“Jajepyʼapýkena ojuehe ñande pyʼaite guive [...]. Ani jafalta meme rreunionhápe.” (HEB. 10:24, 25)

PURAHÉI: 20, 119

1-3. a) ¿Mbaʼérepa jaʼekuaa kristianokuérape g̃uarã siémpre iñimportanteha umi rreunión? (Ehecha pe taʼanga oĩva iñepyrũme.) b) ¿Mbaʼépa oñemyesakãta ko artíkulope?

CORINA orekórõ guare 17 áño oñepyrũ ohasa heta situasión ijetuʼúva. Isýpe ojegueraha préso ha oñemondo mombyry peteĩ kámpo de konsentrasiónpe. Upéi Corínape avei oñemondo Sibériape, opytáva miles de kilómetro hógagui. Upépe ombaʼapo pohýi peteĩ gránhape ha ojetrata chupe esklávaicha. Avei ojeovliga chupe ombaʼapo hag̃ua okápe roʼyve jave, hiʼarive ni ndaijaoakúi. Ijetuʼúramo jepe, Corina ha peteĩ ermána odesidi ohotaha peteĩ rreuniónpe mombyry upe lugár oĩhagui.

Corina omombeʼu: “Rosẽ roho kaʼaru ha roguata 25 kilómetro rog̃uahẽ peve pe estasión de trénpe. Pe tren osẽ las 2 de la madrugáda, ha roviaha 6 óra. Upéi roguata jey 10 kilómetro rog̃uahẽ hag̃ua pe lugár oikotahápe pe rreunión”. Corina ha pe ermána ovyʼaiterei ndofaltái haguére pe rreuniónpe. Haʼe heʼi: “Upépe rostudia rrevísta Ñemañaha ha ropurahéi umi kántiko. Umi mbaʼe oremokyreʼỹeterei ha orepytyvõ romombareteve hag̃ua ore jerovia”. Koʼã mokõi ermána tres día haguépe oho jey pe gránhape,  péro pe guárdia ni vymi ndopillái haʼekuéra noĩri hague.

3 Jehová siervokuéra ningo ymaite guive oñerreuni. Por ehémplo, umi kristiáno ypykue siémpre oñembyaty vaʼekue oadora hag̃ua Jehovápe ha oaprende hag̃ua heta mbaʼe chugui (Hech. 2:42). Oime vaʼerã ñande avei jahaseterei umi rreunionhápe. Péro oiko haguéicha umi kristiáno ypykuére, heta vése ijetuʼu ñandéve jaha meme hag̃ua rreunionhápe. Sapyʼánte tekotevẽ ñambaʼapo heta órare, térã ñanerembiapoiterei ha ñanekaneʼõma. Ñaiméramo ko situasiónpe, ¿mbaʼépa ñanepytyvõta ikatu hag̃uáicha siémpre jaha ñane rreunionkuérape? [1] (Elee pe nóta oĩva opakuévo ko artíkulo.) ¿Mbaʼéichapa ikatu ñamokyreʼỹ ñane estudiántepe ha umi ermánope ani hag̃ua ofalta rreunionhápe? Ko artíkulo ohechaukáta ñandéve iñimportantetereiha umi rreunión, pórke jaha memévo upépe ñañevenefisia ñande, oñevenefisia ñane ermanokuéra, ha ñambovyʼa Jehovápe. [2]

MBAʼÉICHAPA UMI RREUNIÓN ÑANEVENEFISIA

4. ¿Mbaʼéichapa umi rreunión ñanepytyvõ jaikuaave hag̃ua Jehovápe?

4 Umi rreunión ñanerekomboʼe. Káda rreunión ñanepytyvõ jaikuaave hag̃ua Jehovápe. Por ehémplo, heta kongregasiónpe ndaareguasúi ojestudia hague pe lívro Acerquémonos a Jehová. Ko lívro oipytyvõ hetaiterei ermánope omombaʼeve hag̃ua umi kualida porãite Jehová orekóva, ha ikatu hag̃uáicha ohayhuve chupe. Avei umi ermáno komentário omokyreʼỹeterei kuri chupekuéra. Umi rreuniónpe ñaaprende avei heta mbaʼe Ñandejára Ñeʼẽgui, ñahendúvo umi diskúrso, pe lektúra de la Biblia ha jahechávo umi demostrasión (Neh. 8:8). Por ehémplo, ñapensamíntena umi mbaʼe porãite ñaaprendévare káda semána jastudia jave umi kapítulo de la Biblia oñeasignáva upe semánape g̃uarã, ha ñahendu vove rreuniónpe umi mbaʼe iñinteresánteva ñane ermanokuéra otopa vaʼekue.

5. ¿Mbaʼéichapa umi rreunión ñanepytyvõ jajapo hag̃ua umi mbaʼe ñaaprendéva la Bíbliagui ha japredikakuaave hag̃ua?

5 Umi rreunión ñanemboʼe avei ñamoĩ hag̃ua en práktika opa mbaʼe ñaaprendéva la Bíbliagui (1 Tes. 4:9, 10). Por ehémplo Ñemañaha Ñehesaʼỹijo ñanemokyreʼỹ ñambaʼapove hag̃ua Jehová servísiope, ñañemboʼe porãve hag̃ua chupe, ha ñaperdona hag̃ua ñane ermanokuérape ofalla jave ñanendive. Umi rreunión jarekóva éntre semána katu ñanemboʼe ikatu hag̃uáicha japredikakuaa, ha ñaipytyvõ umi héntepe oaprende hag̃ua la Biblia omboʼéva (Mat. 28:19, 20).

6. ¿Mbaʼéichapa umi rreunión ñanepytyvõ ñanekyreʼỹ ha ñanembareteve hag̃ua?

6 Umi rreunión ñanemokyreʼỹ. Ko múndo oĩva Satanás poguýpe oñehaʼãmbaite omokangy ñande fe, oipota ñañedesanima ha jaiko jajepyʼapyháre. Péro ñane rreunionkuéra ñanemokyreʼỹ ha ñanemombarete jasegi hag̃ua jaservi Jehovápe (elee Hechos 15:30-32). Pyʼỹinte jastudia avei mbaʼéichapa oñekumpli umi profesía oĩva la Bíbliape. Upéva ñanepytyvõ ñaime hag̃ua segúro Jehová katuete okumplitaha opa mbaʼe oprometéva ñandéve. Ñane ermanokuéra avei ñanemokyreʼỹ, ndahaʼéi umi diskúrso rupivénte, síno okomenta ha opurahéi jave ikorasõite guive umi kántiko (1 Cor. 14:26). Ñañemongeta jave hendivekuéra, tahaʼe oñepyrũ mboyve térã opa rire umi rreunión, haʼete voi ku ñandepiroʼýva japytávo, pórke jahechakuaa jarekoha amígo oñeinteresa añetéva ñanderehe (1 Cor. 16:17, 18).

7. ¿Mbaʼérepa iñimportantete ñañerreuni?

7 Umi rreuniónpe jarresivi espíritu sánto. Jesús oipuru espíritu sánto odirihi  hag̃ua pe kongregasión. Upévare heʼi vaʼekue: “Pe ijapysáva tohendu pe espíritu sánto heʼíva umi kongregasiónpe” (Apoc. 2:7). Pe espíritu sánto ñanepytyvõ ani hag̃ua jaʼa umi tentasiónpe, japredika hag̃ua pyʼaguasúpe ha jadesidi porã hag̃ua. Upévare, jajapókena ikatúva guive jaha meme hag̃ua umi rreuniónpe ha jarresivi hag̃ua Ñandejára espíritu sánto.

UMI RREUNIÓN OVENEFISIA ÑANE ERMANOKUÉRAPE

8. ¿Mbaʼéichapa ñamokyreʼỹ ñane ermanokuérape jahávo rreunionhápe, ñakomenta ha japurahéi jave? (Ehecha pe rrekuádro heʼíva “Oñeñandu porãve ou rire rreunionhágui”.)

8 Umi rreuniónpe jareko oportunida jahechauka hag̃ua jahayhuha ñane ermanokuérape. Heta ermáno ha ermána ningo ombohovái umi mbaʼe ijetuʼuetereíva. Apóstol Pablo oskrivi vaʼekue: “Jajepyʼapýkena ojuehe ñande pyʼaite guive”. Upéi heʼi avei: “Ani jafalta meme rreunionhápe” (Heb. 10:24, 25). Ñande ikatu jahechauka ñañeinteresaha ñane ermanokuérare ñaime jave rreunionhápe, ha jaaprovecha pe oportunida ñañomokyreʼỹ hag̃ua. Ñaime jave ñane ermanokuérandi jahechauka javyʼa ha ñañemongetaseha hendivekuéra, ha ñañeinteresaha hesekuéra. Avei, ñakomenta ha japurahéi jave ñande pyʼaite guive, ñamokyreʼỹ hína chupekuéra (Col. 3:16).

9, 10. a) ¿Mbaʼéichapa Juan 10:16 ñanepytyvõ ñantende hag̃ua mbaʼérepa iñimportánte jaha rreunionhápe? b) ¿Mbaʼéichapa ñaipytyvõ umi ermáno ihentekuéra ndahaʼéivape Testígo, jaha meméramo rreunionhápe?

9 Umi rreunión ñanepytyvõ ñaime hag̃ua unído (elee Juan 10:16). Jesús oñekompara vaʼekue peteĩ pastór rehe ha okompara idisipulokuérape peteĩ ovecha atýre. Ñapensamína: Ñamoĩ chupe oĩha 5 ovecha. Mokõi oĩ peteĩ kámpope, ótro mokõi katu oĩ ótro hendápe, ha peteĩmi oĩ haʼeño ótro ládo. ¿Jaʼétapa koʼã 5 ovecha haʼeha peteĩ ovecha atýnte? Nahániri, pórke peteĩ ovecha aty oĩ vaʼerã oñondivepa ha osegi vaʼerã ipastórpe. Péicha avei, ñande ñaime vaʼerã ñane ermanokuérandi, ha upearã jaha vaʼerã rreunionhápe. Tekotevẽ ñañerreuni ñane ermanokuérandi ikatu hag̃uáicha oiko ñandehegui peteĩ “ovecha aty” ha jasegi peteĩ ‘ovecharerekuápe’.

10 Ñane rreunionkuéra ñanepytyvõ ñaime hag̃ua unído, oĩháicha unído peteĩ família ojoayhúva (Sal. 133:1). Oĩ heta ermáno orekóva ihénte oñemoĩva hesekuéra oservi rupi Jehovápe. Péro Jesús opromete vaʼekue omeʼẽtaha chupekuéra peteĩ família ohayhúva ha oñangarekóva hesekuéra (Mar. 10:29, 30). Jaha meméramo  rreunionhápe, ikatu hína oiko ñandehegui peteĩ túa, sy, ermáno ha ermána koʼãichagua ermáno espirituálpe g̃uarã. Ñapensávo koʼã mbaʼére jajapose ikatúva guive ani hag̃ua jajavy ni peteĩ rreunión.

ÑAMBOVYʼA JEHOVÁPE

11. ¿Mbaʼéichapa umi rreunión rupive ikatu ñameʼẽ Jehovápe haʼe omereséva?

11 Ñane rreunionkuéra rupive, ñameʼẽ Jehovápe haʼe omereséva. Jehová ningo ñande Apohare, ha upévare omerese jaagradese, jarrespeta ha jaalava chupe (elee Apocalipsis 7:12). Upéva ikatu jajapo ñañemboʼe, japurahéi ha ñambotuicha jave chupe umi rreuniónpe. ¡Ajépa iporãite pe oportunida jarekóva ñamombaʼeguasu hag̃ua Jehovápe!

12. ¿Mbaʼéichapa Jehová oñeñandu ñaneñeʼẽrendúramo chupe ha ñaime rreunionhápe?

12 Jehová ñandeapo vaʼekue, ha upévare omerese ñaneñeʼẽrendu chupe. Haʼe omanda ñandéve ñañerreuni hag̃ua, koʼýte koʼág̃a hiʼag̃uíva pe fin (1 Juan 3:22). Jehová ningo ohecha pe esfuérso jajapóva jaha hag̃ua umi rreuniónpe, ha omombaʼeterei upéva (Heb. 6:10).

13, 14. ¿Mbaʼéichapa umi rreunión ñanepytyvõ ñañemoag̃ui hag̃ua Jehováre ha Jesúsre?

13 Ñaimévo rreunionhápe jahechauka ñañemoag̃uiseha Jehováre ha Itaʼýrare. Umi rreuniónpe jastudia la Biblia ha ñaaprende mbaʼépa Jehová oipota jajapo, ha mbaʼéichapa oipota jaiko (Is. 30:20, 21). Heta persóna ndoservíriva Jehovápe péro ohóva rreunionhápe, orrekonose Ñandejára ñandegiaha (1 Cor. 14:23-25). Jehová odirihi ñane rreunionkuéra ijespíritu sánto rupive, ha opa mbaʼe ñaaprendéva upépe ou chugui. Upéicharõ, jaha jave rreunionhápe ñahendu hína chupe, ñañandu mbaʼeichaitépa ñanderayhu ha ñañemoag̃ui hese.

14 Jesús ningo pe omoakãva pe kongregasión, ha haʼe heʼi: “Oĩháme mokõi térã mbohapy oñembyatýva che rérape, che avei aime upépe ijapytepekuéra” (Mat. 18:20). La Biblia heʼi avei Jesús oĩha umi kongregasiónpe (Apoc. 1:20–2:1). Añetehápe Jehová ha Jesús oĩ ñanendive ha ñanemombarete ñaime jave umi rreuniónpe. ¿Mbaʼéichapa Jehová oñeñandu ohechávo ñañehaʼãmbaiteha ñañemoag̃ui hag̃ua hese ha Itaʼýrare?

15. ¿Mbaʼéichapa jahechauka Jehovápe ñaneñeʼẽrenduseha chupe jaha jave rreunionhápe?

15 Ñaimévo rreunionhápe jahechauka Jehovápe ñaneñeʼẽrenduseha chupe. Jehová ningo nañandeovligái jaha hag̃ua rreunionhápe (Is. 43:23). Upéva rangue, oheja ñandete jadesidi mbaʼépa jajapóta. Por ehémplo, ¿mbaʼépa jajapóta ñane patrón oipotáramo ñambaʼapove, ha jahechakuaa upéva káusare jafalta mimitaha rreunionhápe? ¿Mbaʼépa jajapóta umi goviérno heʼíramo ñandekastigataha, ñanemultataha térã ñanemondotaha kárselpe jaháramo ñane rreunionkuérape? ¿Mbaʼépa jajapóta ndajahaséiramo rreunionhápe jajaposeve rupi ótra kósa? Jadesidíramo ñaneñeʼẽrendu Jehovápe, jahechaukáta jahayhuha chupe ha ñarrekonoseha haʼe orekoha derécho heʼi hag̃ua ñandéve mbaʼépa jajapo vaʼerã (Hech. 5:29; Rom. 6:17). Jadesidi jave jaovedese Jehovápe, ñambopyʼaroryeterei chupe (Prov. 27:11).

ÑAÑERREUNI MEMÉKENA

16, 17. a) ¿Mbaʼérepa jaʼekuaa umi kristiáno ypykuépe g̃uarã iñimportanteterei hague umi rreunión? b) ¿Mbaʼépa opensa vaʼekue ermáno George Gangas umi rreuniónre?

16 Ohasa rire Pentekostés áño 33-pegua, umi kristiáno osegi ‘ojesareko umi apóstol omboʼévare, ha okomparti oñondive opa mbaʼe’ (Hech. 2:42). Upéva heʼise haʼekuéra osegi hague oñerreuni oadora hag̃ua Jehovápe. Upéi pe goviérno rrománo ha umi  líder rrelihióso oñepyrũ opersegi chupekuéra, ha ijetuʼuvéma oñerreuni hag̃ua hikuái. Péro umi kristiáno ojapo opa ikatúva osegi hag̃ua oñembyaty iñermanokuérandi.

17 Koʼág̃arupi ñande jaservíva Jehovápe javyʼaiterei jareko haguére oportunida ñañerreuni hag̃ua. Ñapensamína ermáno George Gangas ehémplore. Haʼe ningo oservi vaʼekue kómo miémbro del Kuérpo Governánte mas de 22 áño. Ermáno Gangas heʼi vaʼekue: “Chéve g̃uarã ndaipóri voi mbaʼeve igustovéva umi rreunióngui, pórke upépe akomparti ermanokuérandi ha chekyreʼỹeterei apytávo. Añehaʼãmbaite ag̃uahẽ voi porã ha apyta tárde peve, ikatúma guive. Chepyʼarory añemongetávo umi ermáno oĩvandi Jehová puévlope. Hendivekuéra haʼete voi aiméva che hentekuérandi ógape, peteĩ paraíso espirituálpe”. Upéi ermáno Gangas heʼi avei: “Che ningo ahaseterei voi umi rreuniónpe”.

18. a) ¿Mbaʼépa nde repensa umi rreuniónre? b) ¿Mbaʼépa redesidi rejapo koʼág̃a guive?

18 ¿Ndépa reñeñandu avei ermáno Gangas oñeñandu haguéicha rreunionhápe? Oiméramo upéicha, eñehaʼãmbaitékena siémpre reime rreunionhápe ne ermanokuérandi, sapyʼánte ijetuʼúramo jepe. Ehechaukákena Jehovápe repensaha rréi David opensa haguéicha. Haʼe heʼi vaʼekue: “Jehová, che ahayhueterei nde róga” (Sal. 26:8, NM).

^ [1] (párrafo 3) Heta ñane ermáno ha ermána ndaikatúi jepi oho rreunionhápe pórke hasy. Koʼãichagua ermáno oĩ vaʼerã segúro Jehová ontendeha isituasionkuéra ha ovaloraitereiha opa mbaʼe ojapóva hikuái oadora hag̃ua chupe. Umi ansiáno oipytyvõkuaa koʼãichagua ermánope ikatu hag̃uáicha ohendu umi rreunión, tahaʼe teléfono térã gravasión rupive.

^ [2] (párrafo 3) Ehecha pe rrekuádro heʼíva “Mbaʼérepa iñimportánte jaha rreunionhápe”.