Ehecha oĩva pype

Ehecha menú secundario

Ehecha oĩva pype

Testígo de Jehová

guarani

10 pregúnta ojapóva mitãrusu ha mitãkuñanguéra

 PREGÚNTA 6

¿Mbaʼépa ajapokuaa oĩramo ojapoukaséva chéve ivaíva?

¿Mbaʼépa ajapokuaa oĩramo ojapoukaséva chéve ivaíva?

MBAʼÉREPA IÑIMPORTÁNTE REIKUAA UPÉVA

Ndete edesidíramo mbaʼépa rejapóta, nderehejamoʼãi ótro nedomina.

¿MBAʼÉPA NDE REJAPÓNE?

Epensamína ko situasiónre: Pedro ipyʼapererepa ohechávo mokõi ikompañéro ouha hína hendápe. Ko semánape dos vésema oikuaveʼẽ chupe hikuái sigarríllo ha oime vaʼerã upearã jeýma ou hína hikuái.

Peteĩva heʼi chupe:

“¿Mbaʼéiko ejapo hína neaño? Etanteamína kóa”.

Ha oguenohẽ ivolsíllogui peteĩ sigarríllo ha ombohasa chupe.

Pedro ohecha la sigarríllo ha koʼytevéntema ipyʼaperere.

“No, grásia. Haʼémango peẽme kuri che...”.

Upéi pe ótro ikompañéro osẽ heʼi: “¿Anichénengo rekyhyje repita hag̃ua? ¡Ajéa ndepyʼaju!”.

Pedro heʼi chupe: “No, ndahaʼéiko upéva”.

Upéi ikompañéro heʼi jey chupe: “Mbaʼéiko la tánto, peteĩ sigarríllonteko la repitatáva”.

Ha pe ótro ikompañéro osẽ heʼi chupe: “Epita katuna, oréko noromombeʼumoʼãi avavépe”.

¿Mbaʼépa nde rejapóne reiméramo Pedro lugárpe?

 EPENSAMÍNA KO MBAʼÉRE

¿Ndépa ere Pedro kompañerokuéra oikuaa porãha la ojapóva? Añetehápe, haʼekuéra ojapónte avei umi ótro ojapóva. Haʼekuéra oipota hapichakuéra oguerohory chupe, péro péicha oheja hína ótro odesidi hesekuéra.

¿Mbaʼépa nde rejapóne reiméramo upe situasiónpe? Jahechamína mbaʼépa ikatu rejapo ani hag̃ua reheja avave ojapouka ndéve ivaíva.

  1. EJEPREPARA EMBOHOVÁI HAG̃UA UPE SITUASIÓN

    La Biblia heʼi: “Pe iñentendídova ohechakuaa pe pelígro ha ojere chugui, péro umi ivýrova katu derechoite oho upépe, ha osufri odesidi vai haguére” (Proverbios 22:3, TNM).

    Sapyʼánte ningo japilláma voi moõpa ikatu oĩ provléma. Por ehémplo, rehecháramo rehasataha oĩhárupi unos kuánto ne kompañéro opitáva hína, epensáma vaʼerã mbaʼépa rejapóta oikuaveʼẽramo ndéve hikuái sigarríllo.

  2. EPENSA UMI KONSEKUÉNSIARE

    La Biblia heʼi: “Peñehaʼãkena akóinte penekonsiénsia potĩ” (1 Pedro 3:16).

    Epensamína: ¿Mbaʼéichapa reñeñandúta rejapóramo umi mbaʼe nde rapichakuéra ojapóvante? Ikatu ndeguerohory hikuái peteĩ tiémpore. Péro ¿mbaʼéichapa reñeñandúta upe rire? ¿Rehejátapa siémpre umi ótro odesidi nderehe repyta porãséguinte hendivekuéra? (Éxodo 23:2).

  3. EJEDESIDI VAʼERÃ

    La Biblia heʼi: “Pe iñarandúva oñatende porã la ojapótavare ha ojei umi mbaʼe vaígui” (Proverbios 14:16, TNM).

    Tárde o tempráno enterove jadesidi vaʼerã mbaʼépa jajapóta ha jaikuaa vaʼerã umíva orekoha konsekuénsia. Por ehémplo, la Biblia oñeʼẽ heta kuimbaʼe odesidi porã vaʼekuére, umíva apytépe oĩ José, Job ha Jesús. Péro oñeʼẽ avei heta kuimbaʼe odesidi vai vaʼekuére, por ehémplo, Caín, Esaú ha Judas. ¿Ha nde, mbaʼépa rejapóta?

La Biblia heʼi jajapo vaʼerãha iporãva (Proverbios 12:22). Oiméramo redesidíma mbaʼépa rejapóta ha repensáma mbaʼe konsekuénsiapa orekóta upéva, ifasilvétama ndéve rejapo hag̃ua pe iporãva.

Natekotevẽi ningo rediskursea voi ne kompañerokuérape, síno ere porãnte vaʼerã chupekuéra nderejapomoʼãiha la haʼekuéra oipotáva. Ha ohechakuaa hag̃ua hikuái nderehe nerekambiamoʼãiha la repensáva, ikatu ere:

  • “Ehekántena ótro nemoirũ vaʼerã”.

  • “Che ndajapomoʼãi asy umi mbaʼe”.

  • “Ndéngo reikuaa porã mbaʼépa che apensa koʼã mbaʼére”.

Nderedudáiramo rerresponde hag̃ua chupekuéra ha ojekuaáramo nderehe ndereguevimoʼãiha, rehecháta mbaʼéichapa ndereja hikuái trankílo.

¿MBAʼÉPA IKATU AJAPO OĨRAMO OÑEMBOHORÝVA CHEREHE?

Siémpre rejapóramo ne kompañerokuéra oipotáva, rehejáta hína nemaneha hikuái peteĩ hugéteicha.

Ikatu ne kompañerokuéra heʼi ndéve: “¿Anichéne nereñanimái? ¿Mbaʼéiko la ndepyʼajuete?”. Haʼekuéra heʼi upéicha ikatu hag̃uáicha rejapo haʼekuéra oipotáva. Péro ¿mbaʼépa ikatu ere chupekuéra?

  • Ikatu ere: “Añete la eréva, nañanimái”. Ha upéi reexplika chupe mbaʼérepa.

  • Ikatu reexplika mbaʼérepa nderejapomoʼãi ha upéi ere chupe: “Ndéngo nearandu ha reikuaa porã koʼã mbaʼe nembyaitaha”.

Ne kompañerokuéra osegíramo ndejopy rejapo hag̃ua peteĩ mbaʼe naiporãiva, rehónte vaʼerã upégui. Repytáramo katuete osegíta nemolesta hikuái. Péro rehóramo, rehechaukáta nderehejaiha haʼekuéra odesidi nderehe.

Siémprente voi oĩta ojapoukaséva ndéve ivaíva. Péro ani hag̃ua ipuʼaka hikuái nderehe, redesidíma vaʼerã mbaʼépa rejapóta ha reexplika porã mbaʼérepa nderejapomoʼãi la haʼekuéra oipotáva (Josué 24:15).