Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 71

Umi fariséo omongyhyjese pe kuimbaʼe isiégo vaʼekuépe

Umi fariséo omongyhyjese pe kuimbaʼe isiégo vaʼekuépe

JUAN 9:19-41

  • UMI FARISÉO OMONGYHYJESE PE KUIMBAʼE ISIÉGO VAʼEKUÉPE

  • UMI LÍDER RRELIHIÓSO LA ‘ISIÉGOVA’

Umi fariséo ndoaseptaséi Jesús omonguera hague pe kuimbaʼe onase vaʼekuépe siégo, upévare ohenoika ituvakuérape. Pe kuimbaʼe tuvakuéra oikuaa porã heʼíramo hikuái ojeroviaha Jesúsre, ‘oñemosẽtaha sinagógagui’ (Juan 9:22). Oikóramo upéva, umi ótro hudío ndojeheʼamoʼãvéima hesekuéra, ha ikatu voi ojeperhudika ekonómikamente.

Umi fariséo oporandu: “¿Kóva piko pende raʼy, peẽ pejéva onase hague siégo? ¿Mbaʼéicha rupi piko koʼág̃a ohecha?”. Haʼekuéra ombohovái: “Roikuaa kóva haʼeha ore raʼy ha onase hague siégo. Péro ndoroikuaái mbaʼéichapa koʼág̃a ohecha térã mávapa omonguera chupe”. Katuete pe kuimbaʼe omombeʼupáne raʼe ituvakuérape la oiko vaʼekue, péro haʼekuéra naiprovlemaséi umi fariséondi, upévare heʼi: “Peporandúna chupe, haʼéngo okakuaapáma ha haʼeñóma oñedefende vaʼerã” (Juan 9:19-21).

Upémarõ umi fariséo ohenói jey pe kuimbaʼe isiégo vaʼekuépe, ha omongyhyjese chupe hikuái heʼívo orekoha pruéva ohechaukáva Jesús haʼeha peteĩ mbaʼe vai apoha. Umi fariséo heʼi pe kuimbaʼépe: “Ani ndejapu Ñandejára renondépe; ore roikuaa pe kuimbaʼe pekadorha”. Pe siegokue osẽ heʼi chupekuéra: “Che ndaikuaái oimépa pekadór; péro peteĩ mbaʼe aikuaa porã, yma ndahechái vaʼekue ha koʼág̃a katu ikatúma ahecha” (Juan 9:24, 25).

Umi fariséo oporandu jey: “¿Mbaʼépa ojapo nderehe? ¿Mbaʼéichapa nemonguera?”. Pe kuimbaʼe ndokyhyjéi, ha ombohovái: “Haʼémango peẽme ha napehendúi. ¿Mbaʼére piko peipota haʼe jey peẽme? ¿Térã piko peẽ peikose avei idisípuloramo?”. Umi fariséo ipochyeterei, upévare heʼi chupe: “Nde ningo pe kuimbaʼe disípulo, péro ore Moisés disípulo hína. Ore roikuaa Ñandejára oñeʼẽ hague Moiséspe, péro pe kuimbaʼe ndoroikuaái moõguipa ou” (Juan 9:26-29).

Pe siegokue ndogueroviaséi la ohendúva. Upévare heʼi: “Eʼa, peẽ ndapeikuaái moõguipa ou, ha hiʼarive haʼe chemonguera”. Upéi pe kuimbaʼe osẽ heʼi mbaʼeichagua persónapepa Ñandejára ohendu ha oguerohory. Haʼe heʼi: “Jaikuaa Ñandejára nohenduiha umi pekadórpe, péro oĩramo okyhyjéva Ñandejáragui ha ojapóva hembipota, chupe ohendu. Arakaʼeve noñehendúiva avave omonguera hague peteĩ onase guive isiégo vaʼekuépe”. Pe siegokue heʼi jey: “Ko kuimbaʼe ndahaʼéirire Ñandejára remimbou, ndaikatúi vaʼerãmoʼã ojapo mbaʼevete” (Juan 9:30-33).

Pe kuimbaʼe ningo siertoguánte la heʼíva umi fariséope, ha ojurumbotyete voi chupekuéra. Upévare umi fariséo oñepyrũ ojaʼo vaipa chupe, ha heʼi: “Nde nerenyhẽ pekádogui renase guive, ¿ha piko oremboʼéta?”. ¡Ha omosẽ chupe hikuái! (Juan 9:34.)

Jesús oikuaávo la oikóva oho pe kuimbaʼe rendápe, ha heʼi chupe: “¿Nde piko rejerovia pe Yvypóra Raʼýre?”. Pe kuimbaʼe heʼi: “Karai, eréna chéve mávapa ajerovia hag̃ua hese”. Jesús heʼi chupe: “Rehecháma ningo chupe, che hína upéva, pe oñeʼẽva nendive” (Juan 9:35-37).

Upépe pe kuimbaʼe heʼi Jesúspe: “Ajerovia hese Karai”. Upéi oñesũ henondépe, ha Jesús heʼi chupe: “Che aju ko múndope Ñandejára ohusga hag̃ua ko múndope, umi ohechaʼỹva ohecha hag̃ua ha umi ohecháva opyta hag̃ua siégo” (Juan 9:38, 39).

Umi fariséo ohendúva chupe oikuaa porã haʼekuéra ndahaʼeiha siégo. Péro, ¿ogiápa hikuái umi héntepe ikatu hag̃uáicha oñemoag̃ui Ñandejárare? Haʼekuéra oñedefendeségui oporandu guaʼu Jesúspe: “Oréngo ndahaʼéi siégo avei, ¿ajépa?”. Jesús heʼi chupekuéra: “Peẽ siégorire ndaperekói vaʼerãmoʼã pekádo. Péro peje rupi: ‘Ore rohecha’, noñeperdonamoʼãi pende pekádo” (Juan 9:40, 41). Umi fariséo omboʼe pe Léi umi Israelguápe, péro haʼekuéra orrechasa pe Mesíaspe. Upévare Jesús heʼi noñeperdonamoʼãiha chupekuéra ipekádo.