Ehecha oĩva pype

Ehecha menú secundario

Ehecha oĩva pype

Testígo de Jehová

guarani

La Biblia: Mbaʼépa oikuaauka ñandéve?

 PÁRTE 26

Ko yvýgui oiko jey peteĩ hardín

Ko yvýgui oiko jey peteĩ hardín

Igoviérno rupive Jehová omopotĩta héra, oipeʼapáta opaichagua mbaʼe vai, ha ohechaukáta haʼe añoite ogoverna porãha

APOCALIPSIS (térã Revelación) omohuʼã la Biblia, ha apóstol Juan ohai pype heta visión Ñandejára ohechaukavaʼekue chupe. Koʼãva omeʼẽ ñandéve esperánsa omyesakãvo mbaʼéichapa Jehová okumplipáta hembipota.

Ñepyrũrã Juan ohecha mbaʼéichapa Jesús oipytyvõ ha omeʼẽ konsého umi kongregasiónpe. Upéi ohecha Ñandejára oĩha itrónope yvágape ha umi anhelkuéra omombaʼeguasuha chupe.

Og̃uahẽmbotávo pe ára Ñandejára okumplipa hag̃ua hembipota oiko heta mbaʼe ndetuichapa jepéva. Jesucrístope oñemeʼẽ peteĩ kuatiañeʼẽ oñembotýva siete hendápe. Haʼe oavri umi cuatro párte tenondegua ha upépe ojekuaa osẽha cuatro kuimbaʼe kavaju arigua. Pe tenonde osẽva ningo Jesucristo oiko rire chugui mburuvicha guasu ha oho peteĩ kavaju morotĩ ári. Umi mbohapy osẽva upe rire ikavajukuéra ótro kolór, ha orrepresenta gérra, ñembyahýi ha mbaʼasy. Upéi oavrívo pe párte sieteha, oñehendu siete trompéta pu. Koʼãva ohechauka oñemomarandutaha umi héntepe Ñandejára ojapótava. Umi siete plága upe riregua ohechauka mbaʼeichaitépa Ñandejára ipochy.

Upe rire Juan ohecha onaseha peteĩ mitãʼi. Upéva ohechauka Jesucristo oñepyrũmaha ogoverna yvágape. Upéro oiko peteĩ ñorairõ, oñemosẽ Satanás ha idemoniokuérape yvágagui, ha ojeity chupekuéra ko yvy gotyo. Upévo oñehendu peteĩ hatã heʼíva: ‘Aichejáranga umi yvyporakuéra’. Mbaʼérepa? Satanás oikuaa saʼimaha pe tiémpo hembýva chupe ha upévare itarovaite pochýgui (Revelación [Apocalipsis] 12:12, JMP).

Upéi Juan ohecha peteĩ ovecharaʼy orrepresentáva Jesucrístope. Oĩ hendive 144.000 ojeporavovaʼekue yvyporakuéra apytégui. Péicha Apocalipsis omyesakã porã ñandéve oĩtaha 144.000 yvypóra ogovernátava Jesucrístondi yvágape (Revelación 14:1; 20:6).

Upéi ojehecha mburuvichakuéra yvy arigua oñembyatyha oñorairõ hag̃ua Ñandejára Ipuʼakapávandi. Upe ñorairõme oñehenói Armagedón. Haʼekuéra oñemoĩ Jesús ha ijehérsito yvagapeguáre. Mbaʼéichapa opáta ko ñorairõ? Umi mburuvicha yvy arigua omanombaitéta ha Satanás opytáta préso. Upe rire Jesús ha 144.000 omoirũva chupe ogovernáta ko yvy mil áño pukukue. Opávo upe mil áño, Satanáspe avei ojejukáta (Revelación 16:14; 20:4).

Mbaʼe iporãvapa ohupytýta umi iñeʼẽrendúva Ñandejárape? Apóstol Juan ohai: ‘Jehová omokãta hesaykuéra, ndaiporimoʼãvéima ñemano, tasẽ, jaheʼo ha ñembyasy. Opa mbaʼe vai oĩvaʼekue ndaiporivéima’ (Revelación 21:4). Péicha ko yvýgui oiko jeýta peteĩ hardín.

Apocalipsis ohechauka ñandéve pe marandu iñimportantevéva oĩva la Bíbliape: Irréino rupive Jehová omopotĩta héra ha ohechaukáta haʼe añoite ogovernavaʼerãha.

(Oñeguenohẽ Apocalipsis [Revelación] kuatiañeʼẽgui.)