Ehecha oĩva pype

Ehecha menú secundario

Ehecha oĩva pype

Testígo de Jehová

guarani

La Biblia: Mbaʼépa oikuaauka ñandéve?

 PÁRTE 15

Daniel ohecha umi mbaʼe oikótava

Daniel ohecha umi mbaʼe oikótava

Daniel ohai heta profesía oñeʼẽva Ñandejára rréinore ha oikuaaukáva arakaʼépa oúta pe Mesías. Ciro ojagarra Babilonia

DANIÉLPE ningo ojeguerahavaʼekue Babilóniape Jerusalén oñehundi mboyvemi. Upépe umi hudío oiko tembiguáirõ péro umi Babiloniaygua ndojopyetereíri hendivekuéra. Ñandejára akóinte oipytyvõ Daniélpe oĩ aja mombyry ivállegui. Peteĩ jey oguenohẽ chupe leonguéra apytégui, ha avei ohechauka chupe umi mbaʼe oikótava tenonderãme. Daniel omeʼẽ heta profesía iñimportantéva oñeʼẽva Ñandejára goviérnore ha pe Mesías rehe.

Arakaʼépa og̃uahẽta pe Mesías. Arakaʼépa og̃uahẽvaʼerã ‘Ñandejára Rembiporavo’? Daniélpe oñemombeʼu oñemeʼẽtaha peteĩ permíso oñemopuʼã jey hag̃ua Jerusalén murálla, ha upe guive ohasavaʼerãha 69 semána. Káda semána ningo oreko 7 día ha káda día orrepresenta 1 áño. Upéicharõ 69 semána heʼise 483 áño. Pe permíso oñemopuʼã jey hag̃ua umi murálla oñemeʼẽ áño 455-pe a.C., upe guive jaipapáramo 483 áño ñag̃uahẽ áño 29-pe. Mbaʼépa oikorakaʼe upérõ? Upe rire jahecháta. Daniélpe ojekuaauka avei Ñandejára Remimbou ‘ojejukataha’ omopotĩ hag̃ua yvyporakuéra rembiapo vaikue (Daniel 9:24-26).

Pe Mesías oisãmbyhýta yvágape. Peteĩ visiónpe Daniel ohecha pe Mesías “ojoguáva yvypórape” oñembojaha Ñandejára rendápe yvágape. Upépe Jehová omeʼẽ chupe ‘puʼaka ha teko mimbipa oporosãmbyhy hag̃ua’ tapia g̃uarã. Upéi Daniélpe ojekuaauka oĩtaha omoirũva pe rréipe ogoverna hag̃ua. Koʼãva haʼe hína Ñandejára Yvatetegua rembiguái (Daniel 7:13, 14, 27).

Pe rréino ohundipaitéta umi goviérno yvy ape arigua. Pe rréi Babiloniaygua Nabucodonosor ohecha iképe peteĩ mbaʼe ombopyʼatarovaitéva chupe. Upémarõ Ñandejára oipytyvõ Daniélpe omyesakã hag̃ua chupe mbaʼépa heʼise. Nabucodonosor ohecha peteĩ taʼanga guasu iñakã ojejapóva órogui, ipytiʼa ha ijyva plátagui. Hye ha ikuárto ojejapo kóvregui, hetyma iérrogui ha ipy katu iérro ha ñaiʼũgui. Upéi ohecha peteĩ sérrogui osẽha peteĩ ita ha oúva ojejoso pe taʼanga pýre ha oity omyanguʼipaite. Daniel heʼi pe taʼanga akã orrepresentaha Babilóniape, umi ótra párte katu orrepresenta ambue tetã guasu ojupítava Babilonia rendaguépe. Daniel omombeʼu Ñandejára rréino ohundipaitetaha entéro goviérno oĩva ko yvy ape ári. Upéva oikóta ogoverna tiémpope pe orrepresentáva pe taʼanga pykue. Upéi Jehová goviérno oisãmbyhýta opa ára g̃uarã (Daniel kapítulo 2).

Umi proféta heʼi haguéicha Ciro ojagarra Babilonia. Upérõ Daniel oikove gueteri. Ha umi hudío oiko rire 70 áño Babilóniape oho jey hetãme. Heta mburuvicha, saserdóte ha proféta ojeroviáva Jehováre omoakã chupekuéra omopuʼã jey hag̃ua Jerusalén ha itémplo. Péro mbaʼépa oiko ohasa rire umi 483 áño Daniel oñeʼẽ hague?

(Oñeguenohẽ Daniel kuatiañeʼẽgui.)