Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 78

¡Eñatende porãkena tembiguái jeroviaha!

¡Eñatende porãkena tembiguái jeroviaha!

LUCAS 12:35-59

  • PE TEMBIGUÁI JEROVIAHA OÑATENDE PORÃ VAʼERÃ

  • JESÚS HEʼI OU HAGUE OPORODIVIDI

Jesús omyesakã umi “ovechakuéra mbovymi” añoite oĩtaha pe Rréino yvagapeguápe (Lucas 12:32). Ha upéva hína peteĩ priviléhio tuichaitereíva. Upévare Jesús ohechauka mbaʼéicha vaʼerãpa peteĩ persóna, ikatu hag̃uáicha orresivi upe rrekompénsa pe Rréinope.

Jesús omombeʼu idisipulokuérape haʼe ou jeytaha, ha tekotevẽha oĩ preparádo hikuái. Haʼe heʼi: “Peñemonde, pejeprepara ha pemyendy pene lámpara. Peime vaʼerã oĩháicha umi kuimbaʼe ohaʼarõva ipatrónpe og̃uahẽ kasamientohágui. Ikatu hag̃uáicha haʼe ombotávo pe okẽ, pyaʼeterei oavri chupe hikuái. ¡Ovyʼa vaʼerã umi tembiguái, og̃uahẽrõ ipatrón ha otopa hesekuéra oñatendeha hína!” (Lucas 12:35-37).

Umi disípulo pyaʼe ohechakuaa mbaʼépa Jesús omboʼese chupekuéra. Haʼe ohechauka koʼã tembiguái oĩtaha preparádo ha alérta ou jey vove ipatrón. Jesús heʼi: “[Pe patrón] og̃uahẽrõ tárdema pyhare, térã las doce riréma, ha otopa chupekuéra péicha, ¡ovyʼa vaʼerã hikuái!” (Lucas 12:38).

Jesús ndahaʼéi omombeʼúnteva mbaʼépa oñehaʼarõ peteĩ tembiguáigui. Haʼe oipota idisipulokuéra ontende mávapa pe patrón térã pe Yvypóra Raʼy. Upévare heʼi chupekuéra: “Peẽ avei, akóinteke pejeprepara, cháke peteĩ óra peimoʼãʼỹve jave oúta pe Yvypóra Raʼy” (Lucas 12:40). Og̃uahẽta peteĩ tiémpo Jesús ou jey vaʼerãha. Upévare haʼe oipota isegidorkuéra, espesiálmente umi “ovecha mbovymi” oĩ preparádo.

Pedro ontende porãse mbaʼépa heʼise Jesús, upévare oporandu chupe: “Che Ruvicha, ¿oréve g̃uarãnte piko remoĩ ko ehémplo, térãpa enterovépe g̃uarã?”. Jesús ombohovái rangue chupe derechoite, heʼi: “¿Mávapa hína pe tembiguái jeroviaha ha iñarandúva, pe Ijára omoĩtava oñangareko hag̃ua hogayguakuérare, omeʼẽ hag̃ua chupekuéra hembiʼurã hiʼoraitépe? ¡Ovyʼaite upe tembiguái, og̃uahẽrõ pe Ijára ha otopa hese ojapoha hína upéicha! Añetehápe haʼe peẽme: Opa mbaʼe orekóva omoĩta ipoguýpe” (Lucas 12:41-44).

Koʼã mokõi ehémplope, “pe patrón” ha ‘pe jára’ orrepresenta Jesúspe, haʼéva hína pe Yvypóra Raʼy. Ha pe “tembiguái jeroviaha” katu haʼe hína mbovymi kuimbaʼe ojeelehíva umi unhído apytégui, térã umi “ovechakuéra mbovymi” apytégui (Lucas 12:32). Jesús heʼi avei koʼã kuimbaʼe ‘oñangarekotaha hogayguakuérare’ térã isegidorkuérare, ha ‘omeʼẽtaha chupekuéra hembiʼurã hiʼoraitépe’. Jesús omboʼe ha omombarete idisipulokuéra jerovia. Upéicha rupi Pedro ha umi ótro disípulo ontende Jesús heʼíva oñekumplitaha amo gotyove, ou vove pe Yvypóra Raʼy. Og̃uahẽ vove upe tiémpo, “pe tembiguái” omeʼẽta “hogayguakuérape”, térã Jesús segidorkuérape, aliménto omombaretétava ijerovia.

Jesús heʼi avei ótra kósa ohechauka hag̃ua mbaʼérepa idisipulokuéra tekotevẽ oĩ alérta ha preparádo. Haʼe oikuaa haʼekuéra ojedeskuidáramo, ikatuha mbeguekatúpe ou ikaigue, ha ikatu voi oñemoĩ umi ótro iñermánore. Jesús heʼi: “Péro pe tembiguái oñepyrũramo heʼi ipyʼapýpe: ‘Che jára ndoumoʼãi gueteri’, ha oñepyrũramo ombyepoti umi ótro tembiguáipe, kuimbaʼe ha kuñáva, avei okaru, omboyʼu ha okaʼu, upéi peteĩ día ha peteĩ óra haʼe oimoʼãʼỹve jave oúta Ijára, okastiga pohýita upe tembiguáipe ha omombóta chupe umi ojeroviaʼỹva oĩháme” (Lucas 12:45, 46).

Jesús heʼi avei: “Che aju amyendy hag̃ua tata ko yvy ape ári”. Ha siertoite upéva, pórke haʼe ohechauka oĩ vaiha heta enseñánsa ha kostúmbre ojesegíva. Upéicha rupi umi hénte  ojedividipa, ha umi oñehaʼarõva oĩ unído jepe oiko vaipa. Jesús heʼi: “Túva oiko vaíta taʼýrandi, ha taʼýra itúva ndive. Sy oiko vaíta imembykuña ndive, ha imembykuña isy ndive. Suégra oiko vaíta inuérandi, ha nuéra isuégra ndive” (Lucas 12:49, 53).

Jesús heʼi koʼã mbaʼe espesiálmente idisipulokuérape. Upéi haʼe oñepyrũ oñeʼẽ jey umi héntepe. La majoría koʼã persóna oĩva upépe norrekonoseséi Jesús haʼeha pe Mesías, upévare haʼe heʼi chupekuéra: “Peẽ pehecha jave opuʼã pe arai poniénteguio, pejéma: ‘Ou hína peteĩ torménta’, ha upeichaite oiko. Ha pehechávo oipeju viénto sur katu peje: ‘Hakuetereíta hína’, ha upéicha oiko. Peẽ tekove rovamokõi, pemañávo pe ára rehe, peikuaáma tiémpo vaítapa, térãpa tiémpo porãta. Upéicharõ, ¿mbaʼéicha piko ndapehechakuaái mbaʼépa heʼise umi mbaʼe oikóva koʼág̃a?” (Lucas 12:54-56). Añetehápe ningo haʼekuéra noĩri preparádo.