Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Núm. 3 2016

 KO RREVÍSTAPE OÑEANALISA | OMANO VOVE PETEĨ JAHAYHÚVA

¿Ivai piko la ñanerasẽ?

¿Ivai piko la ñanerasẽ?

Ñanderasy jave sapyʼánte pyaʼe voi jajerrekupera ha upéi ni nañanemanduʼavéima upévare. Péro ñanehentemanóramo ndahaʼeiete upéicha. Doktór Alan Wolfelt heʼi voi: “Añetehápe núnka voínte ndajasuperái ñanehentemanóramo. [...] Ohasávo pe tiémpo ha umi ótro ñanepytyvõ rupi mbeguekatúpe saʼivéma hasy ñandéve” (Healing a Spouseʼs Grieving Heart).

Jahechamína por ehémplo mbaʼéichapa Abrahán oñeñandu vaʼekue omanóramo guare chugui hembireko. La Biblia heʼi: “Abrahán ombyasyeterei omano haguére Sara, upévare heta hasẽ ha ojaheʼo hese” (Génesis 23:2, NM). Pe versíkulo heʼi Abrahán heta hasẽ hague, upévare jaʼekuaa ijetuʼúne hague chupe sapyʼaitépe osuperáma hag̃ua pe situasión. * La Biblia oñeʼẽ avei Jacob rehe, itaʼyrakuéra ningo heʼi vaʼekue chupe peteĩ animál salváhe ojuka hague itaʼýra Josépe. Haʼe oñembyasy “heta díare” ha ihentekuéra ndaikatúi okonsola chupe. Heta áño rire jepe hasy asy gueteri chupe imanduʼávo Josére (Génesis 37:34, 35, NM; 42:36; 45:28).

Abrahán ombyasyeterei omano haguére hembireko Sara

Ñane tiémpope upeichaiténte avei ohasa asy umi omanóva chugui iñamígo térã ihénte. Jahechamína mokõi ehémplo.

  • “Che ména Robert omano peteĩ aksidéntepe, el 9 de julio de 2008. Ni naimoʼãingo la oikóva, upe pyharevénte rorambosa hína kuri oñondive, ha rojapoháicha jepi haʼe oho mboyve itraváhope, roñohetũ, roñoañuã ha roʼe ojupe rojoayhuha. Ojapóma 6 áño omano hague, péro hasyeterei gueteri chéve. Chéverõ g̃uarã núnka voínte ndasuperamoʼãi Rob omano hague” (Gail, orekóva 60 áño).

  • “Ojapóma 18 áño omano hague chehegui che rembireko ahayhuetéva. Péro che lomímonte ahechagaʼu gueteri chupe ha hasy chéve omano hague. Ahecha jave peteĩ mbaʼe porã pe aikohárupi, katuete chemanduʼa hese, ha haʼete voi ahechapáva mbaʼeichaitépa haʼe ovyʼáta kuri oĩrire chendive upépe” (Etienne, orekóva 84 áño).

Hasy ningo ñandéve omanóramo peteĩ jahayhúva, ha ndahaʼéi voínte sapyʼaitépe ñañeñandu porã jeýtamava. Káda uno oñeñandu diferénte ohasa jave upe situasión, upévare ndovaléi jahusga avavépe umi mbaʼe oñandúvare péicha jave. Ha oiméramo jepe ohasáma heta tiémpo ha ijetuʼu gueteri ñandéve jasupera hag̃ua pe situasión, ndovaléi jajekulpa upe haguére. Péro, ¿mbaʼépa ikatu ñanepytyvõ ñañeñandu porãve hag̃ua?

^ párr. 4 Abrahán raʼy, Isaac, oñembyasy vaʼekue avei heta tiémpore isy omano haguére, ohechaukaháicha pe artíkulo “Jajeroviave hag̃ua” osẽva ko rrevístape (Génesis 24:67).