ñandejárape ótro paíspe, péro pe konvéntope avave nachemokyreʼỹi upearã, hiʼarive upépe añeñandu ku añeñapytĩrõguáicha. Upémarõ un áño haguépe aha jey ógape, añangareko hag̃ua pe che tióre, haʼéva paʼi. Upépe ajapo umi tembiapo ogapypegua, ha káda kaʼaru roñemboʼe oñondive pe rrosário. Avei ahámi pe tupaópe amoĩ yvoty ha ambojeguapa pe vírhen María ha umi sánto.

Araceli: Aĩrõ guare Zaragózape ajapo pe primer vóto oiko hag̃ua chehegui mónha. Upe rire, umi mónha odesidi chemondo Madrídpe ha upépe ajapo che segundo vóto. Ramoni katu opyta Zaragózape ha Láuripe oñemondo Valénciape. Pe konvénto de Madrídpe oiko heta estudiánte ha persóna ijedáva, upévare siémpre heta la traváho upépe. Chéve cheasigna hikuái ambaʼapo hag̃ua enfermeríape.

Che ningo aimoʼã avyʼaitereitaha oikóramo chehegui mónha. Apensa kuri pe konvéntope ikatutaha alee meme la Biblia ha antende porãtaha la oĩva pype. Péro upépe avave noñeʼẽi Ñandejárare ni Jesúsre, ha ndojepurúi la Biblia. Pe konvéntope sólamente aaprendeʼimi idióma latín, mbaʼéichapa aadora vaʼerã Maríape, ha astudia umi katóliko santokuéra rembiasakue. Upéi todo el tiémpo ambaʼapo jejopy.

Añepyrũ añekevranta ha ndavyʼavéi. Apensa iporãvetaha aipytyvõramo che famíliape, aiko rangue ajesakrifika ótro oñemborríko hag̃ua. Upémarõ añeʼẽ pe mádre superiórandi ha haʼe chupe ahase jeyha ógape. Péro haʼe chemoinge peteĩ kalavósope jahecha nakambiáipa la apensáva.

Tres vése voi chemoinge ha chenohẽ hikuái pe kalavósogui jahecha ahasépa gueteri che rógape. Ohechámarõ nakambiaiha, haʼekuéra heʼi chéve arrenunsia ha askrivi hag̃ua: “Aha koʼágui, pórke aservise Satanáspe, Ñandejárape rangue”. Upéva ningo chesorprende. Che ahaseterei upégui, péro ni mbaʼevéicharõ ndaskrivimoʼãi upéva. Amo ipahápe ajerure añekonfesa hag̃ua peteĩ paʼíndi, ha amombeʼupaite chupe la oikóva. Haʼe ojerure permíso pe diósesispe, ikatu hag̃uáicha ajetraslada jey pe konvénto de Zaragózape. Apyta rire 3 mése upépe, oñemeʼẽ chéve permíso aha hag̃ua. Tiémpo riremínte Lauri ha Ramoni osẽ avei umi konvéntogui.

 PETEĨ LÍVRO ORESEPARA

Felisa

Felisa: Tiémpo rire, amenda ha aha aiko Cantábriape, peteĩ provínsia opytáva nórte gotyo Espáñape. Káda semána aha misahápe. Péro peteĩ domingo, pe paʼi ipochy ha osapukái: “¡Pemañami ko lívrore!”. Ohechauka oréve pe lívro La verdad que lleva a vida eterna. Ha upéi heʼi: “Oimérire oñemeʼẽ peẽme, pemeʼẽ chéve osino pemombo”.

Che ndarekói kuri pe lívro, péro ahendu rire pe paʼípe, chembokuriósa ha aipota peteĩ. Unos kuánto día rire, mokõi testígo de Jehová ou che rógape, ha oofrese chéve pe lívro. Pe pyharépema voi añemoĩ alee, ha umi Testígo ou jeýrõ guare chevisita, oporandu chéve ndastudiaséipa hendivekuéra la Biblia, ha haʼe chupekuéra astudiaseha.

Pe lívro oresepara vaʼekue

Umi mbaʼe aaprendéva la Bíbliagui pyaʼe voi opoko che korasõre. Che siémpre aipotávante voi Ñandejára cheguerohory, ha aikuaa rire Jehovápe, ahayhueterei chupe ha añeʼẽse hese opa ikatúvape. Ajevautisa áño 1973-pe. Ha káda ke ija chéve, añehaʼãmbaite vaʼekue apredika che hentekuérape. Péro haʼekuéra oñemoĩ cherehe, koʼýte che ermána Araceli.

Araceli: Pe konvéntope chetrata vaieterei vaʼekue hikuái. Upévare apyta añamarga ha nakonfiavéi che rrelihiónre. Upéicharõ jepe, káda domingo aha misahápe ha káda día añemboʼe pe rrosário. Avei ajerure Ñandejárape tachepytyvõmi, pórke antende porãse la Biblia. Upéi che ermána Felisa oñepyrũ opredika chéve. Haʼe ningo iñakãrakueterei voi umi mbaʼe oaprendévare, ha katuete roñemoĩ rojodiskuti, pórke chéve g̃uarã haʼe ifanatikaitereínte.

Araceli

Tiémpo rire, aha jey Madrídpe ambaʼapo hag̃ua, ha amenda upépe. Péro ahechakuaa umi hénte oho meméva tupaópe, ndojapoiha Jesús omboʼe vaʼekue. Upémarõ ndahavéi misahápe. Upe guive ndajeroviavéi umi sántore, nañekonfesavéi, ndaroviavéi oexistiha pe infiérno ha amombopa che imahenkuéra. Péro che naĩri segúra ajapo porãpa hína koʼã mbaʼe. Añetehápe, chedesepsionaite che rrelihión. Upévare añemboʼe Ñandejárape ha haʼe chupe: “Roikuaa porãse ningo Ñandejára, chepytyvõmína”. Umi testígo de Jehová pyʼỹinte ohómi ombota che rokẽ opredika hag̃ua, péro che núnka  nañatendéi hesekuéra. Añetehápe, ndajeroviavéima mbaʼeveichagua rrelihiónre.

Che ermána Lauri oho vaʼekue oiko Fránciape, ha Ramoni katu Espáñape. Áño 1980-perupi, haʼekuéra oñepyrũ ostudia la Biblia umi testígo de Jehovándi. Che apensa kuri oñembotavýnte hague chupekuéra, Felísape oñembotavy haguéicha. Tiémpo rire aikuaa peteĩ che vesína héravape Angelines, ha oiko orehegui oñoamigaite. Haʼe ningo testígo de Jehová avei. Angelines ha iména chemokyreʼỹ astudia hag̃ua hendivekuéra la Biblia. Haʼekuéra oñemeʼẽ enkuénta cheinteresaha la Biblia, haʼéramo jepe ndaikuaaseiha mbaʼeve rrelihióngui. Upéi peteĩ díape haʼe chupekuéra: “Vuéno, astudiáta penendive, péro jaipuru vaʼerã che Biblia”. Che areko vaʼekue peteĩ traduksión de la Biblia hérava Nácar-Colunga.

LA BIBLIA OREUNI

Felisa: Ajevautisárõ guare 1973-pe, oĩ kuri 70 Testígorupi Santandérpe (Cantabria). La ore território tuichaiterei ha oreko heta puévlo. Upévare roviaha kolektívope, ha tiémpo rire kóchepe, ikatu hag̃uáicha romog̃uahẽ pe marandu porã pe provínsia de Cantabria tuichakuére. Roho káda puévlope ha ropredikapaite upe sóna.

Heta tiémporema amboʼe la Biblia heta persónape, ha umíva apytégui 11 ojevautisa. La majoría katóliko kuri. Che ningo katólika vaʼekue avei, upévare aikuaa porã chepasiénsia ha antende vaʼerãha chupekuéra. Añemeʼẽ enkuénta oikotevẽha tiémpo hikuái oheja hag̃ua umi mbaʼe opraktika vaʼekue heta áñore. Avei ahechakuaa, la Biblia ha pe espíritu sánto opoko vaʼerãha ikorasõrekuéra, ha oipytyvõ vaʼerãha chupekuéra ontende hag̃ua pe añetegua (Heb. 4:12). Che ména, hérava Bienvenido haʼe vaʼekue polisía, ha ojevautisa áño 1979-pe. Mama katu oñepyrũ ostudia la Biblia omano mboyvemi.

Araceli: Añepyrũrõ guare astudia la Biblia umi testígo de Jehovándi, adeskonfia vaʼekue chuguikuéra. Péro kon el tiémpo, añesenti porãvéma hendivekuéra. Ahecharamoiterei mbaʼéichapa umi Testigokuéra ndahaʼéi omboʼénteva la Biblia, síno ojapo avei la omboʼéva. Amás día ajeroviave Jehováre ha la Bíbliare, ha upéva chembovyʼaiterei. Unos kuánto che vesíno jepe heʼi chéve: “Araceli, aníke reheja mbaʼeve ndejoko resegi hag̃ua ko tape”.

Peteĩ díape añemboʼe Jehovápe ha haʼe chupe: “Aagradesete ningo ndéve nderepensái haguére nachepohãveimaha, ha emeʼẽ haguére chéve heta oportunida antende hag̃ua la Biblia”. Upéi, ajerure che ermána Felísape cheperdonami hag̃ua amoñeñandu vaieterei haguére chupe. Koʼág̃a ndorojodiskutivéima, síno roñemongeta kyreʼỹ la Bíbliare. Áño 1989-pe ajevautisa, arekórõ guare 61 áño.

Felisa: Koʼág̃a areko 91 áño, apytáma viúda ha ndaikatuvéima ajapo heta mbaʼe yma ajapo vaʼekue. Péro asegi alee la Biblia káda día, ha ikatúma guive, aha rreunionhápe ha predikasiónpe.

Araceli: Apredikaseterei voi umi paʼi ha mónhape, oime vaʼerã pórke che haʼe vaʼekue mónha. Heta vésema añemongeta porã hendivekuéra, ha ahejáma chupekuéra heta puvlikasión. Chemanduʼa porãiterei ningo peteĩ vuéltape añemongeta hague peteĩ paʼíndi. Avisita rire chupe unas kuánta vése, haʼe heʼi chéve: “Araceli, siertoite opa mbaʼe eréva. Péro, ¿mbaʼe piko che ajapovétama? Chetujaitereíma ningo. ¿Mbaʼéiko heʼíta che hentekuéra ha umi hénte che iglesiapegua?”. Che katu asẽ haʼe chupe: “Péro, ¿mbaʼépa heʼíne Ñandejára?”. Pe paʼi ohechakuaa siertoha la haʼéva, péro noñanimái oheja irrelihión.

Núnka ndacheresarái che ména heʼírõ guare chéve cheakompañataha peteĩ rreuniónpe. Orekómarõ jepe 80 áño, upe guive ndofaltái ni peteĩ rreuniónpe. Haʼe ostudia vaʼekue la Biblia ha oiko jepe chugui puvlikadór no vautisádo. Chemanduʼa heta vése rosẽ hague ropredika oñondive, péro ofaltárõ guare 2 mése ojevautisa hag̃ua, oumi omano.

Felisa: Che añepyrũrõ guare aservi Jehovápe, umi mbohapy che ermána menór haʼe vaʼekue opositóra, péro koʼág̃a oiko chuguikuéra che ermána espirituál. Ha upéva chembovyʼaiterei. Hetáma ningo rohasa porã oñondive roñemongetávo Jehováre ha Iñeʼẽre. ¡Koʼág̃a hasypeve roĩ unída! *

^ párr. 29 Ramoni oreko 83 áño, Felisa 91 ha Araceli 87 áño. Haʼekuéra osegi oservi Jehovápe ipyʼaite guive. Lauri ifiél Jehovápe omano meve áño 1990-pe.