Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Núm. 2 2017

Jesús oho vaʼekue Pedro suégra rógape ha omonguera chupe (Mateo 8:14, 15; Marcos 1:29-31)

¿Oproivípa Ñandejára omenda umi omoakãva rrelihión?

¿Oproivípa Ñandejára omenda umi omoakãva rrelihión?

HETA rrelihión ojerure umi omoakãvape chupekuéra opyta hag̃ua soltéro, por ehémplo umíva apytépe pe Iglésia Katólika Romana, heta Iglésia Ortodóxo, pe Vudísmo, ha hetave. Péro oĩ opensáva avei upéva káusare koʼág̃arupi oĩha hetaiterei líder rrelihióso hekokyʼáva ha ovioláva mitãme.

Upévare iñimportánte ñañeporandu, ¿oproivi piko añete Ñandejára omenda umi omoakãva rrelihión? Ñarresponde hag̃ua ko porandu, jahechamíta mbaʼéichapa oñeñepyrũ raʼe oñepensa upéicha, ha avei jahecháta mbaʼépa Ñandejára opensa upévare.

MBAʼÉICHAPA OÑEPYRŨ VAʼEKUE

Áño 2006-pe, Pápa Benedicto XVI ojapo vaʼekue peteĩ diskúrso umi odirihívape rrelihión katólika. Upérõ heʼi chupekuéra umi omoakãva rrelihión ndovaleiha omenda, ha upéva haʼeha voi “peteĩ kostúmbre ojeguerekóva umi apóstol époka riremi guive”.

Péro umi kristiáno oiko vaʼekue primer síglope ikatu kuri omenda. Apóstol Pablo ningo oiko vaʼekue upe épokape, ha haʼe heʼi porã vaʼekue oĩtaha persóna heʼíva “marandu japu” ha “oproivíta ñemenda” (1 Timoteo 4:1-3).

Síglo 2-pe ae oñeñepyrũ vaʼekue ojeproivi pe ñemenda umi Iglésia “kristiánape”, upe rire koʼã Iglésiagui osẽ pe rrelihión katólika. Peteĩ lívro heʼi upéva oiko hague “pórke upe tiémpope Rómape oñeñepyrũ avei ojeproivi ojeguereko rrelasión sexuál” (Celibacy and Religious Traditions).

Heta áño upe rire, umi omoakãva umi Iglésia oñepyrũma avei oproivi pe ñemenda. Haʼekuéra oimoʼã kuri umi rrelasión sexuál ikyʼaha ha ndovaleiha  peteĩ líder rrelihióso ojapo upéva. Upéicharamo jepe, pe Enciclopedia Británica heʼi “síglo 10-pe osegínte gueteri hague oĩ saserdóte ha ovíspo omendáva”.

Áño 1123 ha 1139-pe ojejapo vaʼekue Rómape umi oñehenóiva “Concilios de Letrán”, ha upépe ojedesidi pe rrelihión katólika oproivitaha omenda umi líder rrelihióso, ha upéva osegi koʼag̃aite peve. Péicha ojejapo ani hag̃ua pe Iglésia operde pláta, pórke umi saserdóte omendáramo, ikatu hína oheja kómo erénsia ifamíliape umi mbaʼe orekóva pe iglésia.

MBAʼÉPA OPENSA ÑANDEJÁRA

Upéicharõ, ¿opytámante vaʼerãpa soltéro umi rrelihión omoakãva? La Biblia ningo ohechauka porã mbaʼépa opensa Ñandejára ko mbaʼére. Ipype jatopa mbaʼépa heʼi Jesús umi nomendáivare “pe Rréino yvagapegua rehehápe”, haʼe ojapo haguéicha (Mateo 19:12). Apóstol Pablo oñeʼẽ avei kuri umi kristiáno osegívare iñehémplo ha odesidíva opyta soltéro “umi marandu porã rehehápe” (1 Corintios 7:37, 38; 9:23).

Péro Jesús ha Pablo ndeʼíri kuri umi líder rrelihióso ndovaleiha omenda. Jesús heʼi vaʼekue voi umi isegidór apytégui naentéroi ikatutaha opyta soltéro. Pablo ningo oakonseha vaʼekue iporãveha japyta soltéro, péro upéicha avei heʼi: “Ndarekói mandamiénto ñande Ruvichágui, péro haʼéta che apensáva” (Mateo 19:11; 1 Corintios 7:25).

La Biblia ningo ohechauka avei pe primer síglope oĩ hague heta líder rrelihióso omendáva, umíva apytépe apóstol Pedro (Mateo 8:14; Marcos 1:29-31; 1 Corintios 9:5). Upe épokape ningo Rómape oĩ vaʼekue heta hénte hekokyʼaitereíva. Upévare Pablo oskrivi vaʼekue umi omoakãva kongregasión peteĩnte hembireko vaʼerãha ha ifamiliakuéra iñeʼẽrendu ha ojeporta porã vaʼerãha (1 Timoteo 3:2, 4).

Péro umi omendáva ikatu kuri oreko rrelasión sexuál, pórke la Biblia oñeʼẽvo upévare heʼi porã voi: “Ména omeʼẽ vaʼerã hembirekópe oikotevẽva”, ha heʼive avei umi omendávape: “Ani penega ojuehegui upéva” (1 Corintios 7:3-5). Jahecha porã upéicharõ Ñandejára ndoproiviriha omenda umi omoakãva rrelihión.

UMI MARANDU PORÃ REHEHÁPE

Oiméramo Ñandejára ndoproivíri umi líder rrelihióso omenda, ¿mbaʼére piko upéicharõ Jesús ha Pablo heʼi iporãveha japyta soltéro? Pórke umi opytáva soltéro orekove oportunida omombeʼu hag̃ua ótrope umi marandu porã. Umi soltéro ningo ndorekói umi rresponsavilida orekóva umi omendáva, ha péicha rupi ikatu oipuruve itiémpo ha imbaretekue oservi hag̃ua Ñandejárape (1 Corintios 7:32-35).

Jahechamína David ehémplo, haʼe ningo ombaʼapo porã vaʼekue Ciudad de Méxicope, péro oheja upe itraváho oho hag̃ua Costa Rícape omboʼe hag̃ua la Biblia umi héntepe. Haʼe ningo ohechakuaa ikatuha kuri ojapo upéva haʼe rupi soltéro. ¿Mbaʼérepa? David omombeʼu: “Upépe ningo idiferénte umi kostúmbre ha ojeiko lája, upévare ijetuʼu kuri chéve ajepokuaa hag̃ua, péro namendái rupi ifasilve chéve ajeadapta hag̃ua, pórke akuida vaʼerã kuri chejehénte”.

Peteĩ kristiána soltéra hérava Claudia, ova vaʼekue opredika hag̃ua umi lugár oñekotevẽhápe. Haʼe omombeʼu: “Avyʼaiterei ningo aservívo Ñandejárape. Ahechávo mbaʼéichapa okuida cherehe, che jerovia imbareteve ha añandu añemoag̃uiveha hese”.

“Oiméramo nde soltéro térã remendáva, rejapóramo ikatúva guive Jehovápe g̃uarã lomímonte revyʼáta” (Claudia).

Lomímonte ningo ikatu javyʼa nañamendáiramo. Claudia heʼive: “Oiméramo nde soltéro térã remendáva, rejapóramo ikatúva guive Jehovápe g̃uarã lomímonte revyʼáta” (Salmo 119:1, 2).