Ñandejára ojapo vaʼekue ñande rete ikatu hag̃uáicha okuera. Ojehu jave ñandéve álgo, por ehémplo ñañekytĩ, ñañekarãi térã álgo ñandekutúramo, “ñande retépe oñepyrũ peteĩ proséso ha upéicha rupi ikatu okuera umi erída tuicháva ha michĩva” (Johns Hopkins Medicine). Ñande rete pyaʼe voi oñepyrũ ombaʼapo anivéma hag̃ua huguy la ñande erída ha okuera hag̃ua kompletoite ñande pire reheve entéro.

EPENSAMÍNA KO MBAʼÉRE: Ñande Apohare ojapóramo ñande rete ikatu hag̃uáicha okuera, ¿ikatu piko ñakonfia haʼe ñanepytyvõtaha ñañeñandu porãve hag̃ua jasufri jave? Pe salmísta heʼi vaʼekue: “Ñandejára oipytyvõ umi oñembyasy ha osufrívape, haʼete omongueráva ijeridakuéra” (Salmo 147:3). Eñeñandu vaíramo ojehu haguére ndéve álgo yma térã koʼág̃a, ¿ikatu piko reime segúro Jehová nepytyvõtaha eñeñandu porãve hag̃ua koʼág̃a ha avei amo gotyove?

¿OHECHAUKÁPA LA BIBLIA ÑANDEJÁRA ÑANDERAYHUHA?

Ñandejára opromete: “Ani rekyhyje pórke che aĩ nde ykére. Che ningo nde Jára, upévare ani rejepyʼapy. Che romombaretéta ha roipytyvõta” (Isaías 41:10). Peteĩ persóna oikuaáva Jehová oñangarekoha hese, ipyʼaguapy ha imbaretéta ombohovái hag̃ua oimeraẽ provléma. Apóstol Pablo oñeʼẽ vaʼekue upe pyʼaguapýre ha heʼi haʼeha: “Ñandejára pyʼaguapy tuichavéva opa mbaʼe ikatúvagui pentende”. Upéi Pablo heʼive: “Opa mbaʼerã chembarete Ñandejára omeʼẽgui chéve podér” (Filipenses 4:4-7, 9, 13).

La Biblia ñanepytyvõ jajeroviave hag̃ua umi promésa Jehová ojapóvare ha oñekumplítava amo gotyove. Por ehémplo, Apocalipsis 21:4, 5 omombeʼu ñandéve mbaʼépa ojapóta ha mbaʼérepa ikatu jajerovia haʼe ojapotaha upéva:

  • “Haʼe omokãmbaitéta hesaykuéra”. Jehová oipeʼapaitéta opa mbaʼe ñanembosufri ha ñandepyʼapýva, naiñimportanteguasúiramo jepe umíva umi ótrope.

  • “Pe oguapýva pe trónope” yvágape, pe Rréi Todopoderóso okrea vaʼekue opa mbaʼe, oipurúta pe podér ha autorida orekóva ñanepytyvõ ha oipeʼapa hag̃ua pe sufrimiénto.

  • Jehová oasegura ñandéve: “Koʼã ñeʼẽ ningo añetegua ha ikatu pejerovia hese”. Ñandejára ningo ndaijapúi ha upéva ñanepytyvõ jajerovia hag̃ua haʼe okumplitaha katuete umi mbaʼe oprometéva.

“‘Haʼe omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva. Umi mbaʼe yma guare ohasapáma’. Ha Pe oguapýva pe trónope heʼi: ‘¡Péina! Ambopyahu hína opa mbaʼe’. Heʼi avei: ‘Ehaíkena koʼã mbaʼe. Koʼã ñeʼẽ ningo añetegua ha ikatu pejerovia hese’” (Apocalipsis 21:4, 5).

La Biblia ha opa mbaʼe oĩva ko univérsope ñanepytyvõ jaikuaa hag̃ua mbaʼeichagua persónapa ñande Ru yvagapegua. Umi hembiapokue ñanemokyreʼỹramo jepe jaikuaa ha ñañemoag̃ui hag̃ua Ñandejárare peteĩ amígoicha, la Biblia heʼi voi ñandéve jajapo hag̃ua upéva: “Peñemoag̃uíkena Ñandejárare, ha haʼe oñemoag̃uíta penderehe” (Santiago 4:8). Hechos 17:27 heʼi: “Haʼe noĩri voi mombyry ñandehegui”.

Amáske reipuru ne tiémpo eikuaave hag̃ua Ñandejárape, reĩvéta segúro haʼe ojepyʼapyha nderehe (1 Pedro 5:7). ¿Mbaʼépepa nepytyvõta ekonfiáramo Jehová ojepyʼapyha nderehe?

Jahechamína mbaʼépa oiko peteĩ kuimbaʼe héravare Toru ha oikóva Japónpe. Haʼe okakuaa vaʼekue isýndi, haʼéva kristiána, péro upéi oike peteĩ grúpo mafióso iviolentoitereívape hérava yakuza ha oĩva Japónpe. Toru omombeʼu: “Che apensa kuri Ñandejára ndochaʼeiha cherehe ha omanóvo chehegui umi persóna oĩva che jerére, koʼýte umi persóna ahayhúva, haʼe upéva haʼeha peteĩ kastígo”. Toru heʼi avei oĩ rupi peteĩ ambiénte naiporãivape oikoha chugui peteĩ persóna iñaña ha ndohayhúiva avavépe. Omombeʼu avei mbaʼépa raʼe la ohupytyséva: “Che amanose kuri chemitã reheve, péro ajuka rire peteĩ  ifamosovévape chehegui, upéicha chefamóso hag̃ua avei ajapo haguére álgo”.

Péro upéi Toru ha hembireko Hannah ostudia la Biblia oñondive ha upéva oipytyvõ chupe okambiaite hag̃ua umi mbaʼe ojapo ha opensáva. Hembireko omombeʼu: “Ahecha porã mbaʼéichapa che ména okambia”. Koʼág̃a Toru heʼi: “Ñandejára ojepyʼapy káda únore. Haʼe ndoipotái avave omano ha oĩ operdona hag̃uáicha umi oñarrepentívape ipyʼaite guive. Haʼe ohendu umi mbaʼe ndaikatumoʼãiva jaʼe ótrope síno chupe añoiténte, umi mbaʼe ótra persóna ndaikatumoʼãiva voínte ontende. Jehová koʼẽrõitéma oipeʼapáta umi provléma ha opa mbaʼe ñanembosufríva. Koʼág̃ama voi haʼe ñanepytyvõ ñande ñaimoʼãʼỹháicha. Haʼe ñanepytyvõ ñaime vaiete jave” (Salmo 136:23).

Ohechaukaháicha Toru experiénsia, jaikuaáramo Ñandejára koʼẽrõitéma oipeʼapataha opa mbaʼe ñanembosufríva, ndahaʼéi omeʼẽtanteva ñandéve esperánsa síno koʼág̃ama voi ñanepytyvõ jaiko porãve hag̃ua. Jaikóramo jepe peteĩ múndo henyhẽvape sufrimiéntogui, Ñandejára ikatu nepytyvõ ojepyʼapy rupi nderehe.