Ehecha oĩva pype

Ehecha menú secundario

Ehecha oĩva pype

Testígo de Jehová

guarani

¡Notísia porã oúva Ñandejáragui!

 LEKSIÓN 4

¿Mávapa Jesucristo?

¿Mávapa Jesucristo?

1. ¿Mávapa ojaporakaʼe Jesúspe?

¿Mbaʼérepa umi hénte oñembojasevaʼekue Jesús rendápe? (MATEO 11:29; MARCOS 10:13-16)

Jehová ojapovaʼekue Jesúspe raẽvete. Ou mboyve ko yvy ape ári, Jesús peteĩ ánhel poderóso oikóva yvágape. Upévare haʼe idiferénte yvyporakuéragui (Juan 8:23). Oĩrõ guare yvágape, haʼe oipytyvõvaʼekue Itúvape ojapo hag̃ua opaite mbaʼe. Ñandejára haʼeñoite ojapovaʼekue Jesúspe, upévare oñehenói chupe pe Taʼýra “peteĩetéva”. Avei oñehenói chupe “pe Ñeʼẽ”, oñeʼẽ rupi Jehová rérape (Juan 1:14).Elee Proverbios 8:22, 23, 30 ha Colosenses 1:15, 16.

2. ¿Mbaʼérepa ourakaʼe Jesús ko yvy ape ári?

Ñandejára ombouvaʼekue Jesúspe ko yvy ape ári. Upearã oguerova Itaʼýra rekove peteĩ kuñataĩ hudía retepýpe, hérava María. Upéicha rupi haʼe Ñandejára Raʼy, ndahaʼéi peteĩ yvypóra raʼy (Lucas 1:30-35). Haʼe ouvaʼekue ojapo hag̃ua mbohapy mbaʼe iñimportantetereíva: 1) omboʼe mávapa Ñandejára tee, 2) ohechauka ikatuha jajapo Ñandejára rembipota jahasa asýramo jepe, ha 3) omeʼẽ hekove perfékto “opaga” hag̃ua ñanderehe.Elee Mateo 20:28.

3. ¿Mbaʼérepa tekotevẽ ojepaga ñanderehe?

Ojepaga jepi peteĩ présio ani hag̃ua omano peteĩ tapicha, ha péicha ojesalva chupe (Éxodo 21:29, 30). Ñandejára nañandeapói ñandetuja ha ñamano hag̃ua. Haʼe  heʼivaʼekue Adánpe omanotaha naiñeʼẽrendúiramo. Upéicharõ, Adán ndopekáirire nomanoivaʼerãmoʼã (Génesis 2:16, 17; 5:5). La Biblia ohechauka pe ñemano “oike” hague ko múndope Adán rupive. Haʼe ombohasa iñemoñarekuérape pe pekádo, ha upévare enterovete ñamano. Upéicha rupi opavave ñaikotevẽ peteĩ opagáva ñanderehe, ikatu hag̃uáicha jajei pekádo ha ñemano poguýgui.Elee Romanos 5:12 ha 6:23.

Péro, ¿mávapa ikatúne opaga ñanderehe jajesalva hag̃ua ñemanógui? Ñamano vove ñande japaga ñande pekádo rehe. Péro ñaneimperfékto rupi, ndaikatúi japaga ñande rapicha pekádore.Elee Salmo 49:7-9.

4. ¿Mbaʼérepa omano Jesús?

Jesús ningo perfékto ha arakaʼeve ndopekái. Péro omano opaga hag̃ua ñande pekádore, ndahaʼéi ipekádore. Ñandejára ohechauka ñanderayhuetereiha omboúvo Itaʼýrape omano hag̃ua ñanderehehápe. Ha Jesús avei ñanderayhu rupi iñeʼẽrendu Itúvape ha omeʼẽ hekove ñandepeʼa hag̃ua pekádo ha ñemano poguýgui.Elee Juan 3:16 ha Romanos 5:18, 19.

5. ¿Mbaʼépa Jesús ojapo koʼág̃a?

Oĩrõ guare ko yvy ape ári, Jesús omongueravaʼekue hasývape, omoingove jey omanóvape ha oipytyvõ ohasa asývape. Péicha ohechauka mbaʼépa ojapóta amo gotyove yvyporakuéra iñeʼẽrendúva rehehápe (Mateo 15:30, 31; Juan 5:28). Omanórõ guare, Ñandejára omoingove jey chupe ikatu hag̃uáicha oho jey oiko yvágape (1 Pedro 3:18). Upe rire ohaʼarõ Itúva deréchape, haʼe omoĩ peve chupe Rréiramo (Hebreos 10:12, 13). Koʼág̃a Jesús ogoverna yvágape, ha hemimboʼekuéra oikuaauka upe notísia porã ko yvy tuichakuére.Elee Daniel 7:13, 14 ha Mateo 24:14.

Koʼẽrõitéma ko Rréi ipoderósova ohundíta umi hénte añáme ha péicha opáta umi mbaʼe ñanembohasa asýva. Ha umi ojeroviáva Jesús rehe ha iñeʼẽrendúva chupe, oikóta vyʼápe peteĩ hardín neporãmba jepévape ko yvy ape ári.Elee Salmo 37:9-11.