Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 81

“Che ha pe Túva ningo peteĩnte”

“Che ha pe Túva ningo peteĩnte”

JUAN 10:22-42

  • “CHE HA PE TÚVA NINGO PETEĨNTE”

  • JESÚS OHECHAUKA NDAHAʼEIHA ÑANDEJÁRA

Jesús ou Jerusalénpe ogueromanduʼa hag̃ua pe arete hérava Hanuká (térã pe témplo oñeinagura jey hague). Ojapo mas de 100 áño pe rréi Siriagua hérava Antíoco IV Epífanes, ojagarra hague Jerusalén ha ojapouka peteĩ altár Ñandejára témplope, pe altár guasu ári. Péro tiémpo rire, peteĩ saserdóte hudío raʼykuéra orrekupera Jerusalén ha oinagura jey pe témplo. Upe guive, ko arete ojefesteha káda 25 de kislev, pe mes ñane kalendáriope hoʼáva noviembre pahárupi ha diciembre oñepyrũvo.

Koʼág̃a inviérno ha hoʼysã. Jesús katu oguata oikóvo pe témplope, pe lugár héravape Salomón rogaguy. Upépe ou ojere hese unos kuánto hudío ha oñepyrũ oporandu chupe: “¿Mbaʼére piko neremombeʼúi gueteri oréve mávapa nde? Ere porãna oréve oiméramo nde haʼe hína pe Cristo” (Juan 10:22-24). ¿Mbaʼépa Jesús ombohovái chupekuéra? Haʼe heʼi: “Haʼémango peẽme ha upéicharamo jepe ndapegueroviái”. Jesús ningo ndeʼíri chupekuéra derechoite haʼeha pe Cristo, heʼíma haguéicha pe samaritánape pe póso kóstape (Juan 4:25, 26). Péro añetehápe ohechaukáma kuri chupekuéra mávapa haʼe, heʼírõ guare: “Abrahán onase mboyve che aiméma vaʼekue” (Juan 8:58).

Jesús oipota umi hénte ohechakuaa umi mbaʼe haʼe ojapóva okumpliha umi profesía oñeʼẽva pe Crístore. Péicha haʼekuéra ijeheguiete opilláta haʼeha pe Cristo. Upévare voi Jesús heʼíma vaʼekue idisipulokuérape ani hag̃ua omombeʼu avavépe haʼeha pe Mesías. Péro koʼág̃a haʼe heʼi umi hudío añáme: “Umi mbaʼe ajapóva che Túva rérape, umíva ohechauka mávapa che. Péro [...] peẽ ndapegueroviái” (Juan 10:25, 26).

¿Mbaʼére piko umi hénte ndogueroviái Jesús haʼeha pe Cristo? Haʼe heʼi: “Peẽ ndahaʼéigui che ovecha, ndapegueroviái. Che ovechakuéra ohendu che ñeʼẽ, che aikuaa chupekuéra ha haʼekuéra ou che rapykuéri. Che ameʼẽta chupekuéra jeikove opaveʼỹva, arakaʼeve noñehundimoʼãi hikuái ha avave ndoipeʼamoʼãi che poguýgui. Umi ovecha che Ru omeʼẽva chéve tuichave opaite mbaʼégui”. Upéi Jesús ohechauka mbaʼeichaitépa haʼe ha Itúva oĩ unído, heʼívo: “Che ha pe Túva ningo peteĩnte” (Juan 10:26-30). Jesús oĩ ko yvy ári ha Itúva katu yvágape. Upévare jaʼekuaa haʼe ndeʼiséi hague mokõivéva haʼeha peteĩ persónante, síno heʼise mokõivéva opensaha peteĩcha ha oĩha peteĩ ñeʼẽme.

Umi hudíope omorrenegaiterei la Jesús heʼíva, ha ojagarra hikuái ita ojapi hag̃ua chupe. Péro Jesús ndokyhyjéi chuguikuéra, ha heʼi: “Ajapo pene renondépe heta mbaʼe porã pe Túva omandágui chéve. ¿Mavaite umi mbaʼe porã ajapo vaʼekuérepa chejapise?”. Umi hudío heʼi: “Ndorojapimoʼãi rejapo haguére mbaʼe porã, síno retaky rupi Ñandejárare. Ndéngo [...] ere ndejehe peteĩ ñandejaraha” (Juan 10:31-33). Péro Jesús ningo arakaʼeve ndeʼíriva haʼeha peteĩ dios. Upéicharõ, ¿mbaʼére piko umi hudío oakusa chupe?

Pórke Jesús oñeʼẽrõ guare ‘ijovechakuérare’, heʼi kuri: “Che ameʼẽta chupekuéra jeikove opaveʼỹva”. Péro umi hudío opensa Ñandejára añoite orekoha podér omeʼẽ hag̃ua jeikove opaveʼỹva. Añetehápe ningo ndaipóri yvypóra ikatúva opromete upéva (Juan 10:28). Péro umi hudío naimanduʼái Jesús heʼi hague opavave rovake Itúva omeʼẽha chupe autorida térã podér.

Jesús ohechaukase oakusa reiha chupe hikuái, upévare imanduʼávo Salmo 82:6 heʼívare, ombohovái chupekuéra: “Pende Léipe Ñandejára heʼi: ‘Peẽ hína ñandejára’, ¿ajépa? Upéicharõ, haʼe voi ohenói ‘ñandejára’ umi kuimbaʼépe, jepe Iñeʼẽme oñekondena chupekuéra. [...] ¿Mbaʼéicha piko upéicharõ pejéta atakyha Ñandejárare haʼe haguére: ‘Che hína Ñandejára Raʼy’?” (Juan 10:34-36).

Añetehápe ningo Ñandejára Ñeʼẽme voi oñehenói jepi “ñandejára” umi hués umánope iñinhústoramo jepe. Upéicharõ, ¿mbaʼére piko okritika hikuái Jesúspe heʼi haguére haʼeha “Ñandejára Raʼy”? Upéi Jesús heʼi: “Ndajapóiramo che Ru rembipota, ani pejerovia cherehe. Péro ajapóramo upéva katu, ndapejeroviáiramo jepe cherehe, pegueroviána umi mbaʼe ajapóva, ikatu hag̃uáicha peikuaa ha akóinte pentende porãve pe Túva oĩha chendive ha che aĩha pe Túvandi” (Juan 10:37, 38).

Jesús heʼipa rire koʼã mbaʼe, umi hudío oñehaʼã ojagarra chupe, péro haʼe odipara ha okañy chuguikuéra. Upéi haʼe osẽ Jerusaléngui, ohasa rrío Jordán ha oho pe lugár Juan el Bautista oñepyrũ hague gotyo oporovautisa, ojapóma cuatro áñorupi. Amalisia pe lugár opyta sur gotyo mar de Galiléagui.

Upépe heta hénte ou Jesús rendápe ha heʼi hikuái: “Añetehápe Juan ndojapói ni peteĩ milágro, péro siertoite raʼe opa mbaʼe heʼi vaʼekue ko kuimbaʼére” (Juan 10:41). Upévare heta hudío upepegua oñepyrũ ojerovia hese.