Ehecha oĩva pype

Ehecha menú secundario

Ehecha oĩva pype

Testígo de Jehová

guarani

La Biblia: Mbaʼépa oikuaauka ñandéve?

 PÁRTE 11

Puraheikuéra ñanepytyvõ ha ñanembopyʼaguapýva

Puraheikuéra ñanepytyvõ ha ñanembopyʼaguapýva

Espíritu sánto rupive David ha ambue kuimbaʼe ohai heta purahéi omombaʼeguasu hag̃ua Jehovápe. Salmos kuatiañeʼẽme oĩ 150 purahéi

SALMOS héra pe lívro ipukuvéva oĩva la Bíbliape, ha iñapesã pype hetaiterei purahéi ojehaivaʼekue 1.000 áño pukukue. Umi ohaivaʼekue koʼã sálmo ojeroviaiterei Ñandejárare, upévare ombojegua ñeʼẽyvoty opurahéi hag̃ua Jehovápe. Jaleévo koʼã purahéi jatopa haʼekuéra oñeʼẽha umi mbaʼe ñande yvyporakuéra ñañandúvare, pór ehémplo: javyʼa, ñanderasy, ha oĩ vése ñandeahoʼi mbaʼembyasy ha vyʼaʼỹ. Avei ojekuaa hesekuéra ohayhueterei hague Ñandejárape. Jahechamína mbykymi mbaʼépa oĩ koʼã purahéipe.

Jehová hína ñande Ruvicha Guasu, chupe añoite ñamombaʼeguasu ha jaadoravaʼerã. Salmo 83:18-pe heʼi: ‘Ha enterove toikuaa nderéra Jehová, ha ndaiporiha nde rasaharã ko yvy ape ári’. Heta sálmope oñembotuicha Jehovápe ojapo haguére pe yvága omimbipáva, umi estrellakuéra, ko yvy ha umi oĩva ipype, ha ñande rete iporãitéva (Salmos 8; 19; 139 ha 148). Ambue sálmo katu omombaʼeguasu Jehovápe osalva ha oñangareko haguére isiervokuérare (Salmos 18; 97 ha 138). Ha oĩ avei oguerohorýva Jehovápe omoĩ haguére tekojoja, oipytyvõgui umi ohasa asývape ha okastiga rupi umi iñañávape (Salmos 11; 68 ha 146).

Jahayhúramo Jehovápe haʼe ñanepytyvõ ha ñanembopyʼaguapy. Hetaiterei oĩ oguerohorýva ha omombaʼéva pe Salmo 23. Upépe David ombojoja Jehová peteĩ kuimbaʼére mborayhúpe oñangarekóva ijovechakuérare. Salmo 65:2 katu ñanemomanduʼa Jehová ohenduha ñane ñemboʼe. Salmo 39 ha 51 ombopyʼaguapy umi ojapovaʼekuépe heta mbaʼe vai. Koʼã sálmope David ohechauka oñembyasyha ipyʼaite guive hembiapo vaikuére, ha ohechakuaa Jehová operdona hague chupe. Salmo 55:22 ñanemokyreʼỹ jajerovia hag̃ua Jehováre, ha jaheja haʼe togueraha ñandéve ñane mbaʼe pohýi.

Jehová oguerúta peteĩ múndo pyahu irréino rupive. Umi Salmo heta hendápe omombeʼu mbaʼépa ojapóta pe Mesías ág̃a ogoverna vove. Pór ehémplo Salmo 2-pe heʼi ko Mburuvicha ohunditaha umi tetã opuʼãvape hese. Salmo 72 heʼi oipeʼataha ñembyahýi, inhustísia ha opa mbaʼe vai. Ha Salmo 46:9 katu ohechauka Irréino rupive Ñandejára oipeʼapataha umi ñorairõ, ha omyanguʼitaha umi armaménto. Avei ñandepyʼarory jaleévo Salmo 37, upépe heʼi pe múndo pyahúpe ndaiporimoʼãveimaha hénte ñaña, ha umi hekojojáva oikotaha pyʼaguapýpe opa ára g̃uarã.

(Oñeguenohẽ Salmos kuatiañeʼẽgui.)