Ehecha oĩva pype

Ehecha menú secundario

Ehecha oĩva pype

Testígo de Jehová

guarani

La Biblia: Mbaʼépa oikuaauka ñandéve?

 PÁRTE 3

Ojesalva hikuái pe ama guasúgui

Ojesalva hikuái pe ama guasúgui

Ñandejára ohundipa umi iñañávape, ha osalva Noé ha ifamíliape

HETAVÉVO ohóvo umi hénte oparupiete ojejapo ivaíva. Upérõ oiméne Enoc añoite hekoporã ko yvy ape ári. Upévare Jehová heʼi chupe omomarandu hag̃ua opavavépe umi iñañáva oñehundipataha. Péro avavépe ndoúi ni ndohói Enoc heʼíva ha umi hénte iñañave rei. Umi ánhel jepe opuʼã Jehováre, ha ou ko yvy ape ári oñembohete kuimbaʼéicha oiko hag̃ua kuñanguérandi. Upéi koʼã kuña imemby chuguikuéra una partída kuimbaʼe ndetuichapa jepéva. Koʼãva iñañaiterei, oñorairõ ha ojapo sarambi oparupiete. Oiménepa Ñandejára ombyasyete ohechávo koʼã mbaʼe vaieta.

Enoc omano rire oĩ jey peteĩ kuimbaʼe ipyʼaporãva, hérava Noé. Haʼe ha ifamília oñehaʼã oiko Ñandejára oipotaháicha. Upéi Jehová heʼi Noépe oguerutaha peteĩ ama guasu ohundi hag̃ua umi iñañávape. Ha heʼi chupe ojesalva hag̃ua ifamiliakuérandi ojapovaʼerãha peteĩ árka. Haʼekuéra oikevaʼerã upépe ha avei omoingevaʼerã mymbakuérape ojesalva hag̃ua. Noé iñeʼẽrendu Ñandejárape ha ombaʼapo 50 áño rupi ojapo hag̃ua pe árka. Ha upe aja opredika avei hapichakuérape (2 Pedro 2:5). Heʼi chupekuéra outaha peteĩ ama guasu, péro avave ndogueroviái chupe. Upéi Noé ha ifamília oike pe árkape umi mymbakuérandi, Ñandejára omboty pe okẽ ha oñepyrũ oky.

Oky charara 40 día pukukue ha pe y ojahoʼipa ko yvy. Umi iñañáva katu ni hapykuere ndopytái. Heta mése rire pe y oguejy ohóvo ha pe árka opyta peteĩ montáña ruʼãme. Un áño rire ae Noé ha ifamília osẽ upégui. Noé ovyʼaitereígui ojuka peteĩ mymba ha oikuaveʼẽ Jehovápe. Haʼe katu opromete arakaʼeve nomboumoʼãveimaha peteĩ ama guasu ohundi hag̃ua opa mbaʼe. Ha ohechauka hag̃ua okumplitaha heʼivaʼekue omoĩ peteĩ árko íris pe árare. Péicha umi ohecháva guive imanduʼáta Jehová promésare.

Pe ama guasu rire Ñandejára oheja yvyporakuérape hoʼu soʼo, péro heʼi ani hag̃ua hoʼu tuguy. Heʼi avei chupekuéra taisarambi opárupi ko yvy ape ári. Péro peteĩ kuimbaʼe hérava Nemrod opuʼã Ñandejárare, ha omboliga umi héntepe opyta hag̃ua oiko peteĩ hendápente ha oñepyrũ ojapo hikuái peteĩ tórre yvate. Ani hag̃ua omohuʼã upe tembiapo Jehová okambiapa chuguikuéra iñeʼẽ ha noñontendevéi ha isarambipa hikuái upégui. Upe táva upe rire oñehenói Babel térã Babilonia.

(Oñeguenohẽ Génesis kapítulo 6-11 ha Judas 14, 15-gui.)