Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Jesús ohechauka pe tape, omboʼe pe añetegua, omeʼẽ jeikove

 KAPÍTULO 59

¿Mávapa pe Yvypóra Raʼy?

¿Mávapa pe Yvypóra Raʼy?

MATEO 16:13-27 MARCOS 8:22-38 LUCAS 9:18-26

  • JESÚS OMONGUERA PETEĨ ISIÉGOVAPE

  • PEDRO ORRESIVI UMI LLÁVE OJEIKE HAG̃UA PE RRÉINOPE

  • JESÚS HEʼI OMANOTAHA HA ORRESUSITATAHA

Jesús ha idisipulokuéra og̃uahẽ Betsáidape. Umi hénte ogueru Jesúspe peteĩ kuimbaʼe isiégova, ha ojerure asy chupe hikuái omongueramínte hag̃ua pe kuimbaʼépe.

Jesús ojagarra pe kuimbaʼépe ipógui ha oguenohẽ chupe pe puévlogui. Upéi ondyvu hesáre ha oporandu chupe: “¿Mbaʼépa rehecha?”. Haʼe heʼi: “Haʼeténgo yvyramáta, péro oiméne kuimbaʼe hína ajeve la oguata” (Marcos 8:23, 24). Upémaramo Jesús opoko jey hesáre, upépe okueraite ha ohecha porãma. Upéi Jesús omondo pe kuimbaʼépe hógape ha onkarga chupe ani hag̃ua oike pe puévlope.

Upe rire Jesús ha idisipulokuéra oho nórte gotyo, Cesarea de Filipo sónare. Og̃uahẽ hag̃ua upépe oguata vaʼerã hikuái 40 kilómetrorupi, hiʼarive arriváda memete. Ko lugár opyta peteĩ alturahápe (350 métro de altúra). Upe guive iporãiterei pe vísta. Noréste gotyo ojekuaa pe sérro Hermón, ha pe niéve ojahoʼi pe huʼã. Oiméne Jesús ha idisipulokuéra dos díarupi oviaha og̃uahẽ hag̃ua upépe.

Peteĩ moméntope pe viáhe aja, Jesús oñemohaʼeño oñemboʼe hag̃ua. Upérõ ofalta nueve térã diez mésentema omano hag̃ua, ha ojepyʼapy isegidorkuérare. Oĩma heta oheja reíva chupe, ótro katu nontendéi la oikóva térã oñedesepsiona. Oime vaʼerã oikuaase hikuái mbaʼérepa Jesús ndohejái kuri umi hénte omoĩ chupe irreikuerarã, ha mbaʼérepa ndohechaukái peteĩ señál ikatu hag̃uáicha entéro oikuaa mávapa añetehápe haʼe.

Umi disípulo oho Jesús rendápe, ha Jesús oporandu chupekuéra: “¿Mbaʼépa heʼi umi hénte pe Yvypóra Raʼy rehe?”. Haʼekuéra orresponde: “Oĩ heʼíva Juan el Bautista; ótro katu heʼi Elías, ha oĩ avei heʼíva Jeremías, térã peteĩ proféta”. Umi hénte opensa Jesús haʼeha peteĩva koʼã kuimbaʼe omano vaʼekue, ha orresusita jeynteha. Péro haʼe oikuaase mbaʼépa opensa idisipulokuéra, upévare oporandu chupekuéra: “¿Péro peẽ mbaʼe peje, máva piko che hína?”. Simón Pedro osẽ heʼi: “Nde hína pe Cristo, Ñandejára oikovéva Raʼy” (Mateo 16:13-16).

Jesús heʼi Pédrope ovyʼa vaʼerãha Ñandejára oikuaauka haguére chupe upéva, ha heʼi: “Che avei haʼe ndéve: Nde hína Pedro, ha ko ita guasu ári amopuʼãta che kongregasión, ha pe sepultúra ndaipuʼakamoʼãi hese”. ¿Mbaʼérepa Jesús heʼi upéva Pédrope? Pórke Jesús voi omoñepyrũta pe kongregasión ha ni pe ñemano ndaikatumoʼãi oreko préso umi oĩvape upe kongregasiónpe, osegíramo iñeʼẽrendu hikuái oĩ aja ko yvy ári. Upéi opromete Pédrope: “Che ameʼẽta ndéve umi lláve ojeike hag̃ua pe Rréino yvagapeguápe” (Mateo 16:18, 19).

Upéva ndeʼiséi Pedro iñimportanteveha umi ótro apóstolgui, térã haʼetaha pe simiénto oñemopuʼã hag̃ua pe kongregasión. Jesús hína pe ita guasu ha hiʼári oñemopuʼãta ikongregasión (1 Corintios 3:11; Efesios 2:20). Pédrope oñemeʼẽnte  mbohapy lláve ikatu hag̃uáicha omeʼẽ oportunida diferénte grúpo de persónape oike hag̃ua pe Rréino yvagapeguápe. Péicha haʼete oavrítava chupekuéra peteĩ okẽ.

Pedro oipuru pe primera lláve Pentekostés áño 33-pe. Upérõ omombeʼu mbaʼépa ojapo vaʼerã ojesalva hag̃ua umi hudío ha umi oikéva rrelihión hudíape. Upe riremínte oipuru pe segunda lláve oavrívo pe oportunida oike hag̃ua pe Rréinope umi samaritáno ojeroviávape. Ha áño 36-pe oipuru pe tercera lláve oavrívo pe oportunida umi tetã ambueguápe, tenondete Cornelio, ihénte ha iñamigokuérape (Hechos 2:37, 38; 8:14-17; 10:44-48).

Jesús osegi oñemongeta ijapostolkuérandi. Péro haʼekuéra oñeñandu vai, pórke Jesús heʼi hiʼag̃uimaha pe tiémpo haʼe ohasa asytaha ha omanotaha Jerusalénpe. Umi apóstol nontendéi oñemoingove jeytaha Jesúspe oiko hag̃ua yvágape, upévare Pedro omohaʼeño chupe ha heʼi: “Anivéna ere upéicha che Ruvicha, ejeporiahuverekomína nde avei. Ni mbaʼevéicharõ ndoikomoʼãi koʼã mbaʼe nderehe”. Jesús katu ojere Pédrogui ha heʼi chupe: “¡Eñemoĩ che atukupépe Satanás! Nde cherapejokose hína, nerepensáigui Ñandejára opensaháicha, repensa guei yvyporakuéraicha” (Mateo 16:22, 23).

Koʼág̃a Jesús ohenói umi ótra hénte omoirũvape chupekuéra, ha heʼi entéro osegiséva chupe ohasa asytaha. Jesús heʼi: “Oĩramo chemoirũséva, toñembyesarái ijehegui, tohupi ijapére ijyvyra pohýi ha tachemoirũ meme. Oimeraẽ osalvaséva hekove omanóta, péro oimeraẽ omanóva haʼe haguére che disípulo térã pe marandu porã rehehápe, ojesalváta” (Marcos 8:34, 35).

Añetehápe opavave omoirũva Jesúspe isakrifikádo ha ipyʼaguasu vaʼerã. Jesús heʼi: “Oimeraẽ oguerotĩva che ñeʼẽ, ha otĩva heʼi hag̃ua haʼeha che disípulo koʼã hénte aña ha oporomoakãratĩva apytépe, pe Yvypóra Raʼy avei otĩta heseve ág̃a og̃uahẽ vove Itúva rekomimbipa reheve umi ánhel marangatu ndive” (Marcos 8:38). Ág̃a Jesús ou vove, opagáta “peteĩteĩme hembiapokuére” (Mateo 16:27).