Ehecha oĩva pype

Ehecha oĩva pype

 KAPÍTULO 69

¿Mávapa ituvakuéra? ¿Abrahán térãpa pe Aña?

¿Mávapa ituvakuéra? ¿Abrahán térãpa pe Aña?

JUAN 8:37-59

  • UMI HUDÍO HEʼI ABRAHÁN HAʼEHA ITUVAKUÉRA

  • JESÚS OĨMA VAʼEKUE ABRAHÁN MBOYVE

Pe Enrramáda Guýpe Jeiko Arete aja, Jesús osegi oporomboʼe Jerusalénpe. Unos kuánto hudío oĩva upépe heʼi chupe: “Oréngo Abrahán ñemoñare ha arakaʼeve ndoroikóiva avave rembiguáiramo”. Jesús osẽ heʼi chupekuéra: “Che aikuaa peẽ haʼeha Abrahán ñemoñare, péro peẽ chejukase ndaperoviáigui che amboʼéva. Che amombeʼu opa mbaʼe ahecha vaʼekue aĩ aja che Túvandi, ha peẽ katu pejapo pende ru heʼíva peẽme” (Juan 8:33, 37, 38).

Jesús ohechaukasénte Itúva idiferenteha umi hudío túvagui. Péro haʼekuéra nontendéi upéva, ha osẽ heʼi: “Ore ru ningo Abrahán” (Juan 8:39; Isaías 41:8). Abrahán haʼe vaʼekue Ñandejára amígo, ha umi hudío katu idesendiénte. Upévare opensa hikuái ojeroviaha Ñandejárare, ojerovia haguéicha Abrahán.

Péro Jesús oityvyro chupekuéra heʼívo: “Oimérõ peẽ Abrahán raʼy, pejapóna Abrahán ojapo vaʼekue”. Jaikuaaháicha, umi taʼýra ohaʼanga jepi itúvape. Upévare Jesús heʼi: “Péro koʼág̃a chejukase, hiʼarive che amombeʼu peẽme pe añetegua Ñandejára oikuaauka vaʼekue chéve. Abrahán ndojapói vaʼekue upéva”. Ha orrepeti jey: “Peẽ pejapo pende ru ojapóva” (Juan 8:39-41).

Umi hudío nontendéi gueteri mbaʼépa Jesús heʼise. Haʼekuéra osegínte opensa haʼeha Abrahán raʼy tee, upévare heʼi: “Ore ndahaʼéi avave raʼy okára, ore Ru ningo peteĩnte, upéva hína Ñandejára”. Péro, ¿añete piko Ñandejára Ituvakuéra? Jesús heʼi: “Ñandejára haʼérire pende Ru, peẽ cherayhu vaʼerãmoʼã. Ñandejára chembou rupi koʼápe aime, che ndajúi chejehegui rei, síno Haʼe chembou”. Upéi Jesús oporandu peteĩ mbaʼe, ha haʼe voi orresponde: “¿Mbaʼérepa ndapeikuaái pe haʼéva peẽme? Ndaikatúigui pehendu che ñeʼẽ” (Juan 8:41-43).

Jesús ontendekase kuri umi hudíope mbaʼépa oikóta hesekuéra orrechasa haguére chupe. Péro koʼág̃a derechoite heʼi chupekuéra: “Pende ru ningo pe Aña ha peẽ pejapose haʼe oipotáva”. ¿Mbaʼeichagua persónapa hína pe Aña? Jesús omombeʼu: “Haʼe oporojukáma vaʼekue ha omboyke pe añetegua”. Upéi heʼi: “Pe oúva Ñandejáragui ohendu Ñandejára heʼíva, péro peẽ ndapejúi Ñandejáragui, upévare napehendúi” (Juan 8:44, 47).

Umi hudío orrenegaiterei Jesús okondena haguére chupekuéra, ha heʼi: “Ndareíriko roʼe nderehe samaritáno ha reñendemoniaha”. Haʼekuéra heʼívo hese “samaritáno”, ohechauka odespresiaha chupe. Péro Jesús nopenái hesekuéra ha osegi oñeʼẽ: “Che nañendemoniái, amombaʼe guei che Rúpe, ha peẽ katu cheapoʼi”. Añetehápe ningo ivaieterei la umi hudío heʼíva Jesúsre. Upévare haʼe heʼi: “Oĩramo ojapóva che haʼéva nomanomoʼãi arakaʼeve”. Jesús ndeʼiséi kuri ijapostolkuéra ha umi osegíva chupe arakaʼeve nomanomoʼãiha. Upéva rangue, haʼe ohechauka idisipulokuéra noñehundimoʼãiha pára siémpre. Chupekuéra núnka ndohupytymoʼãi pe “ñemano mokõiha”. Pe ñemano mokõiha heʼise pe persóna ndorresusitamoʼãveimaha (Juan 8:48-51; Apocalipsis 21:8).

Umi hudío ontende vai la Jesús heʼíva. Haʼekuéra oimoʼã umi osegíva Jesúspe núnka nomanomoʼãiha. Upévare heʼi hikuái: “Koʼág̃a roikuaa porãma reñendemoniaha, Abrahán omano ha umi proféta avei, péro nde reiko ere: ‘Pe ojapóva che haʼéva nomanomoʼãi arakaʼeve’. ¿Nde guaʼu piko ndetuichave hína ore ru Abrahángui? [...] ¿Máva mbaʼe piko nde upéicharõ?” (Juan 8:52, 53).

Jesús ningo heta vésema ohechauka haʼeha pe Mesías. Upéicharõ jepe, omombeʼu rangue chupekuéra direktoite mávapa haʼe, koʼág̃a heʼi: “Che aikóramo añembotuicha, upéva ndovaléi mbaʼeverã. Che Ru ningo pe chembotuicháva, upe peẽ pejéva haʼeha pende Jára. Péro peẽ ndapeikuaái  chupe, che katu aikuaa chupe. Ha haʼéramo ndaikuaaiha, aikótama chejapu peẽicha” (Juan 8:54, 55).

Upéi Jesús oñeʼẽ jey Abrahán rehe ha heʼi: “Pende ru Abrahán ovyʼaiterei vaʼekue ohaʼarõgui ohecha che ára, ha ohechávo ovyʼa”. Abrahán ningo ojeroviaiterei vaʼekue Jehová promésare ha vyʼápe ohaʼarõ og̃uahẽ pe Mesías. Umi hudío ndogueroviái Jesúspe ha ombohovái: “Ndéngo neʼĩra reguereko cincuenta áño, ¿ha piko rehecháta Abrahánpe?”. Jesús heʼi: “Añetehápe haʼe peẽme: Abrahán onase mboyve che aiméma vaʼekue”. Upéicha Jesús ohechauka haʼe oĩma hague yvágape, ha ou mboyve ko yvy ape ári haʼe vaʼekue peteĩ ánhel ipoderósova (Juan 8:56-58).

Umi hudío ipochy ohendúvo Jesús heʼiha oĩma hague Abrahán mboyve, ha ojagarra hikuái ita ojapi hag̃ua chupe. Péro Jesús okañy chuguikuéra ha ndojehúi chupe mbaʼeve.