MBAʼÉPA ÑANEMBOʼE HEMBIAPOKUE

Epensamína mokõi persóna ojogueraha porãitereívare ha avave voi ndojoguerahái haʼekuéraicha, péicha hína umi hemélo. Nancy Segal, haʼéva direktóra peteĩ lugár ojestudiahápe umi hemélope ha oguerekóva avei peteĩ ermána heméla heʼi: “Haʼete ningo emombeʼuséva álgo peteĩ persónape ha haʼe nentendepaite reexplikaʼỹre chupe mbaʼeve”. Peteĩ kuña omombeʼu mbaʼéichapa ojogueraha haʼe ha iñermána heméla: “Che aikuaapaite opa mbaʼe che ermánagui ha haʼe upéichante avei”.

¿Mbaʼérepa umi hemélo ojokuaa porãite? Umi estúdio heʼi upéva odependeha umi mbaʼe oĩvare ijerére ha mbaʼéichapa oñemongakuaa chupekuéra. Péro ndahaʼéi voi upévante, la iñimportantevéva haʼe hína ojojoguaitereiha pe ADN * orekóva hikuái.

EPENSAMÍNA KO MBAʼÉRE: Ñande Apohare ningo haʼe pe ojapo vaʼekue pe ADN ha upévare ndaipóri ótro ontende porãvétava mbaʼeichagua persónapa ñande. Pe salmísta David heʼi vaʼekue voi: “Nde cheapo che sy ryépe. Nde cheapórõ guare ñemihaitépe che sy retepýpe, rehecháma vaʼekue umi che kangue [...] Nde ningo cherecháma kuri che sy retepýpe. Nde lívrope oĩma vaʼekue opaite mbaʼe” (Salmo 139:13, 15, 16). Ñandejára añoite ningo oikuaa ha ontende porã pe ñande ADN ha avei oikuaa umi mbaʼe oiko vaʼekue ñanderehe ha omoldeáva ñane personalida ha ñane kondúkta. Ñandejára oikuaa porã rupi mbaʼéichapa ojejapo pe ñande ADN ikatu ñaĩ segúro haʼe ñanentende porãitereiha.

¿OHECHAUKÁPA LA BIBLIA ÑANDEJÁRA IÑARANDUHA?

David oñemboʼe vaʼekue: “Jehová, nde ningo chekuaa porãiterei, pórke nde remaña mbaʼe mbaʼépa areko che pyʼapýpe. Nde reikuaapaite la ajapóva, reikuaa arakaʼépa apuʼã térã añeno. Ha mombyry guive reikuaáma mbaʼépa apensa. Jehová, che neʼĩra ni aavri che juru añeʼẽ hag̃ua, ha nde reikuaapáma la haʼétava” (Salmo 139:1, 2, 4). Jehová oikuaa avei umi mbaʼe ñañandúva ñande pyʼapýpe ha oikuaa “entéro mbaʼe ñapensáva” (1 Crónicas 28:9; 1 Samuel 16:6, 7). ¿Mbaʼépa ñanemboʼe Ñandejáragui koʼã versíkulo?

Ñañemboʼe jave ndaikatúiramo jepe ñamombeʼupaite opa mbaʼe ñapensa ha ñañandúva, ñande Apohare oikuaapaite umíva. Haʼe ndahaʼéi omañánteva mbaʼépa jajapo síno ohecha avei mbaʼérepa jajapo. Haʼe ontende avei umi mbaʼe porã jajaposéva, péro ndaikatúiva jajapo oĩ rupi álgo ñandejokóva. Ñandejára ñandeapo rupi ikatu  hag̃uáicha japorohayhu, haʼe oikuaaseterei ha ontendese umi mbaʼe ñapensáva ha umi mbaʼe ñanemomýiva jajapo hag̃ua opa mbaʼe japorohayhu rupi (1 Juan 4:7-10).

Mbaʼevete nokañýi Ñandejáragui. Haʼe ohechapaite umi mbaʼe jahasáva, umi ótro ndohechái térã nontendepáiramo jepe umíva

Ñandejára Ñeʼẽ heʼi voi:

  • “Jehová ojesareko umi hekojojávare ha ohendu chupekuéra ojerure asy jave; péro Jehová oñemoĩ umi hembiapo vaíva kóntrape” (1 PEDRO 3:12).

  • “Ñandejára heʼi: “Che rohekomboʼéta. Ahechaukáta ndéve moõrupipa reho vaʼerã, ha nderehe ajesarekóta opa árape” (SALMO 32:8, Sociedad Bíblica Paraguaya térã SBP).

ÑANDEJÁRA ÑANDEPORIAHUVEREKOITEREI

¿Ñanepytyvõtapa ñaaguanta hag̃ua ñane provlemakuéra jaikuaáramo Ñandejára ontendeha ñane situasión ha mbaʼéichapa ñañeñandu? Jahechamína mbaʼépa oiko raʼe Anna rehe, oikóva Nigériape. Haʼe heʼi: “Che apensa vaʼekue ovaléitipa la péna asegi aikove pórke umi mbaʼe ahasáva ijetuʼueterei”. Upéi heʼive: “Che ningo viúda ha aiko che memby reheve ospitálpe pórke oreko idrosefália (upéva heʼise orekoha heta líkido iñakãme), upéi osẽ avei chéve arekoha kánser de máma ha tekotevẽ kuri ajeopera ha ajapoka kimioterápia ha rradioterápia. Ijetuʼueterei kuri chéve pórke al mísmo tiémpo mokõivéva roĩ la ospitálpe”.

¿Mbaʼépa oipytyvõ Ánnape ombohovái hag̃ua ko situasión? Haʼe heʼi: “Ajepyʼamongeta umi mbaʼe heʼívare Filipenses 4:6, 7-pe, upépe heʼi Ñandejára pyʼaguapy tuichavéva opa mbaʼe ikatúvagui ñantende oñangarekotaha ñane korasõre ha umi mbaʼe ñapensávare. Chemanduʼa jave ko téxtore, añandu aĩha Jehová ykerete ha haʼe chentende porãitereiha. Heta chepytyvõ avei umi haʼéva che rrelihionpegua”.

“Orerasýramo jepe mokõivéva, koʼág̃a roĩ porãvéma. Jehová oĩ rupi ore ykére, roaprende roñeñandu porã hag̃ua rombohovái jave umi situasión. Santiago 5:11 oasegura ñandéve: ‘Ñande jaʼe ovyʼaitereiha umi oaguanta vaʼekue heta mbaʼe ijetuʼúva. Peẽ pehendu Job oaguanta hague heta mbaʼe, ha peikuaa avei umi mbaʼe porã Jehová omeʼẽ vaʼekue chupe. Upéva ohechauka Jehová ñanderayhuetereiha ha avei ñandeporiahuverekoha’”. Jehová ontende porã vaʼekue umi mbaʼe Job ohasáva, ha ikatu ñaĩ segúro haʼe ñanentendetaha avei jahasa jave umi mbaʼe ijetuʼúva.

^ párr. 4 Umi létra ADN heʼise ásido desoxirrivonukléiko, péva ningo ojogua peteĩ lívro michiʼĩvape, orekóva informasión ikatu hag̃uáicha ojeikove ko yvy ape ári.