OĨ OPENSÁVA NAHANIRIHA. Peteĩ doktór heʼi vaʼekue jaipotáramo la Biblia ñandegia haʼeteha jaipurúva peteĩ lívro osẽ vaʼekue áño 1920-pe jaexplika hag̃ua peteĩ kláse de química. Umi ndojeroviáiva la Bíbliare katu heʼi jaipurúnepa peteĩ manuál itujaitereímava jaikuaa hag̃ua mbaʼéichapa jaipuru vaʼerã peteĩ komputadóra ipyahúva. Koʼã mbaʼe ohechauka haʼekuéra opensaha la Biblia ndovaleveimaha ñane tiémpope g̃uarã.

¿Maʼerã piko jaipuruséta peteĩ lívro ymaiterei guare jaheka hag̃ua gía, si koʼág̃arupi henyhẽte umi teknolohía osẽ pyahúva? Por ehémplo, Internétpe oĩ umi sítio oñemeʼẽhápe konsého ha suherénsia, ha oĩ voi umi orekóva peteĩ páhina Internétpe opuvlika hag̃ua umíva ha oñerresponde hag̃ua chupekuéra. Télepe avei oñembohasa hetaiterei prográma ha entrevísta ojejapóva umi sikólogope, konsehérope ha eskritórpe. Ha umi opuvlikáva lívro katu onohẽ hetaiterei puvlikasión de autoajúda ogana hag̃ua pláta la héntere.

Koʼág̃arupi umi informasión osẽva pyaʼeterei ojeaktualisa, ha la Biblia katu ojapóma amo 2.000 áñorupi ojeskrivipa hague, ¿maʼerã piko upéicharõ jahekáta gía pype? ¿Siértopa la heʼíva umi ndojeroviáiva la Bíbliare, ombojojávo chupe peteĩ lívro de química ndovalevéimavare térã peteĩ manuál itujaitereímavare? Añetehápe ojavy hikuái opensávo upéicha. Pe siénsia ha pe teknolohía ningo pyaʼeterei okambia, péro, ¿okambiápa umi mbaʼe añetehápe ñaikotevẽva? Koʼag̃aite peve ningo entéronte javyʼase, jaikose segúro, jajepyʼapyʼỹre ñane renonderãre, ha javyʼase ñane família ha amigokuérandi.

Ojapómarõ jepe hetaiterei tiémpo ojeskrivi hague la Biblia, pype oñeñeʼẽ entéro koʼã mbaʼére ha hetave ótra kósare avei. Heʼi ñande Apohare voi oskrivika hague ko lívro, ha oguereko umi konsého ñanepytyvõva ñambohovái porã hag̃ua oimehaichagua situasión ikatúva oñepresenta ñandéve (2 Timoteo 3:16, 17). Hiʼarive heʼi umi konsého omeʼẽva odurataha pára siémpre ha arakaʼeve ndoikomoʼãiha chugui álgo ndovalevéimava. La Biblia voi heʼi: “Ñandejára Ñeʼẽ oikove” (Hebreos 4:12).

¿Siértopa koʼã mbaʼe? ¿Itujaitereíma piko la Biblia ha upévare ndovalevéima, térãpa haʼe hína pe lívro ideprovechovéva? Ko rrevísta ojeprepara ikatu hag̃uáicha oñembohovái koʼã porandu.