Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 79

Mbaʼérepa oñehundímante vaʼerã hikuái

Mbaʼérepa oñehundímante vaʼerã hikuái

LUCAS 13:1-21

  • JESÚS OMBOʼE PETEĨ LEKSIÓN MOKÕI DESGRÁSIA OIKO VAʼEKUÉGUI

  • OMONGUERA PETEĨ KUÑÁME PETEĨ SÁBADO

Jesús hetáma oñehaʼã umi héntere, jahecha nopensáipa hikuái mbaʼéichapa oĩ hína Ñandejára renondépe. Ha koʼág̃a oreko jey ótra oportunida ojapo hag̃ua upéva, oñeʼẽvo umi oñembyatývape pe fariséo róga renondépe.

Upépe umi hénte imanduʼa peteĩ desgrásiare. Omombeʼu Jesúspe “Pilato [pe governadór rrománo] ojuka hague umi galiléope, oikuaveʼẽrõ guare hikuái sakrifísio Ñandejárape” (Lucas 13:1). ¿Mbaʼérepa imanduʼa hikuái upévare?

Amalisia umi galiléope ojejuka kuri umi hudío ojapórõ guare peteĩ protésta tuicháva Pilato kóntrape. Haʼe ningo oipuru kuri pe pláta oñemeʼẽva kontrivusionrã pe témplope, ikatu hag̃uáicha ojapouka peteĩ kanál oñemog̃uahẽ hag̃ua y Jerusalénpe. Oiméne Pilato okonsegi raʼe pe pláta umi autorida templopegua oipytyvõ rupi chupe. Umi hénte omombeʼúva koʼã mbaʼe Jesúspe, oiméne opensa umi galiléo omano hague hembiapo vai haguére. Péro Jesús nopensái haʼekuéraicha.

Upévare oporandu: “¿Peẽ piko peimoʼã oikoha hesekuéra upéva iñañave haguére entéro umi ótro galiléogui?”. Jesús voi orresponde ndahaʼéi hague upéicha. Upémarõ haʼe oipuru kómo ehémplo upe suséso ohechauka hag̃ua umi hudíope mbaʼépa ikatu oiko hesekuéra: “Añetehápe haʼe peẽme, napeñarrepentíriramo enterove peẽ upéicha avei peñehundíta” (Lucas 13:2, 3). Upéi Jesús imanduʼa avei ótra desgrásiare, posívlemente oiko ramovéva, amalisia ojejapórõ guare upe kanál ojegueraha hag̃ua y Jerusalénpe.

Haʼe oporandu: “¿Térãpa peimoʼã avei umi dieciocho omano vaʼekue, hoʼárõ guare hiʼarikuéra pe tórre oĩva Siloámpe, hetaveha ipekádo entéro umi Jerusalénpe oikóvagui?” (Lucas 13:4). Umi hénte opensa koʼã persóna omano hague ojapo haguére ivaíva, péro Jesús ohechauka ndahaʼeiha upéicha. Haʼe oikuaa porã “umi mbaʼe oñehaʼarõʼỹva” ikatuha ohupyty oimeraẽvape, ha upévare oikoha avei umi desgrásia (Eclesiastés 9:11, NM). Umi hénte oaprende vaʼerã peteĩ mbaʼe iñimportánteva koʼã susésogui. Jesús heʼi jey chupekuéra: “Añetehápe haʼe peẽme, napeñarrepentíriramo, enterove peẽ upéicha avei peñehundíta” (Lucas 13:5). Péro, ¿mbaʼérepa Jesús orrepeti chupekuéra ko konsého?

Jesús opensa pe tiémpo hembývare chupe ko yvy ape ári, ha omoĩ peteĩ ehémplo omyesakã porãve hag̃ua mbaʼe situasiónpepa oĩ hikuái. Haʼe heʼi: “Peteĩ kuimbaʼe oguereko iparraltýpe peteĩ ígo máta, upéi ou ohecha hiʼámapa, péro ndotopái mbaʼeve. Upémarõ heʼi pe parraltýpe ombaʼapóvape: ‘Tres añoháma aju ahecha hiʼámapa ko ígo, ha ndatopái mbaʼevete hese. ¡Eikytĩ ñandéve! Maʼerã piko ahejáta ombyai rei ko yvy’. Haʼe ombohovái chupe: ‘Che patrón, ehejamína avei ko áñope, tajoʼo pe imáta jerére ha tamoĩ chupe avóno. Ha upe rire hiʼáramo, oĩ porã, péro ndahiʼái jeýramo reikytĩta’” (Lucas 13:6-9).

Ojapóma tres áño rasa Jesús oñehaʼã hague oipytyvõ umi hudíope oñemoag̃ui hag̃ua Ñandejárare. Péro saʼieterei oĩ umi orresponde porãva, ha mbovymíguinte oiko idisípulo. Añetehápe hetáma Jesús opredika chupekuéra, ha ombaʼapo jejopy. Haʼete ku ojoʼóva pe ígo máta jerére ha oavona jey jeýva. Upévare osẽ opredika ha oporomboʼe Judea ha Peréarupi. ¡Péro maʼerã rei piko! Saʼimínte oĩ umi hudío ojeroviáva. La majoría noñarrepentiséi ha upévare oñehundíta hikuái.

 Upéi, peteĩ sábadope, ojekuaa porãvéntema la majoría umi hudío ndojeroviaiha. Jesús oporomboʼe hína peteĩ sinagógape, ha upépe ohecha peteĩ kuña 18 áñorema oikóva ikarapã oĩ rupi peteĩ demónio poguýpe, ha upéva oreko asyeterei anga chupe. Jesús oiporiahuvereko ko kuñáme, ha heʼi: “Koʼág̃a repytuʼúma ne mbaʼasýgui” (Lucas 13:12). Jesús omoĩ ipo hiʼári, ha upepete pe kuña oñenderesa ha oñepyrũ ombotuicha Ñandejárape.

Ohechávo upéva, pe mburuvicha sinagogapegua orrenegaiterei, ha heʼi: “Jaguereko ningo seis día ñambaʼapo hag̃ua, umi díape peju vaʼerã pekuera hag̃ua, péro ani peju sabadokue” (Lucas 13:14). Pe mburuvicha nonegái Jesús orekoha podér oporomonguera hag̃ua, péro omongavaju umi héntepe ou haguére sabadokue okuera hag̃ua. Upémarõ Jesús heʼi: “Peẽ tekove rovamokõi. ¿Peẽ piko ndapejorái pene rymba tóro ha pene rymba vúrro, ha pegueraha pemboyʼu sabadokue? Ko kuña ningo Abrahán familiare ha Satanás oguereko chupe dieciocho áñorema ñapytĩháme. ¿Mbaʼégui piko upéicharõ ndovalemoʼãi ñamosãso chupe sábadope?” (Lucas 13:15, 16).

Umi oñemoĩva Jesúsre otĩeterei opytávo, péro umi hénte ovyʼaiterei umi mbaʼe porãita haʼe ojapóvare. Upéi Jesús omombeʼu mokõi ehémplo oñeʼẽva pe Rréinore. Umi ehémplo haʼe omombeʼúma kuri peteĩ kanóa guive mar de Galiléape (Mateo 13:31-33; Lucas 13:18-21).