Oĩ umi provléma koʼág̃a ndaikatúiva jaevita ni ñasolusiona. Por ehémplo, oimérõ omano ndehegui peteĩ rehayhúva térã erekóramo peteĩ mbaʼasy ivaietereíva, egueropuʼakámante vaʼerã umíva. Péro, ¿ikatu piko la Biblia nepytyvõ umícha jave?

UMI MBAʼASY IVAIETEREÍVA

Rosa heʼi: “Che agueronase peteĩ mbaʼasy tódo el tiémpo chembosufrietereíva. Ha káda ves aempeorave ahávo”. Haʼe ningo ojepyʼapyeterei pórke ijetuʼueterei chupe oñekonsentra hag̃ua ostudia jave la Biblia térã ótra puvlikasión. Péro ombopyʼaguapyeterei chupe Jesús heʼi vaʼekue Mateo 19:26-pe: “Ñandejárape g̃uarã ndaipóri ikatuʼỹva”. Rosa ohechakuaa heta hendáicha ikatuha ojestudia. Imbaʼasy káusare sapyʼánte ndaikatúi ni olee, upémarõ ohendu la Biblia ha umi puvlikasión bíblica. * Haʼe heʼi: “Ndarekóirire ko posivilida, ijetuʼúta kuri chéve asegi hag̃ua añemoag̃ui Jehováre”.

Rosa ningo oñeñandu vaieterei ndaikatuvéi haguére ojapo heta mbaʼe anteve guaréicha, péicha jave okonsola chupe heʼíva 2 Corintios 8:12: “Ñandejára oguerohoryeterei pe rregálo oñemeʼẽva pyʼaporãme, haʼe ohaʼarõgui ñameʼẽ pe ikatúva, ndahaʼéi pe ikatuʼỹva”. Upéva omomanduʼa Rósape Ñandejára oguerohoryetereiha chupe, pórke oñehaʼãmbaite ojapo pe ikatumíva hasykatúramo jepe.

 OMANÓRAMO PETEĨ JAHAYHÚVA

Diana, ñañeʼẽma hague anteve, heʼi: “Che membykuña orekóva 18 áño omanórõ guare añeñandu vaieterei, apensa voi ndaikatumoʼãiha aaguanta, ha mbaʼevéma ndahaʼevéi chéve anteve guaréicha”. Chupe omokyreʼỹeterei pe salmísta opurahéi vaʼekue Ñandejárape oĩva Salmo 94:19-pe: “Añekevrantaitereírõ guare ha ndaikuaavéi mbaʼépa ajapóta, nde chekonsola ha chembopyʼaguapy” (TNM). Haʼe heʼive: “Ajerure Jehovápe tachepytyvõ atopa hag̃ua peteĩ traváho, ikatu hag̃uáicha cheresaraimie umi che provlémagui”.

Diana oñepyrũ ombaʼapo de voluntária, ha upéva ombovyʼaiterei chupe. Upéi haʼe ohechakuaa ojoguaha umi krajóla pehenguépe, haʼetéramo jepe ndoservíriva añetehápe ikatu gueteri ojepuru oñepinta hag̃ua. Upéicha avei, haʼe opensáramo jepe ijehe ndoserviveimaha, añetehápe ikatu gueteri oipytyvõ ótra persónape. Haʼe heʼi: “Ahechakuaa aipuru jave umi konsého bíblico akonsola hag̃ua ótrope astudia jave hendivekuéra la Biblia, upe moméntope Jehová chekonsolaha avei”. Omoĩ avei peteĩ lístape umi personáhe bíblico ohasa vaʼekue avei umi situasión ijetuʼúva. ¿Mbaʼépa ohechakuaa hesekuéra? Haʼe heʼi: “Entéronte haʼekuéra oñemboʼe meme vaʼekue Ñandejárape”. Avei ohechakuaa ndoleéiramo la Biblia, ndotopamoʼãiha umi rrespuésta.

La Biblia oipytyvõ avei Diánape oñekonsentra hag̃ua umi mbaʼe ohupytýtavare, ndahaʼéi umi mbaʼe ohasa vaʼekuére. Chupe ningo oanimaiterei la heʼíva Hechos 24:15: “Ha areko esperánsa Ñandejárare [...] oñemoingove jeytaha umi hekojojáva ha hekojojaʼỹva”. ¿Ogueroviápa haʼe Jehová omoingove jeytaha imembykuñáme? Haʼe heʼi: “Aime segúra ahecha jeytaha che membýpe. Che Ru yvagapegua oanotáma ikalendáriope mbaʼe fechaitépa rojoecha jeýta. Chemanduʼa mbaʼéichapa añeñandu vaʼekue che membykuña onasérõ guare, ha aikuaa porã upeichaite jey añeñandutaha roguapy vove oñondive ore hardínpe”.

^ párr. 4 Heta koʼã gravasión ikatu retopa Internétpe ko direksiónpe: www.jw.org/gug.

La Biblia ikatu ñanekonsola jahasa jave umi situasión ijetuʼuetereíva