Ehecha oĩva pype

Ehecha menú secundario

Ehecha oĩva pype

Testígo de Jehová

guarani

La Biblia: Mbaʼépa oikuaauka ñandéve?

 PÁRTE 10

Peteĩ rréi iñaranduetereíva

Peteĩ rréi iñaranduetereíva

Jehová oipytyvõgui Salomónpe haʼe iñarandueterei; haʼe ogoverna aja umi Israelgua ipyʼaguapy ha oiko porã

MBAʼÉICHAPA jaikóne umi mburuvicha ojapóramo Ñandejára heʼíva ha ñande avei ñañehaʼãramo ñaneñeʼẽrendu chupe? Ñambohovái hag̃ua ko porandu jahechami mbaʼéichapa ojeiko Israélpe Salomón ogoverna aja.

Omano mboyvemi David omoĩ Salomónpe hendaguépe. Peteĩ jey Ñandejára oñeʼẽ Salomónpe iképe ha heʼi chupe ojerure hag̃ua haʼe oipotáva. Haʼe ojerure arandu ikatu hag̃uáicha ogoverna porã upe tetã. Jehová oguerohoryeterei upéva ha omeʼẽ chupe ojeruréva. Avei heʼi Salomónpe akóinte iñeʼẽrendúramo oikove pukúta, ipláta hetáta ha oñemombaʼeguasutaha chupe.

Salomón iñarandueterei ha upévare ojekuaa chupe opárupi. Peteĩ jey ou hendápe mokõi kuña oñorairõva peteĩ mitãraʼy rehe, mokõivévante heʼi imbaʼeha. Mbaʼépa ojapo Salomón? Haʼe heʼi: ‘Pegueru peteĩ espáda ha pembojaʼo chupekuéra ko mitã’. Peteĩva heʼi: ‘Pembojaʼo katu oréve’, ha pe ótra ojerure asy ani hag̃ua ojejuka, toñemeʼẽ guei pe hapichápe. Péicha haʼe opilla máva membýpa añetehápe upe mitã. Umi Israelgua oikuaávo ko mbaʼe, ohechakuaa Salomón iñaranduetereiha Ñandejára oipytyvõgui chupe.

Salomón ojapovaʼekue heta mbaʼe ogoverna aja. Pór ehémplo pe témplo iporãitéva omopuʼãvaʼekue Jerusalénpe. Haʼe ojapo ko óga ojeadora hag̃ua Jehovápe. Oñeinagurárõ guare ko témplo Salomón oñemboʼe Jehovápe ha heʼi: ‘Pe yvága ijapyraʼỹva jepe michĩ ndéve g̃uarã; mbaʼéicha piko nde reikéta ko óga che amopuʼãvaʼekuépe’ (1 Reyes 8:27, ÑÑB).

Salomónpe ningo oparupiete ojekuaavaʼekue. Umi oikóva tetã Sébape ohendu avei haʼe iñaranduetereiha. Upévare pe rréina oviaha Israélpe ohecha hag̃ua hembiapokue ha oikuaa hag̃ua añetehápepa iñarandueterei. Ohecha rire hetaiterei mbaʼe porã, pe rréina omombaʼeguasu Jehovápe omoĩ haguére peteĩ rréi iñaranduetéva Israélpe. Jehová ovendesi rupi Salomónpe ndaiporivaʼekue ótro rréi haʼéicha ogoverna porãva Israélpe.

Upéi ou Salomón naiñeʼẽrenduvéi Jehovápe. Omenda heta kuñáre oadoráva umi ñandejára guaʼúpe. Mbegue katúpe koʼãva, oguenohẽ chupe Jehová rapégui ha amo ipahápe Salomón omombaʼeguasu avei umi ñandejára guaʼúpe. Upévare Jehová heʼi oipeʼataha ifamíliagui upe tetã, péro heʼi ndoipeʼapamoʼãiha chugui okumpli hag̃ua ipromésa ojapovaʼekue Davídpe. Péicha jahecha Salomón omboykéramo jepe chupe, Jehová ndahesaráiri pe kompromíso ojapovaʼekuégui David ndive.

(Oñeguenohẽ 1 Reyes kapítulo 1-11; 2 Crónicas kapítulo 1-9; ha Deuteronomio 17:17-gui.)