Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

Ohechauka pe tape, omboʼe pe añetegua, omeʼẽ jeikove

Ohechauka pe tape, omboʼe pe añetegua, omeʼẽ jeikove

Oiméne nde rehenduse notísia iporãva. Upévare katuete revyʼáta reikuaávo oĩha peichagua notísia ndéve ha avei umi rehayhúvape g̃uarã.

Koʼã notísia iporãva oĩ la Bíbliape ha ojapóma heta tiémpo ojeskrivi hague. Ñandejára Jehová, ko univérso Apohare, oskrivika vaʼekue la Biblia. Ko lívrope oñeñeʼẽta cuatro lívro oĩvare la Bíbliape: Mateo, Marcos, Lucas ha Juan. Koʼã lívro oreko umi kuimbaʼe oskrivi vaʼekue réra, ha jatopa pype notísia porã enterovépe g̃uarã.

Heta persóna ohenói koʼã cuatro lívrope “umi cuatro Evangelio”. Koʼãvape oñemombeʼu umi notísia porã oñeʼẽva Jesúsre, ha ojekuaauka ñandéve Ñandejára ñandesalvataha Jesús rupive. Koʼã lívro omombeʼu avei Jesús ovendesitaha opa árare enterove ojeroviávape hese, oiko vove chugui Rréi pe Rréino yvagapeguápe (Marcos 10:17, 30; 13:13).

¿MBAʼÉREPA OJESKRIVI CUATRO LÍVRO OÑEʼẼVA JESÚSRE?

Oiméne reñeporandúmava mbaʼérepa Ñandejára oskrivika cuatro lívro oñeʼẽva Jesúsre ha avei umi mbaʼe omboʼe vaʼekuére.

Ikatu jaʼe ñanepytyvõha heta mbaʼépe jaguereko haguére cuatro lívro voi omombeʼúva Jesús heʼi ha ojapo vaʼekue. Ñantende porã hag̃ua upéva, ñapensamína cuatro kuimbaʼe oĩha peteĩ mboʼehára ifamosoitereíva ypýpe. Peteĩva oĩ hína pe mboʼehára renondépe, ha haʼe peteĩ impuésto kovraha. Ótro oĩva ideréchape katu haʼe peteĩ doktór. Pe kuimbaʼe oĩva ijiskiérda gotyo haʼe hína peteĩ peskadór, ha pe mboʼehára amigoite. Ha pe ótro oĩva tapykue gotyove katu la imitãvéva, ha haʼe oñatende hína opa mbaʼe oikóvare. Káda uno koʼã kuimbaʼe ojesareko umi mbaʼe ointeresavévare chupekuéra. Upévare omombeʼútarõ hikuái umi mbaʼe omboʼéva ha ojapóva pe mboʼehára, káda uno oñeʼẽta diferénte detállere ha nomombeʼumoʼãi hikuái peteĩchapa umi mbaʼe oikóva. Péro ñambojoapypárõ umi detálle ha jaraha enkuénta mbaʼéichapa opensa káda uno, jaikuaáta hetave mbaʼe pe mboʼeháragui. Ko ehémplo ohechauka mbaʼéichapa ikatu ñañevenefisia jareko haguére cuatro lívro omombeʼúva mbaʼépa ojapo vaʼekue Jesús, pe Mboʼehára Iñimportantevéva.

Jasegimína ñañeʼẽ pe ehémplore. Pe impuésto kovraha oipota umi hudío ontende umi mbaʼe  pe mboʼehára oexplikáva, upévare omombeʼu umi enseñánsa ha umi mbaʼe oikóva, oipytyvõ hag̃ua umi hudíope. Pe doktór katu omombeʼuve mbaʼéichapa oñemonguera umi hasývape ha umi ojevaleʼỹvape ijehe. Haʼe ndeʼíri opa mbaʼe pe impuésto kovraha omombeʼuháicha, ha oĩ avei detálle haʼe nomensionáiva. Pe mboʼehára amígo oñekonsentra iñenseñansakuérare ha otrata lájare umi héntepe. Ha pe imitãvéva katu orresumi umi mbaʼe ohecháva. Upéicharõ jepe, káda uno omombeʼu umi mbaʼe oiko hagueichaite. Ko ehémplo ohechauka ideprovechoitereiha umi cuatro lívro omombeʼúva Jesús rembiasakue. Koʼãva ñanepytyvõ jaikuaa porãve hag̃ua mbaʼeichagua persónapa raʼe haʼe, mbaʼe mbaʼépa ojapo ha mbaʼépa omboʼe.

Heta hénte ojepokuaa heʼi “evangelio de Mateo” térã “evangelio de Juan”. Ha upéva ningo noĩvaíri, pórke káda uno omombeʼu “marandu porã oñeʼẽva Jesucristo rehe” (Marcos 1:1). Upéicharõ jepe, ndahaʼéi oĩva cuatro marandu porã diferénte, síno umi cuatro lívro ñanepytyvõ ñantende hag̃ua pe marandu porã oñeʼẽva Jesúsre.

Heta persóna ostudiáva Ñandejára Ñeʼẽ olee ha okompara Mateo, Marcos, Lucas ha Juan, ha ohecha moõpa oho ojuehe umi mbaʼe oñemombeʼúva. Amo áño 170-perupi, pe eskritór sírio hérava Taciano ojapo vaʼekue upéva. Haʼe orrekonose koʼã cuatro lívro ou hague Ñandejáragui, ha omombeʼuha opa mbaʼe oiko hagueichaite. Upévare oskrivi vaʼekue pe Diatesarón, ha omoĩ pype kompletoite umi mbaʼe Jesús ojapo vaʼekue ha oñemombeʼúva Mateo, Marcos, Lucas ha Juánpe.

Ko lívro hérava Jesús ohechauka pe tape, omboʼe pe añetegua, omeʼẽ jeikove, ojejapo avei péicha. Péro ijexaktove ha oreko káda detálle Jesús rembiasakuégui. Upéva ojehupyty pórke koʼág̃a ñantende porãvéma mbaʼéichapa oñekumpli umi profesía ha ehémplo Jesús oipuru vaʼekue. Ñantende porã rupi koʼã mbaʼe, hesakãvéma ñandéve mbaʼérepa haʼe heʼi térã ojapo vaʼekue heta mbaʼe, ha mbaʼe órdenpepa oiko raʼe káda suséso. Avei umi arkeólogo odeskuvri heta mbaʼe ñanepytyvõva ñantendeve hag̃ua umi eskritórpe, ha umi detálle omeʼẽva hikuái. Ndaikatúi ningo jaaseguraite mbaʼe órdenpepa oiko vaʼekue káda suséso. Péro ko lívro omombeʼu Jesús rembiasakue ñantende porã hag̃ua, ha ikatu hag̃uáicha ñañeimahina umi mbaʼe oiko hagueichaite.

OHECHAUKA PE TAPE, OMBOʼE PE AÑETEGUA, OMEʼẼ JEIKOVE

Relee vove ko lívro ha rejepyʼamongetávo hese, eñehaʼãmbaitékena ehecha mbaʼe mensáhepa oreko ndéve ha umi rehayhúvape g̃uarã. Nemanduʼa vaʼerã Jesucristo heʼi hague apóstol Tomáspe: “Che hína pe tape, pe añetegua, ha pe jeikove. Che rupive añoite ikatu oñeg̃uahẽ pe Túva rendápe” (Juan 14:6).

Ko lívro nepytyvõta rehechakuaa hag̃ua Jesús añetehápe ohechaukaha ñandéve “pe tape”. Haʼe rupive añoite ikatu ñañemoag̃ui Jehováre pe orasión rupive. Avei, ñande ningo pekadór, ha Jesús rupivémante ikatu ñaime porã jey Ñandejára renondépe (Juan 16:23; Romanos 5:8). Upéicharõ, Jesús rupive añoitémante ikatu oiko ñandehegui Ñandejára amígo.

Jesús omboʼe “pe añetegua”. Ha ohechauka upéva opa mbaʼe heʼi ha ojapóvape. Avei, “opa mbaʼe Ñandejára oprometéva oñekumpli Jesús rupive” (2 Corintios 1:20; Juan 1:14). Umi profesía ñanepytyvõ ñantende hag̃ua Ñandejára omeʼẽ hague chupe peteĩ rresponsavilida tuicháva, ikatu hag̃uáicha oñekumpli hembipota (Apocalipsis 19:10).

Jesucristo avei omeʼẽ “jeikove”. Haʼe omano ñanderehehápe ha opaga ñande pekádore ontregávo hekove perfékto ha huguy. Péicha omeʼẽ ñandéve posivilida jahupyty hag̃ua ‘jeikove añeteguáva’ térã ‘opaveʼỹva’ (1 Timoteo 6:12, 19; Efesios 1:7; 1 Juan 1:7). Jesús avei omeʼẽta “jeikove” umi persóna omano vaʼekuépe. Omoingovéta hetaiterei héntepe, ha omeʼẽta chupekuéra oportunida oiko hag̃ua pe paraísope opa árare (Juan 5:28, 29).

Ñandejára okumpli hembipota Jesús rupive, ha enterove ñamombaʼeterei vaʼerã upéva. Hiʼãite revyʼa reaprendevévo heta mbaʼe chugui, pórke Jesús ohechauka “pe tape”, omboʼe “pe añetegua” ha omeʼẽ “jeikove”.