Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 20

Ojapo pe segundo milágro oĩ aja Canápe

Ojapo pe segundo milágro oĩ aja Canápe

MARCOS 1:14, 15 LUCAS 4:14, 15 JUAN 4:43-54

  • JESÚS OPREDIKA ‘ÑANDEJÁRA RRÉINO HIʼAG̃UIMBAITEMAHA’

  • OMONGUERA PETEĨ MITÃRUSÚPE MOMBYRY GUIVE

Jesús opyta dos díarupi Samáriape. Haʼe ningo ohasa kuri heta tiémpo Judéape ha opredika meme upérupi. Péro koʼág̃a oho Galilea gotyo, pe lugár okakuaa hague. Jesús ndohói ivállepe ikatu hag̃uáicha opytuʼu, síno opredika hag̃ua. Haʼe oikuaa naentéroi orresivi porãtaha chupe upépe ha heʼi voi “ndaiporiha proféta ojeguerohorýva ivállepe” (Juan 4:44). Idisipulokuéra katu, omoirũ rangue chupe, oho ifamiliakuéra rendápe ha oñepyrũ jey ombaʼapo jepiveguáicha.

¿Mbaʼe mensáhepa opredika Jesús? Haʼe heʼi: “Ñandejára Rréino hiʼag̃uimbaitéma. Peñarrepentíke ha pejerovia umi marandu porãre” (Marcos 1:15). ¿Mbaʼépa ojapo umi hénte ohendu rire ko mensáhe? Heta persóna Galileagua orresivi porã Jesúspe ha omombaʼe chupe. Péro haʼekuéra ndojapói upéva ojeroviáguinte umi marandu porãre, síno oĩ rupi ijapytepekuéra heta ohecha vaʼekue umi milágro haʼe ojapóva oĩrõ guare Jerusalénpe, pe Páskua aja (Juan 2:23).

Galilea ningo tuichaiterei, ha amalisia Jesús oñepyrũ opredika Canápe, pe lugár okonverti haguépe y vínope peteĩ kasamientohápe. Koʼág̃a Jesús ou segunda ves upe puévlope. Ha oĩ aja upépe oikuaa peteĩ mitãrusu hasyete ha omanombotamaha. Pe mitãrusu túva ningo peteĩ kuimbaʼe ombaʼapóva rréi Herodes Antípaspe g̃uarã, pe rréi upéi ojukaukátava Juan el Bautístape. Pe karai ohendu Jesús ou hague Judéagui Canápe. Upémarõ ojapo peteĩ viáhe puku hóga guive, oĩva Capernáumpe ha ou Canápe Jesús rendápe. Otopávo hese ojerure asyeterei chupe: “Karai, jahána chendive ani hag̃ua omano che raʼymi” (Juan 4:49).

Oiméne pe karai oñesorprende Jesús heʼívo chupe: “Tereho katu, oime nde raʼy okueráma” (Juan 4:50). Pe kuimbaʼe orovia Jesús heʼíva ha osẽ oho jey hógape. Tapére ohug̃uaitĩma chupe hembiguaikuéra omombeʼu hag̃ua itaʼýra okueramaha. Upémarõ pe karai “oporandu chupekuéra mbaʼe órapa okuera raʼe”, oikuaa hag̃ua mbaʼépa la oikóva.

Haʼekuéra heʼi: “Kuehe asaje, la únarupi opoi chugui pe akãnundu” (Juan 4:52).

Pe karai ohechakuaa upe oraitépe Jesús heʼi hague chupe: “Oime nde raʼy okueráma”. Ikatu ningo jaʼe ko karai ipláta hague, pórke oreko hembiguaikuéra. Oiko rire ko milágro, ko karaígui ha entéro hogayguakuéragui oiko Jesús disípulo.

Jahechaháicha, Jesús dos veseháma ojapo milágro Canápe. Ñepyrũrã, okonverti y vínope, ha upéi omonguera pe mitãrusúpe, oĩramo jepe 26 kilómetrorupi chugui. Ko segundo milágro ndahaʼéi peteĩ milágro reínte, síno ohechauka haʼe ou jeymaha Galiléape oipytyvõ hag̃ua umi héntepe. Añetehápe, Jesús haʼe hína pe proféta Ñandejára oguerohorýva. Péro, ¿arakaʼe pevépa ‘ojeguerohorýta chupe ivállepe’?

Koʼág̃a Jesús ohótama Nazarétpe, pe siuda onase haguépe. ¿Mbaʼépa ohaʼarõ chupe upépe?