Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Núm. 5 2017

Che rembireko Tabíthandi predikasiónpe

 LA BIBLIA OKAMBIA CHUPEKUÉRA

Ndagueroviái vaʼekue Ñandejára oexistiha

Ndagueroviái vaʼekue Ñandejára oexistiha
  • ONASE: 1974-PE

  • PAÍS: REPÚBLICA DEMOCRÁTICA ALEMANA

  • ÓTRA INFORMASIÓN: ATÉO VAʼEKUE

CHE REMBIASAKUE

Anase vaʼekue peteĩ puévlo oĩva estádo de Sajóniape (yma haʼe vaʼekue República Democrática Alemana). Ógape ningo entéro rojotrata vaʼekue mborayhúpe, ha che tuakuéra chemboʼe mbaʼéichapa añekomporta porã vaʼerã. Upe tiémpope omanda vaʼekue pe komunísmo, upévare Sajóniape hetápe nointeresaguasúi la rrelihión. Areko peve 18 áño ndagueroviái vaʼekue Ñandejára oexistiha ha amombaʼeterei pe komunísmo.

Chegusta vaʼekue pe komunísmo pórke siémpre apensáva enterove peteĩchanteha. Akalkula vaʼekue voi opa hag̃ua umi imboriahúva tekotevẽha ojerrepartipaite umi rrikésa oĩva. Upévare aike peteĩ grúpo de hóvenes komunístape, ha arekópe 14 áño ambaʼapo vaʼekue peteĩ projékto ojerresiklahápe kuatia. Che aiko vaʼekue pe puévlo de Auépe, ha umi autorida oagradeseterei chéve pe traváho ajapo vaʼekuére. Chemitã reheve aikuaáma vaʼekue heta polítiko iñimportántevape upe paíspe. Añandu vaʼekue aha porãha hese ha ikatutaha ahupyty heta mbaʼe porã che rekovépe.

Peichaháguinte tuichaiterei okambia che situasión. Áño 1989-pe ojeity pe múro de Berlín ha upe rire opa avei pe komunísmo oĩ vaʼekue Europa del Éstepe. Opa umi mbaʼe chereja vaieterei. Ahechakuaa ojejapoha heta inhustísia, por ehémplo, umi haʼéva komunísta oapoʼieterei umi ndahaʼéivape. Pe komunísmope ningo oñemboʼe entéro peteĩchanteha, ¿mbaʼéicha piko upéicharõ ojapóta hikuái upéva? ¿Heʼi reínte piko hikuái enterovéva peteĩchanteha? Opa umi mbaʼe oguapyeterei cherehe.

Tiémpo rire iñimportantevéma chéve g̃uarã ótra kósa. Oñepyrũ chegusta la músika ha la pintúra, upévare aha peteĩ eskuéla de músikape ha upégui ikatúta kuri ahasa peteĩ universidápe. Hiʼãiterei vaʼekue chéve ajededika la músika ha la pintúrape. Che tuakuéra ningo chemboʼe vaʼekue añekomporta porã hag̃ua, péro upe tiémpope che ndajapoiete umi mbaʼe aaprende vaʼekue. Aiko vaʼekue che akãre ha sapyʼánte aime voi mokõi térã hetave kuñándi. Ajapóramo jepe entéro koʼã mbaʼe ha ajededikáramo jepe la músika ha la pintúrape, lomímonte  naisentídoi chéve mbaʼeve, ha upéva ojekuaa voi umi divúho ajapóvare. Añeporandúmi vaʼekue mbaʼépa ñaneraʼarõ ñane renonderãme ha maʼerãpa jaexisti.

Oñekontestárõ guare chéve umíva, añesorprendeterei. Peteĩ kaʼaru aime aja pe eskuéla de músikape, aguapy unos kuánto mitãrusúndi, haʼekuéra oñemongeta hína kuri mbaʼépa oikóta ñane renonderãme. Hendivekuéra oĩ avei kuri peteĩ mitãkuña haʼéva testígo de Jehová ha hérava Mandy, * haʼe heʼi chéve: “Andreas, reikuaaséramo maʼerãpa jaexisti ha mbaʼépa ñaneraʼarõ, reheka vaʼerã upéva la Bíbliape”.

Aduda lénto kuri ajapo hag̃ua upéva, péro aikuaase avei la rrespuésta umi pregúnta arekóvape. Mandy ohechauka chéve peteĩ profesía oĩva Daniel kapítulo 2-pe, upépe oñeñeʼẽ umi goviérno omanda guasuvévare ko yvy ape ári. Upéi ohechauka avei chéve ótra profesía oñeʼẽva ñane renonderãre. Hasypeve oñekontestami chéve umi pregúnta arekóva. Péro, ¿mávapa oskrivi raʼe umi profesía? ¿Mbaʼéichapa oikuaa hikuái umi oikótava ñane renonderãme? ¿Oime piko añetehápe ou Ñandejáragui koʼã profesía?

LA BIBLIA CHEPYTYVÕ AKAMBIA HAG̃UA

Mandy opresenta chéve peteĩ matrimónio haʼéva Testígo, hérava Horst ha Angelika. Haʼekuéra chepytyvõ antende porãve hag̃ua la Biblia. Ensegída ahechakuaa umi testígo de Jehová añoite omboʼe ha oipuruha Ñandejára réra (Salmo 83:18; Mateo 6:9). Aaprende Jehová oprometeha ñandéve ojapotaha ko yvýgui peteĩ paraíso. Salmo 37:9 ningo heʼi: “Jehová omeʼẽta ko yvy umi ojeroviávape hese” (TNM). Avyʼaiterei kuri aikuaárõ guare entéro oñehaʼãva ojapo Ñandejára oipotáva ikatuha ohupyty umi mbaʼe porãite.

Ndahaʼéi la ifasilpáva chéve akambia ha aiko hag̃ua la Biblia heʼiháicha. Haʼérõ guare músiko ha pintór chefamóso jepe vaʼekue, ha aju añemombaʼeguasu. Upévare tekotevẽ kuri añehaʼã cheumildeve. Yma ningo cherekovai vaʼekue, ha ijetuʼu kuri chéve aheja hag̃ua upéva. Jehová ningo ohayhu, ipasiénsia ha ontende umi oñehaʼãmbaitévape ojapo la Biblia heʼíva, ha aagradeseterei chupe upévare.

Areko peve 18 áño ndagueroviái vaʼekue Ñandejára oexistiha ha amombaʼeterei pe komunísmo, péro mbeguekatúpe la Biblia chepytyvõ akambia hag̃ua. Umi mbaʼe aaprende vaʼekue chepytyvõ isentído hag̃ua la che rekove ha anivéma hag̃ua ajepyʼapyeterei ñane renonderãre. Áño 1993-pe ajevautisa ha oiko chehegui testígo de Jehová, ha áño 2000-pe aju amenda Tabitha rehe, peteĩ kuñataĩ ikyreʼỹetereíva Jehová servísiope. Mokõivévante roñehaʼãmbaite romboʼe la Biblia heʼíva umi héntepe. Che apensa haguéicha, oĩ avei heta ndogueroviáiva Ñandejára oexistiha ha omombaʼetereíva pe komunísmo. Koʼág̃a avyʼaiterei ikatu haguére aipytyvõ la héntepe oikuaa hag̃ua Jehovápe.

UMI MBAʼE PORÃ AHUPYTÝVA

Che tuakuérape ndogustaiete vaʼekue añepyrũrõ guare astudia umi testígo de Jehovándi. Péro kon el tiémpo haʼekuéra ohechakuaa mbaʼeichaitépa umi mbaʼe aaprendéva chepytyvõ akambia hag̃ua. Koʼág̃a avyʼaiterei, pórke haʼekuéra ostudia hína la Biblia, ha oho meme umi rreunión ojapóvape umi testígo de Jehová.

Tabitha ha che roñehaʼãmbaite romoĩ en práktika umi mbaʼe roaprendéva la Bíbliagui ore matrimóniope, ha upéva orembovyʼaiterei. Por ehémplo peteĩ pártepe heʼi pe matrimónio ipotĩ vaʼerãha, ha rosegívo ko konsého roñandu roñemoag̃uiveha ojuehe (Hebreos 13:4).

Koʼág̃a ndajepyʼapyvéima che renonderãre ni maʼerãpa jaexisti. Umi testígo de Jehová ningo haʼe che família ha enterovéva rovyʼa ha roiko pyʼaguapýpe oñondivepa. Ko famíliape enterovéva peteĩchapa, upéva ningo che ymaitereíma aheka hague, ha avyʼaiterei atopa haguére.

^ párr. 12 Oñekambia héra.