Jehová ombou 10 plága Egipto ári, ha Moisés oguenohẽ upégui umi Israelguápe. Upéi Moisés rupive Ñandejára omeʼẽ iléi

UMI Israelgua heta áñore oiko porã Egíptope, ha oñemboheta hikuái. Upéi ojupi peteĩ faraón ndoikuaáiva Josépe ha ipyʼahatãitereíva. Ohechávo hetaitereiha umi Israelgua, oguereko chupekuéra tembiguáiramo ha ojopy hendivekuéra. Ha heʼi avei ojepoi hag̃ua rrío Nílope entéro mitãkuimbaʼe onaséva. Upévare peteĩ kuña Israelgua omoĩ imemby peteĩ kanástope ha omokañy takuára apytépe. Faraón rajy otopa pe mitã, ombohéra Moisés ha omongakuaa imembyramoguáicha ipalásiope.

Orekórõ guare 40 áño Moisés ohecha mbaʼéichapa peteĩ Egiptoygua ojahéi peteĩ Israelguáre. Haʼe odefende pe Israelguápe, upéva hoʼa vai chupe ha upévare ohómante oiko mombyry. Orekópe 80 áño Ñandejára omondo jey chupe Egíptope ojerure hag̃ua faraónpe opoi hag̃ua Israélgui.

Faraón ni mbaʼevéicharõ ndopoiséi chuguikuéra, upémarõ Ñandejára ombou 10 plága upe tetã ári. Og̃uahẽ mboyve umi plága Moisés oho pe faraón rendápe jahecha ndohejáipa oho umi Israelgua. Péro haʼe oñemombaʼeguasu ha nohenduséi Jehovápe. Pe plága diezhápe Ñandejára ombou peteĩ ánhel ojuka hag̃ua entéro taʼýra ypykuépe. Jehová omanda umi Israelguápe omoĩ hag̃ua ovecha ruguy hokẽ márkore, ha umi ojapovaʼekue añoite ojesalva pe ánhelgui. Upéi umi Israelgua oñembyaty káda áño ogueromanduʼa hag̃ua pe Páskua.

Omano rire faraón raʼy ypykue, haʼe heʼi Moisés ha umi Israelguápe osẽ hag̃ua Egíptogui. Ha pyaʼe porã ombyatypa hikuái ikosakuéra ha oho. Upe riremínte faraón ombyasy opoi haguére chuguikuéra ha oho hapykuéri isoldadokuéra reheve. Umi Israelgua og̃uahẽvo már Rójope haʼete ndorekovéimava moõpa ohóta. Péro Jehová ombojaʼo pe már ha umi hénte ohasa upérupi. Umi Egiptoygua ojepoi hapykuerikuéra ha upépe Ñandejára oity hiʼarikuéra pe y ha ojahogapaite faraón ha umi soldádo.

Tiémpo rire umi Israelgua opyta sérro Sinaí ypýpe ha upépe Jehová ojapo hendivekuéra peteĩ kompromíso. Moisés rupive Ñandejára omeʼẽ chupekuéra iléi ikatu hag̃uáicha osẽ porã opa mbaʼe ojapóvape. Jehová heʼi oñangarekotaha umi Israelguáre iñeʼẽrendu aja hikuái, ha ojevaléta hesekuéra ohupytyka hag̃ua opa tetãme heta mbaʼe porã.

Upéicharamo jepe oĩ heta ndojeroviáiva Jehováre. Ha upévare Ñandejára oheja chupekuéra okorrepa rei desiértore 40 áño pukukue. Upéi Moisés omoĩ hendaguépe peteĩ kuimbaʼe hekoporãva hérava Josué. Upe rire umi Israelgua ikatúma oike pe yvy Ñandejára oprometevaʼekue Abrahánpe.

(Oñeguenohẽ Éxodo; Levítico; Números; Deuteronomio; Salmo 136:10-15; ha Hechos 7:17-36-gui.)