Ehecha oĩva pype

Ehecha menú secundario

Ehecha oĩva pype

Testígo de Jehová

guarani

La Biblia: Mbaʼépa oikuaauka ñandéve?

 PÁRTE 2

Oñemosẽ chupekuéra pe hardíngui

Oñemosẽ chupekuéra pe hardíngui

Peteĩ ánhel aña omboliga Adán ha Évape opuʼã hag̃ua Ñandejárare. Oñepyrũ pekádo ha ñemano

OJAPO mboyve yvyporakuérape Ñandejára ojapo umi ánhelpe. Peteĩva opuʼã hese ha ombotavy Évape hoʼu hag̃ua pe yva ndovaleivaʼekue hoʼu. Ko ánhel upéi héra Satanás térã Aña Ruvicha.

Peteĩ mbói rupive Satanás heʼi Évape Ñandejára káusare ndorekoiha hikuái heta mbaʼe porã ha nomanomoʼãiha hoʼúramo pe yva. Ha ivaiveha katu heʼi Ñandejára ijapuha. Satanás omoporãmbaite voi chupekuéra, heʼi naiñeʼẽrendúiramo Ñandejárape oiko porãitereitaha, oikuaáta opa mbaʼe ha ikatúta ojapo ojaposéva. Péro tuichaiterei ombotavy mokõivévape, ha péicha oñepyrũ la japu. Kóicha Satanás heʼi Ñandejára nogovernaporãiha, ojopyetereiha yvyporakuérandi ha jaiko porãvetaha heseʼỹ.

Eva ogueroviaite Satanáspe ha upévare hoʼu pe yva. Upéi omeʼẽ iménape ha haʼe hoʼu avei. Haʼetéramo jepe vyroreínte la ojapóva, añetehápe opuʼã hikuái Ñandejárare. Haʼekuéra oikuaa porã péicha omboykeha Ijapoharépe, omeʼẽvaʼekue chupekuéra opa mbaʼe porã.

‘Haʼe opyrũta ne akãre ha nde katu reisuʼúta chupe ipytápe.’ (Génesis 3:15)

Upévare Ñandejára okastiga chupekuéra. Opromete Hemimbou ohunditaha Satanáspe, ha upévape oñehenói Ñemoñare. Upéi heʼi Adán ha Eva omanotaha, péro imbaʼeporãgui oheja raẽ chupekuéra taifamília. Upéicharõ, mbaʼe iporãvapa ikatu ohupyty ifamiliare? Jehová heʼi Hemimbou oipeʼataha opa mbaʼe vai oikóva ituvakuéra opuʼã haguére Ñandejárare. Péro, mávapa hína Ñandejára Remimbou ha mbaʼépa ojapóta? Upéva mbeguekatúpe oñemyesakã ohóvo la Biblia rupive.

Ipahápe Ñandejára omosẽ pe hardíngui Adán ha Évape. Ha koʼág̃a haʼekuéra ombaʼapo jejopy vaʼerã ohupyty hag̃ua hemikotevẽ. Upe rire Eva imemby ha ombohéra Caín. Upéi hetave ifamília, ijapytépe Abel ha Set, ha ifamiliarégui ou Noé.

(Oñeguenohẽ Génesis kapítulo 3-5, ha Revelación [Apocalipsis] 12:9-gui.)