Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Núm. 2 2016

¿Jaadora vaʼerãpa Ñandejárape peteĩ santuáriope?

¿Jaadora vaʼerãpa Ñandejárape peteĩ santuáriope?

KÁDA áño, mas de 6 millón de persóna oviaha peteĩ kaʼaguy de sédrope opytáva península de Shímape, Japónpe. Haʼekuéra oho pe Gran Santuario de Ísepe, haʼéva hína peteĩ santuário ojapóva 2.000 áñorupi oñemopuʼã hague ojeadora hag̃ua peteĩ diósa héravape Amaterasu Omikami, orrepresentáva pe kuarahy pe rrelihión sintoístape. Primero haʼekuéra ojohéi ipo ha ijuru ha upéi oho pe salón de adorasión renondépe. Upépe haʼekuéra oñesũ, ojepopete ha oñemboʼe pe diósape. * Umi sintoísta opensa ndaivairiha orekóramo avei hikuái ótra rrelihión, upévare pe santuáriope oho avei heta vudísta, kristiáno, ha umícha.

La majoría umi rrelihión tuichavéva oĩva ko múndope oreko santuário, ha hetaiterei hénte oho jepi umichahárupi. * Umi país oĩháme heta rrelihión kristiána oñemopuʼã jepi tupao ha santuário Jesúspe, Maríape térã umi sántope. Oñemoĩ avei santuário umi lugár oiko haguépe umi mbaʼe oñemombeʼúva la Bíbliape, ojeʼehápe oikoha milágro, térã umi oñeñongatuhápe rrelíkia. Heta hénte opensa oñemboʼéramo peteĩ lugár sagrádope isegurovetaha Ñandejára ohendúvo chupekuéra. Ha oĩ avei operegrináva peteĩ santuário peve ohechauka hag̃ua irrelihiosoha.

Hénte ohóva pe Gran Santuario de Ísepe (Japón) ha pe Gruta de la Virgen de Lóurdespe (Francia)

¿Añetehápepa Ñandejára ohenduve umi oñemboʼévape chupe peteĩ santuáriope? ¿Oguerohorýpa haʼe umi operegrinávape peteĩ santuário peve? ¿Oho vaʼerãpa umi kristiáno peteĩ santuáriope oadora hag̃ua Ñandejárape? Iñimportanteterei jaikuaa mbaʼépa Ñandejára opensa koʼã mbaʼére, upéva ñanepytyvõta avei jaikuaa hag̃ua mbaʼéichapa haʼe oipota jaadora chupe.

“ESPÍRITU SÁNTO POGUÝPE HA AÑETEGUÁPE”

¿Mbaʼépa heʼise jaadora Ñandejárape “espíritu sánto poguýpe ha añeteguápe”?

Peteĩ vuéltape Jesús oñemongeta kuri peteĩ samaritánandi, ha ohechauka porã mbaʼépa Ñandejára opensa umi lugár sagrádo térã santuáriore. Jesús oviaha hína kuri Samáriarupi ha opyta opytuʼu peteĩ póso mátape siuda de Sicar ypýpe. Upépe pe samaritána oñeʼẽ Jesúspe peteĩ diferénsia oĩvare umi hudío ha umi samaritáno oadora lájare Ñandejárape, ha heʼi: “Ore rukuéra ypykue omombaʼeguasu vaʼekue Ñandejárape ko sérrope, péro peẽ hudiokuéra peje Jerusalénpe ojeadora vaʼerãha chupe” (Juan 4:5-9, 20).

Pe kuña oñeʼẽ hína kuri sérro Guerizim rehe, opytáva 50 kilómetrorupi Jerusaléngui. Umi samaritáno oreko vaʼekue upépe peteĩ témplo ofestehahápe  pe Páskua ha umi ótra fiésta. Péro Jesús noñeʼẽi pe kuñáme umi diferénsia oĩvare umi hudío ha samaritáno apytépe, síno heʼi: “Añetehápe haʼe ndéve: Og̃uahẽta peteĩ óra natekotevẽmoʼãveimaha peju ko sérrope ni peho Jerusalénpe peadora hag̃ua Ñandejárape” (Juan 4:21). Katuete oiméne osorprendeterei raʼe pe kuñáme peteĩ hudío heʼi upéicha. ¿Mbaʼére piko ndojeadoramoʼãvéima Ñandejárape pe témplo oĩvape Jerusalénpe?

Jesús heʼi avei: “Og̃uahẽta hína pe tiémpo, ha koʼág̃ama voi oñepyrũ, umi oadoráva hekoitépe Ñandejárape omombaʼeguasutaha chupe espíritu sánto poguýpe ha añeteguápe. Añetehápe Ñandejára voi oheka umichaguápe oadora hag̃ua chupe” (Juan 4:23). Hetaiterei tiémporema umi hudío oho pe témplope oadora hag̃ua Ñandejárape. Oviaha voi hikuái upépe tres vése al áño omeʼẽ hag̃ua ofrénda Ñandejára Jehovápe (Éxodo 23:14-17). Péro Jesús heʼi vaʼekue upéva okambiatamaha ha “umi oadoráva hekoitépe Ñandejárape” oadorataha chupe “espíritu sánto poguýpe ha añeteguápe”.

Pe témplo hudío ningo oĩ vaʼekue peteĩ lugár espesífikope ha ikatu vaʼekue ojehecha. Péro pe añetegua ha espíritu sánto ndahaʼéi peteĩ mbaʼe ikatúva ojehecha ni oĩva peteĩ lugár espesífikope. Upéicharõ, Jesús omboʼese kuri idisipulokuéra nodependemoʼãveimaha peteĩ edifísiore térã peteĩ lugár rehe oadora hag̃ua Ñandejárape, tahaʼe pe sérro Guerizim, pe témplo oĩva Jerusalénpe térã oimeraẽ ótro lugár sagrádo.

Oñemongetárõ guare pe samaritánandi, Jesús heʼi vaʼekue “og̃uahẽta” hague “pe tiémpo” okambia hag̃ua ojeadora lája Ñandejárape. ¿Arakaʼépa oikóta kuri upéva? Upe tiémpo og̃uahẽ Jesús omanórõ guare, upe guive natekotevẽvéima ojesegi pe Léi oñemeʼẽ vaʼekue Moiséspe ojeadora hag̃ua Ñandejárape, ojapo haguéicha kuri umi hudío (Romanos 10:4). Péro Jesús heʼi vaʼekue avei: “Pe tiémpo [...] koʼág̃ama voi oñepyrũ”. ¿Mbaʼérepa? Pórke Jesús haʼe vaʼekue pe Mesías, ha idisipulokuéra osegíta kuri ko mandamiénto: “Ñandejára ningo peteĩ Espíritu, ha ojeadora vaʼerã chupe espíritu sánto poguýpe ha añeteguápe” (Juan 4:24). ¿Mbaʼépa heʼise jaadora Ñandejárape espíritu sánto poguýpe ha añeteguápe?

Jesús heʼírõ guare ñaime vaʼerãha pe espíritu sánto poguýpe heʼise kuri jaheja vaʼerãha pe espíritu sánto ñandegia opa mbaʼépe. Por ehémplo, jaheja vaʼerã tohechauka ñandéve mbaʼéichapa ñantende vaʼerã umi mbaʼe oĩva la Bíbliape (1 Corintios 2:9-12). Ha oñeʼẽrõ guare pe añeteguáre, heʼise kuri jaikuaa porã vaʼerãha mbaʼépa añetehápe omboʼe la Biblia. Upéicharõ, ñambovyʼa hag̃ua Ñandejárape natekotevẽi jaha katuete peteĩ lugár sagrádope, síno  tekotevẽ jajapo la Biblia heʼíva ha jaheja pe espíritu sánto ñandegia.

MBAʼÉICHAPA JAADORA VAʼERÃ ÑANDEJÁRAPE

¿Mbaʼépa jaʼekuaa upéicharõ umi operegrinávare peteĩ santuário peve térã oadoráva Ñandejárape umichagua lugárpe? Jarekóramo enkuénta Jesús heʼi hague jaadora vaʼerãha Ñandejárape espíritu sánto poguýpe ha añeteguápe, ñantende porãta natekotevẽiha jaha peteĩ santuário térã lugár sagrádope upearã. Hiʼarive, la Biblia ohechauka porã ndovaleiha jaadora umi ñandejára guaʼúpe ni jaipuru mbaʼeveichagua taʼanga térã ídolo jaadora hag̃ua Ñandejárape. Heʼi voi: “Aníkena ni mbaʼevéicharõ pemombaʼeguasu ñandejára guaʼu”, ha avei “peñemomombyrýke umi ñandejára guaʼúgui” (1 Corintios 10:14; 1 Juan 5:21). Upévare, umi kristiáno tee ndohói oadora Ñandejárape umi lugár ojeʼévape sagradoha térã ojeadorahápe umi taʼanga. Ha umi santuáriope ojejapo rupi koʼã mbaʼe umi kristiáno tee ndohói umichahárupi.

¿Heʼisépa upéva ndovaleiha jareko peteĩ lugár ñañemboʼe, jastudia ha jajepyʼamongeta hag̃ua? Nahániri. Iporã ningo jareko peteĩ lugár iñordenádo ha ipotĩva ikatuhápe ñañembyaty ha ñañemongeta umi mbaʼe oĩvare la Bíbliape, péicha ifasilve voi ñaaprende hag̃ua. Ha ndaivaíri avei ñamoĩ peteĩ lápida térã ambue mbaʼe ñanemanduʼa hag̃ua peteĩ omano vaʼekuére. Koʼã mbaʼe ojejapo jepínte voi ojehechauka hag̃ua ojehayhueterei hague pe persónape. Péro ivaíta oñekonsideráramo umíva peteĩ lugár sagrádo térã ojeadora upépe taʼanga térã rrelíkia. Jahecháma haguéicha, Jesús ndeʼíri vaʼekue péicha jaadora vaʼerãha Ñandejárape.

Upéicharõ, natekotevẽi jaha peteĩ santuáriope ñapenságui Ñandejára ñanerenduvetaha upépe. Ha ndahaʼéi avei ñaperegrina haguére peteĩ santuário peve ñambovyʼavétava Ñandejárape térã haʼe ñanevendesivétava. La Biblia heʼi voi Ñandejára Jehová, haʼéva “yvága ha yvy Ruvicha”, ndoikoiha “peteĩ témplo kuimbaʼekuéra ojapo vaʼekuépe”. Péro upéva ndeʼiséi ndaikatuiha ñañemoag̃ui hese. Ñaime ñaimehápe haʼe ikatu ohendu ñañemboʼe jave chupe, pórke “haʼe noĩri voi mombyry ñandehegui” (Hechos 17:24-27).

^ párr. 2 Káda santuário sintoístape ikatu idiferenteʼimi umi mbaʼe ojejapóva.

^ párr. 3 Ehecha pe rrekuádro “ ¿Mbaʼépa peteĩ santuário?”.