Jahecháma haguéicha, ojeʼe pe saserdóte Delfospegua tuichaiterei ombotavy hague Crésope, ha upéicha rupi ou operde Persia kóntrape. La Bíbliape avei jatopa peteĩ profesía iñimportantetereíva oñeʼẽva pe rréi Persiapeguáre, péro ko profesía oñekumplipaite vaʼekue, umi detálle michĩva jepe.

Amo 200 áñorupi oñehundi mboyve Babilonia, ha heta tiémpo onase mboyve pe rréi ojapótava upéva, pe proféta hebreo Isaías heʼíma vaʼekue herataha Ciro, ha avei omombeʼu mbaʼeichaitépa ojapóta upéva.

Isaías 44:24, 27, 28: “Che hína Jehová [...] che haʼe ndéve: Che hína upe heʼíva umi y ipypukúvape: ‘Kóva hypa vaʼerã, che ambosékota umi rrío’. Che hína upe heʼíva Ciro rehe: ‘Haʼe hína pe pastór che aiporavo vaʼekue, haʼe ojapopaitéta umi mbaʼe che aipotáva’. Che hína upe heʼíva Jerusalén rehe: ‘Ko siuda oñemopuʼã jeýta’, ha pe témplore katu haʼe: ‘Isimiénto ojekoloka porãta’”.

Pe istoriadór griego hérava Heródoto heʼi Ciro ehérsito ombodesvia hague pe rrío Éufrates ojeréva Babilóniare. Upéicha rupi isoldadokuéra ikatu okrusa pe rrío ha oike pe siudápe. Upe rire Ciro olivera umi judío oĩ vaʼekue Babilóniape ha omondo chupekuéra Jerusalénpe omopuʼã jey hag̃ua pe siuda. Upérõ ningo ojapóma kuri 70 áño oñehundi hague Jerusalén.

Isaías 45:1: “Jehová oiporavo Círope, ha ojagarra chupe ipo deréchagui. Haʼe olehi chupe ojagarra hag̃ua umi tetã, ha oipeʼapa hag̃ua umi rréigui hiʼarmakuéra. Ñandejára oavri chupe pe siuda rokẽ, umi puérta oĩva pe entrádape opyta nandi”.

Umi persa oike pe okẽ guasúrupi opytáva aviérto noñeñatendéi rupi. Umi babilonio oikuaárire umi mbaʼe Ciro oplaneáva ndohejái vaʼerãmoʼã aviérto pe okẽ opytáva pe rrío gotyo. Péro oiko rupi upéicha ndahasyiete kuri ojeike hag̃ua upe siudápe.

Kóva haʼe peteĩ profesía, péro la Bíbliape oĩ hetaitereive oñekumpli vaʼekue ojeʼe hagueichaite. * Umi hénte oprofetisa jave heʼi jepi hikuái oñeʼẽha umi dios fálso rérape, péro umi profesía oĩva la Bíbliape katu ou Ñandejáragui, ha haʼe añoite ikatu heʼi oĩva Isaías 46:10-pe: “Ñepyrũrã che amombeʼúma mbaʼéichapa opáta peteĩ mbaʼe. Ymaite  guive che aprofetisa vaʼekue umi mbaʼe neʼĩrava oiko”.

Ñandejára Jehová añoite ikatu heʼi péicha. Oaseguraháicha heta estudióso, pe héra heʼise voi “Haʼe ojapo upe oipotáva oiko”. Kóva ohechauka haʼe ikatuha oikuaa mbaʼépa oikóta amo gotyove, ha ikatuha ojapo tekotevẽva guive okumpli hag̃ua pe heʼi vaʼekue. Upéva oasegura ñandéve haʼe katuete ojapotaha umi mbaʼe opromete vaʼekue.

UMI PROFESÍA OÑEKUMPLÍVA KOʼÁG̃A

¿Ndépa reikuaase mbaʼe profesíapa oñekumpli hína ñane tiémpope? Ojapóma 2.000 áñorupi la Biblia oprofetisa hague “umi ára pahápe pe situasión ijetuʼúta ha hasýta jagueropuʼaka hag̃ua”. ¿Mbaʼépa heʼise umi ára paha? Ndeʼiséi oñehunditaha ko yvy ni entéro yvypóra, síno heʼise opataha pe gérra, hénte oporombohasa asýva ha pe sufrimiénto ymaiterei guivéma ñandereko asýva. Jahechamína unos kuánto profesía oñekumplíva hína ñane tiémpope.

2 Timoteo 3:1-5: “Umi ára pahápe [...] umi hénte ijehénte ojepyʼapýta, iplatarayhúta, oñembotuicháta, ijejapóta, otakýta hapicháre, naiñeʼẽrendumoʼãi ituakuérape, imalagradesídota, oporombotavýta, ndohayhumoʼãi ihéntepe, oñemohatãta heʼívape, okopíta ótrore, ndojejokokuaamoʼãi, oñemboharáita hapicháre, ndohayhumoʼãi mbaʼeve iporãva, itraisionérota, hovaʼatãta, oñemombaʼeguasúta, oikóta vyʼarã rapykuéri ohayhu rangue Ñandejárape, haʼetévaicha oservíva Ñandejárape, péro hekovére ojekuaáta ndosegiriha chupe”.

Ajépa koʼág̃arupi hetave oĩ peichagua persóna. ¿Ndépa rehechakuaa oĩha heta hénte opensáva ijehénte, iplatarayhúva ha oñembotuicháva? ¿Rehechakuaápa avei mbaʼéichapa umi hénte iñexihenteve ha oñemohatã heʼívapente? Koʼág̃arupi hetaitereive oĩ naiñeʼẽrendúiva ituakuérape ha oikóva vyʼarã rapykuéri ohayhu rangue Ñandejárape. Ha káda día ivaive ohóvo la situasión.

Mateo 24:6, 7: “Peẽ pehendúta oikoha gérra heta hendárupi. [...] Peteĩ tetã opuʼãta ótro tetãre, ha umi goviérno opuʼãta ojuehe”.

Ojekalkula 1914 guive oĩ hague 100 millón rasa omano vaʼekue gérra káusare, ha heta país ni ndohupytýi ko kantida de avitánte. Eñeimahinamína mbaʼeichaitépa upéva káusare umi hénte osufri, oñembyasy ha hasẽ. ¿Ojapópa álgo umi país opa hag̃ua umi gérra?

Mateo 24:7: “Oĩta ñembyahýi”.

Pe Programa Mundial de Alimentos heʼi: “Ko múndope ningo oĩ tembiʼu entérope g̃uarã, péro upéicharõ jepe 815 millón oke káda pyhare hoʼuʼỹre mbaʼeve. Ha ivaiveha 3 apytégui 1 noñealimentaporãi”. Ojekalkula voi káda áño oĩha amo 3 millónrupi mitã omanóva ñembyahýigui.

Lucas 21:11: “Oikóta umi yvyryrýi tuicháva”.

Káda áño oiko amo 50 mil terremóto opilláva umi hénte. Ha umíva apytégui 100 ombyai umi edifísio ha óga, ha káda áño oiko avei peteĩ terremóto tuichaitereíva. Peteĩ kálkulo ojejapo vaʼekue ohechauka 1975 guive 2000 peve, umi terremóto ojuka hague 471 mil persónape.

Mateo 24:14: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetãrupi, ha upéi og̃uahẽta pe ára pahaite”.

Mas de 8 millón testígo de Jehová opredika hína pe notísia porã oñeʼẽva Ñandejára Rréinore amo 240 paíspe. Ko notísia porã oñemosarambi umi siudaháre, umi kampañaháre, kaʼaguýre ha umi serroháre. Ha, ¿mbaʼépa oikóta ojepredika vove Ñandejára oipotaha peve? La Biblia heʼi: “Upéi og̃uahẽta pe ára pahaite”. ¿Ha mbaʼépa oikóta upe rire? Oñehundíta yvyporakuéra goviérno ha oñepyrũta Ñandejára Rréino ogoverna. ¿Mbaʼépa jahupytýta upépe? Eikuaa hag̃ua eleemína pe artíkulo oúva.